ವೇಳ್ ಆನಿ ವೆಳಾಚೊ ಮಹತ್ವ್

149

ವೇಳ್ ಆನಿ ವೆಳಾಚೊ ಮಹತ್ವ್ … ಹೆ ಚಾರ್ ಸಬ್ದ್ ಹಾಂವೆ ಬರಯ್ತ್ ಆಸ್ತಾನಾ ಆನಿ ವಾಚ್ಪ್ಯಾ ತುಂವೆ ಹೆ ಸಬ್ದ್ ವಾಚುನ್ ಆಸ್ತಾನಾ … ಆಮ್ಚಿಂ ದೋನ್ ತೀನ್ ಸೆಕುಂದಾಂ  ಪಾಶಾರ್ ಜಾವ್ನ್ ಗೆಲಿಂ ತೆಂ ಖಂಡಿತ್.  ಆನಿ ಪಾಶಾರ್ ಜಾವ್ನ್ ಗೆಲ್ಲಿಂ ಹಿಂ ದೋನ್ ತೀನ್ ಸೆಕುಂದಾಂ ಪರತ್ ಆಮ್ಕಾಂ ಜಾಯ್ ಮ್ಹಳ್ಯಾರ್, ಆಮ್ಕಾಂ ತಿಂ ಪರತ್ ಖಂಡಿತ್ ಮೆಳಾನಾಂತ್!

ಹ್ಯಾ ಸಂಸಾರಿಂ ಪಾಶಾರ್ ಜಾವ್ನ್ ಗೆಲ್ಲಿಂ ಸಬಾರ್ ಸಂಗ್ತಿಂ ಪರತ್ ಪಾಟಿಂ ಮೆಳ್ತಿತ್…ಪೂಣ್ ಏಕ್-ಪಾವ್ಟಿಂ ಪಾಶಾರ್ ಜಾವ್ನ್ ಗೆಲ್ಲೊ ವೇಳ್ ಮಾತ್ರ್ …ಖಂಡಿತ್ ಜಾವ್ನ್ ಆಮಿಂ ಪರತ್ ಪಾಟಿಂ ಜೊಡುಂಕ್ ಸಕ್ಚೆನಾಂವ್. ತ್ಯಾಚ್ಚ್ ಪರ್ಮಾಣೆಂ, ವೆಳಾಕ್ ಆಮ್ಕಾಂ ಧರ್ನ್ ದವರುಂಕ್‌ಯೀ ಜಾಯ್ನಾಂ. ವೇಳ್ ಆನಿ ವಾರೆಂ ಕೊಣಾಕ್‌ಚ್ಚ್ ರಾಕಾನಾಂತ್.

ಆಸಲ್ಯೊ ಗಜಾಲಿ, ವೆಳಾಚೊ ಸದುಪಯೋಗ್ ಕರ್ತೆಲ್ಯಾಕ್ ಮಾತ್ರ್ ಕಳಿತ್. ಸದುಪಯೋಗ್ ಕೆಲ್ಲ್ಯಾಕ್ ಪಾಶಾರ್ ಜಾಲ್ಲ್ಯಾ ವೆಳಾವಿಶಿಂ ಚುರ್ಚುರೆ ನಾಂತ್. ಪೂಣ್ ವೆಳಾಕ್ ದುರುಪಯೋಗ್ ಕೆಲ್ಲ್ಯಾಕ್ ಮಾತ್ರ್…ಹ್ಯಾವಿಶಿಂ ಚುರ್ಚರೆ ದೆದೆಸ್ಪೊ‍ರ್ಪಣ್ ಆಸ್ತಾ.

ವೇಳ್ ಕೊಣಾಕ್‌ಚ್ಚ್ ರಾಕೊನ್ ರಾವಾನಾ. ತೊ ಪಾಟಿಂ ಪಳೆನಾಸ್ತಾಂ, ಪಾಶಾರ್ ಜಾಯ್ತ್ ವೆತಾ. ವೆಳಾವಿಶಿಂ ಆಮಿಂ ಬೆಫಿಕೆರೆನ್ ಆಸ್ಚೆಂ, ‘ಆತಾಂ ನಾಕಾ ಉಪ್ರಾಂತ್ ಕರ್ಯಾಂ’ ಮ್ಹಣ್ ವೆಳಾ ಥಂಯ್ ಅಳ್ಸಾಯ್ ಕರ್ಚೆಂ, ಅಸಲ್ಯಾ ಸರ್ವ್ ಸಂಗ್ತಿಂ ವರ್ವಿಂ ಆಮಿಂ ಆಳ್ಶಿ ಜಾತಾಂವ್. ಆನಿ ಆಮ್ಚ್ಯಾ ಜಿವಿತಾಂತ್ ಯಶಸ್ವೀ ಜೊಡುಂಕ್ ಸಕಾ ನಾಸ್ತಾಂ … ಜಿವಿತಾಂತ್ ಆಮಿ ಜಾವ್ನ್ ಸಲ್ವೊಣಿಂ ಆಪ್ಣಾವ್ನ್ ಘೆತಾಂವ್. ಆನಿ ಆಮ್ಚಿ ತಿ ಅಳ್ಸಾಯ್ ಆಮ್ಕಾಂ ಮಾರೆಕಾರ್ ಜಾತಾ.

ಹ್ಯಾವರ್ವಿಂ ಆಮ್ಕಾಂಚ್ಚ್ ಆಮಿ ನಶ್ಟ್ ಕರ್ನ್ ಘೆತಾಂವ್. ಆಮ್ಚೆ ಥಂಯ್ ಆಸ್ಚಿಂ ತಾಲೆಂತಾಂ ಊರ್ಜಿತ್ ಜಾಂವ್ಚಾ ಬದ್ಲಾಕ್… ಆಮ್ಚ್ಯಾ ತಾಲೆಂತಾಂಚಾ ನಾಸಾಕ್ ಆಮಿಂಚ್ಚ್ ಕಾರಣ್ ಜಾತಾಂವ್.

‘ವೇಳ್ ವಿಭಾಡ್ ಕೆಲ್ಲೊ ಅಳ್ಶಿ ಜಾತಾ. ಅಳ್ಶಿ ಜಾಲ್ಲೊ ಭಿಕಾರಿ ಜಾತಾ’. ವೆಳಾವಿಶಿಂ ಅಳ್ಶಿ ಜಾವ್ನ್ ಆಸ್ಲೆಲೆ ಸಾಹಿತಿ, ರಾಜಕೀಯ್ ವೆಕ್ತಿ, ವಿಜ್ಞಾನಿ, ಧಾರ್ಮಿಕ್ ಮನಿಸ್… ಅಸಲೆ ಸರ್ವ್ ಸಂಪನ್ಮೂಲ್ ವೆಕ್ತಿ ತಾಂಚಿಂ ತಾಲೆಂತಾ ಹೊಗ್ಡಾವ್ನ್ , ತೆ ತಾಂಚ್ಯಾ ಜಿವಿತಾಂತ್ ಯಶಸ್ವಿ ಜೊಡ್ಚ್ಯಾಂತ್ ಸಲ್ವತಾತ್.

ವ್ಯಾಪಾರಿ, ಉದ್ಯಮಿ ಅಸಲೆ ವೆಕ್ತಿ… ವೆಳಾಚ್ಯಾ ದುರುಪಯೋಗಾ ವರ್ವಿಂ, ಚಡಾವತ್ ಖಂತಿನ್, ದುರ್ಬಳ್ಕಾಯೆಂತ್ ಖರ್ಗೊನ್ ಆಸ್ತಾತ್.

ವೆಳಾಚೊ ಸದುಪಯೋಗ್ ಕರಿನಾಸ್ಚೆ ಆಳ್ಶಿ ಮನಿಸ್… ತಾಂಚಾ ಜಿವಿತಾಂತ್ ಉದೆಲ್ಲ್ಯಾ ಸಮಸ್ಯಾಕ್ ಪರಿಹಾರ್ ಜೊಡುಂಕ್ ಪ್ರೇತನ್ ಕರಿನಾಸ್ತಾಂ, ಫಕತ್ತ್ ಖಂತ್ ಬೆಜಾರಾಯೆನ್‌ಚ್ ವೇಳ್ ಪಾಡ್ ಕರುನ್…ಆಪ್ಲ್ಯಾ ಜಿವಿತಾಂತ್ ಸಲ್ವಣಿ ಜೊಡ್ತಾತ್.

ವೆಳಾಚಿ ಪ್ರಜ್ಞಾ – ಮಹತ್ವ್ ನೆಣಾಂ ಆಸ್ಲೆಲೆ ತೆ, ಸಮಾಜೆಕ್ ಉಪ್ಕಾರಾಕ್ ಪಡಾನಾತ್ಲೆಲೆ ಸ್ವಾರ್ಥಿ ವೆಕ್ತಿ ಜಾತಾತ್, ತಶೆಂ ಆಪ್ಣಾಚ್ಯಾ ನಾಸಾಕ್ ತೆಚ್ಚ್ ಕಾರಾಣ್ ಜಾತಾತ್. ಪೂಣ್ ವೆಳಾಚೊ ಮಹತ್ವ್ ತಶೆಂ ತ್ಯಾವಿಶಿಂ ಪ್ರಜ್ಞಾ ಆಸ್ಲೆಲೆ ಚಡಾವತ್ ಜಣ್ ಸ್ವಾರ್ಥಿ ಜಾವ್ನ್ ಆಸಾನಾಂತ್.

ತಸಲೆ ವೆಕ್ತಿ ಸಮಾಜೆಂತ್ಲ್ಯಾ ಪಿಡೆಸ್ತಾಂ ಥಂಯ್, ಅವ್ಘಡಾಕ್ ಸಾಂಪಡ್ಲೆಲ್ಯಾಂ ಥಂಯ್, ಯಾ ಗರ್ಜೆವಂತಾಂಚಾ ಅನ್ವಾರ್ ಅಕಾಂತಾ ಥಂಯ್, ವೇಳ್ ಪಾಡ್ ಕರಿನಾಸ್ತಾಂ ಖಿಣಾನ್ ಸ್ಪಂಧಿತ್ ಜಾತಾತ್. ಆನಿ ಮನ್ಶಾ ಜೀವ್ ರಾಕ್ಟಾಂತ್, ತಾಂಚೆ ಜೀವಿತ್ ರೂಪಿತ್ ಕರ್ಚ್ಯಾಂತ್,  ಯಶಸ್ವೀ ಜಾತಾತ್. ಅಸಲ್ಯಾ ಕಾಲೆತೆಚೆ ಮನಿಸ್ ಮತಿ ಕುಡಿನ್ ಸುಡ್ಸುಡಾಯೆನ್ ಆಸೊನ್, ತೆ ಜಿವಿತಾಂತ್ ಶಾಂತ್ ಸಮಾಧಾನೆನ್ ತಶೆಂ ಭಲಾಯ್ಕೆಂತ್ ಜಿಯೆವ್ನ್ ಆಸ್ತಾತ್.

ವೆಳಾಚೊ ಸದುಪಯೋಗ್ ಕರುನ್ ಹರ್ಯೆಕ್ ಘಡಿ ಅಮೂಲ್ಯ್ ಮ್ಹಣ್ ಜಿವಿತಾಚಾ ಯಶಸ್ವೆಖಾತಿರ್ ಹರ್ ಪ್ರೇತನ್ ಕರುನ್ ಆಸ್ಲೆಲೆ ಕಿತ್ಲೆಶೆ ಜಣ್… ತಶೆಂ ಅಸಹಾಯೆಕ್ ದುಬ್ಳೆ ಯಾ ಮಧ್ಯಮ್ ವರ್ಗಾಚೆ ಮನಿಸ್…ವೆಳಾಕ್ ಮಹತ್ವ್ ದೀವ್ನ್, ಖಳಾನಾಸ್ತಾಂ ಕೆಲ್ಲೆಲ್ಯಾ ವಾವ್ರ್, ಪ್ರೇತನಾಚಾ ಪರಿಣಾಮಾವರ್ವಿಂ…ಸುರ್ವೆರ್ ತಾಂಚೆ ಥಂಯ್ ಲ್ಹಾನ್-ಲ್ಹಾನ್ ಬದ್ಲಾವಣ್ ಘಡುನ್ …

ಉಪ್ರಾಂತ್ ಹೆಂ ಅಶೆಂಚ್ಚ್ ಮುಂದರುನ್… ತಸಲೆ ವೆಕ್ತಿ, ಜಿವಿತಾಂತ್ ಯಶಸ್ವಿ ಜೊಡುನ್, ಅನ್ಕೂಲಸ್ತ್ ಜಾವ್ನ್ ಬದ್ಲಾತಾತ್. ಅಸಲೆ ಸಬಾರ್ ಜಿವಿತಾಂತ್ ಗ್ರೇಸ್ತ್ಕಾಯ್ ಆಪ್ಣಾವ್ನ್, ತ್ಯಾ ನಂತರ್ ಕಿತ್ಲೆಶೆ ಅಸಲೆ, ಕೊರೊಡೋಪತಿ ಜಾಲ್ಲೆ ಸಬಾರ್ ಧಾಕ್ಲೆ ಆಸಾತ್.

ವೆಳಾಕ್ … ಗ್ರೇಸ್ತ್ ದುಬ್ಳೆ, ಶಿಕ್ಪಿ ಅಶಿಕ್ಪಿ, ಜಾತ್ ಕಾತ್ ಮ್ಹಳ್ಳೆಂ ಭೇಧ್-ಭಾವ್ ನಾಂ. ವೇಳ್ ಸಕ್ಡಾಂಕೀ ಎಕ್-ಚ್ಚ್. ವೇಳ್ ತಾಂಚಿಂ ತಾಂಚಿ ಆಸ್ತ್. ತಿ ಎಕ್ಲ್ಯಾ ಥಾವ್ನ್ ಎಕ್ಲ್ಯಾನ್ ದಾವ್ಲಿ ಮಾರುನ್ ಅಪಹರ್ಸುಂಕ್ ಜಾಯ್ನಾಂ. ತಿ ಉಪಯೋಗ್ಸುಂಚಿ ಬರ‍್ಯಾನ್ ಯಾ ವಾಯ್ಟಾನ್ ತಿ ತಾಂಚಾ ತಾಂಚಾ ಸ್ವಾತಂತ್ರಾಕ್ ಸಂಭಂಧ್ ಜಾಲ್ಲಿ ತಸಲಿ.

ಆಮಿಂ ಬರ‍್ಯಾನ್ ವಾಪಾರ್ಲ್ಯಾರೀ ಯಾ ವೆಳಾವಿಶಿಂ ಅಲಕ್ಶಾ ಕೆಲ್ಯಾರೀ, ಆಮ್ಚೆಂ ಜಿವಿತ್… ಸೆಕುಂದಾಂ, ಮಿನುಟಾಂ, ಘಂಟೆ, ದೀಸ್, ಹಪ್ತೆ, ಮಹಿನೆ, ವರ್ಸಾಂನಿಂ ಆವ್ರತ್ ಜಾವ್ನ್ ಪಾಶಾರ್ ಜಾಯ್ತ್  ವೆತಾ. ಆನಿ ಹೊ ವೇಳ್ ಸದುಪಯೋಗ್ ಕೆಲ್ಯಾರ್ ಜಿವಿತಾಂತ್ ಯಶಸ್ವಿ, ಆನಿ ದುರಪಯೋಗ್ ಕೆಲೊ ತರ್ ಸಲ್ವೊಣಿ ಹೆಂ ಆಮಿ ಜೊಡುನ್ ಘೆತೆಲ್ಯಾಂವ್.

ವೆಳಾಕ್ ಆಮಿ ಪೈಶ್ಯಾಂಕ್ ಸರಿ ಕರ್ಯೆತ್. ತೆಂ ಬರ‍್ಯಾನ್‌ಯೀ ತಶೆಂ ವಾಯ್ಟಾನ್‌ಯೀ ವಿನಿಮಯ್ ಕರ್ಯೆತ್. ತ್ಯಾದೆಕುನ್ ‘ವೇಳ್’ ಏಕ್ ಅಮೂಲ್ಯ್ ವಸ್ತ್ ಜಾವ್ನಾಸಾ. ದೆಕುನ್ ಜಾಣಾರಿ, ಸಂಪನ್ಮೂಳ್ ವೆಕ್ತಿ, ವಿಜ್ನಾಂನಿಂ… ‘ವೇಳ್ ಏಕ್ ಮೊಲಾಧಿಕ್ ದಿರ್ವೆಂ’ ಮ್ಹಣ್ ಮ್ಹಣ್ತಾತ್.

ದೆಕುನ್ ಆಮಿ ಪ್ರಥಮ್ ಜಾವ್ನ್ ವೆಳಾಚೆಂ ಮೋಲ್ ಜಾಣಾಂ ಜಾಂವ್ಕ್ ಜಾಯ್. ವೆಳಾಚೆ ಮೋಲ್ ಆಮಿ …ಘರಾಂತ್ ಪಾಂಚ್ ಸ ಭುರ್ಗಿಂ ಆಸ್ಲೆಲ್ಯಾ ಎಕಾ ಆವಯ್-ಲಾಗಿಂ… ಘರ್ಚೆಂ ಕಾಮ್ ಕರುನ್ ಆಫಿಸಾಕ್ ಧಾಂವ್ಚಾ, ದಾದ್ಲ್ಯಾ ಬಾಯ್ಲಾಂಲಾಗಿಂ… ಕಾಮಾ ಥಳಾರ್ ಕಾಮ್ ಕರುನ್ ಕರುನ್, ಕಾಮ್ ಮುಗ್ದಾನಾತ್ಲೆಲ್ಯಾ ವೆಕ್ತಿಲಾಗಿಂ…ವಿಚಾರ್ ಕೆಲ್ಯಾರ್ ಸಾರ್ಕೆಂ ಕಳ್ತಾ.

ಸೆಕುಂದ್ ಮಿನುಟಾಂಚೆಂ ಮೋಲ್…ಥೊಡ್ಯಾಚ್ಚ್ ಆವ್ದೆನ್ ಬಸ್ಸ್ ಯಾ ರೈಲ್ ಚುಕ್ಲೆಲ್ಯಾ ಪಯ್ಣಾರ‍್ಯಾಲಾಗಿಂ…ಘಂಟ್ಯಾಚೆಂ ಮೋಲ್ ಎಕಾ ವೊರಾಭಿತರ್ ಎರೋಡ್ರಾಮಾಕ್ ಪಾವಾಜೆ  ಜಾಲ್ಲ್ಯಾ ಟ್ಯಾಕ್ಸಿ ಡ್ರೈವರಾಲಾಗಿಂ…ವಿಚಾರ್ ಕೆಲ್ಯಾರ್ ಕಳಿತ್ ಜಾತಾ.

ತ್ಯಾಚ್ಚ್ ಪರ್ಮಾಣೆಂ…ದಿಸಾಚೆಂ ಮೋಲ್, ದೀಸ್ ಕಾಮೆಲ್ಯಾಲಾಗಿಂ… ಹಪ್ತ್ಯಾಚೆಂ ಮೋಲ್…ಹಪ್ತಾಳೆಂ ಪತ್ರಾಚಾ ಸಂಪಾದಕಾ ಲಾಗಿಂ…ತಶೆಂಚ್ಚ್ ವರ್ಸಾಚೆಂ ಮೋಲ್…ಎಕಾ ವರ್ಸಾನ್ ಬಿಲ್ಡಿಂಗ್ ಬಾಂದೊನ್ ಮುಗ್ದಿಜಾಯ್ ಜಾಲ್ಲ್ಯಾ…ಎಕಾ ಬಾಂದ್ಪಾ ಕೊಂಟ್ರೆಕ್ಟರಾ ಲಾಗಿಂ, ವಿಚಾರ್ಶ್ಯಾತ್ ತರ್ ಕಳಿತ್ ಜಾತಾ.

ಆಮಿ ಆಮ್ಚೊ ವೇಳ್, ಬರೆಂ ನಿತಳ್ ಜಾಣ್ವಾಯೆ ಭರಿತ್ ವಾಚ್ಪಾಂ, ಟಿವಿ ಪ್ರೊಗ್ರಾಮಾಂ, ಇಂಟರ್ ನೆಟ್ಟ್, ವಾಪರುನ್…ನಿತಳ್ ಚತುರ್ ಚಿಂತ್ನಾಂನಿ, ಚುರುಕ್ ಚಟುವಟಿಕೆನ್ ಖರ್ಚುಂಕ್ ಜಾಯ್. ಹರ್ ಏಕ್ ಘಡಿ ವಿಬಾಡಿನಾಸ್ತಾಂ…ಸುಡ್ಸುಡಾಯೆನ್ ತಶೆಂ ನೈತಿಕ್ ಮೊಲಾಂನಿಂ ನೆಟವ್ನ್ ಗಳ್ಸುಂಕ್ ಜಾಯ್.

ಅಸಲೆಂ ನಿತಳ್ ಪ್ರಮಾಣಿಕ್ ಪರಿಗತ್ ಆಮ್ಚಾ ಥಂಯ್ ಆಮಿಂ ರುತಾ ಕರುನ್ ಆಮ್ಚೆಂ ಜೀವಿತ್ ಬಾಂದುನ್ ಹಾಡ್ತಾಂವ್ ತರ್… ತವಳ್ ಆಮ್ಚಾ ಜಿವಿತಾಂತ್, ಅಪಾಪಿಂಚ್ ಪೆಲ್ಯಾ ಥಂಯ್  ತಶೆಂ ಸಮಾಜೆ ಖಾತಿರ್ ವಾವ್ರ್ ಸೆವಾ ಕರ್ಚೆಂ, ತಶೆಂ ಹೆರಾಂಚ್ಯಾ ಗರ್ಜಾಂಕ್ ಪಾಂವ್ಚೆಂ ಬರೆಂ ಮನ್, ಆಮ್ಚೆ ಥಂಯ್ ರೂಪಿತ್ ಜಾತಾ.  ಹಾಚೆ ಬದ್ಲಾ ಆಮಿಂ…ಅಳ್ಸಾಯೆನ್ ವೇಳ್ ಖರ್ಚುನ್, ಹೆರಾವಿಶಿಂ ವಾಯ್ಟ್ ಖಬ್ರೊ ಉಲೊವ್ನ್,  ರಾಗ್ ಮೊಸೊರ್ ಹಗೆಂ ಫಾರಿಕ್ಫಣ್ ಅಸಲ್ಯಾ ಸರ್ವ್ ವಾಯ್ಟ್ ವಿಚಾರಾಂನಿಂ ಮಿಸ್ಳೊನ್, ಆಮ್ಚೊ ವೇಳ್ ವಿಭಾಡ್ ಕರ್ತಾಂವ್ ತರ್…

ತಸಲ್ಯಾಂಕ್, ತಸಲ್ಯಾ ವಾಯ್ಟ್ ವಿಚಾರಾಂಚಾ ಮನೋದಬಾವೆವರ್ವಿಂ ಬ್ಲಡ್ ಪ್ರೆಶರ್, ಡಯಾಬಿಟಿಸ್ ತಸಲಿ ಪಿಡಾ ಆರಂಭ್ ಜಾವ್ನ್… ಉಪ್ರಾಂತ್ ತೆಂ ಮುಂದರುನ್ ಇತರ್ ಮಾರೆಕಾರ್ ಪಿಡಾ ಉಬ್ಜೊಂವ್ಚೆ ಸಾಧ್ಯತಾ ಆಸಾ. ಹೆಂ ಮನೋವಿಜ್ನಾಂನಿಂ ತಶೆಂ ದಾಕ್ತೆರಾಂಚಿ ಅಭಿಪ್ರಾಯ್ ತಶೆಂ ಜಾಗರಣ್ ಜಾವ್ನ್ ಆಸಾ.

ಅಸಲೆಂ ಪರಿಗತ್ ಅಸಲಿ ಸವಯ್ ಚುಕೊಂವ್ಕ್… ಆಮಿಂ ತ್ಯಾ ತ್ಯಾ ದಿಸಾಚಿಂ, ತ್ಯಾ ತ್ಯಾ ವೆಳಾಚಿಂ ಕಾಮಾಂ ತ್ಯಾತ್ಯಾ ವೆಳಾರ್ ಕರ್ಚೆಂ, ರಾತಿಂಚೆಂ ವೆಗ್ಗಿಂ ನಿದೊನ್ ಫಾಂತ್ಯಾರ್ ವೆಗ್ಗಿಂ ಉಟ್ಚೆಂ, ಸಕಾಳಿಂ ಸಾಂಜೆರ್ ಮಾಗ್ಣ್ಯಾಕ್ ಫಾವೊತೊ ವೇಳ್ ದಿಂವ್ಚೊ, ಅಸಲೆಂ ಸರ್ವ್ ಆಮ್ಚ್ಯಾ ವೆಳಾ ಪ್ರಜ್ಞಾವರ್ವಿಂ ಆಮಿಂ ಆದಾರುಂಕ್ ಜಾಯ್.

ಹ್ಯಾವರ್ವಿಂ ಖಂಡಿತ್ ಜಾವ್ನ್ ಆಮಿಂ ಆಮ್ಚಾ ಜೀವನಾಂತ್, ಸಂತೋಸ್ ಸಮಧಾನ್ ಜೋಡ್ನ್ ಘೆತೆಲ್ಯಾಂವ್.  ಆನಿ ಆಮಿ ಜಿವಿತಾಂತ್ ಯಶಸ್ವೀಚಿಂ ಪಾವ್ಲಾಂ ಚಡೊಂಕ್ ಸಕ್ತೆಲ್ಯಾಂವ್.

ದೀಸ್ ಸಂಪೊನ್ ರಾತಿಂ ನಿದುಂಕ್ ವೆತಾನಾಂ…ತೊ ದೀಸ್ ಆಮಿಂ ಕಸೊ ಖರ್ಚಿಲೊ, ತ್ಯಾದಿಸಾಚಾ ವೆಳಾ ವಾಪಾರಾಂತ್ ಕಾಂಯ್ ಲೋಪ್ –ದೋಶ್ ಆಸಾ?ಆಸಾ ತರ್, ತೊ ಕಸೊ ಸುದ್ರಾಪ್ ಕರುನ್ ಘೆಂವ್ಚೊ?.

ಅಸಲ್ಯಾ ಸರ್ವ್ ಸಂಗ್ತಿಂನಿಂ ಆಮಿ ವೆಳಾಚೊ ಸಾರ್ಕೊ ಮೌಲ್ಯ್ ಮಾಪನ್ ಕರುನ್…ದುಸ್ರ್ಯಾ ದಿಸಾಚಾ ವೆಳಾಚಾ ಉಪಯೋಗಾ ಖಾತಿರ್ ಕಸಲೊ ಯೋಗ್ಯ್ ಯೋಜನ್ ಮಾಂಡುನ್ ಹಾಡುಂಕ್ ಜಾಯ್ ಮ್ಹಳ್ಳೆಂ ಯೋಗ್ಯ್ ಮಾಂಡಾವಳ್ ಯೋಜಿತ್ ಕರುಂಕ್ ಜಾಯ್.

ವೆಳಾಚೊ ಸದುಪಯೋಗ್ ಕರ್ಚ್ಯಾಂ ಸಬಾರಾಂನಿಂ ಸಾಂಗ್ಚೆಂ ಪರ್ಮಾಣೆಂ…ಸಕಾಳಿಂ ಚಾರ್ ವೊರಾರ್ ಉಟೊನ್ ಯೋಗ ತಸಲೆಂ ಆಭ್ಯಾಸ್. ನಂತರ್… ದೇವ್ ಸ್ಥುತಿ ಆನಿಂ ವಾಂಜೆಲ್ ವಾಚಾಪ್. ಉಪ್ರಾಂತ್ ಸ ವರಾಂ ಥಾವ್ನ್ ಆಟ್ ಪರ್ಯಾಂತ್ ವಾಚಾಪ್ ಯಾ ಹಾತಿಂ ಲಿಖ್ಣಿ. ಉಪ್ರಾಂತ್ ಆಟ್ ಥಾವ್ನ್ ನೋವ್ ಪರ್ಯಾಂತ್ ಸಕಾಳಿಂಚೊ ನಾಸ್ಟೊ ಜಾವ್ನ್  ವಾಚಾಪ್ ಯಾ ಲಿಖ್ಣೆಕ್ ಯಾ ತಾಂಚ್ಯಾ ಸದಾಂಚ್ಯಾ ಕಾಮಾಂತ್ ತೆ ಖರ್ಚಿತಾತ್. ನಂತರ್ ದನ್ಪರಾಂಚೆ ಜೆವಾಣ್ ತಿರ್ಸುನ್, ಉಪ್ರಾಂತ್ ಥೊಡೊ ವೇಳ್ ವಿಶೆವ್.  ತ್ಯಾಉಪ್ರಾಂತ್ ಟಿ.ವಿ. ಪಳೆಂವ್ಚಿ, ಸಾಹಿತ್ಯ್ ರಚ್ಚ್ಯಾಕ್ ಯಾ ಹೆರ್ ವಾಚ್ಪಾಕ್ ಯಾ ಹೆರ್ ಯೋಗ್ಯ್ ಕಾಮಾಕ್ ಖರ್ಚಿತಾತ್.

ಹ್ಯಾ ಸರ್ವಾ ಮಧೆಂ ತಾಂಚ್ಯಾ ಕುಟ್ಮಾಕ್ ವೇಳ್ ದೀಂವ್ಕ್ ವಿಸ್ರಾನಾಂತ್. ಪತಿಣೆಚಾ ಕಾಮಾಂನಿಂ ತಿಕಾ ಹಾತ್ ದಿಂವ್ಚೆಂ…ಕುಜ್ನಾಂತ್ ಎಕಾಮೆಕಾ ಹಾತಾಕ್ ಹಾತ್ ದೀವ್ನ್ ಸಾಂಗಾತಾ ವಾವ್ರ್ ಕರ್ಚೆಂ. ತಸಲ್ಯಾ ಕುಟ್ಮಾಂತ್, ಎಕಾಮೆಕಾ ಸೋಡ್ ಧೊಡ್ ಆಸುನ್, ಕುಟಾಮ್ ಸಂತೊಸ್ ಸಮಧಾನೆನ್ ಮೊಗಾನ್ ವಾಡ್ತಾ.

ಚಡಾವತ್ ಜಣಾಂಕ್ ವೆಳಾವಿಶಿಂ ಕಿತೆಂಚ್ಚ್ ಪರಿಜ್ಞಾನ್ ಆಸಾನಾ. ಯಾ ಹ್ಯಾವಿಶಿಂ ಬೆಫಿಕೆರ್ ಯಾ ಅಳ್ಸಾಯ್ ತೆ ದಾಕಯ್ತಾತ್. ಹ್ಯಾವರ್ವಿಂ ತಾಂಚ್ಯಾ ವೆಳಾಚೊ ವಿಭಾಡ್ ಜಾತಾ.  ತೆ ವೇಳ್ ಬರ‍್ಯಾಕ್ ಖರ್ಚಿನಾಂತ್.

ಬಗಾರ್ ಫೊನಾಂ ಮೊಬಾಯ್ಲ್ ಇಂಟರ್-ನೆಟ್ಟ್ ಟಿ.ವಿ. ತ್ಯಾಸರ್ವ್ ತಾಂತ್ರಿಕತೆಚೆಂ ಖರಿಂ ಮೌಲ್ಯಾಂ ಉಪಯೋಗ್ ಕರಿನಾಸ್ತಾಂ… ಭೆಶ್ಟೆಂಚ್ಚ್ ಗರ್ಜ್ ನಾತ್ಲೆಲ್ಯಾ ವಿಶಯಾಂನಿಂ ತಾಂಚೊ ವೇಳ್ ಖರ್ಚುನ್, ಆಪ್ಲೊ ಅಮೂಲ್ಯ್ ವೇಳ್ ವಿಭಾಡ್ ಕರ್ತಾತ್.

ಮೊಗಾಳಾ ವಾಚ್ಪ್ಯಾ ಆತಾಂ ತುಂ ಏಕ್ ಘಡಿ ಬಸೊನ್… ‘ತುಂ ತುಜೊ ವೇಳ್ ಕಶೆಂ ಖರ್ಚಿತಾಯ್…?’ ಮ್ಹಣ್ ಚಿಂತುನ್ ಪೊಳೆ. ಹೆಂ ತುಜಾ ಜಿವಿತಾಚಾ ಯಶಸ್ವಿಕ್ ತಶೆಂ ಶಾಂತಿ ಸಮಧಾನೆಚ್ಯಾ, ತಶೆಂ ಭಲಾಯ್ಕೆ ಭರಿತ್ ಜಿವಿತಾಕ್ ಖಂಡಿತ್ ಉಪ್ಕಾರಾಕ್ ಪಡ್ತೆಲೆಂ. ಅಶೆಂ ವೆಳಾಚೊ ವಿಭಾಡ್ ಕರಿನಾಸ್ತಾಂ… ‘ವೇಳ್ ಏಕ್ ಜಾಣ್ವಾಯ್, ಗಿನ್ಯಾನ್, ಸಂತೊಸ್ ಸಮಧಾನ್, ಭಲಾಯ್ಕಿ ದಿಂವ್ಟಿ ನಿಧಿ…!’ ಮ್ಹಳ್ಳೆಂ ಸಮ್ಜೊನ್ ಘೆವ್ನ್, ವೆಳಾಚ್ಯಾ ಮಹತ್ವಾಚೊ ಪೋಸ್ ಕರುನ್, ವೆಳಾಚ್ಯಾ ಸದುಪಯೋಗಾವರ್ವಿಂ, ವೆಳಾಚೆಂ ಪ್ರಯೋಜನ್ ಆಮಿ ಜೋಡ್ನ್ ಘೆಂವ್ಯಾಂ.

ಆನಿ ಜಿವಿತಾಂತ್, ಆಮ್ಚ್ಯಾಮ್ಚ್ಯಾ ತಾಲೆಂತಾ ಪರ್ಮಾಣೆಂ…ಆಮ್ಚ್ಯಾಮ್ಚ್ಯಾ ವಿವಿಧ್ ಸಂಗ್ತೆಂನಿಂ… ಆಮಿಂ ಆಮ್ಚಿ ಯಶಸ್ವೀ ಜೊಡುನ್ ಘೆಂವ್ಯಾ. ವೆಳಾಕ್ ಆಮಿ ಲೆಕಿನಾಂವ್ ತರ್… ವೆಳಾಕ್ ಆಮಿ ಮಹತ್ವ್ ದೀನಾಂತರ್… ವೇಳ್‌ಯೀ ಆಮ್ಕಾ ಲೆಕಿನಾಂ, ಮಹತ್ವ್ ದೀನಾಂ! ಮ್ಹಳ್ಳೆಂ ಆಮಿ ವಿಸ್ರನಾಯೆ.

                                           ■ ರೋನ್ ರೋಚ್ ಕಾಸ್ಸಿಯಾ