ಜಿಣ್ಯೆಂತ್ ಮರಣ್ ಏಕ್ ಮಾತ್ ಸತ್. ಜಲ್ಮಾಕ್ ಆಯಿಲ್ಲ್ಯಾ ಹರ್ ಜೀವಿಕ್ ಏಕ್ ನ ಏಕ್ ದೀಸ್ ಮರೊಂಕ್ ಆಸಾ. ಮರಣ್ ಫಕತ್ ಮನ್ಶಾಕ್ ಸೀಮಿತ್ ನ್ಹಯ್, ರೂಕ್ – ಝಾಡಾಂ, ಸುಕ್ಣಿಂ – ಸಾವ್ಜಾಂ, ಮೊನ್ಜಾತಿಂಕೀ ಮರಣ್ ಆಸಾ. ಪೂಣ್ ಮರ್ಣಾ ವಿಶ್ಯಾಂತ್ ಮನ್ಶಾನ್ ಚಿಂತ್ಚೆಂ ತಿತ್ಲೆಂ ವಾ ಖಂತ್ ಕರ್ಚೆ ತಿತ್ಲೆಂ ತೀಂಯ್ ಕರ್ತಾತ್ಗಾಯ್ ?
ಮನಿಸ್ ಫಕತ್ ಮರ್ಣಾ ವಿಶ್ಯಾಂತ್ ಮಾತ್ ನ್ಹಯ್, ಮರ್ಣಾ ಉಪ್ರಾಂತ್ಲೆಂ ‘ಪೂನ್’ ಹೆ ವಿಶ್ಯಾಂತೀ ಚಿಂತಾ. ಕೋಣ್ ಮ್ಹಣ್ತಾ ಆತ್ಮೊ ಆಸಾ, ಕೋಣ್ ಮ್ಹಣ್ತಾ ಆತ್ಮೊ ನಾ. ಆತ್ಮೊ ಆಸಾ ಮ್ಹಣ್ ರುಜು ಕರುಂಕ್ ಆತ್ಮ್ಯಾಕ್ ಪಳಯಿಲ್ಲೊ ಕೋಣ್ ನಾ. ‘ಆಸಾ’ ಮ್ಹಣ್ ಪಾತ್ಯೆಲ್ಯಾ ಶಿವಾಯ್ ‘ನಾ’ ಮ್ಹಣ್ ರುಜು ಕರುಂಕ್ ಜಾಯ್ನಾ. ಹ್ಯಾ ಪಾಟಿಥಳಾರ್ ಕನ್ನಡಾಂತ್ ಆಯ್ಲೆವಾರ್ ಚಾಲ್ತೆಕ್ ಆಯಿಲ್ಲ್ಯಾ ಎಕಾ ಸಬ್ದಾನ್ ಮ್ಹಜೆಂ ಗುಮಾನ್ ವೊಡ್ಲೆಂ – ‘ಆತ್ಮಹತ್ಯೆ’ ಮ್ಹಳ್ಳ್ಯಾ ಸಬ್ದಾ ಬದ್ಲಾಕ್ ಹಾಲಿಂ ‘ದೇಹಹತ್ಯೆ’ ಮ್ಹಳ್ಳೊ ಸಬ್ದ್ ಕನ್ನಡಾಂತ್ ಚಲಾವಣೆಕ್ ಆಯ್ಲಾ. ‘ಆತ್ಮ್ಯಾಕ್ ಮರಣ್ ನಾ, ಕೂಡ್ ಫಕತ್ ಆತ್ಮ್ಯಾಚೆಂ ಪಯ್ಣಾತಾರುಂ’ ಮ್ಹಳ್ಳೆಂ ದಾರ್ಶನಿಕ್ ಚಿಂತಪ್ ಹ್ಯಾ ವಾಡಾವಳಿ ಪಾಟ್ಲ್ಯಾನ್ ಅಸುಂಯೆತಾ – ಅಸೊ ಮ್ಹಜೊ ಅಂದಾಜ್.
ಪ್ಲೇಟೊ – ಜಲ್ಮಾ ಆದಿಂ ಆನಿ ಮರ್ಣಾ ಉಪ್ರಾಂತ್ ಆತ್ಮ್ಯಾಚಾ ಅಸ್ತಿತ್ವಾಂತ್ ಪಾತ್ಯೆತಾ ತರ್, ಅಸ್ತಿತ್ವವಾದಿ – ಅತ್ಮ್ಯಾಚಾ ಅಸ್ತಿತ್ವಾಕ್ ವಾ ಪುನರ್ಜಲ್ಮಾಕ್ ಪಾತ್ಯೆನಾಂತ್. ತತ್ವಶಾಸ್ತಿರಾಚಿಂ ಇಸ್ಕೊಲಾಂ ಕಿತೇಂಯ್ ಮ್ಹಣೊಂ, ಏಕ್ ಮಾತ್ ಸತ್ – ಹ್ಯಾ ಸಂಸಾರಾಂತ್ಲಿಂ ಸಗ್ಳಿಂ ಧರ್ಮಾಂ ‘ಮರಣ್’ ಆನಿ ಮರ್ಣಾಚ್ಯಾ ಭಿಂಯಾಚೇರ್ ಬಾಂದುನ್ ಹಾಡ್ಲ್ಯಾಂತ್ ಮ್ಹಳ್ಳೆಂ ಸತ್ ಮಾತ್ ನೆಗಾರುಂಕ್ ಜಾಯ್ನಾ! ಜರಿ ಸಂಸಾರಾಂತ್ ಮರಣ್ ಮ್ಹಳ್ಳೆಂ ನಾತ್ಲೆಂ ತರ್, ಹ್ಯಾ ಸಂಸಾರಾಂತ್ ಆಜ್ ಬೋವ್ಶಾ ಧರ್ಮ್ ಮ್ಹಳ್ಳೆಂ ಆಸ್ತೆಂಚ್ ನಾ ಮ್ಹಣ್ ಮ್ಹಜೊ ಅಂದಾಜ್. ಹರ್ ಧರ್ಮ್ ಮರ್ಣಾ ಉಪ್ರಾಂತ್ಲೆಂ ಸರ್ಗ್ ಆನಿ ಸರ್ಗಾಚೆಂ ಸುಕ್ ವಾ ಯೆಮ್ಕೊಂಡ್ ಆನಿ ಯೆಮ್ಕೊಂಡಾಚೊ ಉಜೊ ದಾಕವ್ನ್ ಬೆಶ್ಟಾಯ್ತಾ. ಜಿಣ್ಯೆಂತ್ ಬರ್ಯೊ ಕರ್ನ್ಯೊ ಕರುಂಕ್ ಆನಿ ಪೂನ್ ಜೊಡುಂಕ್ ಶಿಕೊಣ್ ದಿತಾ. ಪೂಣ್ ಸದಾಂ ಮರ್ಣಾಕ್ ಭಿಯೆಂವ್ಚೊ ಜಿಯೆತಾ ಮ್ಹಣೊಂಕೀ ಜಾಯ್ನಾ!
ಹ್ಯಾ ಸಗ್ಳ್ಯಾ ಭಾಯ್ರ್ ಏಕ್ ಸಂಸಾರ್ ಆಸಾ; ತಾಕಾ ಹಾಂವ್ ‘ಜೀವ್’ ಮ್ಹಣ್ತಾಂ. ಹರೇಕಾ ಜಿವಾ ಭಿತರ್ ಭೊಗ್ಣಾಂ ಆಸಾತ್. ಆನಿ ಹ್ಯಾ ಭೊಗ್ಣಾಂಕ್ ಲಾಗೊನ್ ಸಂಬಂದ್ ಜಾತಾತ್. ತಾಂತ್ಲೆ ಥೊಡೆ ಜೀವಾಚೆ ಜಾತಾತ್. ಆನಿ ಅಸಲೆ ಜೀವಾಚ್ಯಾ ಸಂಬಂದಾಂತ್ಲೊ ಕೋಣ್ ಎಕ್ಲೊ ಉಟೊನ್ ವೆತಾನಾ, ಕೋಣ್ ಪಿಡೆಂತ್ ಕಶ್ಟಾತಾನಾ, ಅನ್ಯೇಕ್ ಜೀವ್ ರಡ್ತಾ. ಆನಿ ಹ್ಯಾ ದುಕಿಂತ್ ರಡ್ಚ್ಯಾ ಜಿವಾಕ್ ಸುಟ್ಕಾ ದೀಂವ್ಕ್ ಕೊಣಾಕ್ ಧರ್ಮ್ – ತತ್ವಜ್ಞಾನ್ ತರ್, ಕೊಣಾಕ್ ಕವಿತಾ – ಸಾಹಿತ್ಯ್ ಕುಮ್ಕೆಕ್ ಯೆತಾ.
ಮರ್ಣಾಚಿ ಪ್ರತಿಮಾ ಘೆವ್ನ್ ಕೊಂಕ್ಣೆಂತ್ ಜಾಯ್ತೆ ಮಾರ್ಮಿಕ್ ಕವಿತಾ ರಚ್ಲೆಲ್ಯಾ ಕವಿ ಮೆಲ್ವಿನಾಚಿ ಪ್ರಸ್ತುತ್ ಕವಿತಾ – ವಾಚ್ಪ್ಯಾಂಕ್ ಮರ್ಣಾಚಿ ಅನ್ಯೇಕ್ ದಾರ್ಶನಿಕ್ ಕೂಸ್ ದಾಕಯ್ತಾ.
■ ಎಚ್ಚೆಮ್
ಕುಡಿ ಆತ್ಮ್ಯಾ ಸಮೇತ್
ಅಂತ್ರಳಾರ್ ಉಬೊನ್ ಆಸಾಂ.
ಸಕಯ್ಲ್, ಉಬೊಂಕ್ ಜಾಯ್ನಾತ್ಲ್ಯಾ ಕಿತ್ಲ್ಯಾಕಿ
ಕುಡಿಂತ್ಲೆ ಆತ್ಮೆ ಉಬೊಂಕ್ ತಯಾರ್ ರಾವ್ಲ್ಯಾತ್ ಆಸ್ತಲೆ.
ಭಾಯ್ಲ್ಯಾ ಕಾಳೊಕಾಂತ್ ಯೆದೊಳಚ್ ಸುಟ್ಕಾ ಜೊಡಲ್ಲ್ಯಾ ಅತ್ಮ್ಯಾಂಚೊ ನಾಚ್ ಚಲ್ತಾ ಆಸ್ತಲೊ,
ಪುಣ್ ಕಾಂಯಿಂಚ್ ಝಳ್ಕನಾ.
ಹಾಂವ್ ಕಾಂಪ್ತಾಂ
ಖಂಯ್ ತರೀ
ಮ್ಹಜ್ಯಾ ಅತ್ಮ್ಯಾಕ್ ತಾಂಣಿ
ನಾಚುಂಕ್ ಆಪಯ್ಲೆಂ ತರ್?
ವಾ ಮ್ಹಜ್ಯಾಚ್ ಅತ್ಮ್ಯಾಕ್ ತಾಂಚೆ ಸಾಂಗಾತಾ ನಾಚ್ಚೆಂ
ಮನ್ ಜಾಲೆಂ ತರ್?
ಪಾವ್ಸಾಚ್ಯಾ ಕುಪಾಂತ್ಲ್ಯಾನ್
ಪಾಶಾರ್ ಜಾಂವ್ಚೆಂ ವಿಮಾನ್
ಥರ್ಥರ್ತಾ.
ಸತ್ ಸಾಂಗ್ಚೆಂ ತರ್
ಹಾಂವೆಂ ಕೆನ್ನಾಂಯ್
ಜಿವಿತಾಂತ್ ನಾಚುಂಕ್ ಮನ್ ದಾಕಯಿಲ್ಲೆಂ ನಾ.
ತರೀ ಅತ್ಮ್ಯಾಚ್ಯಾ ನಾಚಾಕ್
ಆಡಾಯ್ತಲೊಂ ಹಾಂವ್ ಕೊಣ್?
ತಾಕಾಯ್ ತಾಚೆಂ ಮ್ಹಳ್ಳೆಂ
ಅಸ್ತಿತ್ವ್ ಆಸಾ ನ್ಹಯ್?
ಎಕೆ ಕುಡಿಂತ್
ನಾಚುನ್ ಥಕ್ತಾನಾ
ವೆಗ್ಳೆ ಕುಡೀಕ್ ವೇಂಗ್ ಮಾರ್ಚೆಂ!
(ಜುಲಾಯ್ 4, 2026)
