ಮೆಲ್ವಿನ್ ರೊಡ್ರಿಗಸ್, ಸಾಹಿತ್ಯ ಅಕಾಡೆಮಿ ನ್ಯೂಡೆಲ್ಲಿ ಹಾಂಗಾಚ್ಯಾ ಕಾರ್ಯಕಾರಿ ಸಮಿತಿಚೊ ವಾಂಗ್ಡಿ ತಶೆಂಚ್ ಕೊಂಕಣಿ ಸಲಹಾಗಾರ್ ಸಮಿತಿಚೊ ನಿಮಂತ್ರಕ್. ಉದ್ಯಮ್ ಆಡಳ್ತ್ಯಾಂತ್ ಸ್ನಾತಕ್ ಆನಿ ಸಮಾಜ್ ಶಾಸ್ತ್ರಾಂತ್ ಸ್ನಾತಕೋತ್ತರ್ ಶಿಕಪ್ ಜೊಡುನ್ ಪ್ರಸ್ತುತ್ ದಾಯ್ಜಿವರ್ಲ್ಡ್ ಮಾಧ್ಯಮ್ ಸಂಸ್ಥ್ಯಾಂತ್ ನಿರ್ದೇಶಕ್ ಜಾವ್ನ್ ತೊ ವಾವುರ್ನ್ ಆಸಾ. ಖಾಡಿಗಾಂವಾಂತ್ ಪಂದ್ರಾ ವರ್ಸಾಂ ಕ್ವಾಲಿಟಿ ಎಶ್ಯುರೆನ್ಸ್ ಶೆತಾಂತ್ ತಾಣೆ ವಾವ್ರ್ ಕೆಲಾ. ಕೊಂಕಣಿ ಕವಿತೆಚ್ಯಾ ಉದರ್ಗತೆ ಖಾತೀರ್ ವಾವುರ್ಚೆಂ ಕವಿತಾ ಟ್ರಸ್ಟ್ ಸ್ಥಾಪನ್ ಕರುನ್ 260 ಮಿಕ್ವುನ್ ಕವಿತೆಕ್ ಲಗ್ತಿ ಕಾರ್ಯಕ್ರಮಾಂ ತಶೆಂ ಚಾಳೀಸ್ ಪುಸ್ತಕಾಂ ತಾಣೆ ಪರ್ಗಟ್ ಕೆಲ್ಯಾಂತ್. ಕೊಂಕಣಿ ಭಾಷಾ ಮಂಡಳ್, ಕಲಾಸಂಪತ್, ದಾಯ್ಜಿ ದುಬಾಯ್, ಅಖಿಲ್ ಭಾರತ್ ಕೊಂಕಣಿ ಪರಿಶದ್, ಕೊಂಕಣಿ ಭಾಸ್ ಆನಿ ಸಂಸ್ಕೃತಿ ಪ್ರತಿಷ್ಥಾನ್, ಸೈಂಟ್ ಎಲೋಶಿಯಸ್ ಕೊಲೆಜಿಚೆಂ ಕೊಂಕಣಿ ಲೆಕ್ಸಿಕನ್ ಪ್ರೊಜೆಕ್ಟ್ - ಅಶೆಂ ಜಾಯ್ತ್ಯಾ ಸಂಸ್ಥ್ಯಾಂನಿ ತಾಣೆ ವಾವ್ರ್ ಭೆಟಯ್ಲಾ. ಮಿತ್ರ್, ಝೆಲೊ, ಜಿವಿತ್, ಉದೆವ್ ಪತ್ರಾಂನಿ ಸಹ-ಸಂಪಾದಕ್ ಜಾವ್ನ್ ವಾವ್ರ್ ಕೆಲಾ. ಗೊಂಯ್ಚ್ಯಾ ಕಾಣಕೊಣಾಂತ್ 2019ವ್ಯಾ ವರ್ಸಾ ಜಾಲ್ಲ್ಯಾ ಚೊವಿಸಾವ್ಯಾ ಅಖಿಲ್ ಭಾರತ್ ಕೊಂಕಣಿ ಸಾಹಿತ್ಯ ಸಮ್ಮೇಳನಾಚೊ ತೊ ಅಧ್ಯಕ್ಷ್ ಆಸಲ್ಲೊ. ತಾಂಚೆ ಸ ಕವಿತಾ ಜಮೆ, ದೋನ್ ಪ್ರಬಂಧ್ ಸಂಗ್ರಹ್, ಏಕ್ ಪದಾಂಚಿ ಸಿಡಿ, ಚ್ಯಾರ್ ಭಾಷಾಂತರ್ ಕೃತಿಯೊ, ಸ ಸಂಪಾದಿತ್ ಕೃತಿಯೊ ಆನಿ ಏಕ್ ನವಲಿಕಾ ಪರ್ಗಟ್ ಜಾಲ್ಯಾತ್. ತಾಂಕಾಂ ಡೆಲ್ಲಿಚ್ಯಾ ಸಾಹಿತ್ಯ ಅಕಾಡೆಮಿಚೊ ಪುರಸ್ಕಾರ್, ಕರ್ನಾಟಕಾ ರಾಜ್ಯಾಚ್ಯಾ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚೊ ಗೌರವ್ ಪುರಸ್ಕಾರ್, ಸಂದೇಶ ಪ್ರಶಸ್ತಿ, ದೋಹಾ ಖತಾರ್ ಎಮ್. ಸಿ.ಎ. ಕಲಾ ಪುರಸ್ಕಾರ್, ದಾಯ್ಜಿ ಸಾಹಿತ್ಯ ಪುರಸ್ಕಾರ್, ಡೊ. ಟಿ. ಎಮ್. ಎ. ಫೌಂಡೇಶನ್ ಪ್ರಶಸ್ತಿ, ಕೊಂಕಣಿ ಕುಟಮ್ ಬಾಹ್ರೇನ್ ಪುರಸ್ಕಾರ್ - ಅಶೆಂ ಜಾಯ್ತೆ ಪುರಸ್ಕಾರ್ ಫಾವೊ ಜಾಲ್ಯಾತ್.
No products in the cart.
