ಪ್ರಗತೆಚೆಂ ಮೂಳ್ – ರೋದ್

ಮನ್ಶ್ಯಾಕುಳಾಚಾ ಚರಿತ್ರೆಂತ್ ಏಕ್ ಮಹತ್ವಾಚೊ ಪಾತ್ರ್ ಖೆಳ್‌ಲ್ಲ್ಯಾ ವಸ್ತುಂ ಪಯ್ಕಿ, ರೋದ್ ಏಕ್ ಜಾವ್ನಾಸಾ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ. ಹ್ಯಾ ರೊದಾಚಿ ಚರಿತ್ರಾ ಪಾಂಚ್ ಹಜಾರ್ ವರ್ಸಾಂಚಾಕೀ ಆದ್ಲಿ ತರೀ, ರೋದ್ ಆಪಾಪಿಂ ಉದೆಲ್ಲೆಂ ನ್ಹಯ್. ಸುರ್ಯಾಚಾ, ಚಂದ್ರಾಚಾ ಆನಿ ಥೊಡ್ಯಾ ಫಳ್-ವಸ್ತುಂಚಾ ಉರುಟ್ ಆಕಾರಾಕ್ ಪಳೆಲ್ಲ್ಯಾ ಮನ್ಶ್ಯಾಚಾ ಮತಿಂತ್ ’ವ್ರತ್ತ್’ ಉದೆಲ್ಲೆಂ ಲಾಖೋಂ ವರ್ಸಾಂ ಆದಿಂಚ್ ಮ್ಹಳ್ಳ್ಯಾಕ್, ಮನ್ಶ್ಯಾನ್ ಮಾಟ್ಯಾಂನಿ ವಸ್ತಿ ಕರುನ್ ಆಸ್‌ಲ್ಲ್ಯಾ ಕಾಳಾರ್, ಮಾಟ್ಯಾಚಾ ವಣದಿನಿ ಸೊಡಯಿಲ್ಲಿಂ ಚಿತ್ರಾಂಚ್ ಸಾಕ್ಸ್. ತಿತ್ಲೆಂಚ್ ನ್ಹಯ್, ಉದ್ಕಾಂತ್ ಫಾತೊರ್ ಉಡಯಿಲ್ಲ್ಯಾ ವಗ್ತಾ ಆಸಾ ಜಾಂವ್ಚಿಂ ವ್ರತ್ತಾಂಯೀ ಮನ್ಶ್ಯಾಚಾ ಚಿಂತ್ಪಾಕ್ ಈಟ್ ದೀಂವ್ಕ್ ಸಕ್‌ಲ್ಲಿಂ ಆಸ್ಯೆತ್.

ಅಸಲ್ಯಾ ಸಾಧ್ಯಾ ಚಿಂತ್ಪಾ ಥಾವ್ನ್ ಉದೆಲ್ಲ್ಯಾ ರೊದಾನ್, ಸಂಸಾರಾಂತ್, ಸಾಗ್ವಳಿ, ಝುಜಾಂ, ಕೈಗಾರಿಕ್ಯೊ ಆನಿ ಮನ್ಶ್ಯಾಚಾ ಆಧುನಿಕ್ ಜೀವನಾಕ್ ಏಕ್ ಬುನ್ಯಾದ್ ಘಾಲಿ ಮ್ಹಣ್ಯೆತ್ ತರೀ, ರೊದಾಚಾ ಪ್ರಗತೆಂತ್ ಮನ್ಶ್ಯಾಚಿ ಅವನತಿಯೀ ಭರ್ಸಲ್ಯಾ. ವಾತಾವರಣಾಚಿ ಮಲಿನಾಯ್, ಲೆಕಾವರ್ತೊ ರಬ್ಬರಾಚೊ ಉಪ್ಯೋಗ್ ಆನಿ ಹಾಚೊ ಜನಸಂಖ್ಯಾಚೆರ್ ಪರಿಣಾಮ್ ಕಸಲೊ ಮ್ಹಣ್ ಚಿಂತ್ಚ್ಯಾ ಬರಾಬರ್, ಹರ‍್ಯೆಕಾ ವರ್ಸಾ, ಝರೊನ್ ಗೆಲ್ಲ್ಯಾ ಕೊರೊಡೊಂ ಟಯರಾಂಚಿ ರಾಸ್ ಸಂಸಾರಾಂತ್ ಚಡೊನ್ಂಚ್ ಯೆತಾ ಮಾತ್ರ್ ನ್ಹಯ್, ಸಕ್ಕಡ್ ರಾಷ್ಟ್ರಾಂಚಾ ಸರ್ಕಾರಾಂಕ್ ತ್ಯಾ ಸಮಸ್ಯಾಕ್ ವಾಟ್ ಸೊಧ್ಚಿ ತಕ್ಲೆ ಫಡಾಪಡ್ ಆಸಾ ಜಾಲ್ಯಾ.

ಏಕ್ ವಾಟ್ ಆಸಾ, ರೊದಾಂ ನಾತ್‌ಲ್ಲಿಂ ವಾಹನಾಂ ಸೊಧುನ್ ಕಾಡ್ಚಿ. ಆಧುನಿಕ್ ಜನಾಂಗ್ ಹ್ಯಾ ಸಾಹಸಾಕ್ ಮಾತೆಂ ಮಾರುಂಕ್ ಸಕಾತ್‌ಗೀ ಮ್ಹಳ್ಳೆಂ ಸವಾಲ್ ಸಕ್ಡಾಂ ಮುಕಾರ್ ಉಬೆಂ ಜಾಲಾಂ.

ಆರಂಭಾರ್, ರೋದ್ ಘೊಡ್ಯಾಚಾ ವ ಬೊಯ್ಲಾಂಚಾ ಗಾಡಿಯಾಂ ಖಾತಿರ್ ರಚ್‌ಲ್ಲೆಂ ಖಂಡಿತ್ ನ್ಹಯ್. ಮೆಸಪೊಟೇಮಿಯಾಂತ್, ಕ್ರಿಸ್ತಾ-ಪುರ್ವಿಂಚಾ 3500 ವರ್ಸಾಂ ಪಯ್ಲೆಂ, ಮಾತಿಯೆ ಥಾವ್ನ್ ಮೊಡ್ಕ್ಯೊ ಕರ್ಚ್ಯಾ ವಾಟೆನ್, ಕುಂಬಾರಾನಿ ರೋದ್ ವಾಪರ್‌ಲ್ಲ್ಯಾಚೊ ಉಲ್ಲೇಖ್ ಆಸಾ. ತೆಂಚ್ ಚಿಂತಪ್ ಕ್ರಮೇಣ್, ಧರ್ನಿಚ್ಯೆರ್ ಘುಂವೊಂಕ್ ಸಕ್ಚಿಂ ರೊದಾಂ ಜಾವ್ನ್ ಬದ್ಲಲೆಂ ಮ್ಹಣ್ ಜಾಣಾರಿ ಸಾಂಗ್ತಾತ್. 

ಕ್ರಿಸ್ತಾ-ಪುರ್ವಿಂಚಾ 2000 ವರ್ಸಾಂಯಿತ್ಲ್ಯಾಕ್, ತೆದೊಳ್ ಪರ‍್ಯಾಂತ್ ರೂಂದ್ ಫೊಳ್ಯಾಂ ಥಾವ್ನ್ ಕಾತರ್‌ಲ್ಲ್ಯಾ ಜಡಾಯೆಚಾ ರೊದಾಂ ಬದ್ಲಾಕ್, ಭಂವ್ತಣಿ ವ್ರತ್ತ್ ಆಸೊನ್, ಮಧೆಂ ರಿಪಾಂ ವ ಬೆತಾಂ ಆಸೊನ್ ಹಾಳು ಜಾಲ್ಲಿಂ ರೊದಾಂ (spoked wheel) ಚಲಾವಣೆಕ್ ಆಯ್ಲಿಂ. ಹ್ಯಾ ರೊದಾಂ ಬರಾಬರ್, ಗಾಡಿಯೊ ಉಬ್ಜಲ್ಯೊ ಆನಿ ತಾಚಾ ಪಾಟಾಪಾಟ್, ಪಾಡ್ಯಾಂಕ್ ಆನಿ ಘೊಡ್ಯಾಂಕ್ ಬಾಂದುನ್ ಗಾಡಿಯೊ ವೊಡುನ್ ವ್ಹರ್ಚಿ ರೀತ್ ಸುರು ಜಾತಚ್, ಗಾಡಿಯೊ ತುರ್ತಾನ್ ಚಲಂವ್ಕ್ ಸಾಧ್ಯ್ ಜಾಂವ್ಚ್ಯಾ ಸಂಗಿಂ, ಲೊಕಾ ಸಂಚಾರ್ ಸುಲಭ್ ಜಾಲೊ. ಅಸಲ್ಯಾ ಗಾಡಿಯಾಂಚೊ ಪ್ರಭಾವ್ ಘಡಿಯೆನ್ ವಿಸ್ತಾರ್ಚ್ಯಾ ಬರಾಬರ್, ಝುಜಾಂನಿ ಸಯ್ತ್ ಅಸಲ್ಯೊ ಗಾಡಿಯೊ ವಾಪರ್ಲ್ಯೊ ಮಾತ್ರ್ ನ್ಹಯ್, ರೋದ್ ಮ್ಹಳ್ಯಾರ್, ಸಲಿಸಾಯೆನ್ ಮನ್ಶ್ಯಾಕ್ ಆನಿ ತಾಚ್ಯಾ ವಸ್ತುಂಕ್, ಎದೊಳ್ ಚಿಂತ್‌ಲ್ಲ್ಯಾಚ್ಯಾಕೀ ಪಯ್ಸ್ ವ್ಹರೊಂಕ್ ಜಾಂವ್ಚಿ ಏಕ್ ವಸ್ತ್ ತಶೆಂಚ್ ಪ್ರಗತೆಚಿ ಆನಿ ವೆಪಾರ್-ವೈವ್ಹಾಟಾಚಿ ಕುರ‍್ಹು ಜಾಲೆಂ.

ಮೆಸಪೊಟೇಮಿಯಾಂತ್ಲೆಂ ಏಕ್ ಚಿತ್ರ್

ರೊಮಾಗಾರಾಂನಿ, ಅಸಲ್ಯೊ ಗಾಡಿಯೊ ಚಲಂವ್ಚಾ ವಾಟೆನ್, ಫಾವೊತೆ ರಸ್ತೆ ಆಸಾ ಕೆಲೆ ಆನಿ ವೆಪಾರಾಕ್ ಕುಮಕ್ ಕರ್ಚ್ಯೊ ವಸ್ತು ತ್ವರಿತಾಯೆನ್ ಸಾಗ್ಸುಂಕ್ ವಾಟ್ ಕೆಲಿ. ಅಸಲ್ಯಾ ರಸ್ತ್ಯಾಂ ದ್ವಾರಿಂ ತಾಂಕಾಂ ಝುಜಾಂ ಜಿಕೊಂಕೀ ಸುಲಭ್ ಜಾಲೆಂ. ಹೆಂಚ್ ರೋದ್, ತಳ್ಯಾಂತ್ಲೆಂ ಉದಕ್ ಕಾಡ್ಚ್ಯಾಕ್ ವಾಪರ್ಚ್ಯಾ ಸಂಗಿಂ, ರೊದಾಚೆ ವಿವಿಧ್ ಉಪ್ಯೋಗ್ ದಿಸೊನ್ ಯೇಂವ್ಕ್ ಸುರು ಜಾಲೆ. 

18-ವ್ಯಾ ಆನಿ 19-ವ್ಯಾ ಶೆಕ್ಡ್ಯಾಂ ಮಧೆಂ ಜಾಲ್ಲ್ಯಾ ಕೈಗಾರಿಕ್ ಕ್ರಾಂತೆಂತ್, ರೊದ್ ಅಭಿವೃದ್ದೆಚೆಂ ಮೂಳ್ ಜಾಲೆಂ ಮ್ಹಣ್ಯೆತ್. ಫೆಕ್ಟರಿನಿ ಉತ್ಪಾದನ್ ಚಡಂವ್ಚಾ ವಾಟೆನ್, ರೊದಾಂ ವಾಪರ್ನ್ ಕೆಲ್ಲ್ಯಾ ಮೆಶಿನಾಂಚಿ ಉದೆವ್ಣಿ ಜಾಂವ್ಚ್ಯಾ ಸಂಗಿಂ, ಲುಗಾಟ್ ಉತ್ಪಾದನ್ ಕರ್ಚಿಂ ಮಿಲ್ಲಾಂ, ರಯ್ಲ್ ಗಾಡಿಯೊ ಪಾಟ್ಯಾಂಚ್ಯೆರ್ ಚಲೊಂಕ್ ಗರ್ಜೆಚಿಂ ಮಿಲಾವಾಚಿಂ ರೊದಾಂ ಆನಿ ಹೆಂ ಸಗ್ಳೆಂ ಮ್ಹಣ್ತನಾ, ರೊದಾ ಭಂವ್ತಣಿಂ ಸಂಸಾರ್ ಘುಂವೊಂಕ್ ಲಾಗ್ಲೊ.

ತಿತ್ಲ್ಯಾರ್ ಏಕ್ ನವಿಚ್ ಸಂಗತ್ ಸೊಧುನ್ ಕಾಡ್ಲಿ – ಮನ್ಶ್ಯಾಕ್ ಖಂಯ್ಸರ್‌ಯೀ ವ್ಹರೊಂಕ್ ಸಕ್ಚೆಂ ‘ಸಾಯ್ಕಲ್’. 

19-ವ್ಯಾ ಶೆಕ್ಡ್ಯಾಂತ್ ಸಾಯ್ಕಲಾಚಾ ಉದೆವಾನ್, ಹರ‍್ಯೆಕ್ಲ್ಯಾಕ್, ಚಡಾವತ್ ಜಾವ್ನ್ ಸ್ತ್ರೀಯಾಂಕ್, ಖಂಯ್ಸರೀ ವೆಚ್ಯೆಂ ಸ್ವಾತಂತ್ರ್ ಲಾಬ್ಲೆಂ. ಹ್ಯಾ ಸಾಯ್ಕಲಾಂನಿ ವಾಪರ್ಚ್ಯಾ, ವಾರೆಂ ಘಾಲುನ್ ಫುಲಂವ್ಚಾ ಟಯರಾಂಚಿ ಮಾಂಡಾವಳ್ ಪಳೆವ್ನ್, ತಸಲಿ ಮಾಂಡಾವಳ್ ತ್ಯಾಚ್ ತೆಂಪಾರ್ ಸೊಧುನ್ ಕಾಡ್‌ಲ್ಲ್ಯಾ ಕಾರಾಂನಿ ವಾಪರ್ಚ್ಯಾಂತ್ ಇಜ್ನೆರ್ ಜಯ್ತೆವಂತ್ ಜಾಲೆ. ಥಂಯ್ ಥಾವ್ನ್ ಮನ್ಶ್ಯಾ ಸಂಚಾರಾಚೆಂ ರೂಪ್‌ಚ್ ಬದ್ಲಲೆಂ ಮ್ಹಣ್ಯೆತ್.

ಟಯರಾಚಾ ರೊದಾಂ ದ್ವಾರಿಂ ವೆಪಾರ್-ವೈವ್ಹಾಟ್ ವಾಡೊಂಕ್, ಲೊಕಾಕ್ ಪಯ್ಣ್ ಕರುಂಕ್, ನವಿಂ-ನವಿಂ ವಾಹನಾಂ ಉಬ್ಜೊನ್ ಕಾಮಾಂ ಚಡೊಂಕ್ ವಾಟ್ ಜಾಲಿ ತರೀ, ಆನ್ಯೇಕಾ ವಾಟೆನ್, ಮನ್ಶ್ಯಾಚಾ ಖಬ್ರೆವಿಣೆ, ಹ್ಯಾ ಅಭಿವೃದ್ದೆಚಿ ಕಾಳಿ ಕೂಸ್ ಝಳ್ಕೊಂಕ್ ಲಾಗ್ಲಿ. ವಾಹನಾಂ ಚಡ್ಚ್ಯಾ ಸಂಗಿಂ, ವಾತಾವರಣ್ ಮ್ಹೆಳೆಂ ಜಾಲೆಂ, ಕಾಮಾಂ ಸೊಧುನ್ ಆಯಿಲ್ಲೊ ಲೋಕ್ ಶಹರಾಂನಿ ಭರೊನ್ ಆಯ್ಲೊ, ದುಬ್ಳ್ಯಾ ಆನಿ ಗ್ರೇಸ್ತಾಂ ಮಧೆಂ ಫುಟ್ ಆಯ್ಲಿ ಆನಿ ಧರ್ನಿಂತ್ಲೆಂ ಕಾಡ್‌ಲ್ಲ್ಯಾ ಪೆಟ್ರೊಲಿಯಮಾಚೊ ವಾಪರ್ ಚಡ್ಲೊ.

ತಿತ್ಲೆಂಚ್ ನ್ಹಯ್ ಆಸ್ತಾಂ, ಝರೊನ್ ಉಪ್ಕಾರಾಕ್ ಪಡಾನಾತ್‌ಲ್ಲ್ಯಾ ಟಯರಾಂಚಿ ರಾಸ್ ವ್ಹಡ್ ಜಾಂವ್ಕ್ ಸುರು ಜಾಲಿ. ಲಾಂಬ್ ಆವ್ದೆಕ್ ಬಾಳ್ವೊಂಚ್ಯಾ ಉದ್ದೇಶಾನ್ ಕೆಲ್ಲಿಂ ಹಿಂ ಟಯರಾಂ, ರುಕಾಡ್ ಕುಂಬು ಜಾಂವ್ಚ್ಯೆ ತಿತ್ಲ್ಯಾ ಸುಲಭಾಯೆನ್ ಕರ್ಗಾಲಿನಾಂತ್. ತೆಣೆಂ, ಹಿಂ ಪರ್ನಿಂ ಜಾಲ್ಲಿಂ ಟಯರಾಂ ರಾಸ್ ಘಾಲ್ಲೆ ಕಡೆನ್, ತಾಂಚ್ಯಾ ಭಿತರ್ ಪಾವ್ಸಾಚೆಂ ಉದಕ್ ರಾವೊನ್, ಜಳಾರಿಂಚ್ಯೆಂ ಪಾಡೆಂ ಚಡ್ಲೆಂ ಆನಿ ಮಲೇರಿಯಾ ಪಿಡಾ ಚಡೊನ್ ಆಯ್ಲಿ. ಹಿಂ ಟಯರಾಂ ಕ್ರಮೇಣ್ ಕರ್ಗಾತಾನಾ, ತ್ಯಾ ಟಯರಾಂಚೊ ಪಿಟೊ ಉದ್ಕಾಂತ್ ಭರ್ಸೊನ್, ಮನ್ಶ್ಯಾಕ್ ಆನಿ ಮನ್ಜಾತಿಂಕ್ ಮಾರೆಕಾರ್ ಜಾಲೊ. ಸಂಸಾರಾಂತ್ ಆಜ್-ಕಾಲ್ ಕೊರೊಡೊಂ ಗಟ್ಲ್ಯಾನ್ ಝರ್‌ಲ್ಲಿಂ ಟಯರಾಂ ರಾಸ್ ಪಡ್ತಾತ್ ಆನಿ ತಿಂ ಸಾರ್ಕ್ಯಾ ರಿತಿರ್ ಕರ್ಗುಂಚಿ ವೆವಸ್ಥಾ ನಾಸ್ತಾನಾ, ಕ್ರಮೇಣ್ ಮಾತ್ಯೆಂತ್ ಭರ್ಸಾತಾತ್. ಅಭಿವೃದ್ದೆಚೆರ್ ಲಗಾಮ್ ಚುಕ್ಲೆಂ ತರ್, ಜಾಂವ್ಚಿ ಗತ್ ಹಿಚ್ಚ್.

ಹ್ಯಾ ಸವಲಾಕ್ ಆಯ್ಚ್ಯಾ ವಿಗ್ಯಾಂನಿನಿ ಫುಡ್ ಕೆಲ್ಯಾ ಮಾತ್ರ್ ನ್ಹಯ್, ರೊದಾಂ ನಾತ್‌ಲ್ಲಿಂ ವಾಹನಾಂ ಸೊಧುನ್ ಕಾಡ್ಲ್ಯಾಂತ್.

ಮ್ಯಾಗ್ಲೆವ್ (Maglev (Magnetic Levitation) Trains) ನಾಂವಾಚಿಂ ಹಿ ಆಧುನಿಕ್ ರಯ್ಲಾಂ, ಪಾಟ್ಯಾಂಚ್ಯೆರ್ ಚಲ್ತಾತ್ ತರೀ ತಿಂ ಪಾಟ್ಯಾಂಕ್ ಲಾಗಾನಾಂತ್. ಮ್ಯಾಗ್ನೆಟಾಂಚಿ ಸಕತ್ ವಾಪರ್ನ್ ಚಲಂವ್ಚ್ಯೊ ರಯ್ಲಾ ಗಾಡಿಯೊ, ಪಾಟ್ಯಾಂಚ್ಯಾ ಆನಿ ರಯ್ಲಾಚ್ಯಾ ಪಂದ್ಲ್ಯಾ ಕುಶಿ ಮಧೆಂ ಅಂತರ್ ಆಸ್ಲ್ಯಾರೀ ಕಸಲ್ಯಾಚ್ ರಗ್ಳ್ಯಾಂವಿಣೆ ಚಲೊಂಕ್ ಸಕ್ತಾತ್ ಮಾತ್ ನ್ಹಯ್, ಹ್ಯೊ ಗಾಡಿಯೊ ಚಲ್ತಾನಾ, ವಿಮಾನಾ ಭಾಶೆನ್ ಕಾಂಯ್ಚ್ ಉಡಾನಾತ್‌ಲ್ಲೆ ತಸಲೆಂ ಸುಶೆಗಾಚೆಂ ಪಯ್ಣ್ ಕರ‍್ಯೆತಾ. ಚೀನಾ ಆನಿ ಜಪಾನಾಂತ್ ಅಸಲ್ಯಾ ರಯ್ಲ್ ಗಾಡಿಯಾಂಕ್ ಎದೊಳ್‌ಚ್ ವಾಪ್ರುಂಕ್ ಸುರು ಕೆಲಾಂ. 

ಮ್ಯಾಗ್ಲೆವ್ ರಯ್ಲ್ (Maglev Trains)

ಇಲೆಕ್ಟ್ರಿಕ್ ಕಾರಾಂಚಿ ಸುರ್ವಾತ್ ಕೆಲ್ಲ್ಯಾ ‘ಇಲೊನ್ ಮಸ್ಕ್’ ಹಾಣೆ, ‘ಹೈಪರ್ ಲೂಪ್’ (Hyperloop) ಮ್ಹಳ್ಳಿ, ಎಕಾ ನಳಾಂತ್ಲ್ಯಾನ್ ಪಯ್ಣ್ ಕರ್ಚಿ ನವಿ ಮಾಂಡಾವಳ್ ಸೊಧುನ್ ಕಾಡ್ಲ್ಯಾ. ಅಸಲ್ಯಾ ಮಾಂಡಾವಳಿಂತ್, ಮ್ಯಾಗ್ನೆಟಾಂ ಆನಿ ವಾರೆಂ ಪ್ರಮುಖ್ ಪಾತ್ರ್ ಖೆಳ್ತಾತ್. ಅಸಲ್ಯಾ ಪಯ್ಣಾಂತ್ ಎಕಾಮೆಕಾ ಖಂಚೇಯ್ ಲೊಂಕ್ಡಾ ಭಾಗ್ ಘಸ್ಟಾನಾಂತ್ ಜಾಲ್ಲ್ಯಾನ್, ಪಯ್ಣ್ ಸುಗಮ್ ಜಾತಾ ಮಾತ್ರ್ ನ್ಹಯ್, ದುರುಸ್ತೆಚ್ಯೆಂ ಕಾಮ್ ಭಾರಿಚ್ ಉಣೆಂ ಜಾತಾ. ಹಿ ಗಾಡಿ, ಎಕಾ ವ್ಹರಾಕ್ 1000 ಕಿಲೊಮೀಟರಾಂಚ್ಯಾಕೀ ಚಡಿತ್ ವೇಗಾನ್ ಚಲೊಂಕ್ ಸಕ್ತಾ ಮ್ಹಣ್ತಾನಾ, ವಿಮಾನಾ ತಿತ್ಲ್ಯಾಚ್ ವೇಗಾನ್ ತ್ವರಿತಾಯೆನ್ ಪಯ್ಣ್ ಸಂಪ್ತಾ ತೆಂ ಸರ್ವಾಂಕ್ ಪಸಂದೆಚೆಂ ಜಾವ್ನ್, ವಿಮಾನಾಂಚೆರ್ ಲೊಕಾನ್ ಪಯ್ಣ್ ಕರ್ಚ್ಯೆಂ ಉಣೆಂ ಜಾಂವ್ಕ್ ಸಾಧ್ಯ್ ಆಸಾ ಮಾತ್ರ್ ನ್ಹಯ್, ವಿಮಾನಾಂಚಾ ಜಳವಾಕ್ ಖರ್ಚೊಂಚ್ಯಾ ಪೆಟ್ರೊಲಾಚೊ ವಾಪರ್ ಉಣೊ ಜಾವ್ನ್, ವಾತಾವರಣಾಕ್ ಬರೆಪಣ್ ಜಾಂವ್ಕ್ ಸಾಧ್ಯ್ ಆಸಾ. ಎದೊಳ್ ಪ್ರಾಯೋಗಿಕ್ ರಿತಿರ್ ಚಲ್ಚಿ ಹಿ ಪಯ್ಣಾಚಿ ರೀತ್, ಜಾಗತಿಕ್ ವರ್ತುಲಾಂನಿ ಕುತೂಹಲ್ ಉಬ್ಜಂವ್ಕ್ ಸಕ್ಲ್ಯಾ.

ಹೈಪರ್ ಲೂಪ್ (Hyperloop Systems)

‘ಹೋವರ್‌ಕ್ರಾಫ್ಟ್’ (Hovercraft and Air-Cushion Vehicles) ಮ್ಹಣ್ ಆಪಂವ್ಚೆಂ ಆನ್ಯೇಕ್ ವಾಹನ್, ವಾರ‍್ಯಾಚಾ ಬಳಾರ್ ಚಲ್ಚೆಂ ಜಾವ್ನಾಸಾ. ಹೆಂ ಧರ್ನಿಚೆರ್ ಮಾತ್ ನ್ಹಯ್, ಉದ್ಕಾ ವಯ್ರ್‌ಯೀ ಚಲೊಂಕ್ ಸಕ್ತಾ.

ಆಧುನಿಕ್ ’ಹೋವರ್‌ಕ್ರಾಫ್ಟಾ’ ಚೊ, 1960 ಇಸ್ವೆಂತ್, ಆಸ್ಟ್ರೇಲಿಯಾಚ್ಯಾ ವಾರ‍್ಯಾ ಸೈನಿಕ್ ಧಳಾಂತ್ ಉದೆವ್ ಜಾಲ್ಲೊ. 1970 ಥಾವ್ನ್ 1980 ಶತಕಾಂ ಮಧೆಂ, ಆಸ್ಟ್ರೇಲಿಯಾಚಿ ಹಿ ಕಂಪೆನಿ, ಅಮೆರಿಕಾಕ್ ಪಾವ್ಲಿ ಆನಿ ಥಂಯ್ಸರ್ ಅಸಲ್ಯಾ ವಾಹನಾಂಚೆಂ ಉತ್ಪಾದನ್ ಸುರು ಜಾಲೆಂ. ಚಡಾವತ್ ಜಾವ್ನ್ ಆವ್ರಾಚ್ಯಾ, ಉಜ್ಯಾಚ್ಯಾ ಆನಿ ಝೊಡ್-ವಾರ‍್ಯಾಚ್ಯಾ ದೆಸ್ವಾಟೆಂನಿ, ಹೆರ್ ಖಂಚಿಂಯ್ ವಾಹನಾಂ ವಚೊಂಕ್ ಅಸಾಧ್ಯ್ ಜಾತಾನಾ, ಹಿಂ ಹೋವರ್‌ಕ್ರಾಫ್ಟಾಂ, ಭಾರಿಚ್ ಉಪ್ಕಾರಾಕ್ ಪಡ್ತಾತ್. ಸಂಸಾರಾರ್ ಸಬಾರ್ ಸರ್ಕಾರಾಂನಿ, ಹಿಂ ಎದೊಳ್‌ಚ್ಚ್ ಆಪ್ಣಾಯ್ಲ್ಯಾಂತ್. 

‘ಹೋವರ್‌ಕ್ರಾಫ್ಟ್’ (Hovercraft)

ಹ್ಯಾ ವಿವಿಧ್ ಸಾಧನಾಂ ಸಾ-ಸಾಂಗಾತಾಚ್, ರಬ್ಬರಾ ಬದ್ಲೆಕ್ ಹೆರ್ ವಸ್ತು ವಾಪರ್ನ್ ಟಯರಾಂ ಕರ್ಚಿ ಮಾಂಡಾವಳ್‌ಯೀ ಚಲೊನ್ ಆಸಾ. ಸೊಯಾ ಬೀನ್ಸಾಂ ಥಾವ್ನ್ ರಬ್ಬರಾ ಬರಿಚ್ ದಿಸ್ಚಿ ವಸ್ತ್ ಉತ್ಪಾದನ್ ಕರುಂಕ್ ಸಾಧ್ಯ್ ಜಾಲ್ಯಾ ಆನಿ ಹೆಂ ರಬ್ಬರ್ ಥೊಡ್ಯಾಚ್ ತೆಂಪಾನ್ ಕರ್ಗೊಂಕ್ ಸಕ್ತಾ ಮಾತ್ ನ್ಹಯ್, ವಾತಾವರಣಾಕ್ ಅಸಲ್ಯಾ ರಬ್ಬರಾ ವರ್ವಿಂ ಅಪಾಯ್ ನಾ ಮ್ಹಳ್ಳಿ ಏಕ್ ಸಂತೊಸಾಚಿ ಗಜಾಲ್.

ಆಜ್ ಏಕ್ ದುಕೊರ್ ಮಾರ್ನ್, ಸೆಜಾರ‍್ಯಾಂಕ್ ವಿಕ್ತಾನಾ ಜಾಲ್ಲೊ ಲಾಭ್ ಪಳೆವ್ನ್, ಫಾಲ್ಯಾ ದೋನ್ ದುಕೊರ್ ಮಾರ್ಚಿ ಆಶಾ ಉಬ್ಜೊಂಚಿ, ಮನ್ಶ್ಯಾಚಿ ಸೈಂಬಾ ಸವಯ್ ಮ್ಹಳ್ಳಿ ಗಜಾಲ್ ಆಮಿ ಜಾಣಾಂವ್. ತಶೆಂಚ್ ರೊದಾನ್ ಮನ್ಶ್ಯಾಚಾ ಆತುರಿತ್ ಸ್ವಭಾವಾಕ್ ಏಕ್ ವಿಶೇಸ್ ತಾಂಕ್ ದಿಲಿ ಆನಿ ಆಜ್ ಸಂಸಾರಾಂತ್ ಇತ್ಲಿ ಪ್ರಗತಿ ಪಳೆಂವ್ಕ್ ಮೆಳ್ಳಿ ಮ್ಹಳ್ಳಿ ಗಜಾಲ್ ಸರ್ವಾಂಕ್ ಅಭಿಮಾನಾಚಿ ತರೀ, ಹಿ ಪ್ರಗತಿ ಇತ್ಲ್ಯಾ ತ್ವರಿತಾಯೆನ್ ಜಾಂವ್ಚ್ಯಾ ಪಾಟ್ಲ್ಯಾನ್, ಮನ್ಶ್ಯಾನ್ ಹರ‍್ಯೇಕ್ ನಿವವ್ನ್ ಖಾಯ್ಜೆ ಮ್ಹಳ್ಳಿ ಮಾಲ್ಘಡ್ಯಾಂಚಿ ಬೂದ್‌ಬಾಳ್ ಮುಲ್ಯಾಕ್ ಪಡ್ಲಿ. ಆಪ್ಣಾಕ್ ಆಸ್ಚಾ ಚಡುಣೆ ಶೆಂಬರ್ ವರ್ಸಾಂಚಾ ಆವ್ಕಾ ಭಿತರ್, ಜಾತಾ ತಿತ್ಲಿ ಮಝಾ ಭೊಗ್ಚಿ ತಾನ್ ಲಾಗ್‌ಲ್ಲ್ಯಾ ಮನ್ಶ್ಯಾನ್, ಮುಕ್ಲ್ಯಾ ಪಿಳ್ಗೆಚಾ ಬರೆಪಣಾ ವಿಶಿಂ ಕುಸ್ಕುಟ್ ಚಿಂತ್ಲೆಂನಾ. ಹಾಚೊ ಪ್ರಭಾವ್ – ಮ್ಹೆಳೆಂ ಜಾಲ್ಲೆಂ ವಾರೆಂ, ಮ್ಹೆಳಿ ಜಾಲ್ಲಿ ಮಾತಿ, ಮ್ಹೆಳೆಂ ಜಾಲ್ಲೆಂ ಉದಕ್ ಆನಿ ನಾಂವ್ ನಾತ್‌ಲ್ಲಿ ಪಿಡಾ-ಶಿಡಾ.

ಸಾರ್ಕೆಂ ಸಮ್ಜೊಂಚೆಂ ಪ್ರೇತನ್ ಕೆಲ್ಯಾರ್, ಎದೊಳ್ ಪ್ರಗತೆಕ್ ಕಾರಾಣ್ ಜಾಲ್ಲ್ಯಾ ರೊದಾ ಥಾವ್ನ್ ಆಮಿ ವೆಗ್ಳಾಚಾರ್ ಘೆವ್ನ್, ವಯ್ರ್ ಉಲ್ಲೇಖ್ ಕೆಲ್ಲೆ ತಸಲ್ಯಾ ಆಧುನಿಕ್ ಸಂಚಾರ್ ರಿತಿಂಚಿ ವೆವಸ್ಥಾ ಜಾರಿಯೆಕ್ ಹಾಡ್ಚಿ ಗರ್ಜ್ ಆಸಾ ಮ್ಹಳ್ಳಿ ಗಜಾಲ್ ಸಮ್ಜೊಂಕ್ ಚಡಿತ್ ತ್ರಾಸ್ ಭೊಗಾನಾಂತ್. ಪುಣ್ ಅಸಲ್ಯೊ ನವ್ಯೊ ರಿತಿ ಭಾರಿಚ್ ಮ್ಹಾರ್ಗಾಯೆಚ್ಯೊ ಮ್ಹಳ್ಳಿ ಗಜಾಲ್ ಏಕ್ ವ್ಹಡ್ಲೆಂ ಸಮಸ್ಯೆಂ ಮ್ಹಣ್ ಭೊಗ್ತಾ ತರೀ, ಆಜ್-ಕಾಲ್ ಸಂಸಾರಾಚಾ ರಾಷ್ಟ್ರಾಂನಿ, ಝುಜಾಂ ಖಾತಿರ್ ಖರ್ಚುಂಚೊ ಪಯ್ಸೊಚ್ ಲೆಕಾಕ್ ಧರ್ಲ್ಯಾರ್, ತ್ಯಾಚ್ ಪಯ್ಶ್ಯಾಂನಿ ಲೊಕಾಕ್ ಆನಿ ಪ್ರಕೃತೆಕ್ ಬರೆಪಣ್ ಕರ‍್ಯೆತ್ ಮ್ಹಳ್ಳಿ ಗಜಾಲ್ ಸತ್ ಮ್ಹಳ್ಳಿ ಸಂಗತ್ ಸಮ್ಜೊಂಚಿ ಗರ್ಜ್‌ಯೀ ಆಸಾ.

■ ಸುನಂದ್