ಕಾಂಯ್ ಹಾಂವ್ ಪಾಂಚ್ವ್ಯಾ ವಾ ಸವ್ಯಾ ಕ್ಲಾಸಿಂತ್ ಶಿಕ್ತಾಲೊಂ ಕೊಣ್ಣಾ. ತೆದ್ನಾಂ ಆಮಾ ದುಬ್ಳ್ಯಾಂಚ್ಯಾ ಘರಾಂನಿ ಮನೋರಂಜನ್ ಮ್ಹಳ್ಳ್ಯಾರ್ ಶೋರ್ಟ್ ಆನಿ ಮೀಡಿಯಮ್ ವೇವ್ ಅಶೆಂ ದೋನ್ ಬ್ಯಾಂಡಾಂಚೊ ಬೆಟ್ರೆ ಸೆಲ್ಲಾಂಚೊಂ ರೇಡಿಯೊ. ಮೀಡಿಯಮ್ ಗ್ರೇಸ್ತಾಂಚ್ಯಾ ಘರಾ ಸ್ಟೀರಿಯೊ ಆನಿಕೀ ಗ್ರೇಸ್ತಾಂಚ್ಯಾ ಘರಾ ಡೆಕ್. ಆಮ್ಚ್ಯಾ ದೋನ್ ಬ್ಯಾಂಡಾಂಚ್ಯಾ ರೇಡಿಯೋಕ್ ಏಕ್ ಸತ್ರೆಚ್ಯಾ ಕಾಡಿಯೆಪರಿಂ ಏಕ್ ದೊಡ್ಚೆಂ ಅಂಟೇನಾ ಆನಿ ತೆಂ ಅಂಟೇನಾ ವೊಡ್ಲ್ಯಾರ್ ಮಾತ್ ಲಾಗ್ತಾಲೆಂ ರೇಡಿಯೊ ಸ್ಟೇಶನ್ – ರೇಡಿಯೊ ಸಿಲೊನ್ ಮ್ಹಳ್ಯಾರ್ ಶ್ರೀಲಂಕಾ ಬ್ರಾಡ್ಕಾಸ್ಟೀಂಗ್ ಕೊರ್ಪೊರೇಶನ್.
ದನ್ಪಾರಾಂಚ್ಯಾ 1.30 – 2.00 ವ್ಹರಾಂ ಪರ್ಯಾಂತ್ ಮಂಗ್ಳುರ್ಚ್ಯಾ ಆಕಾಶವಾಣಿರ್ ಕನ್ನಡ ಚಿತ್ರಗೀತೆ ಜಾತೆಚ್ ಇಂಗ್ಲೀಷಾಂತ್ ಖಬ್ರೊ. ಆನಿ ಆಯಿನ್ನ್ ವೆಳಾ ಆಮಿ ಆಂಟೆನಾ ವೊಡ್ತೆಲ್ಯಾಂವ್ ಆನಿ ರೇಡಿಯೊಚೆಂ ಬ್ಯಾಂಡ್ ಬದ್ಲಿತೆಲ್ಯಾಂವ್. ಆನಿ ತವಳ್ ಯೆತಾಲಿ ಸಿಸು ಸಮಿ ಆನಿ ವಾಳ್ತಾಲೆಂ ಹೆನ್ರಿಯಾಬಾನ್ ಘಡ್ಲ್ಲೆಂ ಆನಿ ಹೆನ್ರಿಯಾಬಾ ಸಾಂಗಾತಾ ಹೆಲೆನ್ ಡಿ’ಕ್ರೂಜ್ ಹಿಣೆ ಗಾಯಿಲ್ಲೆಂ ಎವರ್ಗ್ರೀನ್ ‘ಕಾತ್ರಿನಾ’ ಪದ್. ಹೆಂ ಪದ್ ರೇಡಿಯೊ ಸಿಲೋನಾಚೆರ್ ಸದಾಂನೀತ್ ಮ್ಹಳ್ಳೆಪರಿಂ ಫಾಯ್ಸ್ ಜಾತಾಲೆಂ ಆನಿ ಸದಾಂಯ್ ಆಮ್ಕಾಂ ತೆಂ ಆಯ್ಕೊಂಚೆಂ ಮ್ಹಳ್ಯಾರ್ ಎಕಾ ಥರಾಚೊ ಆನಂದ್ , ಕೊಂಕ್ಣಿ ಪದ್ ಮ್ಹಣ್ಚೊ ಆಭಿಮಾನ್. ಮ್ಹಜ್ಯಾ ಸೀಮಿತ್ ಸಮ್ಜಣೆ ಪರ್ಮಾಣೆ ಆಕಾಶವಾಣಿರ್, ತೇಂಯ್ ದೆಶಾಚ್ಯಾ ಗಡಿಭಾಯ್ಲ್ಯಾ ಆಕಾಶವಾಣಿರ್, ಕೊಂಕ್ಣಿ ಪದ್ ಫಾಯ್ಸ್ ಕೆಲ್ಲಿ ಕೀರ್ತ್ ಬೋವ್ಶಾ ಹೆನ್ರಿಯಾಬಾಕ್ ಫಾವೊ ಜಾತಾ. (ಮ್ಹಜಿ ಮಾಹೆತ್ ಚುಕಿಚಿ ತರ್ ದಯಾಕರುನ್ ಮ್ಹಾಕಾ ಸಾರ್ಕೆಂ ಕರಾ.)
ಆಜ್ – ಹ್ಯಾ ಎವರ್ಗ್ರೀನ್ ಪದಾಚೊ ಘಡ್ಣಾರ್ ಹೆನ್ರಿಯಾಬ್ ಆಮ್ಕಾಂ ಸಾಂಡುನ್ ತಾಚ್ಯಾ ಸರ್ಗಿಂ ಪಯ್ಣಾಕ್ ಗೆಲಾ. ಆಗೋಸ್ತಾಚ್ಯಾ 14 ತಾರಿಕೆರ್ ಮುಂಬಯಾಂತ್ ಆಪ್ಲ್ಯಾ 83 ವರ್ಸಾಂಚ್ಯಾ ಪ್ರಾಯೆರ್ ತೊ ಹ್ಯಾ ಸಂಸಾರಾಕ್ ಆಂತರ್ಲೊ. ತಾಚ್ಯಾ ಮರ್ಣಾ ಸಂಗಿಂ ಮಂಗ್ಳೂರಿಯನ್ ಕೊಂಕ್ಣೆಂತ್ಲ್ಯಾ ಸಂಗೀತ್ ಕಾಳಾಂತ್ಲೊ ಎಕ್ ಯುಗ್ ಸಂಪ್ಲೊ ಮ್ಹಣೊನ್ ಸಾಂಗ್ಲ್ಯಾರೀ ಅತಿಶಯೋಕ್ತಿ ಜಾಂವ್ಚಿ ನಾ ಕೊಣ್ಣಾ. ಎಕಾ ಕುಶಿನ್ ವಿಲ್ಫಿಯಾಬಾಚಿ ಪದಾಂ ತರ್ ಆನ್ಯೇಕಾ ಕುಶಿನ್ ಜೆರೊಮಾಚಿಂ ಪದಾಂ. ಹಾಂಚ್ಯಾ ದೊಗಾಂಚ್ಯಾ ಜಬರದಸ್ತ್ ಲೊಕಾಮೊಗಾಳಾಯೆ ಮಧೆಗಾತ್ ಹೆನ್ರಿಯಾಬಾನ್ ಕೊಂಕ್ಣಿ ಸಂಗೀತ್ ಕ್ಷೇತ್ರಾಂತ್ ಆಪ್ಲೀಚ್ ಮ್ಹಣ್ಚಿ ಏಕ್ ಅಥ್ವಿಚ್ ಮ್ಹೊರ್ ಮಾರ್ಲ್ಲಿ. ತಾಚ್ಯಾ ಪದಾಂನಿ ಹೆನ್ರಿಯಾಬಾ ಸಾಂಗಾತಾ ಹೆಲೆನ್ ಡಿ’ಕ್ರೂಜ್ ಆನಿ ದೊ| ಆಪರ್ಣಾ ಮಾಯೆಕಾರ್ ಸೊಡ್ಲ್ಯಾರ್ ಹೆರಾಂನಿ ಸಾಂಗಾತ್ ದಿಲ್ಲೊ ಭೊವ್ ಉಣೊ.
ಚಿಕ್ಮಗ್ಳುರ್ಚ್ಯಾ ಬಸ್ರಿಕಟ್ಟೆ ತಸಲ್ಯಾ ಲ್ಹಾನ್ ಗಾಂವಾ ಥಾವ್ನ್ ಆಯಿಲ್ಲೊ ಜಾಲ್ಯಾರೀ, ಬೊಂಬೊಯ್ ಮ್ಹಾಶೆರಾಕ್ ಪಾವೊನ್, ತ್ಯಾ ಕಾಳಾರ್ ಉಂಚ್ಲೆಂ ಶಿಕಪ್ ಜೋಡ್ನ್ (ತಾಚೆಲಾಗಿಂ ಕಾನುನೀ ಸನದ್ಯೀ ಆಸ್ಲ್ಲೊ ಉಡಾಸ್) ಬರ್ಯಾ ಕಂಪ್ಣೆಂತ್ ಉಂಚ್ಲ್ಯಾ ಹುದ್ದ್ಯಾರ್ ತೋ ಕಾಮಾರ್ ಆಸ್ಲ್ಲೊ. ಎಚ್ಎಮ್ವಿ ತಸಲ್ಯಾ ಕಂಪೆನಿನಿ ತಾಚಿಂ ಪದಾಂ ಫಾಯ್ಸ್ ಕೆಲ್ಲಿಂ. ಫಕತ್ ಕೊಂಕ್ಣಿ ಸಂಗೀತ್ ಮಾತ್ ನ್ಹಂಯ್, ಕೊಂಕ್ಣೆಚ್ಯಾಚ್ ಮಟ್ಟಾಕ್ ಸಾಂಗ್ಚೆಂ ತರ್ – ಹಿ ಏಕ್ ಬೋವ್ ವ್ಹಡ್ ಗಜಾಲ್ ಮಾತ್ ನ್ಹಂಯ್ ಆಜ್ ಏಕ್ ದಾಕ್ಲೊ. 1964 ವ್ಯಾ ವರ್ಸಾ ಬೊಂಬೊಯ್ ಆಕಾಶವಾಣಿ ಥಾವ್ನ್ ಎಕಾ ಸಂಗೀತ್ಗಾರಾನ್ ತಾಳೊ ಬಸವ್ನ್ ಘಡ್ಲಲೆಂ ಪಯ್ಲೆಂ ಸ್ವತಂತ್ರ್ ಕೊಂಕ್ಣಿ ಪದ್ ಪ್ರಸಾರ್ ಕೆಲ್ಲೊ ದಾಕ್ಲೋಯ್ ಹೆನ್ರಿಯಾಬಾಚ್ಯಾ ನಾಂವಾರ್ ಆಸಾ. ತಾಚೆಪಯ್ಲೆಂ ಕೊಂಕ್ಣಿ ಸಾಂಪ್ರದಾಯಿಕ್ ವಾ ಲೋಕ್ಗಿತಾಂ ‘ಕಾಂತಾರಾಂ’ ನಾಂವಾನ್ ಪಣಜಿ, ಧಾರ್ವಾಡ್ ಆನಿ ಬೊಂಬೊಯ್ ಆಕಾಶವಾಣಿ ಥಾವ್ನ್ ಪ್ರಸಾರ್ ಜಾಲ್ಲಿಂ ಆಸಾತ್.
ಹೆನ್ರಿಯಾಬ್ ಆನಿ ಮ್ಹಜಿ ಒಳೊಕ್ ಪಾಟ್ಲ್ಯಾ ದೋನ್ ತೆ ತೀನ್ ದಶಕಾಂಚಿ. ಉಗ್ಡಾಸಾಚೊ ಭಂಡಾರ್ ತೊ. ತಾಚೆ ಲಾಗಿಂ ಉಲೊವ್ನ್ ಬಸ್ತಾನಾ ವೇಳ್ ಪಾಶಾರ್ ಜಾಲ್ಲೊಚ್ ಕಳಾನಾತ್ಲ್ಲೊ. ಸಾಂಗಾತಾಚ್ ತಾಚೆ ಥಾವ್ನ್ ಜಾಯ್ತೆಂ ಶಿಕೊಂಕ್ ಮೆಳ್ತಾಲೆಂ. ತಾಚ್ಯಾ ನಾಯ್ಟಾ ವೆಳಿಂ ಮೈಕ್ ದೋನಿ ಹಾತಾಂನಿ ಕಾಣ್ಘೆವ್ವ್ ಘಾಲ್ಚೆ ತಾಚೆ Signature Steps ಕೆದ್ನಾಂಯ್ ವಿಸ್ರೊಂಕ್ ಜಾಯ್ನಾಂತ್ ತಸಲೆ. ಬಾಯ್ಕಲಾ ಹೊಲಾಂತ್ ತಾಚ್ಯಾ ‘ಆಬಾಚೊ ಗುಂಡು’ ಪದಾಕ್ ಮೆಳ್ಲ್ಲ್ಯೊ ತ್ಯೊ ಶಿಳೊಣ್ಯೊ ಆನಿ ತಾಳಿಯೊ ಅಜೂನ್ ಮ್ಹಜ್ಯಾನ್ ವಿಸ್ರೊಂಕ್ ಜಾಯ್ನಾಂತ್ ತಸಲ್ಯೊ. ದೋನ್ ಪಾವ್ಟಿಂ ತಾಚೆಂ ಸಂದರ್ಶನ್ ಘೆಂವ್ಚೆಂ ಭಾಗ್ ಮ್ಹಾಕಾ ಫಾವೊ ಜಾಲಾಂ. ಕ್ಲೆಮೆಂಟ್ ಲೋಬೊ ಆನಿ ಹೆನ್ರಿ ಡಿ’ಸಿಲ್ವಾ ವಿಶಿಂ ತಾಕಾ ಉಲಯಿಲ್ಲ್ಯಾ ತಿತ್ಲೆಂ ಪಾವಾನಾತ್ಲ್ಲೆಂ. ಆರ್ವಿಲ್ಯಾ ವರ್ಸಾಂನಿ ಡಯಾನ್ ಡಿ ಸೋಜಾಚೊ ಸಂಘಟಕ್ ಜಾವ್ನ್ ವಾವ್ರ್ , ಡೊನಿ ಕೊರೆಯಾ – ಆನಿ ಆಶಾ ಕೊರೆಯಾ ಜೊಡ್ಯಾಚೆಂ ಕಲಾ ದೆಣೆಂ ಹ್ಯಾ ವಿಶಿಂಯ್ ಬರೀಚ್ ತೊಕ್ಣಾಯ್ ತೋ ಕರ್ತಾಲೊ.
ತಾಚ್ಯಾ ಪದಾಂನಿ ಏಕ್ ಸುಂದರ್ ಕಾಣಿ ಆಸ್ತಾಲಿ. ತಿ ಕಾಣಿ ಮ್ಹಜ್ಯಾ ಆನಿ ತುಜ್ಯಾ ಸುತ್ತುರಾಂತ್ ಘಡೊನ್ ಆಸ್ಚೀಚ್ ಜಾಲ್ಲ್ಯಾನ್ ತೀ ಕಾಣಿ ಆಮ್ಚ್ಯಾ ಕಾಳ್ಜಾಕ್ ಲಾಗ್ತಾಲಿ. ಜಾಂವ್ದಿ ತಿ ಫುಲ್ವಾಲಿ , ಆಮಿ ದೊಗಿ ಸೆಜಾರಾ , ಆಲಿಸ್ ಬಾಯ್ , ಆಬ್ದುಲ್ಲಾ , ಶರ್ಲಿ , ಝೀನಾ , ಫಿಲೊಮೆನಾ , ಲಿಲ್ಲಿ , ಲೊಣ್ಚೆಂ , ಡಿಸ್ಕೊ , ಬೊಂಬಯ್ ಶಹರ್ , ಘರಾಚೊ ದಿವೊ , ಕ್ಯಾರೊಲಿನ್ , ಚಣೆವಾಲಿ, ಡೊರಿನಾ , ಚಂದ್ರೆಮ್ ಉದೇವ್ನ್ ಆಯ್ಲೊ , ಚೆಡುಂ ಬೊಂಬಯ್ಚೆಂ ಆನಿ ಹೆರ್ ಪದಾಂ ಪಾಟ್ಲ್ಯಾನ್ ಆಮ್ಕಾಂ ಸಮ್ಜೊಂಚ್ಯಾ ಸಾರ್ಕಿ ಕಾಣಿ ತಾಣೆ ಪದಾಂ ರುಪಿಂ ಗುಂತುನ್ ದಿಲ್ಯಾ. ಪರಿಣಾಮ್ ಜಾವ್ನ್ ಹೆನ್ರಿಯಾಬಾಚಿಂ ಪದಾಂ ಆತಾಂಯ್ ಆಮ್ಚ್ಯಾ ವೊಂಟಾಂ ವಯ್ರ್ ಖೆಳ್ತಾತ್ , ಕಾಜಾರಾ ಮಾಟೊವ್ ಆನಿ ಹೆರ್ ಸಂಭ್ರಮಾಂನಿ ಆಮ್ಕಾಂ ನಾಚಯ್ತಾತ್ , ಕಾಳ್ಜಾಂತ್ ಮೊಗಾಚಿಂ ಉಡ್ಕಾಣಾಂ ಘಾಲಾಯ್ತಾತ್ , ಆವಯ್ಚೊ ಮೋಗ್ ಆನಿ ತ್ಯಾಗ್ ನಿಯಾಳುನ್ ಆಮ್ಚ್ಯಾ ಕರ್ತವ್ಯಾಂಕ್ ಜಾಗಿಂ ಕರ್ತಾತ್.
ಹೆರಾಂಚ್ಯಾ ಕಲೆಕ್ , ತಾಂಚ್ಯಾ ತಾಲೆಂತಾಂಕ್ ಹಲ್ಕ್ ಕರ್ಚ್ಯಾ ಉದ್ದೇಶಾನ್ ಕೊಂಕ್ಣೆಂತ್ಲ್ಯಾ ಸ್ವ ಘೋಷಿತ್, Highly Intellectual ವರಯ್ಣಾರಾಂನಿ ಹೆನ್ರಿಯಾಬಾಚಿಂಯ್ ಪದಾಂ ಭೊವ್ ಸಾದಿಂ, ತಿಂ ಸ್ಪರ್ದ್ಯಾಂಕ್ ಗಾಂವ್ಕ್ ಯೋಗ್ಯ್ ನಂಯ್ ಮ್ಹಳ್ಳೆಂ ‘ತೀರ್ಪ್’ ದಿಲ್ಲೆಂ. ಪುಣ್ ಕಿತೆಂ ಕರ್ಚೆಂ … ಸ್ಪರ್ದ್ಯಾಂನಿ ಆಡಾವ್ಯೆತ್ ಪೂಣ್ ಕಾಳ್ಜಾಂ ಮನಾಂನಿ ವೊಡಾ ರುಕಾಚ್ಯಾ ಪಾಳಾಂಬರಿ ರೊಂಬೊನ್ ಗೆಲ್ಲ್ಯಾ ಮಧುರ್ ಪದಾಂಕ್ ಭಾಯ್ರ್ ವೊಡ್ಚೆಂ ತರೀ ಕಶೆಂ ? ಪದಾಂತ್ ಗ್ರೇಸ್ತ್ಕಾಯ್ ನಾತ್ಲ್ಲಿ ತರ್ ‘ಕಾತ್ರಿನ್’ ಆರ್ಭಿ ದರ್ಯೊ ಉತ್ರೊನ್ ಶ್ರೀಲಂಕಾ ಪಾವ್ತೆಂ ನಾ ಆಸ್ಲ್ಲೆಂ. ಥಂಯ್ ಥಾವ್ನ್ ಸಂಸಾರಾಚ್ಯಾ ಲೊಕಾಂಚ್ಯಾ ಜಿಬಾಂನಿ ನಾಚ್ತೆಂ ನಾ ಆಸ್ಲ್ಲೆಂ. ವಿಪರ್ಯಾಸ್ ಮ್ಹಳ್ಯಾರ್ ಹ್ಯಾ ವರಯ್ಣಾರಾಂನಿ High Standard ಮ್ಹಣ್ ವೊಲಾಯಿಲ್ಲಿಂ ಪದಾಂ ಉಗ್ತ್ಯಾನ್ ಗಾಂವ್ಕ್ ಜಾಯ್ ತರ್ ಸಾಹಿತ್ಯ್ ಸೊಧುನ್ ವಚೊಂಕ್ ಜಾಯ್! ಪುಣ್ ಹೆನ್ರಿಯಾಬಾಚ್ಯಾ ಪದಾಂಚೆಂ ಸಾಹಿತ್ಯ್ ಪದ್ ಸುರು ಕೆಲ್ಯಾರ್ ಪುರೊ – ಸಹಜ್ಪಣಿ ವ್ಹಾಳೊನ್ ಯೆತಾ.
ಥೊಡ್ಯಾಂಕ್ ಆಪ್ಣಾಚೆಂ ಮಾತ್ ಶ್ರೇಷ್ಠ್, ಹೆರಾಂಚೆಂ ನಿಕೃಷ್ಠ್ ಮ್ಹಣ್ಚಿ ಏಕ್ ಪಿಡಾ ತರ್, ಆನಿ ಥೊಡ್ಯಾಂಕ್ ಹಾಂವ್ ಮಾತ್ ತಾಚೆ ವಿಶ್ಯಾಂತ್ ಚಿಂತ್ತಾಲೊಂ, ಹೆರಾಂಕ್ (ತಾಚ್ಯಾ ಕುಟ್ಮಾಕೀ) ತಾಚೆಂ ಪಡೊನ್ ವಚೊಂಕ್ ನಾ ಮ್ಹಣ್ ಬಿಂಬಿತ್ ಕರ್ಚಿ ಆನ್ಯೇಕ್ ವಿಚಿತ್ರ್ ಪಿಡಾ. ಹಿ ಪಿಡಾ ಹೆನ್ರಿಯಾಬಾಚ್ಯಾ ಮರ್ಣಾಚ್ಯಾ ಪಯ್ಲೆಂ ಥೊಡ್ಯಾಂ ಥಂಯ್ ವಿಪ್ರೀತ್ ಚಾಳ್ವಾಲಿ. (ಹೆ ವಿಶ್ಯಾಂತ್ ಕಿಟಾಳಾರ್ ಆಮಿಗ್ ಕಿಶೂ, ಬಾರ್ಕುರಾನ್ ಬರಯಿಲ್ಲೆಂ ಲೇಖನ್ ವಾಚ್ಯೆತ್)
ಹೆನ್ರಿಯಾಬ್ ದೆವಾದೀನ್ ಜಾಂವ್ಚ್ಯಾ ಥೊಡ್ಯಾಚ್ ದಿಸಾಂ ಪಯ್ಲೆಂ ತಾಚಿ ಘರಾಂತ್ ಬಸೊನ್ ಆಸ್ಚಿ ತಸ್ವೀರ್ ಸಾಮಾಜಿಕ್ ಜಾಳಿ ಜಾಗ್ಯಾಂನಿ ಪಾಯ್ಸ್ ಜಾಲಿ. ಕೊಣೆ ಹೆನ್ರಿಯಾಬಾಚ್ಯಾ ಅಭಿಮಾನಿನ್ ತಾಚಿ ಭಲಾಯ್ಕೆ ಪರಿಸ್ಥಿತಿ ಸಮ್ಜೊನ್ ತಾಚ್ಯಾ ಖಾಸ್ ಮನ್ಶಾಂ ಸಂಗಿ ತಿ ಖಾಸ್ಗೆನ್ ವಾಂಟುನ್ ಘೆತ್ಲ್ಲಿ ಜಾಂವ್ಕ್ ಪುರೊ. ಪುಣ್ ಆಮ್ಚ್ಯಾ ಜಾಯ್ತ್ಯಾ ಸ್ವ ಘೋಷಿತ್ ಇಂಟಲೆಕ್ಚುವಲಾಂನಿ ಹೆನ್ರಿಯಾಬಾಚಿ ಸಂಪೂರ್ಣ್ ಜವಾಬ್ದಾರಿ ಆಪ್ಣೆಂಚ್ ಘೆತ್ಲ್ಯಾ ಮ್ಹಳ್ಳ್ಯಾಬರಿ ತೀ ತಸ್ವೀರ್ ‘ವೈರಲ್’ ಕರುನ್ ತಾಂಚಿ ವಿಕೃತ್ ಮನಾಸ್ಥಿತಿ ಸಂಸಾರಾಕ್ ದಾಕಯ್ಲಿ.
ಹರ್ ಮನ್ಶ್ಯಾಕ್ ಏಕ್ ಖಾಸ್ಗಿ ಜಿವಿತ್ ಆಸ್ತಾ ಆನಿ ತ್ಯಾ ಜಿವಿತಾಕ್ Privacy ಆಸ್ತಾ. ತಾಚೆರ್ ಸವಾರಿ ಕರುಂಕ್ ಆಮ್ಕಾಂ ಕಸಲೊಚ್ ಅಧಿಕಾರ್ ನಾ, ಹಕ್ಕ್ಯೀ ನಾ ಮ್ಹಣ್ಚೆಂ ಸರಳ್ ಚಿಂತಪ್ ಹಾಂಚ್ಯಾ ಮತಿಕ್ ವಚೊಂಕ್ ನಾ. ಹ್ಯಾ ವಿಶಿಂ ತಾಚ್ಯಾ ಕುಟ್ಮಾಕ್ ದುಕ್ಲಾಂ ಮ್ಹಳ್ಳಿ ಖಬರ್ ಆಸಾ. ದುರಾದೃಷ್ಟ್ ಮ್ಹಳ್ಳ್ಯಾರ್ ತೊ ಸರ್ಲ್ಲ್ಯಾ ಉಪ್ರಾಂತ್ ತಾಚ್ಯಾ ಮರ್ಣಾಕ್ ತಾಚೆ ವಿಶ್ಯಾಂತ್ ಇತ್ಲಿ ಫಿಕಿರ್ ದಾಕಯಿಲ್ಲೆ ಹೆ Viral Masters ಜಾಂವ್ದಿ, ಸಂಘಟನಾಂ ಜಾಂವ್ದಿ ಕೊಣೀ ಹಾಜರ್ ಜಾಲ್ಲೆಂ ದಿಸುನ್ ಯೇನಾ.
ಹೆಂ ಕಶೆಂಯ್ ಜಾಲೆಂ, ಆತಾಂ ಹೆನ್ರಿಯಾಬಾಚ್ಯಾ ಮರ್ಣಾ ಉಪ್ರಾಂತ್ ಅನ್ಯೇಕಾ ನಮೂನ್ಯಾಚಿ ಪಿಡಾ ಸುರು ಜಾಲ್ಲಿ ದಿಸೊಂಕ್ ಲಾಗ್ಲ್ಯಾ. ತೊ ಸರೊನ್ ತಾಚ್ಯಾ ಫೊಂಡಾ ವಯ್ರ್ ದೋನ್ ದಿಸಾಂಚೊ ಪಾವ್ಸ್ ಸಯ್ತ್ ಪಡೊಂಕ್ ನಾ, ಬೊಲ್ತ್ಯಾಚ್ ಗೃಹಾಂತ್ ಜಿಯೆಂವ್ಚೊ ಲೋಕ್ ಆಪ್ಲಿಂ ಸಾಮಾಜಿಕ್ ಹ್ಯಾಂಡಲಾಂ ಚ್ಯಾರ್ ಲೈಕ್ಸ್ ಆನಿ ಶೇರ್ ಆಪ್ಣಾವ್ನ್ ಗಿರೇಸ್ತ್ ಕರ್ಚ್ಯಾ ಉದ್ದೇಶಾನ್ ಹೆನ್ರಿಯಾಬಾಚ್ಯಾ ಪದಾಚೇರ್ ರುಕಾಕ್ ಸುತ್ತು ಘಾಲ್ನ್ ನಾಚೊಂಕ್ ಲಾಗ್ಲ್ಯಾತ್. ಜರ್ ಆಪ್ಲ್ಯಾಚ್ ಕುಟ್ಮಾಚೊ ಕೋಣ್ ಸಾಂದೊ ಅಂತರ್ಲೊ ಜಾಲ್ಯಾರ್ ಹಿಂ ಆಶೆಂಚ್ ನಾಚ್ತಿಂ?
ಹೆನ್ರಿಯಾಬಾನ್ ಜಾಯ್ತಿಂ ಪದಾಂ ಘಡ್ಲ್ಯಾಂತ್ ತರೀ ತಾಕಾ ತಾಚ್ಯಾ ಹರ್ಯೆಕಾ ಪದಾ ವಯ್ರ್ ತಾಕಾ ವರ್ತೊ ಆಭಿಮಾನ್ ಆಸ್ಲೊ. ಆಪ್ಲ್ಯಾ ಪದಾಂಕ್ ತೋ ಭುರ್ಗ್ಯಾಂ ಪರಿಂ ದೆಕ್ತಾಲೊ. ಮ್ಹಾಕಾ ಪದಾಂ ಜಮೊ ಕರ್ಚಿ ಪಿಸಾಯ್ ಆಸ್ಲ್ಲ್ಯಾನ್ ತಾಚ್ಯಾ ಪದಾಂಚೆ Details ವಿಚಾರ್ಲ್ಯಾರ್ , ಮ್ಹಜಿ ತಾಕಾ ಬರ್ಯಾನ್ ವ್ಹಳೊಕ್ ಆಸ್ಲ್ಲಿ ತರೀ “They are my Private Property , I can’t give” ಮ್ಹಣೊನ್ ಶೀದಾ ಸಾಂಗ್ತಾಲೊ. Privacy ಕ್ ಮಾನ್ ದಿಂವ್ಚ್ಯಾ ಎಕಾ ಉತ್ತೀಮ್ ಕಲಾಕಾರಾಚ್ಯಾ ಖಾಸ್ಗಿಪಣಾ (Privacy) ಕ್ ತಾಚ್ಯಾ ಮರ್ಣಾ ಪಯ್ಲೆಂ ಆನಿ ಉಪ್ರಾಂತ್ ಮಾನ್ ದಿಂವ್ಚೊ ಕಾಯ್ದೊ ಆಮ್ಕಾಂ ಬಾಂದ್ತಾ ಮ್ಹಳ್ಳೆಂ ಆಮಿ ವಿಸ್ರಾನಾಯೆ.
ಪೂಣ್ ಮ್ಹಾಕಾ ಆಶೆಂಯ್ ಭೊಗ್ತಾ; ಹೆನ್ರಿಯಾಬಾಕ್ ಮ್ಹಾಕಾ ವಾ ತಾಚ್ಯಾ ಪದಾಂಚೊಂ ಅಭ್ಯಾಸ್ ಕರ್ತೆಲ್ಯಾ ಹೆರ್ ಕೊಣಾಕ್ ತಾಚ್ಯಾ ಪದಾಂಚೆಂ ವಿವರ್ ದಿಲ್ಲೆ ತರ್ ಫುಡಾರಾಂತ್ ಕಾಂಯ್ ಅಧ್ಯಯನಾಕ್ ಗರ್ಜೆಕ್ ಪಡ್ತೆ ಕೊಣ್ಣಾ. ದೆಕುನ್ ಹಾವೆಂ ಜಾಯ್ತ್ಯಾ ಪದಾಂ ಘಡ್ಣಾರಾಂಕ್ ಸಾಂಗ್ಲ್ಲೆಂ ಆಸಾ – ತುಮ್ಚಿಂ ಪದಾಂ ಸಾಮಾಜಿಕ್ ಜಾಳಿ ಜಾಗ್ಯಾಂನಿ ಶಾಸ್ವತ್ ಕರುನ್ ದವರಾ ಮ್ಹಣೊನ್. ಆಮ್ಚೆ ಬರ್ಯಾಂತ್ಲೆ ಬರೆ ಪದಾಂ ಘಡ್ಣಾರ್ ಆಮ್ಕಾಂ ಸಾಂಡುನ್ ಗೆಲ್ಯಾತ್. ಸಾಂಗಾತಾಚ್ಚ್ ತಾಂಚಿಂ ಪದಾಂ ಹಳ್ತಾರ್ ಮಾಜ್ವೊನ್ ವೆತೇ ಆಸಾತ್. ದಾಕ್ಲ್ಯಾಕ್ ಪಿ. ಎಚ್. ಪಿಂಟೊ, ಹೆನ್ರಿ ಟಿ ಡಿ ಸೊಜಾ, ಮಿಕ್ ಮ್ಯಾಕ್ಸ್, ವಿಕ್ಟರ್ ಕೊನ್ಸೆಸೊ ಆನಿ ಹೆರ್ ಥೊಡೆ. ಹೆನ್ರಿಯಾಬಾಚ್ಯಾ ಪದಾಂಕ್ ತಶೆಂ ಜಾಯ್ನಾತ್ಲ್ಲ್ಯಾ ಬರಿ ತಾಚೆಂ ಕುಟಾಮ್ ಜೊಕ್ತಿಂ ಮೆಟಾಂ ಘೆತಾಲೆಂ ಮ್ಹಣ್ ಹಾಂವ್ ಭರ್ವಾಸ್ತಾಂ.
ಹೆನ್ರಿಯಾಬ್ ಆಮ್ಕಾಂ ಸೊಡ್ನ್ ಗೆಲಾ. ಪುಣ್ ತಾಚೆಂ ಕಾತ್ರಿನ್ ಆಮ್ಚ್ಯಾ ಸಾಂಗಾತಾಚ್ ಆಸ್ತಾಲೆಂ. ಹೆನ್ರಿಯಾಬ್ ಆಮ್ಕಾಂ ಸೊಡ್ನ್ ಗೆಲಾ. ಆಮಿ ದೋಗಿ ಸೆಜಾರಿ ಜಾವ್ನ್ಂಚ್ ಉರ್ತೆಲ್ಯಾಂವ್. ಚಣೆ ಖಾಂವ್ಚ್ಯಾ ಆಶೆನ್ ಚಣೆ ಖಾಂವ್ಕ್ ಗೆಲ್ಯಾರ್ ತಾಚಿ ಚಣೆವಾಲಿ ಆಮ್ಕಾಂ ಹೆನ್ರಿಯಾಬಾಚೊ ಯಾದ್ ಕರುನ್ ದಿತೆಲಿ. ಹರ್ಯೆಕಾ ಜೆವ್ಣಾರ್ ಬಸೊನ್ ಆಸ್ತಾನಾ ಮುಕಾರ್ ಆಸ್ಲ್ಲೆಂ ಲೊಣ್ಚೆಂ ಹೆನ್ರಿಯಾಬಾಚೊ ಉಗ್ಡಾಸ್ ಹಾಡುನ್ ಮಿಟಿಯೊ ಮಾರುಂಕ್ ಲಾಯ್ತಾಲೆಂ.
ಕೊಂಕ್ಣಿ ಸಂಸಾರಾಂತ್ ಪುಸುನ್ ವಚಾನಾತ್ಲಿ ಮ್ಹೊರ್ ಮಾರ್ಲೆಲ್ಯಾ ಪದಾಂನಿ, ಹೆನ್ರಿಯಾಬ್ ತುಂ ಆಮರ್ ಜಾಲಾಯ್, ಆಮ್ಚೆ ಮದೆಂ ಸದಾಂಚ್ ಜಿಯೆತಾಯ್.
■ ನಾನು ಮರೋಲ್ , ತೊಟ್ಟಾಮ್
