ಹ್ಯಾ ದಿಸಾಂನಿಂ ಏಕ್ ತಸ್ವೀರ್ ಸಾಮಾಜಿಕ್ ಸಂಪರ್ಕಾಜಾಳಾಂನಿಂ ಪಾಸಾಯೊ ಮಾರ್ಚಿ ದಿಸುನ್ ಆಯ್ಲಿ. ತಸ್ವಿರೆಚ್ಯಾ ಸಕಯ್ಲ್ ತೆಂ ಧಾಡ್ಲೆಲ್ಯಾಂಚೆಂ –ಕೋಣ್ ಮ್ಹಣ್ ಹಾಂವ್ ನೊಕೊ, ಮ್ಹಾಕಾ ತಾಂತು ಫರಕ್ ಪಡಾನಾಂ- ಒಕ್ಕಾಣೆ ‘ಹಿ ತಸ್ವೀರ್ ಕೊಣಾಂಚಿ ಜಾಣಾಂತ್?’ ಮಾಗಿರ್ ಕೊಂಕ್ಣೆಚ್ಯಾ ಫಾಮಾದ್ ಮ್ಹಾಲ್ಘಢ್ಯಾ ಗಾವ್ಪ್ಯಾಚೆ ನಾಂವ್. ತಿ ತಸ್ವೀರ್ ಆಮ್ಚ್ಯಾ ಸರ್ವಾಂಚ್ಯಾ ಮೊಗಾಚ್ಯಾ ತ್ಯಾಚ್ ಗಾವ್ಪ್ಯಾಚಿಗಿ ಮ್ಹಣ್ ಮ್ಹಾಕಾ ಖಾತ್ರಿ ನಾಂ. ಪೂಣ್ ಸವಾಲ್ ತಿ ತಸ್ವೀರ್ ತಾಚಿ ವ್ಹಯ್ಗೀ ನಂಯ್ ಮ್ಹಣ್ ನಂಯ್. ಬಗಾರ್ ಕೊಣಾಚ್ಯಾಯ್ ಎಕಾ ಖಾಸ್ಗಿ, ಥಕ್ಲೆಲ್ಯಾ ಯಾ ಆಸ್ಕತ್ ಘಡಿಯೆಚಿ ತಸ್ವೀರ್ ಕಾಡುನ್ ತಸಲ್ಯಾ ಒಕ್ಕಾಣ್ಯಾಸವೆಂ ಜಾಳಿ ಜಾಗ್ಯಾರ್ ಉಬತ್ ಸೊಡ್ನ್ ತಾರಿಪೊ ಕರ್ತೆಲ್ಯಾ ಆನಿ ತಿ ಪರತ್ ಪರತ್ ವಾಂಟುನ್ ಘೇವ್ನ್ ಸ್ಯಾಡಿಸ್ಟಿಕ್ ಸುಶೇಗ್ ಭಗ್ಚ್ಯಾ ನಾಪಾಸಾಂಚ್ಯಾ ವಿಕೃತ್ ಮನಾಸ್ಥಿತೆಚಿ.
ಏಕ್ ಕಲಾಕಾರ್, ಬರವ್ಪಿ, ನಟ್, ಗಾವ್ಪಿ, ಗಾವ್ಪಿಣ್ ಆಪ್ಲ್ಯಾ ಕೃತಿಯಾಂ ಆನಿಂ ಪ್ರದರ್ಶನಾಂಸವೆಂ ಕಿತ್ಲೊಯ್ ಪಬ್ಲಿಕ್ ಜಾಲೊ ಜಾಲ್ಯಾರೀ ತೊ ಎಕಾ ಮ್ಹನ್ಶ್ಯಾಪರಿಂಚ್ ಥಕ್ತಾ, ಪಡ್ತಾ, ರಡ್ತಾ, ಮೊಡ್ತಾ. ತಾಂಕಾಯ್ ಏಕ್ ವಯುಕ್ತಿಕ್ ಕೂಸ್ ಆಸಾ, ಕುಟಾಮ್ ಆಸಾ, ಜಿಣೆಂ ಆಸಾ ಆಸಾ ಆನಿ ತಾಂಚೋಚ್ ಸಂತೋಸ್ ಆನಿ ದುಖಾಂಚ್ಯೊ ಘಡಿಯೊ ಆಸಾತ್ ಆನಿ ಹೆಂ ಸರ್ ಬಿಲ್ಕುಲ್ ಪಬ್ಲಿಕ್ ನಂಯ್. ಹಿಂ ತಾಂಚಿಂ ಖಾಸ್ಗಿ ಖಿಣಾಂ ತಾಣಿಂಚ್ ಯಾ ತಾಂಚ್ಯಾ ಸ್ಪಷ್ಟ್ ಪರ್ವಣ್ಗೆನ್ ತಾಂಚ್ಯಾ ಲಾಗ್ಶಿಲ್ಯಾನಿಂ ವಾಂಟುನ್ ಘೆತ್ಲ್ಲೆ ಶಿವಾಯ್ ಹೆರ್ ಕೊಣಾಯ್ಕೀ ಖಂಯ್ಚ್ಯಾ ಯ್ ನಿಬಾನ್ ವಾಂಟುನ್ ಘೆಂವ್ಚಿ ಪರ್ವಣ್ಗಿ ಯಾ ಹಕ್ ನಾಂ. ತಿಂ ತಾಂಚಿಂ ವಯುಕ್ತಿಕ್ ಖಿಣಾಂ. ತಿಂ ವಾಂಟುನ್ ಆಪುಣ್ ತಾಂಕಾಂ ಉಪ್ಕಾರ್ ಕರ್ತಾಂ ಮ್ಹಣ್ ಪಾತ್ಯೆತೆಲ್ಯಾನಿಂ ಅಸಲೆಂ ಕಾಮ್ ಕಾನೂನಾವಿರುಧ್ ಆನಿ ತೆ ಮಜಾ ಘೆತಾತ್ ತೆಂ ಕೊಣಾಚ್ಯಾ ಮರ್ಯಾದಿಚೆರ್, ಕೊಣಾಚ್ಯಾ ದುಖಾಚೆರ್ ಆನಿ ಆಸ್ಕತ್ಪಣಾಚೆರ್ ಪಯ್ಲೆಂ ಆಪ್ಲ್ಯಾ ಮತಿಂತ್ ಘುಸಂವ್ಕ್ ಜಾಯ್. ಹ್ಯಾ ಪಾಸತ್ ತಾಂಚೆರ್ ಕಾನೂನಿ ಕ್ರಮ್ ಘೇಂವ್ಕ್ ಸಾಧ್ ಆಸಾ ಮ್ಹಣ್ ತಾಂಚ್ಯಾಚ್ ವಿಕೃತ್ ಮನಾಂತ್ ಸಮ್ಜುನ್ ಘೆಂವ್ಚೆಂ ಬೋವ್ ಗರ್ಜೆಚೆಂ.
ಆಮ್ಕಾಂ ಕೊಂಕ್ಣೆಂತ್ ಸಗ್ಳೆಂಯ್ Taken for granted.. ಕೊಣಾಯ್ಚಿ ಕೃತಿ ಫಾಯ್ಸ್ ಕರ್ಚೆ ಥಾವ್ನ್, ಚೋರ್ನ್ ಆಪ್ಣಾಚೀಚ್ ಕರ್ಚೆ ಪರ್ಯಾಂತ್ ಸಕ್ಕಡ್ ‘ಚಲ್ತಾ ಹೆ’. ಆನಿ ಥೊಡ್ಯಾಂಕ್ ವರ್ಸಾಕ್ ಏಕ್ ಪಾವ್ಟಿಂ ಪುಣೀ ಕೊಂಕ್ಣಿಂ ಸಂಸಾರಾಂತ್ ಭಂವಾಡೊ ಮಾರುನ್ ತರ್ನ್ಯಾ ಆನಿ ಪರ್ನ್ಯಾಂಚಿ ಭೆಟ್ ಕರುನ್ ತ್ಯೊ ತಸ್ವಿರ್ಯೊ ಭಂವಾತ್ ಸೊಡ್ಚಿ ಪಿಸಾಯ್, ಆನಿ ತಾಚೆ ಸವೆಂ ಆಪುಣ್ ಸೊಡ್ನ್ ಹೆರ್ ಕೊಣೀ ತಾಂಚಿ ಭೆಟ್ ಕರಿನಾಂತ್, ತಿಂ ಎಕ್ಸುರಿಂಚ್ ಆಸಾತ್ ಮ್ಹಣ್ ಆಪ್ಣಾಚೆಂ ಮಿಸಾಂವ್ ಪರ್ಗಟ್ಚಿ ಭಿರ್ಮೆಂತ್. ಭಿರ್ಮೆಂತ್ ಮ್ಹಣ್ಚೆ ಪ್ರಾಸ್ ಹೆರಾಂಚೆಂ ಕಶ್ಟ್ / ಮೋರ್ನ್ ದಾಖವ್ನ್ ಆಪ್ಣೆ ಸ್ಯಾಡಿಸ್ಟಿಕ್ ಸಂತೊಸ್ ಭೊಗ್ಚಿ ವಿಕೃತ್ ಪಿಡಾಚ್ ಮ್ಹಣ್ಯೆತ್. ನೀಜ್ ಜಾವ್ನ್ ಹೆರ್ ಸಾಂಗಾತೀಯ್ ಹಾಂಚೆಪ್ರಾಸ್ ಚಡ್ ತಾಂಚೊ ಹುಸ್ಕೊ ಘೆವುನ್ ಆಸ್ತಾತ್, ಹಾಂಚೆಪ್ರಾಸ್ ಚಡ್ ತಾಂಚ್ಯಾ ಭೆಟೆಕ್ ವಚುನ್ ತಾಂಚ್ಯೊ ಗರ್ಜ್ಯೊ ಸಮ್ಜುನ್ ತಾಂಕಾ ಕುಮಕ್ ಕರುನ್ ಆಸ್ತಾತ್, ಸಂಪರ್ಕಾರ್ ಆಸ್ತಾತ್ ಮ್ಹಳ್ಳ್ಯಾಚಿ ಖಬರ್ಚ್ ಹಾಂಕಾಂ ಆಸಾನಾಂ. ಪೂಣ್ ಹ್ಯಾ ಹೆರ್ ಥೊಡ್ಯಾ genuine ಇಶ್ಟಾಂಕ್ ಆಪ್ಲ್ಯಾ ಭೆಟೆಚ್ಯೊ ತಸ್ವಿರ್ಯೊ ಜಾಳಿಜಾಗ್ಯಾನಿಂ ಉಬತ್ ಸೊಡ್ಚಿ ವಿಕೃತಾಯ್ ನಾಂ, ಕಿತ್ಯಾಕ್ ತಾಂಕಾಂ ಭೆಟ್ ಬಿರ್ಮತೆಚಿ ಟ್ರೋಫಿ ನಂಯ್, ತಿ ಸತ್ತಿ ಇಷ್ಟಾಗಾತ್.
ಕೊಣಾಯ್ಚ್ಯಾ ಮರ್ಣಾಚಿ ಯಾ ಪಿಡೆಚಿ ಖಬರ್ ಸರ್ವಾಂಪ್ರಾಸ್ ಪಯ್ಲೆಂ ಆಪ್ಣೆಂ ‘ಬ್ರೇಕಿಂಗ್ ನ್ಯೂಸ್’ ಕೆಲಿ ಮ್ಹಣ್ ಗಾಜಂವ್ಚ್ಯಾ ಅಸಲ್ಯಾ ವಿಕೃತೆಕ್ ‘ಸಾಸ್ಣಾಚೊ ವಿಶೆವ್ ಮಾಗ್ಯಾಂ, ಬರ್ಯಾ ಭಲಾಯ್ಕೆ ಪಾಸುತ್ ಮಾಗ್ಯಾಂ’ ಮ್ಹಳ್ಳ್ಯಾ ಪೊಕೊಳ್ ವೊಲಿಂನಿಂ ಆಪ್ಣಾಚಿ ‘fetish’ ರೆವ್ಡಾವ್ನ್ ಆಪ್ಣಾಚಿ ಪಿಡೆಸ್ತ್ ಮನಾಸ್ಥಿತಿ ಕೊಣಾಯ್ಕೀ ಕಳಾನಾಂ ಮ್ಹಣ್ ಚಿಂತ್ಚ್ಯಾ ಹ್ಯಾ ಅಂಧ್ಳ್ಯಾ ಪಿಸಾಯೆಂತ್ ಹಾಣಿಂ ಖಬ್ರೇರ್ ಘಾಲ್ಚ್ಯಾ ತ್ಯಾ ಬಿರ್ಮತ್ ಮ್ಹನ್ಶಾಂಚಿಂ, ತಾಂಚ್ಯಾ ಲಾಗ್ಶಿಲ್ಯಾಂಚಿ ಹಾಲತ್ ಕಿತೆಂ ಜಾಯ್ತ್ ಮ್ಹಳ್ಳೆಂ ಇಲ್ಲೆಂಯ್ ಚಿಂತಿನಾಸ್ಚ್ಯಾ ಅಸಲ್ಯಾಂಚ್ಯಾ ಹ್ಯಾ ನಕ್ಲಿ ಹುಸ್ಕ್ಯಾಕ್ ಕಿತೆಂ ನಾಂವ್ ದಿವ್ಯೆತ್? ಫಾಲ್ಯಾಂ ಹಾಂಚೀಚ್ ಹ್ಯಾ ತಾಂಚ್ಯಾ ಕುಟ್ಮಾಸಾಂದ್ಯಾಂಚಿ ತಸ್ವೀರ್ ಕೊಣೆಂಯ್ ಅಶೆಂಚ್ ಜಾಳಿಜಾಗ್ಯಾರ್ ವಾರ್ಯಾಕ್ ಧರ್ಲ್ಯೊ ತರ್? ತೆ ಮ್ಹಣುಂಕ್ ಪುರೊ, ಮ್ಹಾಕಾ ಕಾಂಯ್ ಫರಕ್ ಪಡಾನಾಂ. ವಯ್, ತುಮ್ಕಾಂ ರೆಡ್ಯಾಫಾಟಿರ್ ಪಾವ್ಸ್ ಪಡಲ್ಲೆಬರಿಂ ಜಾಂವ್ಕ್ ಪುರೊ ಪೂಣ್ ಹೆರಾಂಕ್ ತಾಂಚೆಂ ಖಾಸ್ಗಿ ಖಿಣ್ ಆಸಾತ್. ತುಮ್ಕಾಂ ಚಲ್ತಾ ಮ್ಹಣ್ ಹೆರಾಂಚಿಂ ಜಿಣಿಯೆಚೊ ಲಿಲಾಂವ್ ಘಾಲ್ಚೊ ಅಧಿಕಾರ್ ತುಮ್ಕಾಂ ಭಿಲ್ಕುಲ್ ನಾಂ. ಆಜ್ ನಾಂ, ಫಾಲ್ಯಾಂಯ್ ನಾಂ.
ಥೊಡ್ಯಾ ವರ್ಸಾಂ ಪಯ್ಲೆಂ ಹಾಂವೆ ಹ್ಯಾಚ್ ಥಳಾರ್ ಅಸೊಚ್ ಲೇಖ್ ಬರಯಿಲ್ಲೊ. ಅಶ್ಯೋಚ್ insensitive ತಸ್ವಿರ್ಯೊ ಕಾಡುನ್ ವಾಂಟ್ಚ್ಯಾ ವಿಕೃತೆವಿಶಿಂ. ಆಜ್ ಪರತ್ ಏಕ್ ಪಾವ್ಟಿಂ ತೆಂಚ್ ಮಾತಾಳೆಂ “Come on people.. Have a heart..! Stop being predators disguised as mourners, fans, or friends” ಮ್ಹಜ್ಯಾ ಮತಿಕ್ ಯೆತಾ ತರ್ ಆಮ್ಚ್ಯಾ ರೆಡ್ಯಾಫಾಟಿಕ್ ಕಾಂಯ್ಚ್ ಫರಕ್ ಪಡಾನಾಂ ತೆಂ ಸ್ಪಷ್ಟ್.
ಆಮ್ ಲೊಕಾಚಿ ಗಜಾಲ್ ಸೊಡ್ಯಾಂ – ಆಜ್ ಹೆಂ ವಿಕೃತ್ ಕರ್ಮ್ ಆದಾರುನ್ ಆಸಾತ್ – ಆಪ್ಣಾಕ್ ಆಪುಣ್ ಭಾರೀ ವ್ಹಡ್ ಸಂವೇದನಾಶೀಳ್ ‘ಸಾಹಿತಿ’ ಮ್ಹಣ್ತಲೆ ಮನಿಸ್ ತರ್, ಹಾಂಚೆಥಂಯ್ ಕುಸ್ಕುಟಾಚೆಂ ಮನ್ಶಾಪಣ್ ಉರ್ಲಾಂ ಮ್ಹಣೊಂಕ್ ಜಾತಾ? ಹಾಂಕಾ ‘ಸಾಹಿತಿ’ ಮ್ಹಣ್ಚೆ ಪ್ರಾಸ್ ಮೊಡಿಂ ಪಡೊಂಕ್ ರಾಕೊನ್ ಬಸ್ಚೆ ‘ಗೀದ್’ ಮ್ಹಳ್ಯಾರ್ ಚಡ್ ಸೊಂಪೆಂ ದಿಸ್ತಾ!
ಥೂ ತುಮ್ಚ್ಯಾ ವಿಕೃತ್ ಮನಾಸ್ಥಿತೆಕ್!
■ ಕಿಶೂ, ಬಾರ್ಕುರ್
