ಲೋಬ್ ‘ಢಾಳ್’ ಜಾತಾನಾ…

12

ಆಮ್ಚ್ಯಾ ಕಥೊಲಿಕ್ ಇಗರ‌್ಜೆಕ್ ಆದಿಂಥಾವ್ನ್ ಧೊಸುನ್ ಆಸ್ಚೆಂ ವ್ಹಡ್ ಸವಾಲ್ ಲಂಯ್ಗಿಕ್ ಶೋಷಣಾಂಚೆಂ ನ್ಹಂಯ್ ಬಗಾರ್ ಮೊನೆಂಪಣ್ ಪಾಂಗರ್ನ್ ಬಸ್ಚೆಂ – ಹೆಂ ಇತ್ಲ್ಯಾ ಗುಂಡಾಯೆನ್, ಜೊಗಾಸಾಣೆನ್ ರೊಂಬುನ್ ಗೆಲಾಂ ಮ್ಹಳ್ಯಾರ್ ಆಜ್ ಆಮ್ಚ್ಯಾ ಲೊಕಾಕ್ ಶೋಷಣ್ ಫಕತ್ ಭಾಯ್ಲ್ಯಾ ದಿಶ್ಟಿಕ್ ಪಡ್ಚೆಂ ಏಕ್ ಲಕ್ಷಣ್ ಮಾತ್.

ಹೆ ಆಂಕ್ಡೆ ಸಾಂಕ್ಡೆ ಪಳಯಾ. ಹಾಂತುಂ ಲಿಪುನ್ ಆಸ್ಚೆ ವಿನ್ಯಾಸ್ ನೆಗಾರುಂಕ್ ಜಾಂವ್ಚೆಂ ನ್ಹಂಯ್. ಫ್ರಾನ್ಸಾಚ್ಯಾ ಏಕ್ ಸ್ವತಂತ್ರ್ ಕಮಿಶನಾನ್, 1950 ಥಾವ್ನ್ 2020 ಪರ‌್ಯಾನ್ ಸುಮಾರ್ 216,000 ನೆಣ್ತೆಭುರ‌್ಗೆ ಪಾದ್ರಿವರ‌್ಗಾಚ್ಯಾ ಲಂಯ್ಗಿಕ್ ಶೋಷಣಾಂಕ್ ಬಲಿ ಜಾಲ್ಯಾತ್ ಮ್ಹಣ್ ಲೆಕ್ ದಿತಾನಾಂ, ತೊ ಸಂಕೊ, ಇಗರ‌್ಜೆಕಾಮೆಲ್ಯಾಂಕ್ ಸಂಗಿಂ ಧರ‌್ಲ್ಯಾರ್ 330,000ಕ್ ಚಡ್ಟಾ! ಒಸ್ಟ್ರೇಲಿಯಾಚೆಂ ಏಕ್ ಕಮಿಶನ್ 1950 ತೆ 2010 ವರ‌್ಸಾಪರ‌್ಯಾಂತ್ ‘ಸೆವಾ’ ದೀವ್ನ್ ಆಸ್’ಲ್ಲ್ಯಾ ಪಾದ್ರಿಂಮಧೆಂ ಸುಮಾರ್ ಸಾತ್ ಠಕೆ ಪಾದ್ರಿ ಲ್ಹಾನ್ ಭುರ‌್ಗ್ಯಾಂಕ್ ಲಂಯ್ಗಿಕ್ ಉಪಾದ್ರ್ ದೀವ್ನ್ ಆಸ್’ಲ್ಲೆ ಮ್ಹಣ್ ಸಾಂಗ್ತಾ. 2004 ವರ‌್ಸಾಚ್ಯಾ ಜೋನ್ ಲೇ ವರ‌್ದೆಂತ್ ಅಮೆರಿಕಾಂತ್ಲ್ಯಾ 4,392 ಪಾದ್ರಿಂಚ್ಯಾ ಅತರ‌್ವಣಾಂಚೊ ಹಿಸೊಪ್ ದಿಲಾಂ ತರ್ , 2018 ಪೆನ್ಸಿಲ್ವೇನಿಯಾ ಗ್ರ್ಯಾಂಡ್ ಜ್ಯೂರಿನ್ ಪಾಟ್ಲ್ಯಾ ಜಾಯ್ತ್ಯಾ ಧಾಕ್ಡ್ಯಾಂನಿಂ ದಸ್ತಾವೆಜಾಂತ್ ಫಿಚ್ಯಾರ್ ಕರ್ನ್ ಪೂರ್ನ್ ದವರ‌್ಲಲ್ಯಾ ಶೋಷಣಾಂಕ್ ಉಗ್ತಾಯ್ಲಾಂ.ರೊಮಾಕ್ ಧರುನ್, ಜರ‌್ಮನಿ, ಆಯ್ರ್’ಲ್ಯಾಂಡ್, ಸ್ಪೇಯ್ನ್, ಚಿಲಿ – ದರ್ ಏಕ್ ಕಡೆ ತಾಂ’ತಾಂಚ್ಯಾ ಸ್ವತಃಚೆ ಅಸಲೆ ಭಿರಾಂಕುಳ್ ಆಂಕ್ಡೆ ಸಾಂಕ್ಡೆ ಭಾಯ್ರ್ ಘಾಲ್ಯಾತ್. ವೆವೆಗ್ಳೆ ದೇಸ್, ವೆವೆಗ್ಳ್ಯೊ ಭಾಸೊ, ಪೂಣ್ ಎಕಚ್ ನಮುನ್ : -ಶೋಷಣ್, ಭಿತರ‌್ಲೆ ಭಿತರ್ ತಪಾಸ್ಣಿ, ಗುಪ್ತಿಂ ವ‌ರ್ಗ್ ಆನಿ ಸಾಂಸ್ಥಿಕ್ ವಿಧೇಯ್ಪಣಾಚ್ಯಾ ನಾಂವಾರ್ ಮೊಲಾಕ್ ಘೆತ್’ಲ್ಲೆಂ ಸ್ತಬ್ಧ್ ಮೊನೆಳ್!

ಆಮ್ಚ್ಯಾ ಭಾರತಾಂತ್ ಅಕ್ಖ್ಯಾ ಭಾರತೀಯ್ ಮಳಾರ್ ಅಸಲಿ ಕಸಲಿಯ್ ತಪಾಸ್ಣಿ ಜಾಲ್ಲಿ ನಾಂ ಆನಿ ತಿ ಜಾಲ್ಲಿ ನಾಂ ಮ್ಹಣ್ಚಿಚ್ ತಾಚೆಇತ್ಲ್ಯಾಕ್ ಏಕ್ ಉಣೆಂಪಣ್. ಪೂಣ್ ತಾಚೆಬಗಾರ್ ಚಡ್ತಾವ್ ಕೇರಳಾಂಚ್ಯಾ ಕೊಡ್ತಿಂನಿ ಭಾಯ್ರ್ ಪಡಲ್ಲಿಂ ಸತಾಂಚ್ ಪುರೊ. POCSO ಕಾನೂನಾ ಪರ‌್ಮಾಣೆ ತಾಂಚ್ಯಾ ಸುಪರ‌್ದೆರ್ ಆಸ್’ಲ್ಲ್ಯಾ ನೆಣ್ತ್ಯಾ ಭುರ‌್ಗ್ಯಾಂಚೆರ್ ಅತ್ತ್ಯಾಚಾರ್ ಕೆಲ್ಲೆ ಪಾದ್ರಿ, ಎಕಾ ಮಾದ್ರಿನ್ ಆಪ್ಣಾಚೆರ್ ಜಾಯಿತ್ತೆ ಪಾವ್ಟಿಂ ಅತ್ತ್ಯಾಚಾರ್ ಕೆಲಾಂ ಮ್ಹಣ್ ದೂರ್ ದಿಲ್ಲೆ ಉಪ್ರಾಂತ್ ಎಕಾ ಬಿಸ್ಪಾಚೆರ್ ವರ‌್ಸಾಂಗಟ್ಲ್ಯಾನ್ ಚಲಲ್ಲಿ ಕೊಡ್ತಿಚಿ ಕೇಜ್, ದುರಾಂ ದಿಲ್ಯಾರ್ ಕಾಂಯ್ಚ್ ಕರ‌್ನಾಸ್ತಾಂ ತೆಂ ಧಾಂಪುನ್ ವರುಂಕಚ್ ಪೆಚಾಡ್ಲೆಲೆಂ ಇಗರ‌್ಜೆ ಆಡಳ್ತೆಂ…

Catholic Bishops’ Conference of India ‘ಸಿಬಿಸಿಆಯ್’ 2015 ಥಾವ್ನ್ಂಚ್ zero tolerance ಮಾರ‌್ಗಾದರ‌್ಶನ್ ಫರ್ಮಾವ್ನ್ ಆಸಾ. ತರೀ ಥೊಡ್ಯಾ ಪಾದ್ರಿವರ‌್ಗಚ್ಯಾನಿಂಚ್ ಸಾಂಗ್ಚೆಪರ‌್ಮಾಣೆಂ ಉತ್ರಾಂ ಪಾನಾಂಪೆಲ್ಯಾನ್ – ಕಾನಾಂವಯ್ಲ್ಯಾನ್ ಗೆಲ್ಲಿಂಚ್ ನಾಂತ್.

ಆತಾಂ ಆಮ್ಚ್ಯಾ ಉದೆಂತಿಚ್ಯಾ ರೊಮಾಕ್ ಆಯ್ಲ್ಯಾರ್… ತೆಂ ಉದೆಂತಿಚೆಂ ರೋಮ್ ಮ್ಹಣ್ಚೆಂ‌ ಒಕ್ಕಾಣೆಂಚ್ ಪುರೊ ಹಾಂಗಾಚಿ ಇಗರ್ಜ್ ಭಾರತಾಂತ್ಲ್ಯಾ ಹೆರಾಂಕಡೆಂಥಾವ್ನ್ ಕಿತ್ಲಿ ಅಲಗ್ ತೆಂ ಸಮ್ಜುಂಕ್. ಕೊಂಕ್ಣಿ ಕ್ರಿಸ್ತಾಂವಾಂಚ್ಯಾ ಹ್ಯಾ ಕಾಳ್ಜಾಠಾಣ್ಯಾಂತ್ ಇಗರ್ಜ್ ಫಕತ್ ಏಕ್ ಸಂಸ್ಥೊ ನ್ಹಂಯ್ ಬಗಾರ್ ಸದಾಂಜಿವಿತಾಂತ್ ಮಿಸ್ಳುನ್ ಗೆಲ್ಲಿ ಜಿಣ್ಯೆರೀತ್. ಫಿರ‌್ಗಜ್, ಇಸ್ಕೊಲ್, ಕುಟಮ್ ಸಗ್ಳೆಂ ಎಕಾಚ್ ಥರಾನ್ ದಿಸ್ಪಡ್ತ್ಯಾ ಜಿಣ್ಯೆಂತ್ ಜುಳುನ್ ಗೆಲಾಂ. ಆಟ್ ತೆ ಅಟ್ರಾವರ‌್ಸಾಂಪರ‌್ಯಾಂತ್ಲೆ ಭುರ‌್ಗೆ ವೊರಾಂಚಿಂ ವೊರಾಂ ಸಾಕ್ರಿಸ್ತಿಂತ್ ಪಾದ್ರಿಸವೆಂ ಖರ‌್ಚಿತಾತ್. ಆನಿ ಹೊ ಏಕ್ ಗವ್ರವ್ ಮ್ಹಣ್ ಲೆಕ್ತಾತ್ ಶಿವಾಯ್ ತಿ ಕಾಂಯ್ ಶೋಷಣಾಂಚಿ ವಾಟ್’ಯ್ ಜಾಯ್ತ್ ಮ್ಹಣ್ ಚಿಂತುಂಕ್ ಸಯ್ತ್ ಹಾಂಗಾಚೆ ಭಾವಾಡ್ತಿ ಆಯ್ತೆ ನಾಂತ್.

ಕೇರಳಾಚೆಂಪರಿಂ ಹಾಂಗಾ ಲಂಯ್ಗಿಕ್ ಶೋಷಣಾಂಚಿಂ ಮಾತಾಳಿಂ ದಿಸಾಳ್ಯಾಂನಿಂ‌ ಕೆನ್ನಾಂಯ್ ಆಯಿಲ್ಲಿಂನಾಂತ್. ದೆಕುನ್ ಆಮಿಂ ಸಮಾಧಾನ್ ಪಾವ್ಚೆಂ ನ್ಹಂಯ್ ಬಗಾರ್ ಹ್ಯಾ ಸಂಗ್ತೆನ್ ಆಮ್ಕಾಂ ಅಸ್ವಸ್ಥ್ ಕರಿಜೆ. ಎಕಾ ದೆವೊತ್, ಗಣ್ಣ್ ಸಮುದಾಯಾಂತ್ ಮೊನೆಳ್ ಭದ್ರತೆಚಿ ಗವಾಯ್ ನ್ಹಂಯ್ ಬಗಾರ್ ಗುಪ್ತಿಂ ಸತ್ ಲಿಪವ್ನ್ – ದಾಂಬುನ್ ಧರಲ್ಲ್ಯಾಚೆಂ ಪಯ್ಲೆಂ‌ ಲಕ್ಷಣ್.

ಪೂಣ್ ಪಾದ್ರಿಚೆರ್ ದೂರ್ ದಿಲ್ಲೆಂ‌ ಕುಟಮ್ ಹಾಂಗಾ ಫಕತ್ ಕೇಜ್ ಮಾತ್ರ್ ಹೊಗ್ಡಾಯ್ನಾಂ ಬಗಾರ್ ಸಮುದಾಯಾಂತ್ ಆಪ್ಲಿ ಬುನ್ಯಾದಚ್ ಹೊಗ್ಡಾಯ್ತಾ. ಸೆಜಾರಿ, ಫಿರ‌್ಗಜ್ ಮಂಡಳಿ, ಸಯ್ರಿಂಧಯ್ರಿಂ- ಸಕಡ್, ಲೊಬಾಚಿ ಮರ‌್ಯಾದ್ ಸಾಂಬಾಳ್ಚ್ಯಾಂತ್ ವ್ಯಸ್ತ್ ಜಾವ್ನ್, ದೂರ್ ದಿಲ್ಲ್ಯಾಂಕ್ ವಿಂಗಡ್ ಕರುಂಕ್ ಪೆಚಾಡ್ತಾತ್. ಶೋಷಿತಾಂಕ್ ಭುಜಾವಣ್ ಜಾಂವ್ಚೆ ಪ್ರಾಸ್ ತಾಂಚೆಂ ಮೊನೆಂಪಣ್ ಮೊಲಾಕ್ ಘೆಂವ್ಕ್ ಭೊಗ್ಸಾಣ್ಯಾಚ್ಯಾ ಸ್ಪಿರಿತಾಚೊ ವಾಪಾರ್ ಜಾತಾ. ಆನಿಂ ಪಾದ್ರಿಚೆರ್ ದುಬಾವ್ ಕರ‌್ಚೆಂ ದೆವಾಚೆರ್’ಚ್ ದುಬಾವ್ ಕೆಲ್ಲೊ ಭೂತ್ ಜಾವ್ನ್ ತಾಂಕಾ ಸತಯ್ತಾ.

ಪಾದ್ರಿ ರಾತೊಂರಾತ್ ವ‌ರ್ಗ್ ಜಾತಾ, ಕಾಂಯ್ ತೀನ್ ಮ್ಹಯ್ನ್ಯಾಂಕ್ ನಪಂಯ್ಚ್ ಜಾತಾ ಆನಿ ಪರತ್ ದಸೆಂಬ್ರಾಚ್ಯಾ ಮ್ಹಯ್ನ್ಯಾಂತ್ ನತಾಲಾಂಚ್ಯಾ ಮಿಸಾಚೆರ್ ಘಣ್ಘಣಿತ್ ಪ್ರಸಂಗ್ದಾರ್ ಜಾವ್ನ್ ಉದೆತಾ. ಪರತ್ ವ್ಹಡ್ಲ್ಯಾ ಏಕ್ ಫಿರ‌್ಗಜೆಂತ್ ಯಾ ಬಾಸಿಲಿಕಾಚೆರ್ ರಾಜ್ವಟ್ ಚಲಯ್ತಾ.

ಮಜೆಚಿ ಗಜಾಲ್ ಮ್ಹಳ್ಯಾರ್ ಆಮಿಂ ಮಂಕ್ರಿ, ಎಕಾ ಪಾದ್ರಿನ್ ಕೊಣಾ ಬಾಯ್ಲೆಚಿ ಚಂಗಾಯ್ ಕೆಲಿ ತರ್, ತಿ ಗಜಾಲ್ ಸತ್ ಆಸುಂ ಯಾ ಖಡಾಖಂಡಿತ್ ಫಟ್ , ಖುಶೇನ್ ಪಲ್ಲಾಂ ಮಾರುನ್ ಸಂತಸ್ತಾಂವ್. ‘ತೊಯ್ ಆಮ್ಚೆಬರೀಚ್ ನ್ಹಂಯ್ಗಿ, ಮೀಟ್ ಮಿರ‌್ಸಾಂಗ್ ಖಾಲ್ಲೊ ಜೀವ್ ನ್ಹಂಯ್ಗಿ’ ಮ್ಹಣ್ ತಾಕಾ ತೆಂಕೊ ಸಯ್ತ್ ದಿತಾಂವ್. ಪೂಣ್ ಚೆರ‌್ಕ್ಯಾಂಚ್ಯಾ ಲಂಯ್ಗಿಕ್ ಶೋಷಣಾಂಚಿ ಗಜಾಲ್ ಯೆತಾನಾಂ ಆಮ್ಕಾಂ ತಿ ಗಜಾಲ್ ಉಲಂವ್ಕ್’ಚ್ ನಾಕಾ. ಆಮ್ಚೆ ಜಿಬೆಕ್ ಆರ್ ಮಾರ‌್ತಾ. ಆಮಿ ತಿ ಗಜಾಲ್ ಇತ್ಲಿ ಕಾಂಟಾಳ್ತಾಂವ್ ಕಿ ಥಂಯ್ ಆಲ್ತಾರಿರ್ ಹೋಸ್ತ್ ಉಬಾರ‌್ಚ್ಯಾ ತಾಚಿಂ ಹರ‌್ಯೆಕ್ ಪಾತ್ಕಾಂ ಆಪಾಪಿಂಚ್ ಧುವ್ನ್ ವೆತಾತ್. ಆನಿ ಫಕತ್ ಕಾಂಯ್ ಧಾ ಠಕ್ಯಾಪರಸ್ ಉಣ್ಯಾಲೊಕಾಕ್ ಮಾತ್ರ್ ಹ್ಯೊ ಗಜಾಲಿ ಕಳಿತ್ ಆಸ್ತಾತ್ ಆನಿ ಉರ್’ಲ್ಲೆ ನೊವೊದ್ ಠಕೆ ‘ಮಾಂಡ್ ಕುರ‌್ಪೊಣ್ ದೆವಾ ತುಂ ಪಾವ್’ ಮ್ಹಣ್ಚ್ಯೊ ಶೆಳ್ಯೊ ಜಾವ್ನ್ಂಚ್ ಉರ‌್ತಾಂವ್.

ಕಾಂಯ್ ಥೊಡ್ಯಾ ವರ‌್ಸಾಂಪಯ್ಲೆಂ ದೊತರ‌್ನಿಚ್ಯಾ ವೆಳಾರ್ ಭುರ‌್ಗ್ಯಾಕ್ ಮಾರ‌್ಲೆಂ ಮ್ಹಣ್ ಎಕಾ ಪಾದ್ರಿಗಾರಾಚೆರ್ ದೂರ್ ಜಾಲೆಂ. ತೆಂ ದೂರ್ ಪಾಟಿಂ ಕಾಡ್ತಾಂಪರ‌್ಯಾಂತ್ ತ್ಯಾ ಕುಟ್ಮಾಚೆರ್ ಕೊಣಾಕೊಣಾಥಾವ್ನ್ ಖಂಯ್ಚ್ಯಾ ಥರಾಚೊ ದಬಾವ್ ಆಯ್ಲೊ ತೆಂ ತಾಂಚೆಥಾವ್ನ್ಂಚ್ ಆಯ್ಕಾಜೆ. ದೋನ್ ವರ‌್ಸಾಂಪಯ್ಲೆಂ ಎಕಾ ಪಾದ್ರಿನ್ ಮ್ಹಾಲ್ಘಡ್ಯಾ ಏಕ್ ಜೊಡ್ಯಾಕ್ ಮಾರ್’ಲ್ಲೊ ವೀಡಿಯೋ ವಯ್ರಲ್ ಜಾಲೊ. ದಿಯೆಸೆಜಿನ್ ತಾಕಾ ಸಸ್ಪೆಂಡ್ ಕೆಲೊ, ಮಾಫ್ ಮಾಗ್ಲೆಂ ಪೂಣ್ ಮಾರ್ ಖೆಲ್ಲ್ಯಾಂಕ್ ಸಮುದಾಯಾನಂಚ್ ವಿಕ್ರಿತ್ ಕೆಲೊ. ವೀಡಿಯೋ ಆಸುನೀಂ ತ್ಯಾ ಜೊಡ್ಯಾಕಚ್ ವಿಕ್ರಿತ್ ಕೆಲೊ ತರ್ ಕ್ಯಾಮರಾದೊಳ್ಯಾಂಕ್ ಪಾವಾನಾಸ್ಚ್ಯಾ ಘಡಿತಾಂವಿಶಿಂ‌ ಇಲ್ಲೆಂ ಚಿಂತ್ಯಾಂ.

ಆನಿಂ ಆತಾಂ ಪರತ್ ಎಕಾ ‘ವ್ಹಡ್ಲ್ಯಾ’ ಫಿರ‌್ಗಜೆಚ್ಯಾ ‘ವ್ಹಡ್ಲ್ಯಾ’ ಪಾದ್ರಿಚೊ ‘ಉಗ್ತೊ’ ಘುಟ್ ಪಯಿಲ್ಲೆ ಪಾವ್ಟಿಂಕ್ ಉಗ್ತಾಡಾಕ್ ಆಯ್ಲಾ ಆನಿ ಇಗರ‌್ಜೆಪ್ರಾಸ್ ಚಡ್ ಲಾಯಿಕ್ ಮುಕೆಲಿಚ್ ತಾಕಾ ಬಚಾವ್ ಕರ‌್ಚಿಂ ಹರ್ ಪ್ರೇತನಾಂ ಕರುನ್ ಆಸಾತ್ ಮ್ಹಣ್ ಆಯ್ಕಾಲಾಂ.

ಹಿ ಕಾಂಯ್ ಏಕ್ ಮುಟಿಭರ್ ಕಾಮಾಂದ್ಳ್ಯಾ ಪಾದ್ರಿಗಾರಾಂಚಿ ಕಾಣಿ ನ್ಹಂಯ್. ಬಗಾರ್ -ಜಾಣಾಸುನ್ ಯಾ ನೆಣಾಸುನ್ — ದುರಾಂ ಜವಾಬ್ದಾರಿ ಜಾಂವ್ಚ್ಯಾ ಆದಿಂಚ್ ತಿಂ ಧಾಂಪುನ್ ಘಾಲುಂಕ್ ಪಳೆಂವ್ಚ್ಯಾ ಎಕಾ ವೆವಸ್ಥೆಚಿ ಕಾಣಿ. ಉಟಾಉಟಿಂ ವರ್ಗ್ ಪುಲಿಸ್ ರಿಪೊರ್ಟಾಂಚೊ ಜಾಗೆ ಘೆತಾ. ಲೊಬಾಚೊ ಮಾನ್ ತೊ ನ್ಹೆಸ್‌ಲ್ಲ್ಯಾ ಮನ್ಶಾಚಿ ತಪಾಸ್ಣಿ ಬದ್ಲುಂಕ್ ವಾಪರ್ತಾತ್. Zero tolerance ಧೋರಣಾಂ ಚಡಾವತ್ ಫಿರ್ಗಜ್‌ಗಾರಾಂನಿ ಕೆದ್ನಾಂಚ್ ವಾಚುಂಕ್ ನಾತ್‌ಲ್ಲ್ಯಾ ದಸ್ತಾವೆಜಾಂನಿಂ ಫಿಚಾರ್. ಆನಿ ತಿಂ ಜಾರಿಯೆಕ್ ಹಾಡ್ಚೆಪ್ರಾಸ್ ಹಾಡಿನಾಸ್ತಾಂ ರಾಂವ್ಚಿಂ ಪುರ‌್ತಿಂ ಸಾಂಸ್ಥಿಕ್ ನಿಬಾಂ ಆಸ್ಲೆಲ್ಯಾಂಚ್ಯಾ ಹಾತಾಂನಿಂ ಮ್ಹಳ್ಳೆಂ ಹಾಂಗಾ ಗುಮಾನಾಂತ್ ದವರ‌್ಚಿ ಗಜಾಲ್.

ಮಂಗ್ಳುರ್ ದಿಯೆಸೆಜಿನ್ ವಾತಿಕಾನಾಚ್ಯಾ Vos estis lux mundi ಸವೆಂ ತಾಳ್ ಪಡ್ಚಿಂ ಭದ್ರತೆ ನೆಮಾಂ ಪರ‌್ಗಟ್ಲ್ಯಾಂತ್. ಉಡುಪಿ ದಿಯೆಸೆಜ್ ಚಡುಣೆ ತ್ಯಾಚ್ ರಾಷ್ಟ್ರೀಯ್ ಚವ್ಕಟಾಭಿತರ್’ಚ್ ಕಾಮ್ ಕರ‌್ತಾ.

ಹಿ ಮಾಂಡಾವಳ್ ಆಸಾ. — ಏಕ್ ಪಾತ್ಯೆಸಾರ‌್ಕೆಂ ದೂರ್ ಬಿಸ್ಪಾಚ್ಯಾ ಮೆಜಾರ್ ಪಾವ್ತಾನಾಂ ಹಿ ವೆವಸ್ಥಾ ಚಲ್ತಾಗಿ — ಯಾ ತಿ ಸಮಸ್ಯಾ ಗಪ್ಚುಪ್ ಆನ್ಯೆಕಾ ಫಿರ್ಗಜೆಕ್ ಆನ್ಯೆಕಾ ಗಾಂವಾಕ್, ಆನ್ಯೆಕಾ ನೆಣಾರಿ ಕುಟ್ಮಾಕ್ ಬಲಿ ಘೆತಾಗಿ ಮ್ಹಳ್ಳಿ ಗಜಾಲ್ ಕರಾವಳಿ ಕರ್ನಾಟಕಾಂತ್ ವ್ಹಡ್ ಮಟ್ಟಾರ್ ಕೆನ್ನಾಂಚ್ ತಪಾಸ್ಣಿ ಜಾಂವ್ಕ್ ನಾಂ.

ಆತಾಂ ಆನ್ಯೆಕ್ ಪಶ್ಚಾತ್ತಾಪಾಚಿ ಹೆಳ್ಕಿ ನ್ಹಂಯ್. ಯಾ ಕೊಣಾಚಿ ತಪಾಸ್ಣಿ ಜಾಯ್ಜೆ ತಾಂಕಾಂಚ್ ವರ‌್ದಿ ಪಾಟಂವ್ಚ್ಯಾ ಆನ್ಯೆಕ್ ಭಿತರ‌್ಲ್ಯಾ ಸಮಿತಿಚಿ ವರ‌್ದಿಯ್ ನ್ಹಂಯ್. ಬಗಾರ್ ಆದ್ಲ್ಯಾ ಸಕ್ಕಡ್ ದುರಾಂಚಿ ಸ್ವತಂತ್ರ್ ತಪಾಸ್ಣಿ. ದೂರ್ ಆಯಿಲ್ಲೆಂಚ್ ದಿಯೆಸೆಜಿಚ್ಯಾ ಟ್ರಿಬ್ಯೂನಲಾಂ ಬದ್ಲಾಕ್ ತಕ್ಷಣ್ ನಾಗರಿಕ್ ಪುಲಿಸಾಂಕ್ ಕಳಂವ್ಚೆಂ ಕಡ್ಡಾಯ್ ಜಾಯ್ಜೆ. ಖಂಯ್ಚ್ಯಾ ದಿಯೆಸೆಜಿಚಿ ತನ್ಕಿ ಜಾವ್ನ್ ಆಸಾ ತಾಂಕಾಂಚ್ ವರ‌್ದಿ ದಿಂವ್ಚಿ ಗ‌ರ್ಜ್ ನಾ’ಸುನ್ ಖರಿ ತನ್ಕಿ ಕರ‌್ಚಿ ತಾಂಕ್ ಆಸ್ಚಿ ಲಾಯಿಕ್ ತನ್ಕೆ ಮಂಡಳಿ ಬಸಾಜೆ. ಗಪ್ಚುಪ್ ವರ‌್ಗಾವರ‌್ಗೆಬದ್ಲಾಕ್ ದೂರ್ ಆಯಿಲ್ಲ್ಯಾ ಯಾಜಕಾವಿಶಿಂ ಲೊಕಾಂಕ್ ಪಾರದರ‌್ಶಿ ಮಾಹೆತ್ ದೀಜೆ.

ಆಲ್ತಾರಿಂಮುಕಾರ್ ದಿಂಬಿಮೊಡ್’ಲ್ಲೆ ಭುರ‌್ಗೆ, ತೋಂಡ್ ಧಾಂಪಯಿಲ್ಲಿಂ ವ್ಹಡಿಲಾಂ, ಚಡ್ ಖೊಲಾಯೆನ್ ಪಳಂವ್ಚೆಂ ನಾಕಾ ಮ್ಹಣ್ಚಿ ವಿಂಚವ್ಣ್ ಕೆಲ್ಲೊ ಸಮುದಾಯ್ – ತಿಂ ಸಕ್ಕಡೀ ಭೊಳಿಂ ನ್ಹಂಯ್. ಬಗಾರ್ ಮೊನೆಳಾಕ್ ಇನಾಮ್ ದೀವ್ನ್, ಉಗ್ತಾಯಿಲ್ಲ್ಯಾಂಕ್ ಸಜಾ ದಿಂವ್ಚ್ಯಾ ಸಂಸ್ಥ್ಯಾನ್ ತಾಂಚೆ ಪಾಸತ್’ಚ್ ಬರಯಿಲ್ಲೊ ಸ್ಕ್ರಿಪ್ಟ್ ಪಾಳ್ಟಲಿಂ. ತಿ ಸ್ಕ್ರಿಪ್ಟ್ ಅಪ್ಣಾಯಿತ್ಲ್ಯಾಕ್ ಬದ್ಲುಂಚಿ ನ್ಹಂಯ್. ಜೆನ್ನಾಂಪರ‌್ಯಾಂತ್ ಲೊಬಾಕ್ ಏಕ್ ಢಾಲ್ ನ್ಹಯ್ ಬಗಾರ್ ನೋಕ್ರಿ ಮ್ಹಣ್ ಇಗರ್ಜ್ ಲೆಕಿನಾಂ, ತೆನ್ನಾಂಪರ್ಯಾಂತ್ ರೊಮಾಥಾವ್ನ್ ಉದೆಂತಿಚ್ಯಾ ರೊಮಾಪರ‌್ಯಾಂತ್ ಧಾಖಲ್ ಜಾಲ್ಲೊ ಹೊ ನಮುನೊ, ಉಂಬಳ್ಪಾಕ್ ನವ್ಯೊ ನವ್ಯೊ ದರ‌್ಯಾವೆಳೊ ಸೊಧುನಂಚ್ ಉರ‌್ತಲೊ.

■ ಕಿಶೂ, ಬಾರ‌್ಕುರ್