“ಬಜಾರಾಕ್ ವಚುನ್ ಯೇ. ವ್ಹಡ್ಲಿ ಸತ್ರಿ ವರ್. ಪಾವ್ಸಾಂತ್ ಬಿಜಾನಾಕಾ”. ಯೆಜ್ಮಾನ್ ಹೊಲಾಂತ್, ಸೊಫಾರ್ ಆಡ್ ಪಡೊನ್, ಟಿವಿ ಪಳೆವ್ನ್ ಆಸ್ಲಿ.
ಹಾಂವ್ ಕುಶಿಚ್ಯಾ ಸ್ಟಡಿ ರುಮಾಂತ್ ಯು-ಟ್ಯೂಬ್ ವಿಡಿಯೊ ಪಳೆವ್ನ್ ಆಸ್ಲೊಂ. ಉಟೊನ್ ಹೊಲಾಕ್ ಆಯ್ಲೊಂ; ಯೆಜ್ಮಾನಿಚ್ಯೆ ಕರ್ಕರೆ ಕೊಣಾಕ್ ಜಾಯ್?
“ತುಂ ಕಿತ್ಯಾಕ್ ರಿಪಬ್ಲಿಕ್ ಟಿವಿ ಚೆನೆಲ್ ಪಳೆತಾಯ್? ಮೋದಿಚ್ಯೆಂ ಅಂಧ್ ಭಕ್ತ್ ಜಾವ್ನಾಂಯ್-ಮೂ” ಮ್ಹಕಾ ಅರ್ನಾಬ್ ಗೋಸ್ವಾಮಿಚಿ ಎಲರ್ಜಿ. “ನ್ಯೂಸ್ ಪಳೆಜೆ ತರ್, ವಿಯೊನ್ ಪಳೆವ್ಯೆತ್ ನೇ?”
“ತುಜ್ಯೆ ನವೆ ವಾಣೊ ಘಾಲ್. ಪಾವ್ಸಾಳ್ಯಾಂತ್, ಫುಟ್-ಪಾತಿರ್ ಪಾಚ್ವಿ ಫಾಮಾಜಿ ಮಾಂಡ್ತಾ. ನಿಸ್ರೊನ್ ಪಡ್ಶಿ, ಜಾಗ್ರತ್!”
“ರಿಕ್ಶಾರ್ ವೆತಾಂ. ಸ ರುಪೈ ಚಿಲ್ಲರ್ ನಾಣಿಂ ದೀ”
“ವೆತಾನಾ ಚಲೊನ್ ವಚ್. ಪಾಂಯ್ ಸಡಿಳ್ ಜಾತಾತ್. ಹ್ಯೆ ಪ್ರಾಯೆರ್ ದೀಸಾಕ್ ವೀಸ್ ಮಿನುಟಾಂ ಚಲಾಜೆ”.
“ಆತಾಂ ಬಜಾರಾಕ್ ಕಿತ್ಯಾಕ್ ವಚಾಜೆ ತೆಂ ಸಾಂಗ್”.
“ಉಡ್ಪಿ ಸ್ವೀಟ್ಸ್ ದುಕಾನಾ ಥಾವ್ನ್ ಏಕ್ ಕಿಲೊ ಪೆಡಾ ಹಾಡ್”.
“ಏಕ್ ಕಿಲೊ? ಸಗ್ಳ್ಯಾ ವಾಡ್ಯಾಕ್ ವಾಂಟುಂಕ್ ಆಸಾ ಕಿತೆಂ. ಖಂಚ್ಯೆ ಖುಶ್ಯೆನ್?”
“ದೇವಾ! ತುಂ ಖಂಯ್ಚ್ಯಾ ಸಂಸಾರಾಂತ್ ಆಸಾಯ್? ದೆಕುನ್ ಹಾಂವ್ ಮ್ಹಣ್ತಾಂ ನ್ಯೂಸ್ ಪಳೆ”.
ತ್ವರಿತ್ ಹಾಂವ್ ನೆಸೊಂಕ್ ಬೆಡ್-ರೂಮಾಕ್ ಗೆಲೊಂ. ಶೊರ್ಟ್ಸ್ ಆನಿ ಟೀ ಶರ್ಟ್ ನೆಸೊನ್, ಬೊಲ್ಸಾಂತ್ ಪರ್ಸ್ ಆನಿ ಹಾತಿಂ ಮೋಬಾಯ್ಲ್ ಘೆವ್ನ್ ಪರತ್ ಹೊಲಾಕ್ ಆಯ್ಲೊಂ. ಯೆಜ್ಮಾನಿನ್ ವಯ್ರ್ ಸಕ್ಲಾ ಪಳೆವ್ನ್ ತಕ್ಲಿ ಹಾಲಯ್ಲಿ: “ಅತಾಂ, ವಚ್”
“ವೆತಾಂ ಹಾಂವ್. ಪೆಡಾ ಶಿವಾಯ್, ಹೆರ್ ಕಾಂಯ್ ಜಾಯ್-ಗೀ”
***
ಹಾಂವ್ ಘರಾ ಪಾಟಿಂ ಯೇತನಾಂ, ಮದಾಮ್ ಟಿವಿ ಮುಖಾರ್ ಬಸೊನ್ ಲಸುಣ್ ಸೊಲ್ತಾಲಿ. ವಿಯೋನ್ ಚೆನೆಲಾರ್ ಕೊಕ್ರೋಚ್ ಜನತಾ ಪಾರ್ಟಿಚ್ಯಾ ಅಭಿಜಿತ್ ದಿಪ್ಕೆಚೊ ಸಂವಾದ್ ಚಾಲು ಆಸ್ಲೊ.
“ತುಜಿ ಸದ್ದ್ಯಾಕ್ ಕೊಕ್ರೋಚ್ ಜನತಾ ಪಾರ್ಟಿ. ಏಕಾ ಕಾಳಾರ್, ತುಂ ಆಮ್ ಆದ್ಮಿ ಪಾರ್ಟಿಚಿ fan ಆಸ್ಲಿಯ್. ದಳ್ ಬದ್ಲು ತುಂ!” ತುಕ್ಲಾಯ್ಲೆಂ ಹಾಂವೆಂ.
“ತುಕ್ಲಾಯ್, ತುಕ್ಲಾಯ್, ಜಾಯ್ ತಿತ್ಲೆಂ ತುಕ್ಲಾಯ್! ಆಂದೋಲನ್ ಕೆಲ್ಲೆ ತರ್ನಾಟೆ ಆನಿ ವಿಧ್ಯಾರ್ಥಿ ಭುರ್ಗ್ಯಾಂಕ್ ಸಯ್ತ್ ತುಂ ತುಕ್ಲಾಯ್ತಾಯ್. ತೆ ಕೊಕ್ರೋಚ್, ಪರಜೀವಿ, ಆಳ್ಶಿ. ತಶೆಂ ತುಂ ಮ್ಹಕಾ-ಯೀ ಪರಜೀವಿ ಆನಿ ಆಳ್ಶಿ ಮ್ಹಣ್ತಾಯ್. ತಾಂಚ್ಯೆ ಭಾಶೆನ್, ಮ್ಹಕಾಯೀ ಕಾಮ್ ದಂಧೊ ನಾಂ; ಬಿಲ್ಕುಲ್ ಬೇಕಾರ್; ತುಜ್ಯಾ ತುಕ್ಡ್ಯಾಂನಿಂ ಜಿಯೆತಾಂ ಮ್ಹಣ್ ತುಕ್ಲಾಯ್ತಾಯ್”.
“ತುಕಾ ಕಾಮ್ ನಾಂ ಮ್ಹಣ್ ಹಾಂವ್ ಮ್ಹಣ್ತಾಂ? ಆಖ್ಖೊ ದೀಸ್ ಟಿವಿ ಪಳೆತಾಯ್: ಮರಾಥಿ ಸೀರಿಯಲಾಂ, ಮಹಾರಾಶ್ಟ್ರಾಚಿ ಹಾಸ್ಯ್ ಜಾತ್ರಾ, ಬಿಗ್ ಬೋಸ್, ಕಪಿಲ್ ಶರ್ಮಾ ಶೋ, ಇಂಡಿಯನ್ ಐಡಲ್, ಇಂಡಿಯಾ ಕೆನ್ ಡಾನ್ಸ್, ಮಾಸ್ಟರ್ ಚೆಫ್, ಕವ್ನ್ ಬನೆಗಾ ಕರೋಡ್ಪತಿ, ವೀಲ್ಸ್ ಒಫ್ ಫೊರ್ಚೂನ್, ಇತ್ಯಾದಿ ಇತ್ಯಾದಿ. ಬಾರಾ ವ್ಹರಾಂ ಟಿವಿ ಪಳೆಂವ್ಚ್ಯೆಂ; ಇತ್ಲೆಂ ಕಾಮ್ ಕರ್ತಾಯ್. ಆಳ್ಶಿ ಖಂಡಿತ್ ನಹಿಂ!”
“ಆನಿ ರಾಂದ್ತಾ ಕೋಣ್? ಭಾಣಾ ಸಾರ್ಖೆಂ ಪೋಟ್ ಘೆವ್ನ್ ಭೊಂವ್ತಾಯ್? ತುಕಾ ಗೊತ್ತು ನಾಂ, ಕೊಕ್ರೋಚ್ ನ್ಯೂಕ್ಲಿಯರ್ ಧಾಡಿಂತ್ ಲೆಗುನ್ ಮೊರಾನಾಂತ್! ತುಜ್ಯೆ ತೀರ್, ಮೋದಿ-ಶಾಚ್ಯೆ ಪೋಲಿಸ್ ದಾಂಡೆ, ದುಕಾಂ ಗ್ಯೇಸ್, ಆನಿ ರಬ್ಬರ್ ಗುಳೆ ಕಿತೆಂ ಕರುಂಕ್ ಸಕ್ತಿತ್?”
“ತುಂ ಭೆಸ್ಟೆಂಚ್ ಹ್ಯಾ ಫಾಲ್ತು ಜರ್ಲ್ಯಾಂಕ್ ಮ್ಹಣ್ಜೆ ಕೊಕ್ರೋಚ್ಯಾಂಕ್, ಫುಕಟಾಚ್ಯೆಂ ಬ್ರ್ಯಾಂಡಿಂಗ್ ಕರ್ತಾಯ್. ‘Cockroach Janta Party’! ಆಮ್ಗೆಲೆಂ ದೇಸಿ ವಿಲನ್ ಟೀಮ್. ಆಮ್ ಆದ್ಮಿ ಪಾರ್ಟಿಚೊ ನವೊ ಆವತಾರ್ ಮ್ಹಣ್ ದಿಸ್ತಾ ಮ್ಹಾಕಾ”.
“ವಿಚಿತ್ರ್! ದೇಶಾಚೊ ಮುಖ್ಯ್ ನ್ಯಾಯಾಧೀಶ್ ಬೇರೋಜ್ಗಾರ್ ಯುವಾಂಕ್ ಜರ್ಲೆ, ಪರಜೀವಿ, ಆಳ್ಶಿ ಆನಿಂ ಕಿತೆಂ ಕಿತೆಂ ಆಡ್ ನಾಂವಾಂ ದೀವ್ನ್ ಹಲ್ಕಿತಾ; ತೆನ್ನಾಂ ತುಜ್ಯೆ ತಸ್ಲೆ ಬುದ್ವಂತ್ ಕೋಣೀ ಉಲಂವ್ಕ್ ನಾಂತ್. ದೇಸಿ ಯುವ-ಜಣ್ ಮಾತ್ರ್ ರಡೊನ್ ಬಸ್ಲೆ ನಾಂತ್. ಬದ್ಲೆಕ್, ತಾಂಣಿಂ ವ್ಯಂಗ್ ರೀಲ್ಸ್ ಕೆಲಿಂ. ಸೊಶಿಯಲ್ ಮೀಡಿಯಾಚ್ಯೆರ್ ಅಪ್ಲೋಡ್ ಕೆಲಿಂ. ಅಂಧ್ ಭಕ್ತಾಂಕ್ ಟ್ರೊಲಿಂಗ್ ಕೆಲೆಂ. ಉಪ್ರಾಂತ್, ಸಂಸದ್ ಚಲೊ ಮೋರ್ಚಾ ಕಾಡ್ಲೊ!”.
“ಜಂತರ್ ಮಂತರ್ ಸಿಟ್-ಇನ್; ಹಾಂ, 100-150 ಬೇಕಾರ್ ಜರ್ಲೆ ಜಮ್ಲೆ. ಹಾತಾಂತ್ ಕಾರ್ಟೂನಾಂ ಘೆವ್ನ್. NEET ಲೀಕ್ ಆಂದೋಲನ್ ಖಂಯ್. ‘Dharmendra Pradhan must go!’ ಮ್ಹಣ್ ನಾರೆ ತಾಂಚ್ಯೆ. ಏಕ್ ಮಂತ್ರಿನ್ ರಾಜೀನಾಮೊ ದಿಲ್ಯಾರ್ ಕಿತೆಂ ಮೆಳ್ತಾ?”
“ಪಳೆ, ಹೊ ಫಕತ್ ಏಕಾ ಮಂತ್ರಿಚೊ, ಏಕಾ ಪರೀಕ್ಶೆಚೊ ಮುದ್ದೊ ನಹಿಂ. ಹೊ ಪದ್ದತಿಚೊ ಮುದ್ದೊ. ಸಿಸ್ಟಮ್ ಬದ್ಲಿ ಜಾಯ್ಜೆ. ಹಿ ಏಕ್ ಅಸಲಿ ಪದ್ದತ್ ಜಂಯ್ ಭುರ್ಗಿಂ ಜಿವ್ಘಾತ್ ಕರ್ತಾತ್. ಕಾರಣ್ ಏಕ್ ಪೇಪರ್ ಲೀಕ್ ತಾಂಚೊ ಫುಡಾರ್ ವಿಭಾಡ್ತಾ. ರಾಜೀನಾಮೊ, ನ್ಯಾಯಿಕ್ ಚೌಕಷೀ, ಆನಿ ನ್ಯಾಶನಲ್ ಟೇಸ್ಟಿಂಗ್ ಏಜೆನ್ಸಿ (NTA) ರದ್ದ್ ಕರುಂಕ್ ತಾಣಿಂ ಮಾಗ್ಣಿ ಕೆಲ್ಯಾಂತ್”.
“ತಾಂಚೊ ಕ್ರೊಧ್ ಮ್ಹಾಕಾ ಸಮ್ಜತಾ. ಪೂಣ್, ಮ್ಹಕಾ ಭಗ್ತಾ CJP ಏಕ್ ಒನ್-ಲಾಯ್ನ್ AAP. ಮಾತ್ರ್, ಆಪಾ ಪ್ರಾಸ್ ಚಡ್ ಬರೆ memes ರಚ್ತಾತ್. ಕಾಂಗ್ರೆಸಾನ್ ಸಯ್ತ್ ಪೈಲೆಂ ಪೈಲೆಂ ತಾಂಕಾ ‘India Against Corruption 2.0’ ಮಳ್ಳೆಂ ಆಸಾ”.
ಯೆಜ್ಮಾನ್: ಹಿಚ್ ತಾಂಚಿ ಸೊಭಾಯ್! ತೆ ಏಕ್ ಪಕ್ಷ್ ನಹಿಂ ಬಗಾರ್ ಏಕ್ ‘mood’. ಸಮಜಾಕ್ ಏಕ್ ವ್ಯಂಗಾತ್ಮಕ್ ಆರ್ಸೊ. ಪೈಲೆಂ ತುಂ ಮೀಮ್ಸ್ ಪಳೆತಾಯ್, ಹಾಸ್ತಾಯ್, ಮಾಗೀರ್ ಸಮ್ಜತಾಯ್: ” ವಿಧ್ಯಾರ್ಥಿಂಕ್ ಕಿತ್ಯಾಕ್ ಕೀಡೆ ಮ್ಹಣ್ ಆಪಯ್ತಾಂವ್ ಮ್ಹಣ್ ಚಿಂತುಂಕ್ ಪಡ್ತಾಯ್”.
“ಹಿಂ ಭುರ್ಗಿಂ ಏಕ್ ಮೂಡ್-ರಿಂಗ್ ಮ್ಹಣ್ ಹಾಂವ್-ಯೀ ಮಾಂದ್ತಾಂ. ಕಿತೆಂ ಟ್ರೇಂಡಿಂಗ್ ಜಾತಾ ತ್ಯಾ ಪರಿಂ ರಂಗ್ ಬದಲ್ತಾತ್. ಏಕ್ ದೀಸ್ NEET, ದುಸ್ರೊ ದೀಸ್ ಹಿಂದು-ಮುಸ್ಲಿಮ್ ಭಜನ್. ಖರೆಂಚ್, ಹಾಂಕಾಂ ಕಸ್ಲಿ ದಿಶಾ ನಾಂ”. ಕುಡ್ಸಿಲೆಂ ಹಾಂವೆಂ.
***
ಯೇಜ್ಮಾನ್: ಜುಲೈ 20 ತುಂವೆಂ ಪಳೆಂವ್ಕ್ ನಾಂ ಮ್ಹಣ್ ದಿಸ್ತಾ. ಪೋಲಿಸಾಂನಿಂ ಟಿಯರ್ ಗ್ಯೇಸ್ ವಾಪರ್ಲೋ. ಕಿತ್ಲಿಂ ಭುರ್ಗಿಂ ಜಕ್ಮಿ ಜಾಲಿಂ. ಆನಿಂ, ಜಾಯಿತ್ತ್ಯಾಂಕ್ ಕುಡಾಯ್ಲೆಂ. ದುಕಾನಾಂಚಿ ತೋಡ್-ಫೋಡ್ ಜಾಲಿ. ಹೆಂ ಮೀಮ್ ನಹಿಂ. ಹಿ ಹಿಂಸಾ, ಖರೆಂ ದುಖವ್ಪ್.
ಹಾಂವ್: ಹಾಂತುಂಚ್ ಆಸಾ ಸತ್. ತುಂ ಪುಸ್ತಕಾಂ ಆನಿ ಬಾವ್ಟ್ಯಾಂ ಥಾವ್ನ್ ಸುರು ಕರ್ತಾಯ್. ಪೋಲಿಸಾಂ ವಯ್ರ್ ಪತ್ರಾವ್ ಕರ್ತಾಯ್. ಪೋಲಿಸ್ ವೇನಾಂಕ್ ಉಜೊ ಲಾಯ್ತಾಯ್. ಫಕತ್ fair ಪರೀಕ್ಷಾ ಜಾಯ್ ಮ್ಹಣ್ತೆಲ್ಯಾ ವಿಧ್ಯಾರ್ಥಿಂಕ್ ಅಸಲಿಂ ಕರ್ತುಬಾಂ ಕಶಿಂ ಮಜತ್ ಕರ್ತಾತ್?
ಯೇಜ್ಮಾನ್: ಕದೆಲ್ ಹಾಲಯ್ನಾ ತರ್ ಸಿಸ್ಟಮ್ ಕೆಪ್ಪಿಚ್ ಆಸ್ತಾ. ಆತಾಂ, ಮೋದಿನ್ ತಾಚ್ಯಾ ಶಿಕ್ಪಾ-ಮಂತ್ರಿಕ್ ಗಾದಿಯೆರ್ ಥಾವ್ನ್ ದೆಂವಂವ್ಕ್ ನಾಂವೇ? ಫಾಸ್ಟ್-ಟ್ರ್ಯಾಕ್ ಕೋರ್ಟಾಂಚಿಂ ಘೋಷಣಾ ಸಯ್ತ್ ಕೆಲ್ಯಾಂತ್. ಹೆಂ ಕಿತೆಂ ಸಂಯೋಗ್ ವ ಯೋಗಾಯೋಗ್? ಹಿ Gen-Zಚಿ ತಾಕತ್!
ಹಾಂವ್: ಮೋದಿ ಕೇವಲ್ ಉಜೊ ಪಾಲ್ವಂವ್ಕ್ ಪ್ರೇತನ್ ಕರ್ತಾ. ಸ್ವ-ರಕ್ಶಣಾ ಖಾತಿರ್. ತಾಚಿ ಪಾಟ್ ಜಳೊಂಕ್ ನಜೊ. ಫಾಸ್ಟ್-ಟ್ರ್ಯಾಕ್ ಕೋರ್ಟ್ ಮೂಳ್ ಕಾರಣ್ ಸೊಡಯ್ತಾ? ತುಂ ಕಿತೆಂ ಚಿಂತಾಯ್? ಮೋದಿ ಪಕತ್ responsive ದಿಸೊಂಕ್ PR ಸ್ಟಂಟ್ ಕರ್ತಾ. ಹಿ ಮೂಳ್ ರಣನೀತ್ ಜರ್ಲೆ ಕಿತ್ಯಾಕ್ ಸಮ್ಜೊಂಕ್ ನಾಂತ್? ಮೋದಿ ಸರ್ಕಾರಾಚ್ಯಾ PR ಸ್ಟಂಟಾಂಕ್ ವಿಧ್ಯಾರ್ಥಿಚ್ ನಹಿಂ ಸೋನಮ್ ವಾಂಗ್-ಚುಕ್ ತಸ್ಲೊ ಜಾಣ್ತೊ ಮನಿಸ್ ಲೆಗುನ್ ಭುಲ್ಲೊ.
***
“ಆಮ್ಚೆ ಯುವಾ ಜಾಗೆ ಜಾಲ್ಯಾತ್. ಹೊ Gen-Z ಪಿಳ್ಗೆಚೊ ವೇಳ್. ವೀಸ್ ಮಿಲಿಯನ್ ಮಿಕ್ವೊನ್ ಜರ್ಲೆ CJP ಕ್ follow ಕರ್ತಾತ್. ಭಾಜಪಾ ಪ್ರಾಸ್ ದೊಡೆ. ಆತಾಂ, ಸರ್ಕಾರಾಕ್ ಸಿಸ್ಟಮ್ ಬದ್ಲಿಜೆ ಪಡ್ತೆಲಿ”. ಮದಾಮೆಚೊ ರಾಗಾ.
“ತೆ ಮಿಲಿಯನ್ Instagram followers. ಒನ್-ಲಾಯ್ನ್ ಸಾಂದೆ. ದಿಲ್ಲಿಂತ್ ಕಿತ್ಲೆ ಮೈದಾನಾಕ್ ದೆಂವ್ಲೆ? 10-12 ಹಜಾರ್? ಪೂನಾ ಆನಿಂ ಲಕ್ನೋಚ್ಯೆ ಫೊಟೆ ಕಿತೆಂ ದಾಖಯ್ತಾತ್? 100-200 ಜಣ್? ಠಿಕಾಕಾರ್ ಮಣ್ತಾತ್ “ಜರ್ಲೆ” # hashtag ತಜ್ಞ್ ಜಮೀನೆರ್ ಫುಸ್ಕ್! ” ಮ್ಹಜೊ ಪ್ರತಿವಾದ್.
ಯೆಜ್ಮಾನ್: ಹರ್ಯೇಕ್ ಆಂದೋಲನ್ ಲ್ಹಾನ್ ಸುರೂ ಜಾತಾ. IAC 2.0 ಸಯ್ತ್! ಹಾಂ! ತಶೆಂ ಮ್ಹಣಾನಾಂ; AAP ಮ್ಹಜ್ಯೆರ್ ಖುಬ್ಳೊಂಕ್ ಪುರೊ. ಕೊಂಗ್ರೆಸಾಕ್ ಆನಿಂ Samajwadi Party (SP)ಕ್, ರುಚ್ಚೆಂ ನಾಂ.
ಹಾಂವ್: ಪಳೆ? ಜರ್ಲ್ಯಾಂಚ್ಯೆ ಇಸ್ಟ್ ಲೆಗುನ್ ಆಂದೋಲನಾಚೊ ಮಾಲಕ್ ಕೋಣ್ ಮ್ಹಣ್ ಎಕ್ ಮತಾನ್ ಉಲಯ್ನಾಂತ್. ಆಪ್ಲೆಂ ಮ್ಹಣ್ತಾ ಕಾಂಗ್ರೆಸ್. AAP ಮಣ್ತಾ ಕಾಂಗ್ರೆಸಾನ್ ಹೆಂ ಆಂದೋಲನ್ ನಶ್ಟ್-ಭ್ರಶ್ಟ್ ಕೆಲೆಂ. ಮಾರ್ಕ್ಸಿಸ್ಟ್ ಕಮ್ಯುನಿಸ್ಟ್ ಯೇವ್ನ್ ವೇದಿರ್ ಬಸ್ಲೆ. ರಾಹುಲ್ ಗಾಂಧಿ ಆನಿಂ ಅಖಿಲೇಶ್ ಯಾದವ್ ವೋಂಯ್ ವಯ್ರ್ ಬಸೊನ್ ತಾಳಿಯೊ ಪೆಟುಂಕ್ ಲಾಗ್ಲೆ.
ಯೆಜ್ಮಾನ್ ಆಂಬ್ಯಾರ್ ಥಾವ್ನ್ ಕುಂಬ್ಯಾರ್ ಚಡ್ಲಿ: “ಪಾಕಿಸ್ತಾನ್ ಸಯ್ತ್ ಜರ್ಲ್ಯಾಂ ವಿಷಿಂ ಉಲಯ್ತಾ” ತಿಚ್ಯೆಂ ನವೆಂ ಗುಮಾಟ್.
ಹಾಂವ್: ಪಳೆ! ಹ್ಯಾ ಆಂದೋಲನಾಕ್ ಘುಟಾನ್ ತಾಣಿಂ ಸಹಕಾರ್ ದಿಲಾ, RAW, IB ಆನಿ CBI ಕಡೆಂ ಪುರಾವೆ ಆಸಾತ್.
ಯೆಜ್ಮಾನ್: ಭೆಸ್ಟೆಂಚ್! ಪೆಪರ್ ಲೀಕ್ ಮಾಫಿಯಾಕ್ ಧರುಂಕ್ CBI, IB ನಾಕಾಮ್. ತಾಂಣಿಂ ಪಾಕಿಸ್ತಾನ್ ಆನಿ ಚೈನಾಂತ್ ಥಾವ್ನ್ ಕಸ್ಲೆ ಪುರಾವೆ ಜಮಂವ್ಚೆ? ಹೆಂ ಸಕ್ಕಡ್ ಸರ್ಕಾರಿ ಪ್ರೊಪಗಂಡಾ.
***
ಮ್ಹಜ್ಯೆ ಯೆಜ್ಮಾನಿನ್ ವಾಡ್ಯಾಂತ್ ಪೇಡಾ ವಾಂಟುನ್ ಸ ದೀಸ್ ಉತರ್ಲೆ. ಸುರ್ಯೊ ತಿತ್ಲೆ ಪಾವ್ಟಿಂ ಉದೆಲಾ ಆನಿಂ ಬುಡ್ಲಾ. ದಿಲ್ಲಿಂತ್ ಪಾರ್ಲಮೆಂಟ್ ಸೆಶನ್ ಚಾಲು ಆಸಾ. ಗ್ರಹ ಮಂತ್ರಿ ಅಮಿತ್ ಶಾ ಆನಿ ಪ್ರಧಾನ್ ಮಂತ್ರಿ ನರೇಂದ್ರ ಮೋದಿ ಹಾಂಚೊ ಪತ್ತೊ ನಾಂ. ಮೋದಿ ಮೊಧ್ಯಾನ್ ರಾತಿಕ್ selfie ಆನಿ Instagram reels ಕರ್ಚ್ಯಾಂತ್ ಬಿಜಿ ಆಸಾ. ಶಾ? ದಿಲ್ಲಿ ಪೊಲಿಸಾಂ ಸಾಂಗಾತಾ ಬಸೊನ್ face recognition technologyಚ್ಯೆ ಫಾಯ್ದೆ ಕಸ್ಲೆ ಹ್ಯಾ ವಿಶಿಂ ಸಂಶೋಧನ್ ಕರ್ನ್ ಆಸಾ ಮ್ಹಣ್ ದಿಸ್ತಾ. CJP ಆಂದೋಲನ್-ಜೀವಿಂಚ್ಯೆರ್ ಮುಖಾರ್ ಕಸಲೆ FIR ತಶೆಂ ಕೇಜಿ ಮಾಂಡ್ಚ್ಯೆ ಮ್ಹಣ್ ಕುತಂತ್ರ್ ರಚ್ತಾ ದಿಸ್ತಾ.
ಪಾರ್ಲಮೆಂಟಾಂತ್ ರಾಹುಲ್ ಗಾಂಧಿನ್ student, idiot ಆನಿ ಅಂಧ್ ಭಕ್ತ್ ಹಾಂಚಿ parable ದಿಲ್ಲಿಚ್ ಭಾಜಪಾಚ್ಯೆ ವಿಧಾಯಕ್ ತಾಚ್ಯೆರ್ ಉಡ್ಕಿ ಮಾರುಂಕ್ ಲಾಗ್ಲೆ. ಹ್ಯಾ ಘೊಟಾಳ್ಯಾ ಮಧೆಂ Public Examinations (Prevention of Unfair Means) Amendment Bill, 2026 ಮಂಜೂರ್ ಜಾಲೆಂ. ಸರ್ಕಾರಿ ಕಾಮ್ ಜಾಲೆಂ. ಪ್ರಜಾ-ಪ್ರಭುತ್ವ್ ಜಿಕ್ಲೆ ಮ್ಹಣ್ ವಿರೋಧಿ ಪಕ್ಶ್ ಖುಶ್! ಗೋದಿ ಮೀಡಿಯಾ ಸಯ್ತ್ ಖುಶ್.
The Accidental Cockroach Party ಮ್ಹಳ್ಳೆಂ ಡೊಕುಮೆಂಟರಿ ಫಿಲ್ಮ್ ಶೀರ್ಷಕ್ ರೆಜಿಸ್ಟರ್ ಜಾಲಾಂ. ಹ್ಯಾ ಮಧೆಂ, Cockroach Party Pakistan ಹಾಂಚ್ಯೆ ರೀಲ್ಸ್ ಒರಿಜಿನಲ್ CJPಚ್ಯೆಂ ನಕ್ಕಲ್ ಕರುಂಕ್ ಲಾಗ್ಲ್ಯಾತ್.
ಕ್ರಾಂತಿ ಕೆನ್ನಾಂಚ್ ಮೊರಾನಾಂ; ತಶೆಂ ಕ್ರಾಂತಿಕಾರ್. ರುಪಾಂ ಬದ್ಲಾತಾತ್; ದೇಸ್ ಬದ್ಲಾತಾತ್. ನವಿ ಪಾಡ್ತ್ ರೆಜಿಸ್ತರ್ ಜಾತಾ. ಜಶೆಂ ಜರ್ಲೆ, ಕಿತ್ಲೆಂ ಫಿಟ್ ಸ್ಪ್ರೇ ಮಾರ್; ಫಕತ್ ಆಪ್ಲಿ ಕಾತ್ ಸೊಡ್ತಾತ್. ಮೊರಾನಾಂತ್. ತಶೆಂ ಕ್ರಾಂತಿಕಾರಿ ಆಸ್ಲೆಲೆ, ನವೆ ರಾಜಕಾರಣಿ ಜಾವ್ನ್ ರೂಪಾಂತರ್ ಜಾತಾತ್. ಆಪ್ಲಿಂ ಉಮೇದ್ವಾರಿಚಿಂ ಕಾಗದ್-ಪತ್ರ್ ದಾಖಲ್ ಕರ್ತಾತ್. ಮುಖ್ಲ್ಯಾ ಚುನಾವಾಚಿ ತಯಾರಿ ಕರ್ಚ್ಯಾಂತ್ ಮಗ್ನ್ ಜಾತಾತ್.
ಕೊಕ್ರೋಚ್ ಜನತಾ ಪಾರ್ಟಿಚಿ ಕಾಣಿ ಹಿಚ್.
■ ಫಿಲಿಪ್ ಮುದಾರ್ಥ್
