ಸಿಕೇರಾಮಾನ್ ಬುಕಾಪಾಟ್ಲ್ಯಾನ್ ಬೂಕ್ ಮ್ಹಣೊನ್ ಇತ್ಲೆ ಬರಯ್ಲೆ ಮ್ಹಳ್ಯಾರ್ ಆತಾಂ ಘರಾಂತ್ ತಾಚ್ಯಾ ಬೂಕ್ಚ್ ಭರೊನ್ ಸಿಕೇರಾಮಾಕ್ ರಾತ್ಚೆಂ ಭಾಯ್ರ್ ನಿದಜೆಂ ಪಡ್ಲಾಂ. ತ್ಯಾ ಭಾಯ್ರ್ ತಾಕಾ ಕೊಣೆಂಗೀ ಸಾಂಗ್ಲೆಂ ಕಂಯ್, ತುವೆಂ ಕೊಂಕ್ಣೆಂತ್ ಆನಿ ಇಲ್ಲೆ ಬೂಕ್ ಕಾಡ್ಲೆಯ್ ತರ್ ತುಜೆಂ ನಾಂವ್ ಗಿನ್ನೆಸ್ ಬುಕ್ ಒಫ್ ರೆಕೋರ್ಡ್ಸ್ ಹಾಂತುಂ ಧಾಕಲ್ ಜಾತೆಲೆಂ ಮ್ಹಣ್. ತಶೆಂ ಆತಾಂ ಸಿಕೇರಾಮ್ ಆನಿಕೀ ಬಿಝಿ. ತಾಕಾ ಆತಾಂ ದೊನ್ಚ್ ಕಾಮಾಂ. ಪಯ್ಲೆಂ, ಸಗ್ಳೊ ದೀಸ್ ಪೇಪರ್ ಆನಿ ಪೆನ್ನ್ ಘೆವ್ನ್ ಬರೊಂವ್ಚೆಂ ಆನಿ ದುಸ್ರೆಂ, ಪುರ್ಸತ್ ಮೆಳ್ತಾನಾ ಘರಾಂತ್ ಆಸ್ಲ್ಲೆ ತಾಚೆ ಬೂಕ್ ಕಾಡ್ಚೆ ಆನಿ ತಾಕಾ ಲಾಗ್ಲ್ಲಿ ಧುಳ್ ಪಾಪುಡ್ನ್ ಪುಸುನ್ ಪರತ್ ಪಾಟಿಂ ದವರ್ಚೆಂ.
ಗಿನ್ನೆಸ್ ರೆಕೋರ್ಡ್ ಮ್ಹಣ್ ಸಿಕೇರಾಮ್ ಬುಕಾವರ್ವಿಂ ಮ್ಹಸ್ತ್ ಚಿಂತಿಲಾಗ್ಲೊ ಆನಿ ಸಿಕೇರಾಮ್ ಚಿಂತ್ಚೆಂ ಪಳೆವ್ನ್ ಸಿಕೇರಾಮಾಚ್ಯೆ ಬಾಯ್ಲೆಕ್ ಚಿಂತ್ತಾ ಜಾಲಿ.
“ಅಳೆಗಾ, ಆಮಿ ವೆಗಿಂಚ್ ಏಕ್ ನವೆಂ ಕೂಡ್ ಬಾಂದಿಜೆ”
“ವ್ಹಯ್ಗೀ ಕಿತೆಂ, ತುಕಾ ಕಾಂಯ್ ಲೊಟ್ರಿ ಪುಣೀ ಲಾಗ್ಲಿಗೀ?”
“ಲೊಟ್ರಿ ನ್ಹಯ್ ಸಾಯ್ಬಾ. ತುಜೆ ಬೂಕ್ ಇತ್ಲೆ ಭರ್ಲ್ಯಾತ್ ಮ್ಹಳ್ಯಾರ್ ತೆ ದವ್ರುಂಕ್ ಆನಿ ಏಕ್ ನವೆಂಚ್ ಕೂಡ್ ಬಾಂದಿಜೆ ಪಡತ್. ಬಾಂದ್ತಾನಾ ಸಿಂಗಲ್ ಬೆಡ್ರುಮಾಚೆಂ ಆಮ್ಚೆಂ ಘರ್ ತುಜ್ಯಾ ಬುಕಾವರ್ವಿಂ ಟು ಬಿಎಚ್ಕೆ ಥಾವ್ನ್ ತ್ರಿ ಬಿಎಚ್ಕೆಕ್ ಆಯ್ಲ್ಯಾಂವ್. ಆನಿಕೀ ತುಂ ಬೂಕ್ಚ್ ಬರೊವ್ನ್ ವೆಶಿ ತರ್ ಫೋರ್, ಫೈವ್ಥಾವ್ನ್ ಸೆವೆನ್ ಬಿಎಚ್ಕೆ ಮ್ಹಣಾಸರ್ ವಚಜೆ ಪಡತ್. ಆನಿ ತುಂ ಗಿನ್ನೆಸ್ ರೆಕೋರ್ಡ್ ಕರ್ಚ್ಯಾ ಮ್ಹಣಾಸರ್ ಪಾವ್ಲೊಯ್ ತರ್ ಮಾಗಿರ್ ಆಮಿ ಸೆಜಾರ್ಯಾಂಚೊ ದೊರೊ ಕಾಡ್ನ್ ಆಮ್ಚೆಂ ಕಾಂಪಾಂವ್ಡ್ ವಿಸ್ತಾರಿಜೆ ಪಡತ್”
“ತಶೆಂ ಮ್ಹಳ್ಯಾರ್ ಹಾಂವ್ ಗಿನ್ನೆಸ್ ರೆಕೋರ್ಡ್ ಮ್ಹಣಾಸರ್ ಪಾವ್ಲೊಂ ತರ್ ಆಮ್ಚೆಂ ಘರ್ ಸೆವೆನ್ ಸ್ಟಾರ್ ಜಾತೆಲೆಂ ಮ್ಹಣ್ಚೆಂ ತುವೆಂ?” ಸಿಕೇರಾಮ್ ಸಂತೊಸಾನ್ ಫುಲ್ಲೊ.
“ಸೆವೆನ್ ಸ್ಟಾರ್ ಜಾಂವ್ಚ್ಯಾ ಪಯ್ಲೆಂ ತುಜೆಂ ಬರೊಂವ್ಚೆಂಚ್ ಸ್ಟಾರ್ ಬಂದ್ ಕರುಂಕ್ ಆಸಾಂ ಹಾಂವ್. ವೆಗಿಂಚ್ ಹೆ ಬೂಕ್ ವಿಕುನ್ ಸೊಡ್ಲೆಯ್ ಜಾಲೆ. ನಾ ತರ್ ಇತ್ಲ್ಯಾ ಬುಕಾಂಕ್ ಎಕ್ಚ್ ಪಾವ್ಟಿಂ ಉಜೊ ಲಾಯಿಲ್ಲಿ ಪಯ್ಲಿ ಸ್ತ್ರೀ ಮ್ಹಣ್ ಮ್ಹಜೆಂ ನಾಂವ್ ಗಿನ್ನೆಸ್ ಬುಕ್ ಒಫ್ ರೆಕೋರ್ಡಾಂತ್ ಧಾಕಲ್ ಕರುಂಕ್ ಆಸಾಂ.”
ಸಿಕೇರಾಮಾಕ್ ಬಾಯ್ಲೆಚೊ ರಾಗ್ ಆತಾಂ ಕಳ್ಳೊ. ತಶೆಂ ತೊ ಸಂಪೂರ್ಣ್ ಗಳ್ಳೊ. ಪಯ್ಲೆಂ ಆಸ್ಲ್ಲೆ ಬೂಕ್ ವಿಕುನ್ ಖಾಲಿ ಕರ್ತಾ ಮ್ಹಣಾಸರ್ ಆಪ್ಣಾಕ್ ದುಸ್ರೊ ಉಪಾಯ್ ನಾ ಮ್ಹಣ್ ತಾಕಾ ಸ್ಪಶ್ಟ್ ಕಳ್ಳೆಂ. ಬೂಕ್ ವಿಕುಂಕ್ ತಾಣೆಂ ಜಾಯ್ತ್ಯೊ ವಾಟೊ ಆಪ್ಣಾಯಿಲ್ಲ್ಯೊ. ಪುಣ್ ಖಂಯ್ಚ್ಯಾಂತ್ಯೀ ಸುಫಳ್ ಜಾಂವ್ಕ್ ನಾ. ದೆಕುನ್ ಬೂಕ್ ವಿಕುಂಕ್ ದುಸ್ರ್ಯೊ ಖಂಯ್ಚ್ಯೋಯ್ ವಾಟೊ ಆಸಾತ್ಗೀ ಮ್ಹಣ್ ತೊ ಪೇಪರ್ ಆನಿ ಪೆನ್ನ್ ಘೆವ್ನ್ ಲಿಸ್ಟ್ ಕರುಂಕ್ ಬಸ್ಲೊ. ತೊ ಅಶೆಂ ಬಸ್ಲಾ ಮಾತ್ರ್, ತಾಚಿ ಬಾಯ್ಲ್ ಭಿತರ್ ಥಾವ್ನ್ ಏಕ್ ಸುರಿ ಘೆವ್ನ್ ರಾಗಾನ್ ಆಯ್ಲಿಚ್.
“ಹಾಂವ್ ಬೂಕ್ ಬರೊಂವ್ಕ್ ನ್ಹಯ್, ಬೂಕ್ ಕಶೆ ವಿಕ್ಚೆ ಮ್ಹಣ್ ಲಿಸ್ಟ್ ಕರುಂಕ್ ಬಸ್ಲಾಂ” ಸಿಕೇರಾಮಾನ್ ಗಡ್ಬಡೊನ್ ಮ್ಹಳೆಂ.
ತಾಚ್ಯೆ ಬಾಯ್ಲೆಕ್ ಹಾಸೊ ಆಯ್ಲ್ಯೊ. ಹಾಂವ್ ತುಕಾ ಸುರಿ ಘಾಲುಂಕ್ ಯೇಂವ್ಕ್ ನಾ. ಭಾಯ್ರ್ ಕತ್ತರಿ ಸಾಣೆಚೊ ಆಯ್ಲಾ. ಹಾಂವ್ ತಾಚೆಸರ್ಶಿಂ ಸುರಿ ಪಾಜುಂಕ್ ದೀಂವ್ಕ್ ವೆತೇ ಆಸಾಂ.
ತಿತ್ಲ್ಯಾರ್ ಸಿಕೇರಾಮಾಚ್ಯೆ ತಕ್ಲೆಂತ್ ಏಕ್ ನವೊ ಉಪಾಯ್ ಝಳ್ಕಾಲೊ. ತೊ ಭಾಯ್ರ್ ಗೆಲೊ. ತಾಣೆಂ ತ್ಯಾ ಕತ್ತರಿ ಸಾಣೆಚ್ಯಾಕ್ ಪಳಯ್ಲೊ. ಏಕ್ ಬಾಯ್ಕ್, ತಾಕಾ ಏಕ್ ರೇಡಿಯೊ. ತಾಚೆರ್ ಆದಿಂಚ್ ರೆಕೋರ್ಡ್ ಕೆಲ್ಲೆಂ ಗಾಜೊನ್ ಆಸಾ. ‘ಕತ್ತರಿ ಸಾಣೆ, ಬ್ಯಾಗ್ ರಿಪೇರಿ, ಝಿಪ್ ಇತ್ಯಾದಿ ಹಾಕಿ ಕೊಡಲಾಗುವುದು’
ಬಾಯ್ಲ್ ಆಯಿಲ್ಲಿಚ್ ತಾಣೆಂ ಮ್ಹಳೆಂ.
“ಮ್ಹಾಕಾಯ್ ಬೂಕ್ ವಿಕ್ಚಿ ಏಕ್ ನವಿಚ್ ಐಡಿಯಾ ಮೆಳ್ಳಿ. ಹಾಂವ್ಯೀ ಕಿತ್ಯಾಕ್ ತಾಚೆಬರಿಚ್ ಏಕ್ ಬಾಯ್ಕ್ ಘೆವ್ನ್, ದೋನ್ ಬ್ಯಾಗಾಂನಿ ಬೂಕ್ ಘೆವ್ನ್ ರೆಕೋರ್ಡ್ ಕರ್ನ್, ಗಲ್ಲೆ-ಗಲ್ಲೆಂನಿ ಭೊಂವೊನ್ ಬೂಕ್ ವಿಕುಂಕ್ ನ್ಹಜೊ?”
“ಗ್ರೇಟ್ ಐಡಿಯಾ ಸಾಯ್ಬಾ. ಹಿ ಸುರಿ ಪಾಜ್ತಾನಾ ತುಜಿ ತಕ್ಲಿಯ್ ಪಾಜುನ್ ಗೆಲಿಗೀ ಮ್ಹಣ್. ಆತಾಂ ತಿ ಸಾರ್ಕಿ ಕಾಮ್ ಕರ್ತಾ. ದೋನ್ ಬ್ಯಾಗಾಂ ಕಿತ್ಯಾಕ್. ದೋನ್ ಗೊಣಿಯಾಂನಿ ವ್ಹರ್. ಪಯ್ಲೆಂಚ್ ರೆಕೋರ್ಡ್ ಕರ್ಚೆಂ ಜಾಲ್ಲ್ಯಾನ್ ತಾನೆನ್ ತುಜೊ ಗಳೊಯ್ ಸುಕ್ಚೊನಾ ಆನಿ ಬಾಯ್ಕಾರ್ ವೆತಾಯ್ ಜಾಲ್ಲ್ಯಾನ್ ಚಲೊಂಕ್ ನಾಸ್ತಾಂ ಪುರಾಸಾಣೆನ್ ಘಾಮ್ಯೀ ಯೆಂವ್ಚೊನಾ.”
ಮ್ಹಜಿ ತಕ್ಲಿ ಪಾಜ್ಲಿ ಗೀ ವಾ ತಕ್ಲಿ ಕಾಪ್ಲಿಗೀ ತೆಂ ಫಾಲ್ಯಾಂಚ್ ಬೂಕ್ ವಿಕುಂಕ್ ವೆತಾನಾ ಕಳ್ತೆಲೆಂ. ದುಸ್ರ್ಯಾ ದಿಸಾ ಹಾಂವ್ ದೋನ್ ಗೊಣಿಯಾಂನಿ ಬೂಕ್ ಘೆವ್ನ್ ರೆಕೋರ್ಡ್ ಕರ್ನ್ ಬಾಯ್ಕಾರ್ ವಚೊಂಕ್ ಆಯ್ತೊ ಜಾಲೊಂ. ಆಮ್ಚೊ ಕ್ರಿಸ್ತಾಂವ್ ಲೋಕ್ ಕುಲ್ಪಾಂ ಕಾಡ್ಚ್ಯಾಂತ್ ಆನಿ ನಕ್ಲಾಂ ಕರ್ಚ್ಯಾಂತ್ ತೆಂಯ್ ಒಳ್ಕಿಚೊ ತರ್ ತಾರಿಫಾಂ ಕರ್ಚ್ಯಾಂತ್ ಎಕ್ದಮ್ ಹುಶಾರ್ ಜಾಲ್ಲ್ಯಾನ್ ಹಾಂವ್ ಪಯ್ಶಿಲ್ಯೆ ಫಿರ್ಗಜೆಕ್ ಪಾವ್ಲೊಂ. ಥಂಯ್ಸರ್ ಕ್ರಿಸ್ತಾಂವ್ ಘರಾಂ ಆಸ್ಚ್ಯೆ ಗಲ್ಲೆಂತ್ ರಿಗ್ಲೊಂ.
ಮ್ಹಜೆಂ ರೆಕೋರ್ಡ್ ಒನ್ ಕೆಲೆಂ. ತೆಂ ಅಶೆಂ ಆಸ್ಲ್ಲೆಂ. ‘ಘೆಯಾ ಘೆಯಾ ಕೊಂಕ್ಣಿ ಹಾಸ್ಯ್ ಪುಸ್ತಕ್. ದರಬಸ್ತ್ ಹಾಸೊಂಕ್ ಆನಿ ಮಝಾ ಭೊಗುಂಕ್. ತುಮ್ಚಿ ಖಂತ್ ಬೆಜಾರಾಯ್ ಪಯ್ಸ್ ಕರುಂಕ್ ಆತಾಂಚ್ ಘೆಯಾ.’ ಇತ್ಲೆಂ ಮ್ಹಾಕಾ ಪುರೊ ಮ್ಹಣ್ ಭೊಗ್ಲ್ಲೆಂ. ಪುಣ್ ಸಕ್ಕಡ್ ವಾಕ್ಯಾಂ ಮ್ಹಜಿಂಚ್ ಜಾಲ್ಯಾರ್ ಬಾಯ್ಲೆಚೆಂ ಖಂಯ್ ಆಸಾ. ದೆಕುನ್ ತಿಣೆಂ ಜಬರ್ದಸ್ತೆನ್ ತಿಚಿಂಯ್ ದೋನ್ ವಾಕ್ಯಾಂ ನಾಕಾ ನಾಕಾ ಮ್ಹಳ್ಯಾರ್ಯೀ ಕುಡ್ಸಿಲ್ಲಿಂ – ‘ಆಜ್ಚ್ ಹಾಸಾ, ಫಾಲ್ಯಾಂಚೊ ದೀಸ್ ಕೊಣೆಂ ಪಳಯ್ಲಾ. ದುಸ್ರ್ಯಾಂಚ್ಯೊ ಖಬ್ರೊ ಉಲೊವ್ನ್ ವೇಳ್ ವಿಬಾಡ್ಚ್ಯಾ ಬದ್ಲಾಕ್ ಇಲ್ಲೆಂ ಪುಣೀ ಹಾಸಾ.’
ಜಾಲ್ಲೆಬರಿ ಜಾತಾ ಮ್ಹಣ್ ಹಾಂವ್ ಗಲ್ಲೆಂನಿ ಭೊಂವೊಂಕ್ ಲಾಗ್ಲೊಂ. ಎಕ್ಲೊಯ್ ಭಾಯ್ರ್ ಯೇಂವ್ಕ್ ನಾ. ಆಮ್ಚೆ ಕ್ರಿಸ್ತಾಂವ್ ದುಕ್ರಾಮಾಸ್ ಖಾವ್ನ್ ಆಳ್ಶಿ, ಉಟೊಂಕ್ ಘಳಾಯ್ ಕರ್ತಾತ್ ಮ್ಹಣ್ ಗಲ್ಲೆ-ಗಲ್ಲೆಂನಿ ಪರತ್ ಗೆಲೊಂ. ತರೀ ಎಕ್ಲೊಯ್ ನಾ. ತ್ಯಾ ಕತ್ತರಿ ಸಾಣೆಚ್ಯಾಕ್ ಆಸ್ಚಿ ತಿತ್ಲಿ ಮರ್ಯಾದ್ ಮ್ಹಾಕಾ ಮೆಳ್ಳಿನಾ ಮ್ಹಣ್ ಹಾಂವ್ ಕರ್ಗಾಲೊಂ. ಹಾಂವ್ ಹ್ಯಾ ಕೊಂಕ್ಣಿ ಬೂಕ್ ವಿಕ್ಚೆಮಾರಿಫಾತ್ ಕ್ರಿಸ್ತಾಂವ್ ಲೊಕಾಂಚೆರ್ ಕಾಂಯ್ ಹಲ್ಲೊ ಪುಣೀ ಕರ್ನ್ ಆಸಾಂಗಾಯ್ ಮ್ಹಣ್ ದುಬಾವ್ ಜಾಲೊ ಮ್ಹಾಕಾ. ಕಿತ್ಯಾಕ್ ಮ್ಹಳ್ಯಾರ್ ಜಶೆಂ ಕ್ರಿಸ್ತಾಂವಾಂಚೆರ್ ಹಲ್ಲೊ ಜಾತಾನಾ ಎಕ್ಲೊಯ್ ದಾರ್ ಕಾಡಿನಾಸ್ತಾನಾ ಭಾಯ್ರ್ ಯೇನಾಂತ್ಗೀ ತಶೆಂಚ್ ಕೊಣೀ ಭಾಯ್ರ್ ಯೆಂವ್ಚೆ ದಿಸ್ಲೆನಾಂತ್.
ತಿತ್ಲ್ಯಾರ್ ಎಕಾ ಮಾನೆಸ್ತಾನ್ ತಾಚ್ಯಾ ಘರಾಥಾವ್ನ್ ಮ್ಹಾಕಾ ಉಲೊ ದಿಲೊ – “ಏಯ್ ಸಿಕೇರಾಮ್, ಹಾಂಗಾ ಯೇ.”
ತಾಚ್ಯಾ ಆಪೊವ್ಣ್ಯಾಕ್ ಮ್ಹಾಕಾ ದೇವ್ಚ್ ಆಪಯ್ತಾ ತಿತ್ಲೊ ಸಂತೊಸ್ ಜಾಲೊ. ಹಾಂವ್ ಘಡಿಯೆನ್ ತಾಂಚ್ಯಾ ಘರಾಬಾಗ್ಲಾರ್ ಹಾಜರ್.
“ತುಂ ಸಿಕೇರಾಮ್ ನೇ. ಕಾಲೆಂ ಬರಯ್ತಾಯ್ ಸಾಯ್ಬಾ. ಹಾಸೊಚ್ ಮುಗ್ದಾನಾಂತ್. ಯೇ ಯೇ ಘರಾ ಭಿತರ್ ಯೇ” ಮ್ಹಣ್ ವ್ಯಂಗ್ಯಾನ್ ಹಾಸೊನ್ ಭಿತರ್ ಆಪೊವ್ನ್ ವ್ಹರ್ನ್ ಗೆಲೊ. ಭಿತರ್ ಗೆಲ್ಲೊಂಚ್ ಉಣ್ಯಾರ್ ಪಂದ್ರಾ ಮಿನುಟಾಂ ಮ್ಹಾಕಾ ಹೊಗೊಳ್ಸಿಲೆಂ. ತಿತ್ಲ್ಯಾರ್ ತಾಚಿ ಬಾಯ್ಲ್ ಮ್ಹಾಕಾ ಪಿಯೆಂವ್ಕ್ ಶರ್ಬತ್ ಹಾಡ್ನ್ ಆಯ್ಲಿ. ಪಿಯೆವ್ನ್ ಮುಗ್ದೊಂಚ್ಯಾ ಭಿತರ್ ಹೊ ಮಾನೆಸ್ತ್ ಭಿತರ್ ವಚೊನ್ ದೋನ್ ಪೊತ್ಯಾಂನಿ ಭರ್ನ್ ಬೂಕ್ ಘೆವ್ನ್ ಆಯ್ಲೊ.
“ಸಿಕೇರಾಮಾ, ತುಂ ಇತ್ಲೆಂ ಬರೆಂ ಬರಯ್ತಾಯ್ ಮ್ಹಳ್ಯಾರ್, ಇತ್ಲೆಂ ಬರೆಂ ಬರಯ್ತಾಯ್ ಮ್ಹಳ್ಯಾರ್ ತುಕಾ ಮ್ಹಜ್ಯಾ ಲೆಕಾರ್ ಹೆ ದೋನ್ ಪೊತಿಂ ಬೂಕ್ ಫುಂಕ್ಯಾಕ್”
“ತುಮಿ ಅಶೆಂ ಬೂಕ್ ಫುಂಕ್ಯಾಕ್ ದಿಂವ್ಚೆ ಪಳಯ್ತಾನಾ ತುಮಿ ಕಾಂಯ್ ಖಂಯ್ಚ್ಯಾಯ್ ಪತ್ರಾಚೆ ಸಂಪಾದಕ್ ಆಸ್ಲ್ಲ್ಯಾತ್ಗೀ?” ಹಾಂವೆಂ ಮ್ಹಜೊ ದುಬಾವ್ ಉಚಾರ್ಲೊ. “ಸಾಂಗ್ಲ್ಲೆಬರಿ ಮ್ಹಜೆ ಬೂಕ್ ಘೆನಾಸ್ತಾನಾ ತುಮ್ಚೆ ಬೂಕ್ ಮ್ಹಾಕಾ ಕಿತ್ಯಾಕ್? ತುಮಿ ಇತ್ಲೆ ಬೂಕ್ ಘೆವ್ನ್ ವಾಚ್ಲ್ಯಾತ್ ತರ್ ಮ್ಹಜೆಯ್ ಬೂಕ್ ಘೆಯಾನೇ”
“ಅಳೆ, ಹಾಂವೆಂ ಖಂಯ್ಚೇಯ್ ಬೂಕ್ ಆಜ್ ಮ್ಹಣಾಸರ್ ಮೊಲಾಕ್ ಘೆಂವ್ಕ್ ನಾಂತ್. ಪುಣ್ ವಾಚ್ಚಿ ಪಿಸಾಯ್ ಆಸಾ. ಹೆ ಬೂಕ್ ಹಾಂವೆಂ ಜಾಯ್ತ್ಯಾಂಥಾವ್ನ್ ವಾಚುಂಕ್ ಮ್ಹಣ್ ಹಾಡ್ಲ್ಲೆ. ಪುಣ್ ವಾಚುನ್ ತಾಂಕಾಂ ಪಾಟಿಂ ದೀಂವ್ಕ್ ಯೆತಾನಾ ತೆ ಕೊಣೀ ವಾಂಚೊನ್ ಉರೊಂಕ್ ನಾಂತ್. ತಶೆಂ ಜಾಲ್ಲ್ಯಾನ್ ಮ್ಹಜೆಲಾಗಿಂಚ್ ಉರ್ಲೆ.”
“ಮಣ್ಜೆ ಫುಂಕ್ಯಾಕ್ ತುಮ್ಕಾಂ ಮೆಳ್ಳಾಂ, ಫುಂಕ್ಯಾಕ್ ತುಮಿ ದಿಯಾ”
“ತಶೆಂ ಚೂಕ್ ಸಮ್ಜಾನಾಕಾ ಸಿಕೇರಾಮಾ, ತುಂ ಕೊಂಕ್ಣೆಚೊ ಮುಕ್ಲೊ ಫುಡಾರಿ. ಮ್ಹಾಕಾ ಆತಾಂ ಪ್ರಾಯ್ ಜಾಲಿ. ಮ್ಹಜೆ ಹಾತ್ ಕಾಂಪ್ತಾತ್. ಏಕ್ ಬೂಕ್ ಹಾತಾಂತ್ ಧರಿಜೇ ಜಾಲ್ಯಾರೀ ಇಲ್ಲೆಂ ಶೆಕಿಜೆ ಪಡ್ತಾ. ಆನಿ ಏಕ್ ಪಾವ್ಟಿಂ ಶೆಕ್ಲೆಂ ಜಾಲ್ಯಾರ್ ಮಾಗಿರ್ ವಾಚ್ತಾನಾ ಅಕ್ಶರಾಂ ಮಾಲ್ವಲ್ಲೆಬರಿ ಜಾತಾತ್. ತುಜೊ ಬೂಕ್ ಘೆಂವ್ಕ್ಯೀ ಜಾಯ್ನಾ, ಹೆಯ್ ಘರಾಂತ್ ದವ್ರುಂಕ್ ಜಾಯ್ನಾಂತ್.”
ತಾಣೆಂ ಸಾಂಗ್ಲ್ಲ್ಯಾಕ್ ನ್ಹಯ್ ತರೀ ಕೊಂಕ್ಣೆಖಾತಿರ್ ಹಾಂವೆಂ ತೆ ಬೂಕ್ ಘೆತ್ಲೆ ಆನಿ ಹಾಂವ್ ಥಂಯ್ ಥಾವ್ನ್ ನಿಕಳ್ಳೊಂ. ಗೆಟಿಕಡೆನ್ ಪಾವ್ತಾನಾ ತಾಣೆಂ ಬಾಯ್ಲೆಲಾಗಿಂ ಕೆಲ್ಲೆಂ ಸಂಭಾಶಣ್ ಮ್ಹಜ್ಯಾ ಕಾನಾಂತ್ ಪಡ್ಲೆಂ.
“ಕಶಿ ಮ್ಹಜಿ ಐಡಿಯಾ, ಗುಜರಿಚ್ಯಾನಿಂಯ್ ವ್ಹರಿನಾ ಮ್ಹಳ್ಳೆಂ ದೊದೋನ್ ಪೊತಿಂ ಬೂಕ್ ತ್ಯಾ ಸಿಕೇರಾಮಾಕ್ ಲಾಟ್ಲೆ.”
ಹಾಂವ್ ತ್ಯಾ ಘರಾಥಾವ್ನ್ ಭಾಯ್ರ್ ಪಡಜೆ ಜಾಲ್ಯಾರ್ ತಾಚ್ಯೆ ಬಾಯ್ಲೆನ್ ತಿ ಖಬರ್ ಘಡಿಯೆನ್ ತ್ಯೆ ಗಲ್ಲೆಂತ್ ವಿಸ್ತಾರಾಯ್ಲಿ. ಹಾಂವ್ ಮಾತ್ರ್ ಕೊಂಕ್ಣಿ ಫುಡಾರಿ, ಕೊಂಕ್ಣಿ ಸುಪುತ್ರ್ ತ್ಯೆ ಗಲ್ಲೆಥಾವ್ನ್ ಸಾಂಜೆರ್ ಭಾಯ್ರ್ ಪಡ್ತಾನಾ ಮ್ಹಜ್ಯಾ ದೋನ್ ಗೊಣಿಯಾಂ ಬುಕಾ ಸಾಂಗಾತಾ ತ್ಯೆ ಗಲ್ಲೆಂತ್ಲೆ ದೋನ್ ಗೊಣಿಯೊ ಚಡಿತ್ ಕೊಂಕ್ಣಿ ಬೂಕ್ ಘೆವ್ನ್ ಘರಾ ಪಾವ್ಲೊಂ!
ಚಡ್ತಿಕ್ ದೋನ್ ಗೊಣಿಯೊ ಬೂಕ್ ಪಳೆವ್ನ್ ಬಾಯ್ಲ್ ರಾಗಾನ್ ತಾಪ್ಲಿ. “ತುಂ ಬೂಕ್ ವಿಕುಂಕ್ ಗೆಲ್ಲೊಯ್ಗೀ ವಾ ತಾಂಚೆ ಜೆರಾಕ್ಸ್ ಹಾಡುಂಕ್ ಗೆಲ್ಲೊಯ್?”
ಹೆ ಕೊಂಕ್ಣಿ ಬೂಕ್ ವಿಕ್ಚ್ಯಾ ಬದ್ಲಾಕ್ ಕತ್ತರಿ ಸಾಣೆ ಜಾಂವ್ಚೆಂಚ್ ಬರೆಂ ಮ್ಹಣ್ ಬಾಯ್ಲೆಕ್ ಸಾಂಗ್ತಾನಾ ತಿಚ್ಯಾ ಹಾತಾಂತ್ಲಿ ಸುರಿ ತಿಣೆಂ ಅಶೆಂ ಉಬಾರ್ಲಿ ಕೀ, ಮ್ಹಾಕಾ ಟಿಪ್ಪು ಸುಲ್ತಾನಾನ್ ತಾಚಿ ತಲ್ವಾರ್ ಭಾಯ್ರ್ ಕಾಡ್ಲ್ಲೆಬರಿ ಜಾಲೆಂ.
ದೋನ್ ದೀಸ್ ಉತರ್ಲೆ. ಮ್ಹಜ್ಯಾ ಘರಾಂತ್ ಬೂಕ್ ಇತ್ಲೆ ಭರ್ಲ್ಲೆ ಮ್ಹಳ್ಯಾರ್ ಮ್ಹಾಕಾ ಚ್ಯಾರ್ ಮೆಟಾಂ ಕಾಡಿಜೆ ತರ್ ವೀಸ್ ಮಿನುಟಾಂ ಲಾಗ್ತಾಲಿಂ. ಬೊಂಬಯ್ಚ್ಯಾ ಲೋಕಲ್ ಟ್ರೆಯ್ನಾರ್ ಆಸ್ಚ್ಯೆ ಗಡ್ದೆಬರಿ ಮ್ಹಜ್ಯಾ ಘರಾಂತ್ ಗಡ್ದಿ ಜಾಲ್ಲಿ. ಅಶೆಂ ಸುವಾತ್ ನಾಸ್ತಾಂ ಮ್ಹಾಕಾ ಖಂತ್ ಜಾಲಿ. ನವೊ ಬೂಕ್ ಬರೊಂವ್ಕ್ ಸುವಾತ್ ಮೆಳ್ಳಿನಾ ತರ್ ಮ್ಹಜೆಂ ಗಿನ್ನೆಸ್ ರೆಕೋರ್ಡ್ ಅಧುರೆಂ ಉರ್ತೆಲೆಂ.
ತಿತ್ಲ್ಯಾರ್ ಮ್ಹಾಕಾ ಆನ್ಯೇಕ್ ಐಡಿಯಾ ಝಳ್ಕಾಲಿ. ಹಾಂವೆಂ ಕಿತ್ಯಾಕ್ ಅಮೆಜಾನಾಚ್ಯಾಂಕ್ ಸಂಪರ್ಕ್ ಕರ್ನ್ ತಾಂಚೆಕರ್ನಾ ಮ್ಹಜೆ ಬೂಕ್ ವಿಕುಂಕ್ ನ್ಹಜೊ. ಆಜ್ ಅಮೆಜಾನಾರ್ ಸಕ್ಕಡ್ ವಿಕುನ್ ವೆತಾ. ಹಾಂವೆಂ ತಕ್ಶಣಾ ಮೊಬಾಯ್ಲ್ ಕಾಡ್ನ್ ಅಮೆಜಾನ್ ಒಫಿಸಾಕ್ ಫೊನ್ ಕೆಲೆಂ.
“ಹಲೋ, ಸಿಕೇರಾಮ್ ಸಾಂಗ್. ಕಿತೆಂ ಫೋನ್ ಕೆಲೆಂಯ್. ಬುಕಾವಿಶಿಂ ಉಲೊಂವ್ಕ್ಗೀ?”
ಅರೇ, ಹ್ಯಾ ಅಮೆಜಾನ್ವಾಲ್ಯಾಂಕ್ಯೀ ಮ್ಹಜೆಂ ನಾಂವ್ ಕಳಿತ್ ಆಸಾ. ಹಾಂವ್ ತಿತ್ಲೊಯ್ ಫಾಮಾದ್ ಗೀ?
“ತುಮ್ಕಾಂ ಕಶೆಂ ಮ್ಹಜೆಂ ನಾಂವ್ ಕಳ್ಳೆಂ ಸರ್. ತುಮಿ ಮ್ಹಜೆ ಬೂಕ್ ವಾಚ್ಲ್ಯಾತ್ಗೀ?”
“ತುಜೆ ಸಕ್ಕಡ್ ಬೂಕ್ ಹಾಂವೆಂ ವಾಚ್ಲ್ಯಾತ್. ವಾಚ್ಲ್ಯಾತ್ ಮಾತ್ರ್ ನ್ಹಯ್ ಚ್ಯಾ-ಚ್ಯಾರ್ ಪಾಂ-ಪಾಂಚ್ ಪಾವ್ಟಿಂ ವಾಚ್ಲ್ಯಾತ್.”
ಆಯ್ಕೊನ್ ಸಿಕೇರಾಮಾಚ್ಯಾ ದೊಳ್ಯಾಂಥಾವ್ನ್ ಸಂತೊಸಾಚಿಂ ದುಕಾಂ ದೆಂವ್ಲಿಂ. “ವ್ಹಯ್ಗೀ ಸರ್. ತುಮಿ ಜಾಲ್ಯಾರ್ ಮ್ಹಜೆ ಅಭಿಮಾನಿ. ಆಯ್ಚೊ ದೀಸ್ ಮ್ಹಜೊ ಸುಫಳ್ ಜಾಲೊ”
“ದೀಸ್ ತುಮ್ಚೊ ನ್ಹಯ್, ಮ್ಹಜೊ ಸುಫಳ್ ಜಾಲೊ ಸರ್ ತುಮ್ಚೆಂ ಫೊನ್ ಪಳೆವ್ನ್”
“ಪುರೊ ಪುರೊ ಸಾಯ್ಬಾ. ಆನಿ ಚಡ್ ಸಾಂಗನಾಕಾ. ಚಡ್ ಆಯ್ಕಲ್ಯಾರ್ ಮ್ಹಾಕಾ ಧಕೊ ಬಸತ್”
“ಧಕೊ ಮ್ಹಾಕಾ ಬಸ್ತೊ ಜರ್ ಫೊನ್ ಕರುಂಕ್ ಘಳಾಯ್ ಕೆಲ್ಲಿ ತರ್”
“ವ್ಹಯ್ಗೀ ಕಿತೆಂ?”
“ತುಮಿ ಎದೊಳ್ ವರೇಗ್ ಕಾಂಯ್ ಪಾಂಚ್ ಹಜಾರ್ ಬೂಕ್ ಕಾಡ್ಲ್ಯಾತ್ ವ್ಹಯ್ಮೂ?”
“ವ್ಹಯ್ ವ್ಹಯ್”
“ತಾಂತುಂ ಎದೊಳ್ ವರೇಗ್ ಬಾತ್ತೀಸ್ ಬೂಕ್ ವಿಕುನ್ ಗೆಲ್ಯಾತ್. ವ್ಹಯ್ಮೂ?”
“ಅರೇ, ತುಜೆಲಾಗಿಂ ಕರೆಕ್ಟ್ ಲೇಕ್ ಆಸಾ ಸಾಯ್ಬಾ. ತುಂ ನೀಜ್ ಜಾವ್ನ್ ಮ್ಹಜೊ ವ್ಹಡ್ ಅಭಿಮಾನಿ”
“ಅಭಿಮಾನಿಗೀ ಕರ್ಮಾಂ. ತುಮಿ ವಿಕ್ಲ್ಲೆ ಬೂಕ್ ಘೆತ್ಲ್ಲ್ಯಾಂನಿ ಮ್ಹಜೆಲಾಗಿಂ ಉಣ್ಯಾ ಮೊಲಾಕ್ ಪುಣೀ ವಿಕುನ್ ದೀ ಸಾಯ್ಬಾ ಮ್ಹಣ್ ಪಾಟ್ಲ್ಯಾ ಸಾತ್ ವರ್ಸಾಂಥಾವ್ನ್ ತೆ ಹಾಂಗಾ ಲೊಳೊನ್ ಆಸಾತ್. ಮ್ಹಾಕಾ ಹ್ಯಾ ಕಾಮಾಂತ್ ಇಲ್ಲೊ ಪ್ರೆಶ್ಶರ್. ಮ್ಹಳ್ಯಾರ್ ಜಾಯ್ತೆಪಾವ್ಟಿಂ ‘ಜೀವನದಲ್ಲಿ ಜಿಗುಪ್ಸೆ’ ಜಾಲಾಂ. ತೆದ್ನಾಂ ಹಾಂವೆಂ ತುಜೆ ಬೂಕ್ ವಾಚ್ಲ್ಯಾತ್. ತೆ ವಾಚ್ಲ್ಯಾ ಉಪ್ರಾಂತ್ ಮ್ಹಜ್ಯಾಕೀ ಚಡ್ ಜಿಗುಪ್ಸೆ ಆಸ್ಚೆ ಬೂಕ್ ಪಳೆವ್ನ್ ಮ್ಹಜೆಂ ಜಿಗುಪ್ಸೆ ಖಂಯ್ ಧಾಂವ್ತಾ ಮ್ಹಣ್ ನಾ. ಇತ್ಲ್ಯಾ ವರ್ಸಾಂನಿ ಮ್ಹಜೆಲಾಗಿಂ ಆಸ್ಲ್ಲೆ ಸಕ್ಕಡ್ ಮಾಲ್ ವಿಕುನ್ ಗೆಲ್ಯಾತ್. ಬಾಕಿ ಉರ್ಲ್ಯಾತ್ ಮ್ಹಳ್ಯಾರ್ ತುಜೆ ಹೆ ಬೂಕ್.”
ತೊ ಉಲೊವ್ನ್ಚ್ ಆಸ್ಲ್ಲೊ. ಹಾಂವೆಂ ‘ಹಲೋ ಹಲೋ’ ಮ್ಹಣ್ ರೇಂಜ್ ಮೆಳ್ನಾ ಮ್ಹಳ್ಳೆಬರಿ ಕರ್ನ್ ಫೊನ್ ಕಟ್ಟ್ ಕೆಲೆಂ. ಹಾಂವ್ ಅಮೆಜಾನಾಥಾವ್ನ್ ಪರೇಶಾನ್ ಜಾಲೊಂ. ಅಮೆಜಾನಾಚ್ಯಾ ರಾನಾಂತ್ಯೀ ಇತ್ಲೆ ರೂಕ್ ಆಸ್ಚೆನಾಂತ್ಗೀ ಜಿತ್ಲೆ ಬೂಕ್ ಮ್ಹಜ್ಯಾ ಘರಾಂತ್ ಆಸಾತ್. ತಿತ್ಲ್ಯಾರ್ ಮ್ಹಜ್ಯಾ ಬುಕಾಥಾವ್ನ್ ಕಿರಿಕಿರಿ ಜಾವ್ನ್ ಬೈಬಲ್ ಬೂಕ್ ವಾಚುನ್ ಆಸ್ಲ್ಲಿ ಮ್ಹಜಿ ಬಾಯ್ಲ್ ತಿಚ್ಯೆ ಮತಿಕ್ ಕಿತೆಂಗೀ ಝಳ್ಕಾಲ್ಲೆಬರಿ ಜಾವ್ನ್ ಆಯ್ಲಿ ಆನಿ ಮ್ಹಣಾಲಿ.
“ತುಜೆ ಬೂಕ್ ವಿಕುಂಕ್ ಮ್ಹಜೆಲಾಗಿಂ ಏಕ್ ಉತ್ತೀಮ್ ಐಡಿಯಾ ಆಸಾ. ಆಮಿ ಸೊಭಿತ್ ಚೆಡ್ವಾಂಕ್ ವಿಂಚ್ಯಾಂ ಆನಿ ತಾಂಕಾಂ ದೊಗಾಂ ದೊಗಾಂ ಲೆಕಾನ್ ಘರಾಂನಿ ಧಾಡ್ಯಾಂ ಆನಿ ಬೂಕ್ ವಿಕ್ಯಾಂ”
“ವಾರೆ ವಾ ಹಿ ಐಡಿಯಾ ಸೂಪರ್.” ಮನಿಸ್ ಸಂಯ್ಬಾನ್ ಅಸ್ಕತ್, ಮ್ಹಜೆಂ ನಾಂವ್ ಆಯ್ಕೊನ್ ನ್ಹಯ್ ತರೀ ಚೆಡ್ವಾಂಚ್ಯೆ ಸೊಭಾಯೆಕ್ ಭುಲೊನ್ ಖಂಡಿತ್ ಬೂಕ್ ಘೆತಿತ್ ಹಾಂವೆಂ ಜಿವಂತ್ ಜೆಜುಕ್ ಅರ್ಗಾಂ ಆನಿ ಹೊಗ್ಳಾಪ್ ದಿಲೆ.
ಫಕತ್ತ್ ಸೊಭಿತ್ ಚೆಡ್ವಾಂಕ್ ಮಾತ್ರ್ ಆವ್ಕಾಸ್ ಮ್ಹಣ್ ಜಾಹೀರಾತ್ ಕರ್ನ್ ರಾತಾರಾತಿಂ ಮ್ಹಜ್ಯೆ ಬಾಯ್ಲೆನ್ ಸೋಶಿಯಲ್ ಮೀಡಿಯಾಚೆರ್ ವೈರಲ್ ಕೆಲ್ಲ್ಯಾನ್ ಸಕಾಳಿಂಫುಡೆಂ ಮ್ಹಜ್ಯಾ ಘರಾ ಆಂಗ್ಣಾಂತ್ ಸೊಭಿತ್ ಸೊಭಿತ್ ತಲ್ಕಾಂಚಿ ಬ್ಯೂಟಿ ಪ್ಯಾರೇಡ್ ಚಲ್ಲಿ. ಮ್ಹಜ್ಯಾ ಘರಾಂತ್ ಇತ್ಲ್ಯಾ ಚೆಡ್ವಾಂಕ್ ಪಳೆವ್ನ್ ವಾಡ್ಯಾಚೊ, ಸೆಜಾರ್ಚ್ಯಾ ವಾಡ್ಯಾಚೊ ಇತ್ಲೊ ಲೋಕ್ ಜಮ್ಲೊ ಕೀ ಮ್ಹಾಕಾ ಲೊಕಾಂಕ್ ಧಾಂವ್ಡಾಂವ್ಚೆಂಚ್ ಕಾಮ್ ಜಾಲೆಂ. ಇತ್ಲ್ಯಾ ಮದೆಂ ಆಪಯಿಲ್ಲಿಂ ಸಬಾರ್ ತರೀ ವಿಂಚುನ್ ಕಾಡುಂಕ್ ಥೊಡ್ಯಾಂಕ್ ಮಾತ್ರ್ ಜಾಲ್ಲ್ಯಾನ್ ಸೊಭಾಯೆಕ್ ಲಾಗೊನ್ ಇಲ್ಲೊ ಗಲಾಟೊಯ್ ಜಾಲೊ.
ಉಪ್ರಾಂತ್ ನಿಮಾಣಿಂ ಬಾರಾ ಜಣಾಂ ಉರ್ಲಿಂ. ತಾಂಕಾಂ ಉದ್ದೇಸುನ್ ಹಾಂವೆಂ ಮ್ಹಳೆಂ. “ಘೆಯಾ ಮ್ಹಜ್ಯಾ ಹಾಸ್ಯ್ ಬುಕಾಂಕ್. ಖಂಯ್ಚ್ಯಾ ಘರಾಂತ್ ತುಮಿ ರಿಗ್ತಾತ್ ಪಯ್ಲೆಂ ಸಮಾಧಾನ್ ಹ್ಯಾ ಘರಾ ಮ್ಹಣಾ. ಜರ್ ತೊ ತುಮ್ಕಾಂ ಸ್ವಾಗತ್ ದೀತ್ ಜಾಲ್ಯಾರ್ ತಾಂಕಾಂ ಹೊ ಬೂಕ್ ಸುಲಬಾಯೆನ್ ವಿಕ್ಯೆತ್. ಜರ್ ತರ್ ತುಮ್ಕಾಂ ತೊ ಸ್ವಾಗತ್ ದೀನಾ ತರ್ ತುಮಿ ತುಮ್ಚಿ ಸೊಭಾಯ್ ವಾಪಾರಾ. ಸೊಭಾಯೆಕ್ ಲಾಗೊನ್ಯೀ ತೊ ಬೂಕ್ ಕಾಣ್ಘೆನಾಂ ತರ್ ಇಲ್ಲೆಂ ಶೇಲೆ-ಮಂಗಣೆ ಕರಾ. ತೆದ್ನಾಂ ತಾಚೆಂ ಅಸ್ಕತ್ ಸಂಯ್ಬ್ ಖಂಡಿತ್ ಉಚಾಂಬಳ್ ಜಾತೆಲೆಂ. ತಾಕಾಯ್ ತೊ ಆಯ್ಕಾನಾ ಜಾಲ್ಯಾರ್ ಜಬರದಸ್ತೆನ್ ಸಯ್ತ್, ಕಶೆಂಯ್ ಕರ್ನ್ ಬೂಕ್ ವಿಕಾ. ನಾ ತರ್ ತುಮ್ಚ್ಯಾ ವಾಣ್ಯಾಂಚಿ ಧುಳ್ ತಾಚ್ಯಾ ಕಾನ್ಸುಲಾರ್ ವ್ಹಾಜಯಾ. ಚತ್ರಾಯ್ ಕರಾ ವಾಟೆರ್ ಮೊಬಾಯ್ಲ್ ಜಾಂವ್, ಫೇಸ್ಬುಕ್ ಜಾಂವ್ ವಾಪಾರಿನಾಕಾತ್. ಪಾಂಯಾಂಕ್ ವ್ಹಾಣೊ ಆನಿ ಹಾತಾಂತ್ ದಾಂಡೊ ಜರೂರ್ ಘೆಯಾ, ಕಿತ್ಯಾಕ್ ಬೀದಿನಾಯಿ ಉಪದ್ರ್ ಚಡ್ ಆಸಾತ್. ತುಮ್ಕಾಂ ಕೊಣೆಂಯ್ ತಾನೆಕ್ ಪಿಯೆಂವ್ಕ್ ದಿಲೆಂ ಜಾಲ್ಯಾರ್ ಖಾಯಾ ಪಿಯೆಯಾ. ನಾ ತರ್ ತಕ್ಲಿ ಘುಂವೊನ್ ಪಡ್ಶಾತ್. ಉಡಾಸ್ ದವರಾ ಘರಾಂ ಮೆಜಿನಾಕಾತ್. ಬಗಾರ್ ವಿಕ್ಲ್ಲ್ಯಾ ಬುಕಾಂಚೆಂ ಲೇಕ್ ಮಾತ್ರ್ ಸಾರ್ಕೆಂ ದವರಾ.”
ಅಶೆಂ ಸಕ್ಕಡ್ ಸೊಭಿತ್ ಮಾಣ್ಕುಲ್ಯಾಂಕ್ ಬೂಕ್ ದಿತಾನಾ ಮ್ಹಜ್ಯಾ ಚ್ಯಾರ್ ಗೊಣಿಯಾಂತ್ಲೆ ಬೂಕ್ ಖಾಲಿ ಜಾಲೆ. ತಿತ್ಲ್ಯಾರ್ ಘರಾಂತ್ ಇಲ್ಲಿ ಸುವಾತ್ ಜಾಲಿ. ಸುವಾತ್ ಜಾತಾನಾ ಮ್ಹಾಕಾ ಗಿನ್ನೆಸ್ ಧಾಕ್ಲ್ಯಾಚಿ ತಾಳ್ಣಿ ಆಯ್ಲಿ. ತಾಳ್ಣಿ ಯೆತಾನಾ ಪರತ್ ನವೊ ಬೂಕ್ ಬರೊಂವ್ಚ್ಯಾಕ್ ಹಾಂವೆಂ ಮ್ಹಾಕಾಚ್ ಇಲ್ಲಿ ಪುರ್ಸತ್ ಕೆಲಿ.
ಅಶೆಂ ಗಿನ್ನೆಸ್ ರೆಕೋರ್ಡಾಚ್ಯಾ ಆಬ್ಲೆಸಾನ್ ಬೂಕ್ ಬರೊಂವ್ಕ್ ಬಸ್ಲ್ಲೊಂ ಉಟ್ತಾನಾ ಸಾಂಜೆಚಿಂ ಸಾತ್ ವೊರಾಂ. ಆನಿ ಕಿತೆಂ ಇಲ್ಲೆಂ ಭಾಯ್ಲೆಂ ವಾರೆಂ ಖಾಯಾಂ ಮ್ಹಣ್ತಾನಾ ಮ್ಹಜ್ಯಾ ಆಂಗ್ಣಾಂತ್ ಲೊಕಾಂಚಿ ಖೆಟ್. ದಾಂಡೆ ಆನಿ ತಲ್ವಾರ್ ಘೆವ್ನ್ ತೆ ಮ್ಹಾಕಾ ರಾಕ್ತಾತ್.
“ಅಳೆ ಹೊಚ್ ತೊ…” ಜಮ್ಯಾಥಾವ್ನ್ ಕೊಣೆಂಗೀ ಎಕ್ಲ್ಯಾನ್ ಬೋಬ್ ಘಾಲಿ.
“ಸಿಕೇರಾಮಾ ಕೊಣ್ಗೀ ದೊಗಾಂ ಚೆಡ್ವಾಂ ಘರಾ ಘುಸ್ಲಿಂ ಆನಿ ಆಮ್ಕಾಂ ಬನಾವ್ನ್ ಆಮ್ಚೆಂ ಮೊಬಾಯ್ಲ್ ಚೋರ್ನ್ ವ್ಹರ್ನ್ ಗೆಲಿಂ” ಎಕ್ಲೊ ಮ್ಹಣಾಲೊ.
“ಆಮ್ಚ್ಯಾಯ್ ಘರಾ ಆಯಿಲ್ಲಿಂ ಆನಿ ಓಟಿಪಿ ವಿಚಾರ್ನ್ ಆಮ್ಚೆ ಸಕ್ಕಡ್ ಪಯ್ಶೆ ಫಾರ್ನ್ ವ್ಹೆಲ್ಯಾತ್” ದುಸ್ರೊ ಕೆಂಕಾರ್ಲೊ.
“ಆಮ್ಗೆರ್ ಯೇವ್ನ್ ಆಮ್ಚೆಂ ಸಕ್ಕಡ್ ಭಾಂಗಾರ್ ವ್ಹೆಲಾಂ” ತಿಸ್ರೊ ರಡ್ಲೊ.
ಮ್ಹಜ್ಯಾ ಗಳ್ಯಾಂತ್ಲಿ ಥಿಂಪಿ ಸುಕೊನ್ ವೆತಾಲಿ. ಎಕಾಪಾಟ್ಲ್ಯಾನ್ ಎಕ್ಲೆ ಸಾಂಗತ್ತ್ ಗೆಲೆ. ದೆಕುನ್ ಹಾಂವೆಂ ವಿಚಾರ್ಲೆಂ-
“ತಾಕಾ ತುಮಿ ಮ್ಹಜ್ಯಾ ಘರಾ ಕಿತ್ಯಾಕ್ ಆಯ್ಲ್ಯಾತ್. ಹಾಂವೆಂ ಕಾಂಯ್ ಚೊರುಂಕ್ ನಾ.”
“ಆತಾಂ ಚೊರುಂಕ್ ನಾ ಮ್ಹಣ್ ಚುಕಾರಿ ಮಾರಿನಾಕಾ. ತಿಂ ಸಕ್ಕಡ್ ಫಾರ್ನ್ ವ್ಹೆಲ್ಯಾ ಉಪ್ರಾಂತ್ ತುಜೊ ಬೂಕ್ ಸೊಡ್ನ್ ಗೆಲ್ಯಾಂತ್. ದೆಕುನ್ ಹಿಂ ತುಜಿಂಚ್ ಕಾಮಾಂ. ಹರ್ಯೆಕಾ ಘರಾ ತುಜೆಚ್ ಬೂಕ್ ಮೆಳಜೆ ತರ್ ಹೆಂ ಕಾಮ್ ತುಜೆಂಚ್.”
ತಾಣಿಂ ಸಾಂಗೊನ್ ಮುಗ್ದೊಂಚ್ಯಾ ಪಯ್ಲೆಂಚ್ ಮ್ಹಾಕಾ ಮತ್ ಚುಕ್ಲ್ಲಿ. ದುಸ್ರ್ಯಾ ದಿಸಾ ಜಾಗ್ ಜಾತಾನಾ ಹಾಂವ್ ಜಯ್ಲಾಂತ್ ಆಸ್ಲ್ಲೊಂ. ತಿತ್ಲ್ಯಾರ್ ಮ್ಹಜಿ ಬಾಯ್ಲ್ ಧಾಂವೊನ್ ಆಯ್ಲಿ ಆನಿ ಮ್ಹಣಾಲಿ.
“ಪೇಪರಾರ್ ತುಜೊ ಫೊಟೊ ಆಯ್ಲಾ. ತುಜೆಂ ನಾಂವ್ ಗಿನ್ನೆಸ್ ಬುಕ್ ಒಫ್ ರೆಕೋರ್ಡಾಂತ್ ಧಾಕಲ್ ಜಾಲೆಂ”
“ವ್ಹಯ್ಗೀ ಕಿತೆಂ, ಮ್ಹಜ್ಯಾ ಬುಕಾಂಕ್ ತಾಣಿಂ ಮಾನ್ಯತಾ ದಿಲಿಗೀ?”
“ಬುಕಾಂ ಖಾತಿರ್ ನ್ಹಯ್ ಸಾಯ್ಬಾ. ತುವೆಂ ಫಕತ್ ಕೊಂಕ್ಣಿ ಬೂಕ್ ದಾಕೊವ್ನ್ ಎಕಾಚ್ ವೆಳಾರ್ ಜಾಯ್ತ್ಯಾಂಚೆಂ ಚೊರ್ಲಾಂಯ್ ಮ್ಹಣೊನ್ ತುಜೆಂ ನಾಂವ್ ಗಿನ್ನೆಸ್ ಬುಕ್ ಒಫ್ ರೆಕೋರ್ಡಾಂತ್ ಆಯ್ಲಾಂ.”
■ ರೋಶು, ಬಜ್ಪೆ
1 comment
ಇತ್ಲೊಂ ಹಾಂವ್ ಕೆನ್ನಾಂಯ್ ಹಾಸುಂಕ್ ನಾ ಕೊಣ್ಣಾ.