ಸಕ್ಕಡ್ ಲ್ಹಾನ್ ಭುರ್ಗ್ಯಾಂಕ್ ಲ್ಹಾನ್ ಆಸ್ತಾನಾ ವ್ಹಡಿಲಾಂ ‘ಗೊಂಗೊ ಆಯ್ಲೊ ಗೊಂಗೊ’ ವಾ ‘ಮೆಲ್ಲೆಂ’ ಮ್ಹಣ್ ಭೆಷ್ಟಾಯ್ತಾಲಿಂ. ಪೂಣ್ ಮ್ಹಾಕಾ ಖಂಚ್ಯಾಯ್ ಮೆಲ್ಲೆಂ ವಾ ಗೊಂಗ್ಯಾಚೆಂ ಭೆಂ ನಾತ್ಲ್ಲೆಂ. ಮ್ಹಜ್ಯಾ ಜಿವಿತಾಂತ್ ಪಯ್ಲೆಂ ಭೆಂ ಜಾವ್ನ್ ರಿಗ್ಲ್ಲಿಂ ಮ್ಹಳ್ಯಾರ್ ಟೀಚರಾಂ. ಟೀಚರಿಚ್ಯಾ ಹಾತಾಂತ್ಲಿ ಬೊಡಿ ಪಳಯ್ತಾನಾಂಚ್ ತಿಣೆಂ ’ಅ’ ಅಕ್ಷರ್ ಶಿಕಯ್ತಾನಾ ಹಾಂವ್ ತಿಚ್ಯಾ ಮಾರಾಚ್ಯಾ ಭಿಂಯಾನ್ ಪಯ್ಲೆಂಚ್ ’ಆ’ ಮ್ಹಣ್ತಾಲೊಂ. ದೆಕುನ್ ಟೀಚರ್ ಚಿಂತ್ತಾಲಿ ಹಾಂವ್ ಏಕ್ ಮೇಟ್ ಮುಕಾರ್ ಆಸಾಂ ಮ್ಹಣೊನ್. ತಿಕಾ ಹೆಂ ಸೊಸುಂಕ್ ಜಾಲೆಂ ನಾ. ದೆಕುನ್ ತಿಣೆಂ ಮ್ಹಾಕಾ ಭೆಷ್ಟಾವ್ನ್ ದವರ್ಲ್ಲೆಂ. ಪೂಣ್ ಅಸಲಿಂ ಟೀಚರಾಂ ಆಸ್ಲ್ಲ್ಯಾನ್ಂಚ್ ಕೊಣ್ಣಾ ಮ್ಹಾಕಾ ಆಜ್ ಏಕ್ ಕೊಂಕ್ಣಿ ಲೇಖಕ್ ಜಾವ್ನ್ ಪರ್ಜಳುಂಕ್ ಸಾಧ್ಯ್ ಜಾಲಾಂ. ತರೀ ಮ್ಹಜ್ಯಾ ಭಿತರ್ಲೆಂ ಟೀಚರಿಂಚೆಂ ಭೆಂ ಆನಿಕೀ ವಚೊಂಕ್ ನಾ.
ತೆಂ ಸಕ್ಕಡ್ ಆಸೊಂ, ವಿಶಯ್ ಕಿತೆಂ ಮ್ಹಳ್ಯಾರ್ ಟೀಚರಾಂಚೆಂ ಭೆಂ ಮ್ಹಣೊನ್ ಮ್ಹಜೆಂ ಅತಾಂ ಕಾಜಾರ್ ಟೀಚೆರಿಲಾಗಿಂಚ್ ಜಾಲಾಂ ಮ್ಹಣ್ತಾನಾ ತುಮಿಂ ಚಿಂತುಂಕ್ ಪುರೊ ಸಿಕೇರಾಮ್ ಇತ್ಲೊ ಧಯ್ರಾಧಿಕ್ ಕಸೊ ಜಾಲೊ ಮ್ಹಣ್. ತೆಂ ಕಿತೆಂ ಜಾಲೆಂ ಮ್ಹಳ್ಯಾರ್ ಪೋರ್ ಎಕಾ ಇಸ್ಕೊಲಾಂತ್ ಸ್ವತಂತ್ರ್ ದೀಸ್ ಆಚರಣ್ ಕರುಂಕ್ ಆಸ್ಲ್ಲೊ. ತ್ಯಾ ದಿಸಾಕ್ ಮುಖೆಲ್ ಸಯ್ರೊ ಜಾವ್ನ್ ವ್ಹಡ್ ವ್ಹಡ್ ಮನ್ಶಾಂಕ್ ಆಪಂವ್ಚೆಂ ಯೋಜನ್ ಘಾಲ್ಲೆಂ. ಪೂಣ್ ಮುಖೆಲ್ ಮೆಸ್ತ್ರಿರ್ಣ್ ಮ್ಹಣಾಲಿ ಕಂಯ್ ಸ್ವತಂತ್ರ್ವಿಶಿಂ ಕೊಣಾಕ್ ಸಾರ್ಕೆಂ ಕಳಿತ್ ಆಸಾ ತಾಕಾಚ್ ಆಪಯಾ ಮ್ಹಣ್. ವ್ಹಡ್ ವ್ಹಡ್ ಗಣ್ಯ್ ವ್ಯಕ್ತಿ ಕಾಜಾರಿ ಜಾಲ್ಲ್ಯಾನ್ ತಾಂಚೆಂ ಸ್ವತಂತ್ರ್ ತೆ ಹೊಗ್ಡಾವ್ನ್ ಘೆವ್ನ್ ಆಸ್ತಾತ್ ದೆಕುನ್ ಎಕಾ ಅಂಕ್ವಾರ್ಯಾಕ್ ಆಪಯಾಂ ಮ್ಹಣ್ ನಿಚೆವ್ ಕೆಲೊ ಕಂಯ್. ತೆದ್ನಾಂ ಸಿಕೇರಾಮಾನ್ ಸ್ವತಂತ್ರವಿಶಿಂ ಜಾಯ್ತಿಂ ಕವಿತಾಂ ಬರಯ್ಲ್ಯಾಂತ್ ಆನಿ ಪ್ರಶಸ್ತ್ಯೊ ಆಪ್ಣಾಯ್ಲ್ಯಾತ್ ಮ್ಹಣ್ ತ್ಯಾ ದಿಸಾಚ್ಯಾ ಕಾರ್ಯಾಚಿ ಜವಾಬ್ದಾರಿ ಘೆತ್ಲ್ಲ್ಯಾ ಲೆಕ್ಕ ಟೀಚೆರಿನ್ ಮ್ಹಜೆಂ ನಂಬರ್ ಸೊಧುನ್ ಕಾಡ್ನ್ ಮ್ಹಾಕಾ ಮುಖೆಲ್ ಸಯ್ರೊ ಜಾವ್ನ್ ಆಮಂತ್ರಣ್ ಕೆಲೆಂ.
ಬಾವ್ಟೊ ಉಬಂವ್ಕ್ ಮೆಳ್ತಾ ಮ್ಹಣ್ ಹಾಂವ್ಯೀ ಖುಶ್ ಜಾಲೊಂ. ಸ್ವತಂತ್ರ್ ದೀಸ್ ಆಚರಣ್ ಜಾವ್ನ್ ಸ್ವತಂತ್ರಾವಿಶಿಂ ಮ್ಹಜೆಂ ಭಾಷಣ್ ಆಯ್ಕೊನ್ ಲೆಕ್ಕ ಟೀಚರಿಚಿಂ ಲೆಕಾಂ ಚುಕ್ಲಿಂ. ಘರಾ ವೆತಾನಾ ಟೀಚರಿನ್ ಮ್ಹಾಕಾ ಏಕ್ ಕವರ್ ದಿಲೆಂ. ಕಾಂಯ್ ದೋನ್ ಹಜಾರ್ ಆಸ್ತೆಲೆ ಮ್ಹಣ್ ಘರಾ ವಚೊನ್ ಖುಶೆನ್ ಉಗ್ತೆಂ ಕರ್ತಾನಾ ಕಿತೆಂ ಪಳೆಂವ್ಚೆಂ ತಾಂತುನ್ ಏಕ್ ಚೀಟ್ ಆಸಾ ಆನಿ ತ್ಯಾ ಚಿಟಿರ್ ಒಂದು ಕೂಡಿಸು ಒಂದು ಅಂದರೆ ಒಂದು ಮ್ಹಣ್ ಬರಯ್ಲಾಂ (1 +1 = 2). ಹೆಂ ಪಳೆವ್ನ್ ಮ್ಹಾಕಾ ಅಜ್ಯಾಪ್ ದಿಸ್ಲೆಂ. ಏಕ್ ಲೆಕ್ಕ ಟೀಚೆರಿನ್ ಅಶೆಂ ಕಶಿ ಚೂಕ್ ಕರ್ಚಿ. ಒಂದು ಕೂಡಿಸು ಒಂದು ಎರಡು ಜಾಯ್ಜೆ ನೇ. ಹಾಂವೆಂ ತಕ್ಷಣ್ ಟೀಚರಿಕ್ ಫೋನ್ ಕೆಲೆಂ ಆನಿ ಮ್ಹಳೆಂ
“ಟೀಚರ್ ಒಂದು ಕೂಡಿಸು ಒಂದು ಎರಡು ನೇ ?”
ಟೀಚರ್ ಲಜೆನ್ ಮ್ಹಣಾಲಿ “ಒಂದು ಕೂಡಿಸು ಒಂದು ಎರಡು ಲೆಕ್ಕಂತ್ ಮಾತ್ರ್. ಮೊಗಾಂತ್ ಒಂದು ಕೂಡಿಸು ಒಂದು ಮ್ಹಳ್ಯಾರ್ ಒಂದುಚ್”
ಟೀಚರಿನ್ ಅಶಿ ಚೀಟ್ ದೀವ್ನ್ ಮ್ಹಾಕಾ ‘ಚೀಟ್’ ಕೆಲೆಂ ಮ್ಹಣ್ ತೆದ್ನಾಂ ಕಳೊಂಕ್ ನಾ. ಮ್ಹಜೊ ಮೆಂದು ಲೆಕಾಂತ್ ಸಾರ್ಕೊ ಆಸ್ಲ್ಲೊ ತರೀ ಕಾಳಿಜ್ ನಿಸರ್ಲೆಂ. ಹೊ ವಿಶಯ್ ಮ್ಹಜ್ಯಾ ಎಕ್ಲ್ಯಾ ಬರವ್ಪಿ ಮಿತ್ರಾಕ್ ಸಾಂಗ್ತಾನಾ ತೊ ಮ್ಹಣಾಲೊ.
“ಅಳೆ ಸಿಕೇರಾಮಾ ಖಂಚೊಯ್ ಫೋಬಿಯಾ ವಚಾಜೆ ತರ್ ಆಮಿಂ ತ್ಯಾ ಫೋಬಿಯಾ ಸಾಂಗಾತಾ ರಾವಾಜೆ. ತುಕಾ ಟೀಚರಿಚೆಂ ಭೆಂ ಆಸ್ಲ್ಯಾರ್ ಬಿಂದಾಸ್ ಟಿಚರಿಕಡೆನ್ ಕಾಜಾರ್ ಜಾ. ಮಾಗಿರ್ ತುಜೆಂ ಸಗ್ಳೆಂ ಭೆಂ ಸುಟ್ತಾಗೀ ನಾಂ ಪಳೆ.”
ತಾಣೆಂ ಸಾಂಗ್ಲ್ಲ್ಯಾ ಉತ್ರಾಂಚೆರ್ ಹಾಂವೆಂ ಟಿಚರಿ ಸಾಂಗಾತಾ ಮ್ಹಜಿಂ ಜಿಣಿ ಮುಂದರ್ಸಿಲಿ. ಕ್ರಿಸ್ತಾಂವ್ ಸಮಡ್ತಿಂತ್ ಆಸ್ಲ್ಲ್ಯಾಬರಿಂ ಕೊಂಕ್ಣಿ ಬರವ್ಪ್ಯಾಂತ್ ಜಾಯ್ತೆ ಪಂಗಡ್ ಆಸಾತ್. ಆನಿ ಹಾಂವ್ ಎಕಾ ಮಾತ್ರ್ ಪಂಗ್ಡಾಕ್ ಸೆರ್ವಾಲ್ಲೊಂ ಜಾಲ್ಲ್ಯಾನ್ ಕಾಜಾರಾಕ್ ಮ್ಹಜೆ ಲೆಕಾಚೆ ಕೊಂಕ್ಣಿ ಬರವ್ಪಿ. ಮ್ಹಜಿ ಟೀಚರ್ ಮಾತ್ರ್ ಚಾರ್ ಪಾಂಚ್ ಇಸ್ಕೊಲಾನಿಂ ಕಾಮ್ ಕೆಲ್ಲ್ಯಾನ್ ಎಕೇಕಾ ಇಸ್ಕೊಲಾಥಾವ್ನ್ ಪಂತ್ತೀಸ್ ಟೀಚರಾಂ ಮಾಗಿರ್ ಹಳೆ ಆನಿ ಹೊಸ ವಿದ್ಯಾರ್ಥಿ ಮ್ಹಣೊನ್ ಕಂಡಾಬಟ್ಟೆ ಲೋಕ್ ಜಮ್ಲ್ಲ್ಯಾನ್ ಮ್ಹಾಕಾ ಮೆಳ್ಲ್ಲ್ಯಾ ತೀನ್ಯೀ ಪ್ರಶಸ್ತೆಚೆ ಪಯ್ಶೆ ಖಾಲಿ ಜಾಲೆ. ತಿ ಟೀಚರ್ ಜಾಲ್ಲ್ಯಾನ್ ಮ್ಹಾಕಾ ಹೌದು’ ಮ್ಹಳ್ಳ್ಯಾ ಶಿವಾಯ್ ದುಸ್ರಿ ವಿಂಚವ್ಣ್ ನಾತ್ಲ್ಲಿ. ಆನಿ ತಿಚೆಂಚ್ ಸಮಾ ಜಾಲ್ಲ್ಯಾನ್ ಮ್ಹಜೊ ತರ್ಕ್ ಥಂಯ್ಸರ್ ನಗಣ್ಯ್ ಜಾಲೊ. ತಶೆಂ ಜಾಲ್ಲ್ಯಾನ್ ಪಯ್ಶೆ ಮ್ಹಜೆ ತರೀ ಕಾಜಾರಾಚೆಂ ಸಗ್ಳೆಂ ಕಾರ್ಬಾರ್ ತಿಚೆಂ. ಎಕಾ ಟೀಚರಿಚ್ಯಾ ಸಾಂಗತ್ಪಣಾಂತ್ ಜಾಯ್ತ್ಯಾ ಟೀಚರಾಂಕ್ ತ್ಯಾ ದೀಸ್ ಸಾಂಗಾತಾ ಪಳೆವ್ನ್ ಮ್ಹಜ್ಯಾ ಭಿತರ್ಲೆಂ ಟೀಚರಿಚೆಂ ಭೆಂ ನಪಂಯ್ಚ್ ಜಾಲೆಂ ಮ್ಹಣ್ ಹಾಂವೆಂ ಚಿಂತ್ಲೆಂ.
ಕಾಜಾರ್ ಜಾಲ್ಲ್ಯಾ ದುಸ್ರ್ಯಾ ದಿಸಾ ಮ್ಹಾಕಾ ಮ್ಹಜ್ಯಾ ಎಕಾ ಕೊಂಕ್ಣಿ ಬರವ್ಪಿ ಇಷ್ಟಾಚೆಂ ಪತ್ರ್ ಆಯ್ಲೆಂ. ಮೊಬಾಯ್ಲ್ ಆಸ್ಲ್ಯಾರೀ ತೊ ಏಕ್ ಅಪ್ಪಟ ಕೊಂಕ್ಣಿ ಬರವ್ಪಿ ಜಾಲ್ಲ್ಯಾನ್ ತಾಣೆಂ ಮ್ಹಾಕಾ ಪತ್ರ್ ಬರವ್ನ್ ಧಾಡ್ಲ್ಲೆಂ. ಹಾಂವೆಂ ಕಾಂಯ್ ಕಾಜಾರಾಚೆ ಶುಭಾಶಯ್ ಪಾಟಯ್ಲ್ಯಾತ್ ಕೊಣ್ಣಾ ಮ್ಹಣ್ ಖುಶೆನ್ ಉಗ್ತೆಂ ಕೆಲೆಂ. ಪೂಣ್ ತೆಂ ರೆಕಾದ್ ಪಾಟಂವ್ಚೆಂ ಪತ್ರ್ ನ್ಹಯ್ ಬಗಾರ್ ಏಕ್ ಭುಜಾವಣೆಚೆಂ ಕಾಗದ್. ತಾಂತುನ್ ಅಶೆಂ ಬರಯಿಲ್ಲೆಂ –
“ಕ್ರೀಸ್ತಾಥಂಯ್ ಸದಾಂಚ್ ವಿಶ್ವಾಸಿ ಮೊಗಾಚ್ಯಾ ಸಿಕೇರಾಮಾ, ಸಾಂ ಪಾವ್ಲ್ ಮ್ಹಣ್ತಾ ’ಕೋಣ್ ಮ್ಹಾಕಾ ಸತ್ಮಾನ್ತಾ ತೊ ಮೊರಾತ್ ಜಾಲ್ಯಾರ್ಯೀ ಜಿಯೆತಲೊ ಆನಿ ಕೋಣ್ ಜಿವಂತ್ ಆಸೊನ್ ಮ್ಹಾಕಾ ಸತ್ಮಾನ್ತಾ ತೊ ಕೆದಿಂಚ್ ಮೊರಾಸೊನಾ. ಹೆಂ ಅವ್ಘಡ್ ಕಶೆಂ ಜಾಲೆಂ. ಪೋರ್ ಮ್ಹಣಾಸರ್ ತುಂ ಬರ್ಯಾ ಭಲಾಯ್ಕೆಂತ್ ಆಸ್ಲ್ಲೊಯ್. ಪೂಣ್ ತುಜೆಥಂಯ್ ಜಾಲ್ಲ್ಯಾ ಹ್ಯಾ ಅನಿರೀಕ್ಷಿತ್ ಘಡಿತಾಕ್ ಹಾಂವ್ ಪಶ್ಚಾತ್ತಾಪ್ ಉಚಾರ್ತಾಂ. ಕಿತ್ಯಾಕ್ ತಿ ವೇಳ್ ವಾ ಘಡಿ ಕೊಣ್ಂಚ್ ನೆಣಾ. ಏಕ್ ದೀಸ್ ಆಮಿಂಯ್ ಸರ್ವ್ ಕಾಜಾರ್ ಜಾತೆಲ್ಯಾಂವ್. ಪೂಣ್ ಟೀಚರಿಕಡೆನ್ ಕಾಜಾರ್ ಜಾಲ್ಲೊಯ್ ತುಂ ಮಾತ್ರ್. ಹ್ಯಾ ವರ್ವಿಂ ರಿತೆಂ ಜಾಲ್ಲೆಂ ತುಜ್ಯಾ ಕಾಳ್ಜಾಂತ್ಲೆಂ ಧಯ್ರ್ ತೊಚ್ ದೇವ್ ಬಾಪ್ ಭರ್ತಿ ಕರ್ತಲೊ. ಕಾಜಾರ್ ಕೊಣಾಚ್ಯಾನ್ಂಚ್ ಆಡಾಂವ್ಕ್ ಜಾಯ್ನಾ. ಕಾಜಾರ್ ಜಾವ್ನಾಸಾ ಏಕ್ ಉತ್ರೊಣಿ ಸಂತೊಸಾಥಾವ್ನ್ ದುಖಾಕ್, ಜಿವಿತಾಥಾವ್ನ್ ಜೀವ್ಘಾತಾಕ್ ಮ್ಹಣ್ಜೆ ಆಪ್ಣಾಕ್ಚ್ ಘಾತ್ ಕರ್ನ್ ಪೆಲ್ಯಾಚಾ ಖುಶೆಕ್ ಜಿಯೆಂವ್ಚ್ಯಾಕ್. ಆದೇವ್ಸ್ ಸಿಕೇರಾಮಾ ಆದೇವ್ಸ್, ತುಜ್ಯಾ ಖುಶೆಚ್ಯಾ ಅಂಕ್ವಾರ್ಪಣಾಕ್.”
ಅರೇ, ಹಾಣೆಂ ಸಾಂ ಪಾವ್ಲಾನ್ ಅಂಕ್ವಾರ್ಗಾರ್ಯಾಂಕ್ ಬರಯಿಲ್ಲ್ಯಾಬರಿಂ ಮ್ಹಾಕಾ ಪತ್ರ್ ಬರಯ್ಲಾಂ ನೇ. ಹಾಂವ್ ಕಿತೆಂ ಮೆಲಾಂ ಮ್ಹಣ್ ಚಿಂತ್ತಾಗಾಯ್ ಹೊ. ತರೀ ತಾಚೆಂ ವಾಚ್ತಾನಾ ಮ್ಹಜ್ಯಾ ಭಿತರ್ಲೆಂ ರಿತೆಂ ಜಾಲ್ಲೆಂ ಭೆಂ ಪರತ್ ವಳೂ ವಳೂ ಜಾಗೆಂ ಜಾತಾಲೆಂ. ರಾಗಾನ್ ಪತ್ರ್ ಕಾಡ್ಲೆಂ ಆನಿ ರಾಂದ್ಣಿಕ್ ಉಡಯ್ಲೆಂ.
ದುಸ್ರ್ಯಾ ದಿಸಾ ಕಾಜಾರಾಕ್ ಯೇಂವ್ಕ್ ಜಾಯ್ನಾತ್ಲ್ಲ್ಯಾ ಅನ್ಯೇಕಾ ಇಷ್ಟಾಚಿ ವಾಟ್ಸಾಪ್ ಮೆಸೆಜ್ ಆಯ್ಲಿ. ಮೆಸೆಜಿಚ್ಯಾ ಪಯ್ಲೆಂ ಮಾತಾಳ್ಯಾರ್ ಚಾರ್ ಫೋನ್ ನಂಬ್ರಾಂ ಆನಿ ಉಪ್ರಾಂತ್ ಮೆಸೆಜ್ –
“ಸಿಕೇರಾಮಾ ವಯ್ರ್ ದಿಲ್ಲಿಂ ನಂಬ್ರಾಂ ಥೊಡ್ಯಾ ಕೌನ್ಸಿಲಾರಾಂಚಿ ಆನಿ ತಶೆಂಚ್ ಡಿಪ್ರೇಶನ್ ಸೆಂಟರಾಚಿಂ. ತುಜ್ಯಾ ಹ್ಯಾ ಕಾಜಾರಾ ನಂತರ್ ತುಕಾ ಜರೂರ್ ಉಪ್ಕಾರಾಕ್ ಪಡ್ತೆಲಿಂ. ತುಂ ಜಾಣಾಂಯ್ ಹಾಂವ್ಯೀ ಕಾಜಾರ್ ಜಾಲ್ಲೊಂ ಎಕಾ ಟಿಚರಿಕಡೆನ್ಂಚ್. ಕಾಜಾರಾಚೊ ದೀಸ್ ಖುಶೆಚೊ ಸೊಡ್ಲ್ಯಾರ್ ತ್ಯಾ ಉಪ್ರಾಂತ್ಲೆ ದೀಸ್ ಹಾಂವೆಂ ಕಶೆ ಸಾರ್ಲ್ಯಾತ್ ಮ್ಹಣ್ ದೇವ್ಚ್ ಜಾಣಾ. ಟಿಚೆರಿಕಡೆನ್ ಕಾಜಾರ್ ಜಾಲ್ಯಾ ನಂತರ್ ಹಾಂವ್ ವಚಾನಾತ್ಲ್ಲ್ಯಾಕಡೆನ್ ಗೆಲಾಂ. ದಾಕ್ತೆರಾಸರ್ಶಿಂ, ಕೌನ್ಸಿಲಿಂಗ್ ಸೆಂಟರಾಂಕ್, ಪೂನ್ಶೆತಾಂಕ್, ರೆತಿರಾಂಕ್, ಪಿಶ್ಯಾಂಚ್ಯಾ ಆಸ್ಪತ್ರೆಕ್ ಆನಿ ಅಕ್ರೇಕ್ ಡಿಪ್ರೇಶನಾಕ್ ಸಯ್ತ್. ಹಾಂವ್ ಪಯ್ಲೆಥಾವ್ನ್ ಎಕೇಕಾ ಕ್ಲಾಸಿಕ್ ದೊದೋನ್ಪಾವ್ಟಿಂ ಬಸ್ಲ್ಲ್ಯಾನ್ ಟಿಚೆರಿಂಚೊ ಮೋಗ್ ಮ್ಹಾಕಾ ಚಡ್ಚ್ ಮೆಳ್ಳೊ. ದೆಕುನ್ ಹಾಂವೆಂಯೀ ಟೆಚೆರಿಚೊಚ್ ಮೋಗ್ ಕೆಲೊ. ಇಸ್ಕೊಲಾಂತ್ ಜಶೆಂ ಭುರ್ಗಿಂ ಎಕಾಮೆಕಾ ಲವ್ ಲೆಟರ್ ಬರಯ್ತಾನಾ, ಚೆಡೆ ಚೆಡ್ವಾಂನಿ ಮೋಗ್ ಕರ್ತಾನಾ ಜೋರ್ ಕರ್ನ್ ತಾಂಕಾಂ ಮೋಗ್ ಮ್ಹಳ್ಳ್ಯಾ ಸಬ್ದಾಚೆರ್ ದ್ವೇಷ್ ಉಬ್ಜಾತಾ. ತಶೆಂ ಜಾಲ್ಲ್ಯಾನ್ ಮ್ಹಾಕಾಯ್ ಬಾಯ್ಲೆಕಡೆನ್ ಮೊಗಾನ್ ಉಲಂವ್ಕ್ ಆವ್ಕಾಸ್ ನಾತ್ಲ್ಲೊ. ಇಲ್ಲೆಶೆಂ ರೋಮ್ಯಾಂಟಿಕ್ ಜಾಲ್ಯಾರ್ಚ್ ತಿ ಮ್ಹಜ್ಯಾ ಕಾನ್ಸುಲಾಕ್ ವಾಜಯ್ತಾಲಿ. ಮಾಗಿರ್ ಎಕಾಂತಾಂತ್ ತಿಚ್ಯಾ ಆಂಗಾರ್ ಹಾತ್ ಘಾಲ್ಯಾರ್ ಪುರೊ, ತಿ ರಾಗಾನ್ ಜಿಡೆಂ ಫುಲೊನ್ ಮ್ಹಾಕಾ ಖೊಂಚ್ಚ್ ಮಾರ್ತಾಲಿ. ದೆಕುನ್ ತುಂ ಚಿಕ್ಕೆ ಚತ್ರಾಯ್ ಕರ್. ದೆವಾಲಾಗಿಂ ನಿರಂತರಿ ಮಾಗ್, ಮೋಗ್ ಮಯ್ಪಾಸ್ ಮ್ಹಣ್ ತುಜಿ ಶಾಂತಿ ಹೊಗ್ಡಾಯ್ನಾಕಾ. ಆನಿ ಗರ್ಜೆಚೊ ವಿಶಯ್ ದಯಾಕರ್ನ್ ಖಂಚ್ಯಾಯ್ ಸಲಹ ಸೂಚನಾಂಕ್ ಮ್ಹಾಕಾ ಫೋನ್ ಕರಿನಾಕಾ. ಅತಾಂ ಫೋನ್ ಸಯ್ತ್ ಮ್ಹಜಿ ಬಾಯ್ಲ್ ಪಳಯ್ತಾ. ವಾಂಚುನ್ ಉರ್ಲ್ಯಾರ್ ಭಿಕ್ ಮಾಗೊನ್ ಖಾ. ವಿಶ್ ಯು ಹ್ಯಾಪ್ಪಿ ಮ್ಯಾರೀಡ್ ಲೈಫ್.”
ತಾಚೆಂ ಹ್ಯಾಪ್ಪಿ ಮ್ಯಾರಿಡ್ ಲೈಫ್ ಮ್ಹಾಕಾ ಏಕ್ ತಮಾಸೊ ಕಸೊ ದಿಸ್ಲೆಂ. ನ್ಹಯ್ ಹೆ ಸಗ್ಳೆ ಮ್ಹಾಕಾ ಬರೆಂ ಮಾಗ್ತಾತ್ ಕೀ ವಾ ಪಾಡ್ ಆಶೆತಾತ್?
ಪೂಣ್ ಹಾಂಚೆಂ ಸಕ್ಕಡ್ ಆಯ್ಕೊನ್ ಮ್ಹಜ್ಯಾ ಭಿತರ್ಲೆಂ ಟಿಚೆರಿಚೆಂ ಭೆಂ ದಿಸಾನ್ದೀಸ್ ವಾಡೊನ್ ಆಯ್ಲೆಂ. ತಿ ಟಿಚೆರ್ ಜಾಲ್ಲ್ಯಾನ್ ತಿಚ್ಯೊ ಥೊಡ್ಯೊ ಸವಯೊ ಮ್ಹಾಕಾ ನಿಜಾಯ್ಕಿ ಭೆಷ್ಟಾಯ್ತಾಲ್ಯೊ. ತಿಣೆಂ ಇಸ್ಕೊಲಾಂತ್ ಬೊಬೊ ಘಾಲ್ನ್ ಶಿಕಂವ್ಚೆಂ ಜಾಲ್ಲ್ಯಾನ್ ಘರಾಂತ್ಯೀ ಲ್ಹಾನ್ ಲ್ಹಾನ್ ಸಂಗ್ತಿಂಕ್ಯೀ ತಿ ಬೊಬೊಚ್ ಘಾಲ್ತಾಲಿ. ನಾವ್ನ್ ಚಡ್ಡಿ ಉಬೊಂಳ್ಚ್ಯಾಂತ್ ಘಾಲ್ ಮ್ಹಣ್ ಸೆಜಾರ್ಯಾಂಕ್ ಆಯ್ಕೊಂಚೆಬರಿಂ. ಉಪ್ರಾಂತ್ ’ಜೇಂವ್ಕ್ ಯೇ’, ಚ್ಹಾ ಪಿಯೆಂವ್ಕ್ ಯೇ ಮ್ಹಣ್ ಬೊಬೊ ಘಾಲ್ನ್ಂಚ್ ಆಪಯ್ತಾಲಿ. ತಿಚಿ ಅನ್ಯೇಕ್ ಸವಯ್ ಮ್ಹಳ್ಯಾರ್ ಇಸ್ಕೊಲಾಂತ್ ಮೊಸ್ತ್ ಭುರ್ಗಿಂ ತಶೆಂ ಥೊಡೆಪಾವ್ಟಿಂ ಬಹುವಚನಾಂತ್ಚ್ ಆಪಯ್ತಾಲಿ ಮ್ಹಣೊನ್ ’ಅತಾಂ ತುಮಿಂ ನಿದೊಂಕ್ ಯೆಯಾ’, ಅತಾಂ ತುಮಿಂ ನಾಂವ್ಕ್ ಯೆಯಾ. ತೆದ್ನಾಂ ಸೆಜಾರ್ಚಿಂ ಗೊಮ್ಟಿ ಲಾಂಬ್ ಲಾಂಬ್ ಕರ್ನ್ ಆಮ್ಗೆರ್ ತಿಳ್ತಾಲಿಂ.
ತ್ಯಾ ಭಾಯ್ರ್ ಮ್ಹಾಕಾ ಖಂಯ್ ಪುಣೀ ಸಯ್ರ್ಯಾಂಗೆರ್ ವಾ ಕುಟ್ಮಾಂಗೆರ್ ವಚೊಂಕ್ ಆಸ್ಲ್ಯಾರ್ ಹಾಂವೆಂ ತಿಕಾ ರಜಾರ್ಜಿ ಬರಯ್ಜೆ ಕಂಯ್. ಪಯ್ಲೆಂ ಮ್ಹಾಕಾ ಕೂಡಿಸು ಸುಲಭ್ ಕಳೆಯುವುದು ಕಷ್ಟ್ ಆಸ್ಲ್ಲೆಂ. ಅತಾಂ ಕೂಡಿಸು ಕಷ್ಟ್ ಜಾಲಾಂ ಆನಿ ಮ್ಹಜೆಂ ಸುಖ್ ಸಮಾದಾನ್ ಶಾಂತಿ ಸಕ್ಕಡ್ ಹೊಗ್ಡಾವ್ನ್ ಗೆಲ್ಲ್ಯಾನ್ ಕಳೆಯುವುದು ಸುಲಭ್ ಜಾಲಾಂ. ತೆಂ ಏಕ್ ದೀಸ್ ಕಾಲೆಂ ಜಾಲೆಂಗೀ ಮ್ಹಳ್ಯಾರ್ ಮ್ಹಜ್ಯಾ ಬುಕಾಂಚೆ ವಿಕೊನ್ ಗೆಲ್ಲ್ಯಾ ಪಯ್ಶಾಂಚೆಂ ಲೇಕ್ ಕರ್ತಾನಾ ದೋನ್ ರುಪಯ್ ಉಣೆ ಪಡ್ಲೆ. ಮಾಗಿರ್ ಜಾಯ್ಗೀ ಮ್ಹಾಕಾ. ಆತಾಂ ಸಂಜೆರ್ ಸ ಥಾವ್ನ್ ಸಾತ್ ವೊರಾಂ ಪರ್ಯಾಂತ್ ನಾಲ್ಕನೇ ಕ್ಲಾಸಿಚೆ ಭುರ್ಗೆ ಲೆಕ್ಕಾಚ್ಯಾ ಟ್ಯೂಶನಾಕ್ ಘರಾ ಯೆತಾನಾ ಮ್ಹಾಕಾಯ್ ತಾಂಚೆ ಸಾಂಗಾತಾ ಬಸೊಂಕ್. ಅತಾಂ ಲಾಗಿಂ ಲಾಗಿಂ ಏಕ್ ವರಸ್ ಜಾಂವ್ಕ್ ಯೆತಾ, ಕಾಜಾರಿ ಜಿವಿತ್ ಕಶೆಂ ಆಸಾ ಮ್ಹಳ್ಯಾರ್ ಸಾಂ ಪಾವ್ಲಾನ್ ಅಂಕ್ವಾರ್ಗಾರಾಂಕ್ ಬರಯಿಲ್ಲೆಂ ಪತ್ರ್ ಸೊಡ್ನ್ ಬಾಕಿಚಿಂ ಸಕ್ಕಡ್ ಸಾಂ ಪಾವ್ಲಾಚಿಂ ಪತ್ರಾಂ ತೊಂಡ್ಪಾಶಿಂ ಜಾಲ್ಯಾಂತ್. ತಶೆಂ ರೆತಿರೆಕ್ ವಚೊನ್ ವಚೊನ್ ಅತಾಂ ಬ್ರದರ್ ನಾಂ ಜಾಲ್ಯಾರ್ ಮ್ಹಾಕಾಚ್ ರೆತಿರ್ ದೀಂವ್ಕ್ ಆಪಯ್ತಾತ್. ಉಪ್ರಾಂತ್ ಮ್ಹಜ್ಯಾ ಬಾಯ್ಲೆಚಿ ಏಕ್ ಪಾಡ್ ಸವಯ್ ಆಸಾ. ತಿಚ್ಯಾ ಹಾತಾಂತ್ ಬೇತ್ ಚುಕೊಂಕ್ ನಜೊ. ತಿ ರಾತಿಕ್ಯೀ ಬೇತ್ ಘೆವ್ನ್ಂಚ್ ನಿದ್ತಾ. ತಶೆಂ ಜಾಲ್ಲ್ಯಾನ್ ಮ್ಹಜೊ ವಂಶ್ ಮುಕಾರ್ ವರ್ಚಿ ಬೆತ್ಕಾಟಿ ಆನಿಕ್ಯೀ ತಯಾರ್ ಜಾಂವ್ಕ್ ನಾ.
ಟಿಚೆರಿಲಾಗಿಂ ಕಾಜಾರ್ ಜಾಲ್ಯಾ ಉಪ್ರಾಂತ್ ಏಕ್ ಖಡಕ್ ಓರ್ಡರ್ ಆಸಾ. ಕಾಜಾರಿ ದೀಸ್ ಆಚರ್ಸುಂಕ್ ನಾ. ತಾಚೆ ಬದ್ಲಾಕ್ ಹರ್ಯೇಕ್ ವರ್ಸಾ ಟೀಚರ್ಸ್ ಡೇ ಮಾತ್ರ್ ಕಡ್ಡಾಯ್ ಜಾವ್ನ್ ಆಚರ್ಸಿಜೆ. ತಶೆಂ ಮ್ಹಣ್ತಾನಾಂಚ್ ತಿಚ್ಯಾ ಇಸ್ಕೊಲಾಚ್ಯಾ ಮುಖೆಲ್ ಮೆಸ್ತ್ರಿಣಿಚೆಂ ಮ್ಹಾಕಾ ಫೋನ್ ಆಯ್ಲೆಂ.
ಹಲೋ ಸಿಕೇರಾಮಾ ಹ್ಯಾ ಪಾವ್ಟಿಂ ಇಸ್ಕೊಲಾಂತ್ ಟೀಚರ್ಸ್ ಡೇ ಆಚರಣ್ ಆಸಾ. ಹ್ಯಾ ಪಾವ್ಟಿಂ ಇಲ್ಲೆಂ ವಿಶೇಸ್ ರಿತಿನ್ ಆಚರ್ಸುಂಚೆಂ. ಹರ್ಯೇಕಾ ಟಿಚರಾಂಚ್ಯಾ ನೊವ್ರ್ಯಾನಿಂ ಯೇವ್ನ್ ತಾಂತಾಂಚ್ಯಾ ಟುಚೆರಿವಿಶಿಂ ದೋನ್ ಬರೆ ಸಬ್ದ್ ಉಲಂವ್ಕ್ ಆಸಾತ್. ಕೋಣ್ ಚಡ್ ಬರೆಂ ಉಲಯ್ತಾ ತ್ಯಾ ಟೀಚರಿಕ್ ಹ್ಯಾ ವರ್ಸಾಚಿ ಅತ್ಯುತ್ತಮ್ ಶಿಕ್ಷಕಿ ಪ್ರಶಸ್ತಿ ದಿತೆಲ್ಯಾಂವ್.
ತುಜ್ಯಾ ಪ್ರಶಸ್ತೆಕ್ ಉಜೊ ಲಾಯ್. ಕಾಜಾರಾ ಉಪ್ರಾಂತ್ ಬಂಧ್ ಜಾಲ್ಲೊ ಮ್ಹಜೊ ಟ್ಯೂಬ್ ಲೈಟ್ ಆಜ್ ಪೆಟ್ಲೊ. ಬರೆಂ ನ್ಹಯ್, ತಿಚಿಂ ಕರ್ತುವಾಂ ಹಾಂವ್ ಅಖ್ಖ್ಯಾ ಇಸ್ಕೊಲಾ ಮುಕಾರ್ ಭಾಯ್ರ್ ಘಾಲ್ತಲೊಂ. ಅಸಲೊ ಆವ್ಕಾಸ್ ಪರತ್ ಮೆಳ್ಚೊನಾ. ಆಯ್ಕೊನ್ ತಿ ಎಕ್ಚ್ ಕುಳಾರಾ ವಚೊನ್ ರಾವ್ತೆಲಿ ವಾ ಮ್ಹಾಕಾ ಡೈವೊರ್ಸ್ ದಿತೆಲಿ. ಉಪ್ರಾಂತ್ ಹಾಂವ್ ಸ್ವತಂತ್ರ್. ಹಾಂವೆಂ ಘಟ್ಟ್ ನಿಚೆವ್ ಕೆಲೊ.
ಸಪ್ತೆಂಬರಾಚಿ 5 ತಾರಿಕ್. ಟೀಚರ್ಸ್ ಡೇ ಸೆಲೆಬ್ರೇಶನ್ ಭರಾನ್ ಚಲ್ತಾಲೆಂ. ಕಾರ್ಯಚೊ ಅಖೇರಿಚೊ ವಾಂಟೊ ಜಾವ್ನ್ ಹರ್ಯೇಕಾ ನೊವ್ರ್ಯಾನಿಂ ತಾಂತಾಂಚ್ಯಾ ಟಿಚರಿವಿಶಿಂ ಉಲಂವ್ಕ್. ಹರ್ಯೇಕ್ಲೊ ಮ್ಹಜಿ ಟೀಚರ್ ತಶಿ, ಮ್ಹಜಿ ಟಿಚರ್ ಅಶಿ ಮ್ಹಣ್ ಉಲವ್ನ್ ಗೆಲೆ. ಅಖ್ರೇಕ್ ಮ್ಹಜಿ ಸರ್ತಿ. ಸಿಕೇರಾಮ್ ಆಜ್ ನ್ಹಯ್ ತರ್ ಆನಿ ಕೆದಿಂಚ್ ನಾ. ಮ್ಹಜೊ ಅಂತಸ್ಕರ್ನಾಚೊ ತಾಳೊ ಬೊಬ್ ಮಾರುಂಕ್ ಲಾಗ್ಲೊ. ಕಾಂಪ್ಚೆ ಮ್ಹಜೆ ಹಾತ್ ಘಟ್ಟ್ ಮಾಯ್ಕಾಕ್ ದರ್ಲೆ.
“ಮ್ಹಜ್ಯಾ ಟೀಚರಿನ್ ಮ್ಹಜೆಂ ಸುಖ್ ಸಮಾಧಾನ್ ಸಕ್ಕಡ್ ಫಾರ್ಲಾಂ. ತಿಕಾ ಉಟ್ತಾ ಬಸ್ತಾನಾ ಫಕತ್ ಭುರ್ಗಿಂ. ಇಸ್ಕೊಲಾಂತ್ ಉಲಯಿಲ್ಲ್ಯಾಬರಿಂ ಘರಾಂತ್ಯೀ ತಾಳೊ ಫಿಂದ್ತಾ ಮ್ಹಣಾಸರ್ ಬೊಬ್ ಮಾರ್ತಾ. ಖಂಯ್ಚೀಯ್ ವಿಶಯ್ ವಿಚಾರ್ಲ್ಯಾರ್ ಬಸೊನ್ ಮ್ಹಾಕಾ ಪಾಠ ಕರ್ತಾ. ಚುಕಿ ಕೆಲ್ಯಾರ್ ಭುರ್ಗ್ಯಾಂಕ್ ಮಾರ್ಲ್ಲ್ಯಾಬರಿಂ ಮ್ಹಾಕಾ ಮಾರ್ತಾ. (ಹೆಂ ಇಲ್ಲೆಂ ಬೊಲ್ಸಾಂತ್ಲೆಂ). ಬರಯ್ತಾನಾ ಚುಕಿ ಕೆಲ್ಯಾರ್ ಶೆಂಭೊರ್ ಪಾವ್ಟಿಂ ಬರಂವ್ಕ್ ಲಾಯ್ತಾ. ನಿದ್ತಾನಾ ಸಯ್ತ್ ಭುರ್ಗ್ಯಾಂಚೊ ಜೋಪ್ ದೆಕುನ್ ಬೇತ್ ಘೆವ್ನ್ಂಚ್ ನಿದ್ತಾ. ತ್ಯಾ ವರ್ವಿಂ ಮಧ್ಯಾನೆ ರಾತಿಕ್ ಮ್ಹಾಕಾ ಜಾಗ್ ಜಾಲ್ಯಾರೀ ತಿಕಾ ಉಟಂವ್ಕ್….. ಮುಕಾರ್ ಉಲಂವ್ಕ್ ಜಾಯ್ನಾಸ್ತಾಂ ಮ್ಹಜ್ಯಾ ದೊಳ್ಯಾಂಥಾವ್ನ್ ದುಖಾಂ ದೆಂವ್ಲಿಂ. ಆನಿ ಕಾಂಯ್ ಮೋಗ್ ಕರುಂಕ್ ಸುರ್ವಾತ್ಲ್ಯಾರ್ ಹಾಂವ್ಯೀ ತಿಚೊ ಸ್ಟೂಡೆಂಟ್ಚ್ ಮ್ಹಣ್ ಲೆಕುನ್ ಮ್ಹಾಕಾ ಧೆಂಕ್ಣೊ ಘಾಲ್ತಾ. ಹಾಂವ್ ಹಿಚೆಕಡೆನ್ ಕಾಜಾರ್ ಜಾಲಾಂಗೀ ವಾ ಶಿಕ್ಚಾಖಾತಿರ್ ಭರ್ತಿ ಜಾಲಾಂಗೀ ಮ್ಹಣ್ ಕಳಾನಾ. ಸಾಂಗಾ ಅಸಲ್ಯಾ ಟೀಚರಿ ಸಾಂಗಾತಾ ಜಿಯೆಂವ್ಚೆಂ ತರೀ ಕಶೆಂ…?”
ಹಾಂವೆಂ ಸಾಂಗೊನ್ ಮುಗ್ಧಿಜೆ ತರ್ ಜಮ್ಲ್ಲ್ಯಾ ಹರ್ಯೇಕಾ ಟಿಚರಾನಿಂ ಭುರ್ಗ್ಯಾಂ ಸಾಂಗಾತಾ ತಾಳಿಯೊ ಪೆಟ್ಯ್ಲೊ. ತಿತ್ಲ್ಯಾರ್ ಮುಖೆಲ್ ಮೆಸ್ತ್ರಿರ್ಣೆನ್ ಮಾಯ್ಕ್ ವೋಡ್ನ್ ಕಾಡ್ಲೊ ಆನಿ ಮ್ಹಣಾಲಿ.
“ಪಳೆಯಾ, ಸಿಕೇರಾಮಾಚಿ ಬಾಯ್ಲ್ ಮಿಸೆಸ್ ಸಿಕೇರಾಮಿ ತಿಕಾ ಇಸ್ಕೊಲಾಥಂಯ್ ಆನಿ ಭುರ್ಗ್ಯಾಂಥಂಯ್ ಕಿತ್ಲೊ ಹುಸ್ಕೊ. ನಿದೆಂತ್ಯೀ ಆನಿ ಜಾಗ್ತಾನಾಂಯ್ ಇಸ್ಕೊಲ್ ಆನಿ ಭುರ್ಗಿಂಚ್. ಹ್ಯಾ ಖಾತಿರ್ ತಿಣೆಂ ನೊವ್ರ್ಯಾಕ್ಯೀ ಕುಶಿಕ್ ದವರ್ಲಾ. ಅಸಲಿ ಟೀಚರಾಂ ಆಮ್ಕಾಂ ಜರೂರ್ ಜಾಯ್. ದೆಕುನ್ ಹ್ಯಾ ವರ್ಸಾಚಿ ಅತ್ಯುತ್ತಮ್ ಶಿಕ್ಷಕಿ ಪ್ರಶಸ್ತಿ ತಿಕಾಚ್ ಫಾವೊ ಜಾತಾ.”
ಕೂಡ್ಲೆ ಏಕ್ ಕದೆಲ್ ಹಾಡ್ಲೆಂ, ತಾಂತುನ್ ಮ್ಹಜ್ಯಾ ಟಿಚರಿಕ್ ಬಸಯ್ಲೆಂ. ಫುಲಾಂ ಫಳಾಂ, ಶೋಲ್ ಪಾಂಗ್ರುನ್, ಏಕ್ ಕವರ್ ದೀವ್ನ್ ತಿಕಾ ಮಾನ್ ಕೆಲೊ ಆನಿ ಅತ್ಯುತ್ತಮ್ ಶಿಕ್ಷಕಿ ಪ್ರಶಸ್ತಿ ತಿಕಾ ದಿಲಿ. ಹಾಂವೆಂ ಮ್ಹಜ್ಯಾ ಟಿಚರಿಕ್ ಗಾಳಿ ದಿಲ್ಲ್ಯೊಗೀ ವಾ ಪುಗಾರ್ಲೆಂಗೀ ಮ್ಹಣ್ ಮ್ಹಾಕಾಚ್ ಘುಸ್ಪೊಡ್ ಜಾಲಿ. ಪ್ರಶಸ್ತಿ ಮೆಳ್ಲ್ಲಿಚ್ ಧಾಂವೊನ್ ಯೇವ್ನ್ ತಿಣೆಂ ಮ್ಹಾಕಾ ಆರಾವ್ನ್ ಧರ್ಲೆಂ. ತಿತ್ಲ್ಯಾರ್ ಮುಕೆಲ್ ಮೆಸ್ತ್ರಿಣೆನ್ ಅನ್ಯೇಕ್ ಎನಾಂವ್ಸ್ ಕೆಲೆಂ –
“ಆನಿ ಮುಕ್ಲ್ಯಾ ತೀನ್ ವರ್ಸಾಂನಿ ತಿಣೆ ಅಶೆಂಚ್ ಮೇಂಟೇಯ್ನ್ ಕೆಲೆಂ ತರ್ ತಿಕಾ ರಾಜ್ಯೋತ್ಸವ ಪ್ರಶಸ್ತಿ ದಿಂವ್ಚ್ಯಾಕ್ ಹಾಂವ್ ಖಂಡಿತ್ ಶಿಫಾರಾಸ್ ಕರ್ತೆಲಿಂ.”
ಹೆಂ ಎನಾಂವ್ಸ್ಮೆಂಟ್ ಆಯ್ಕೊನ್ ಮ್ಹಾಕಾ ಡಿಪ್ರೇಶನಾರ್ ಅಶಿ ತಕ್ಲಿ ಘುಂವೊಳ್ ಆಯ್ಲಿ ಕೀ ಹಾಂವ್ ಧಡಲ್ಲ್ ಕರ್ನ್ ಮ್ಹಜ್ಯಾ ಟಿಚೆರಿಚ್ಯಾ ಉಸ್ಕ್ಯಾರ್ಚ್ ಪಡ್ಲೊಂ. ಹೆಂ ಪಳೆವ್ನ್ ಸಕ್ಕಡ್ ಟಿಚೆರಾನಿಂ ಥಂಬ್ಸ್ ಅಪ್ ಕರ್ನ್ ಹಾತ್ ವಯ್ರ್ ಕೆಲೆ. ಮ್ಹಜ್ಯಾ ಹ್ಯಾ ಸಕ್ಕಡ್ ಕಷ್ಟಾ ವೊಳ್ವೊಳ್ಯಾ ಮಧೆಂ ತೊ ಧಾರುಣ್ ಕಾಳ್ಜಾಚೊ ಫೊಟೊಗ್ರಾಫಾರ್ ಮಾತ್ರ್ ಲಜೆವಿಣೆಂ ಉದ್ಗಾರ್ಲೊ ’ಸ್ಮಾಯ್ಲ್ ಪ್ಲೀಜ್’
■ ರೋಶು ಬಜ್ಪೆ
