ಉಡುಪಿ ದಿಯೆಸೆಜಿಕ್ ಬಿಸ್ಪ್ ಜಾವ್ನ್ ನೇಮಕ್ ಜಾಲ್ಲ್ಯಾ ಮಾ| ದೊ| ಲೆಸ್ಲಿ ಕ್ಲಿಫರ್ಡ್ ಡಿ’ಸೋಜಾ, ಸೊಮಾರಾ ಎಪ್ರಿಲ್ 20 ವೆರ್ ಕಲ್ಯಾಣ್ಪುರ್ ಮಿಲಾಗ್ರೆಸ್ ಕೊಲೆಜಿಚ್ಯಾ ಮಯ್ದಾನಾರ್ ಉಡುಪಿ ಧರ್ಮ್ಪ್ರಾಂತ್ಯಾಚೊ ದುಸ್ರೊ ಧರ್ಮಾಧ್ಯಕ್ಶ್ ಜಾವ್ನ್ ದೀಕ್ಷಾ ಘೆತಲೆ ಮ್ಹಣ್ ಉಡುಪಿ ದಿಯೆಸೆಜಿಚೊ ಸರ್ವಜಣಿಕ್ ಸಂಪರ್ಕ್ ಅಧಿಕಾರಿ ಮಾ| ಬಾ| ಡೆನಿಸ್ ಡೆ’ಸಾ ಹಾಣಿ ಪತ್ರಾ ಪರಿಶದೆಂತ್ ಜಾಹೀರ್ ಕೆಲೆಂ.
ಗೋವಾ – ದಮನ್ ಆರ್ಚ್ ದಿಯೆಸೆಜಿಚೊ ಆರ್ಚ್ ಬಿಸ್ಪ್ ತಶೆಂ FABC ಆನಿ CCBI ಅಧ್ಯಕ್ಷ್ ಕಾರ್ಡಿನಲ್ ಫಿಲಿಪ್ ನೆರಿ ಫೆರಾವೊ ಹಾಂಚ್ಯಾ ಮುಕೆಲ್ಪಣಾರ್ ಪವಿತ್ ಮಿಸಾಚೆಂ ಬಲಿದಾನ್ ಆನಿ ದೀಕ್ಷಾ ಸಂಭ್ರಮ್ ಚಲ್ತಲೊ. ಬೆಂಗ್ಳುರ್ ಆರ್ಚ್ ದಿಯೆಸೆಜಿಚೊ ಆರ್ಚ್ ಬಿಸ್ಪ್ ಅ| ಮಾ| ಡೊ| ಪೀಟರ್ ಮಚಾದೊ ಆನಿ ಉಡುಪಿ ದಿಯೆಸೆಜಿಚೊ ವಿಶ್ರಾಂತ್ ಬಿಸ್ಪ್ ಅ| ಮಾ| ದೊ| ಜೆರಾಲ್ಡ್ ಐಸಾಕ್ ಲೋಬೊ ದೀಕ್ಷಾ ಸಂಭ್ರಮಾಕ್ ಸಾಂಗಾತ್ ದಿತಲೆ.
ಹ್ಯಾ ಐತಿಹಾಸಿಕ್ ಸಂಭ್ರಮಾಕ್ ಭಾರತ್ ಆನಿ ನೇಪಾಳ್ ದೆಶಾಚೊ ಅಪೊಸ್ತೊಲಿಕ್ ನುನ್ಸಿಯೋ ದೊ| ಲಿಯೋಪೋಲ್ಡೊ ಗಿರೆಲ್ಲಿ, ದೇಸ್ಭರ್ ಥಾವ್ನ್ ಆರ್ಚ್ ಬಿಸ್ಪ್, ಬಿಸ್ಪ್, ಯಾಜಕ್, ಧರ್ಮ್ ಭಯ್ಣಿ ಆನಿ ಭಾವ್, ರಾಜಕೀಯ್ ಮುಕೆಲಿ, ಸಮಾಜೆಚೆ ಮುಕೆಲಿ, ಆನಿ ಭಾವಾಡ್ತಿ ಮೆಳೊನ್ 5000 ವಯ್ರ್ ಲೋಕ್ ಉಡುಪಿಂತ್ ಜಮ್ಚಿ ಸಾಧ್ಯತಾ ಆಸಾ.
ಧಾರ್ಮಿಕ್ ವಿಧಿ ಉಪ್ರಾಂತ್ ತ್ಯಾಚ್ ವೆದಿರ್ ನವ್ಯಾ ಗೊವ್ಳ್ಯಾಕ್ ಸರ್ವಜಣಿಕ್ ಸನ್ಮಾನ್ ಕಾರ್ಯೆಂ ಚಲ್ತಲೆಂ. ಉಡುಪಿ ಜಿಲ್ಲ್ಯಾಚಿ ಖಬಾಡ್ದಾರಿ ಮಂತ್ರಿ ಶ್ರೀಮತಿ ಲಕ್ಷ್ಮೀ ಹೆಬ್ಬಾಳಕರ್ ತಶೆಂ ಉಡುಪಿ ಶಾಸಕ್ ಶ್ರೀ ಯಶಪಾಲ್ ಸುವರ್ಣ ನಾಗರಿಕಾಂ ತರ್ಫೆನ್ ಮಾನ್ ಪಾಟವ್ನ್ ಅಭಿನಂದನಾಚಿಂ ಉತ್ರಾಂ ಉಲಯ್ತಲೆ.
ನಿವೃತ್ತ್ ಬಿಸ್ಪ್ ಅ| ಮಾ| ದೊ| ಜೆರಾಲ್ಡ್ ಐಸಾಕ್ ಲೋಬೊ ಹಾಣಿ 2012 ಪಾಸುನ್ 2026 ಮೆರೆನ್ 13 ವರ್ಸಾಂ ಉಡುಪಿ ದಿಯೆಸೆಜಿಚೊ ಪ್ರಥಮ್ ಗೊವ್ಳಿ ಜಾವ್ನ್ ಫಳಾದೀಕ್ ಸೆವಾ ದಿಲ್ಯಾ ಆಸುನ್, ತಾಂಚ್ಯಾ ಮುಕೆಲ್ಪಣಾರ್, ‘ದಿಯೆಸೆಜಿಂತ್ ಗರ್ಜೆವೊಂತ್ ಮ್ಹಳ್ಳೊ ಆಸಾನಾಯೆ’ ಮ್ಹಳ್ಳೊ ಮಿಸಾಂವ್ ಧ್ಯೆಯ್ ಘೆವ್ನ್, ಪ್ರತೇಕ್ ಜಾವ್ನ್ ಯುವಜಣ್ ಆನಿ ಸಮಾಜೆಂತ್ ಮೆರೆರ್ ಜಿಯೆತೆಲ್ಯಾಂಚೇರ್ ತಾಣಿ ವಿಶೇಸ್ ಗುಮಾನ್ ದಿಲ್ಲೆಂ ಆಸಾ. ಪಾಪಾ ಲಿಯೋ ಚೊವ್ದಾವ್ಯಾನ್ 2026 ಜನೆರ್ 31 ವೆರ್ ಮಾ| ದೊ| ಲೆಸ್ಲಿ ಕ್ಲಿಫರ್ಡ್ ಡಿ’ಸೋಜಾ ಹಾಂಕಾ ಉಡುಪಿ ದಿಯೆಸೆಜಿಚೊ ಬಿಸ್ಪ್ ಜಾವ್ನ್ ನೇಮಕ್ ಕೆಲ್ಲೊ.
1962 ಆಗಸ್ಟ್ 19 ವೆರ್ ಉಡುಪಿ ಜಿಲ್ಲ್ಯಾಚ್ಯಾ ಎರ್ಮಾಳ್ ಹಾಂಗಾಸರ್ ಜಲ್ಮಾಲ್ಲ್ಯಾ ಮಾ| ದೊ| ಲೆಸ್ಲಿ ಹಾಣಿ ಮೈಸೂರ್ ವಿಶ್ವವಿದ್ಯಾಲಯಾ ಥಾವ್ನ್ ಕಲಾ ವಿಭಾಗಾಂತ್ ಪದ್ವಿ, ಮಂಗ್ಳುರ್ ಸಾಂ. ಜುಜೆ ಸೆಮಿನರಿಂತ್ ಯಾಜಕೀ ಶಿಕಪ್ ಆನಿ ಬೆಲ್ಜಿಯಂ ಲೂವನ್ ಕ್ಯಾಥೋಲಿಕ್ ವಿಶ್ವವಿದ್ಯಾಲಯಾಂತ್ ನೈತಿಕ್ ಧರ್ಮಶಾಸ್ತ್ರಾಂತ್ ದೊತೊರ್ ಸನದ್ ಜೊಡ್ಲ್ಯಾ.
1990 ಮೇ 10 ವೆರ್ ಯಾಜಕೀ ದೀಕ್ಷಾ ಜೊಡ್ಲೆಲ್ಯಾ ತಾಣಿ ಮಂಗ್ಳುರ್ ಆನಿ ಉಡುಪಿ ದಿಯೆಸೆಜಿಂನಿ ಸಹಾಯಕ್ ವಿಗಾರ್, ಸೆಮಿನರಿಂತ್ ಪ್ರಾಧ್ಯಾಪಕ್ ತಶೆಂ ವಿಗಾರ್ ಆನಿ ವಿಗಾರ್ ವಾರ್ ಜಾವ್ನ್ ಸೆವಾ ದಿಲ್ಯಾ.
2012 ಜುಲೈ 16 ವೆರ್ ಪಾಪಾ ಬೆನೆಡಿಕ್ಟ್ ಸೊಳಾವ್ಯಾನ್ ಉಡುಪಿ ದಿಯೆಸೆಜಿಚಿ ಘೋಷಣಾ ಕರುನ್, ತವಳ್ ಶಿಮೊಗಾ ದಿಯೆಸೆಜಿಚೊ ಬಿಸ್ಪ್ ಜಾವ್ನಾಸ್ಲ್ಲ್ಯಾ ಅ| ಮಾ| ದೊ| ಜೆರಾಲ್ಡ್ ಐಸಾಕ್ ಲೋಬೊ ಹಾಂಕಾ ನವ್ಯಾನ್ ರೂಪಿತ್ ಜಾಲ್ಲ್ಯಾ ಉಡುಪಿ ದಿಯೆಸೆಜಿಚೊ ಪ್ರಥಮ್ ಬಿಸ್ಪ್ ಮ್ಹಣ್ ನೇಮಕ್ ಕೆಲ್ಲೊ. 2012 ಪಯ್ಲೆಂ, ವಿಶಾಲ್ ಮಂಗ್ಳುರ್ ದಿಯೆಸೆಜಿಚೊ ವಾಂಟೊ ಜಾವ್ನಾಸ್ಲ್ಲ್ಯಾ ಉಡುಪಿ ದಿಯೆಸೆಜಿಂತ್ ಪ್ರಸ್ತುತ್ ಕಾರ್ಕೊಳ್, ಕುಂದಾಪುರ್, ಕಾಪು, ಬೈಂದೂರ್, ಹೆಬ್ರಿ, ಬ್ರಹ್ಮಾವರ್ ಆನಿ ಉಡುಪಿ ತಾಲೂಕಾಂ ಆಸೊನ್, ಬೆಂಗ್ಳುರ್ ಆರ್ಚ್ ದಿಯೆಸೆಜಿ ಖಾಲ್ ಯೆಂವ್ಚ್ಯಾ ಉಡುಪಿ ದಿಯೆಸೆಜಿಕ್ ಕಲ್ಯಾಣಪುರ್ಚಿ ಮಿಲಾರ್ ಇಗರ್ಜ್ ಕಾಥೆದ್ರಾಲ್ ಜಾವ್ನಾಸಾ. ಉಡುಪಿ ದಿಯೆಸೆಜಿಂತ್ 60,338 ಭಾವಾಡ್ತಿ ಲೋಕ್ ಆಸುನ್, 51 ಫಿರ್ಗಜೊ, ಏಕ್ ಬಸಿಲಿಕಾ, ತೀನ್ ಪೂನ್ಶೆತಾಂ ಆನಿ ಸಾತ್ ಕೊಪೆಲಾಂ ಆಸಾತ್.
ಪತ್ರಾ ಪರಿಶದೆಂತ್ ಉಡುಪಿ ದಿಯೆಸೆಜಿಚೊ ಆಪೊಸ್ತಲಿಕ್ ಆಡಳ್ತೆದಾರ್ ಅ| ಮಾ| ದೊ| ಜೆರಾಲ್ಡ್ ಐಸಾಕ್ ಲೋಬೊ, ಕಾರ್ಯಕ್ರಮಾಚೊ ಸಂಚಾಲಕ್, ಕಲ್ಯಾಣಪುರ್ ಮಿಲಾರ್ ಕಾಥೆದ್ರಾಲಾಚೊ ವಿಗಾರ್ ತಶೆಂ ದಿಯೆಸೆಜಿಚೊ ವಿಗಾರ್ ಜೆರಾಲ್ ಮಾ| ಬಾ| ಫರ್ಡಿನಾಂಡ್ ಗೊನ್ಸಾಲ್ವಿಸ್, ದಿಯೆಸೆಜಿಚೊ ಛಾನ್ಸಲರ್ ಮಾ| ಬಾ| ಸ್ಟೀವನ್ ಡಿಸೋಜಾ, ಆನಿ ಮಾಧ್ಯಮ್ ಸಂಯೋಜಕ್ ಮೈಕಲ್ ರೊಡ್ರಿಗಸ್ ಹಾಜರ್ ಆಸ್ಲೆ.
ವರ್ದಿ / ತಸ್ವಿರ್ಯೊ : ಅಲ್ಪೋನ್ಸ್, ಪಾಂಗ್ಳಾ
