ಶಿರ್ತಾಡಿಚ್ಯಾ ಚಾರ್ಲ್ಸ್ ಸಾಂತುಮಾಯೋರ್ ಆನಿ ಆಂಜೆಲಿನ್ ಕ್ರಾಸ್ತಾ ಹಾಂಚೊ ಪೂತ್ ಅವಿಲ್ ಸಾಂತುಮಾಯೋರ್, ನೈನಾಡ್ಚ್ಯಾ ಡೆನಿಸ್ ಆನಿ ಎಲಿಜಾ ರೊಡ್ರಿಗಸ್ ಹಾಂಚೊ ಪೂತ್ ಡೆನ್ಜಿಲ್ ರೊಡ್ರಿಗಸ್, ಬೇಳಾಚ್ಯಾ ಜೊನ್ ಆನಿ ಐರಿನ್ ಡಿ ಸೊಜಾ ಹಾಂಚೊ ಪೂತ್ ಜೀವನ್ ಡಿಸೋಜಾ, ಕುಲ್ಶೇಕರ್ಚ್ಯಾ ವಿಕ್ಟರ್ ಜೊನ್ ಆನಿ ಪ್ರಮೀಳಾ ಮೊಂತೇರೊ ಹಾಂಚೊ ಪೂತ್ ಜೋಯಲ್ ಮೊಂತೇರೊ ಆನಿ ಮಡಂತ್ಯಾರ್ ಲೊರೆನ್ಸ್ ಆನಿ ರೀಟಾ ಡಿ ಸೊಜಾ ಹಾಂಚೊ ಪೂತ್ ಲೊಯ್ಡ್ ರೋಹನ್ ಡಿಸೋಜಾ – ಪಾಂಚ್ ದಿಯಾಕೊನ್, 2026 ಏಪ್ರಿಲ್ 16 ವೆರ್ ಕೊರ್ಡೆಲ್ ಪವಿತ್ರ್ ಖುರ್ಸಾಕ್ ಸಮರ್ಪಿಲ್ಲ್ಯಾ ದೇವಳಾಂತ್ ಮಂಗ್ಳುರ್ಚೊ ಗೊವ್ಳಿ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ ಹಾಂಚೆ ಥಾವ್ನ್ ಯಾಜಕೀ ದೀಕ್ಷಾ ಘೆವುನ್, ಮಂಗ್ಳುರ್ ದಿಯೆಸೆಜಿಕ್ ಪಾಂಚ್ ನವೆ ಯಾಜಕ್ ಜಾವ್ನ್ ಭರ್ತಿ ಜಾಲೆ.
ದೀಕ್ಷಾ ಸಂಭ್ರಮಾಕ್ ಮಂಗ್ಳುರ್ ದಿಯೆಸೆಜಿಚೊ ವಿಗಾರ್ ಜೆರಾಲ್ ಮೊ| ಮ್ಯಾಕ್ಸಿಮ್ ನೊರೊನ್ಹಾ, ಧಾರ್ಮಿಕಾಂಚೊಂ ವಿಗಾರ್ ಮಾ| ದೊ| ಡೇನಿಯಲ್ ವೇಗಸ್, ಜೆಪ್ಪು ಸಾಂ. ಜುಜೆ ಸೆಮಿನರಿಚೊ ರೆಕ್ಟರ್ ಮಾ| ದೊ| ರಾಜೇಶ್ ರೊಜಾರಿಯೋ, ಜುಡಿಶಿಯಲ್ ವಿಗಾರ್ ಮಾ|ಬಾ| ನವೀನ್ ಪಿಂಟೊ, ಗೊವ್ಳಿಕ್ ಕೇಂದ್ರಾಚೊ ನಿರ್ದೇಶಕ್ ಮಾ|ಬಾ| ಸಂತೋಷ್ ರೊಡ್ರಿಗಸ್ ತಶೆಂ ಕುಲ್ಶೇಕರ್ ಫಿರ್ಗಜೆಚೊ ವಿಗಾರ್ ಮಾ| ಬಾ| ಕ್ಲಿಫರ್ಡ್ ಫೆರ್ನಾಂಡಿಸ್, ಸಾಂಗಾತಾ ಜಾಯ್ತೆ ಯಾಜಕ್, ಧರ್ಮ್ ಭಯ್ಣಿ, ನವ್ಯಾ ಯಾಜಕಾಂಚ್ಯಾ ಕುಟ್ಮಾಚಿಂ, ಮೊಗಾಚಿಂ ಸಯ್ರಿಂ – ಧಯ್ರಿಂ ಆನಿ ಭಾವಾಡ್ತಿ ಲೋಕ್ ಹಾಜರ್ ಆಸ್ಲೊ.
ಆಪ್ಲ್ಯಾ ಪ್ರವಚನಾಂತ್ ಗೊವ್ಳಿ ಬಾಪ್ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ ಹಾಣಿ ಯಾಜಕೀ ಜಿಣ್ಯೆಚ್ಯಾ ಆತ್ಮೀಕ್ ಗಜಾಲಿಂಚೇರ್ ಭೊರ್ ದೀವ್ನ್, ‘ಯಾಜಕ್ಪಣ್ ದೆವಾಚ್ಯಾ ಅಪಾರ್ ಮೊಗಾಚೆಂ ದೆಣೆಂ’ ಮ್ಹಣ್ ಸಾಂಗ್ಲೆಂ. ದೊ| ಸಲ್ಡಾನ್ಹಾ ಹಾಣಿ ನವ್ಯಾ ಯಾಜಕಾಂನಿ ಆಪ್ಲ್ಯಾ ಸೆವೆಂತ್ ಸದಾಂಚ್ ಮಾಗ್ಣ್ಯಾಚೊ ಆನಿ ದೆವಾಚ್ಯಾ ಕುರ್ಪೆಚೊ ಆದಾರ್ ಘೆಂವ್ಕ್ ಉಲೊ ದಿಲೊ, ತಶೆಂಚ್ ಭಾವಾಡ್ತ್ಯಾಂನಿ ಆಪ್ಲ್ಯಾ ದಿಸ್ಪಡ್ತ್ಯಾ ಜಿವಿತಾಂತ್ ಯಾಜಕಾಂ ಖಾತಿರ್ ಮಾಗೊಂಕ್ ವಿನತಿ ಕೆಲಿ.
ಮಂಗಳ ಜ್ಯೋತಿ ನಿರ್ದೇಶಕ್ ಮಾ| ಬಾ| ರೋಹಿತ್ ಡಿಕೋಸ್ಟಾ ಹಾಂಚ್ಯಾ ಮುಕೆಲ್ಪಣಾರ್ ಸೆಮಿನರಿಸ್ತಾಂನಿ ಮಿಸಾಚಿ ಮಾಂಡವಳ್ ಕೆಲಿ. ಕುಲ್ಶೇಕರ್ ಫಿರ್ಗಜೆಚೊ ವಿಗಾರ್ ಮಾ| ಬಾ| ಕ್ಲಿಫರ್ಡ್ ಫೆರ್ನಾಂಡಿಸ್ ಹಾಣಿ ಸಂಭ್ರಮಾಕ್ ಮಾರ್ಗದರ್ಶನ್ ದಿಲೆಂ.
ಮಿಸಾಚ್ಯಾ ಪವಿತ್ ಬಲಿದಾನಾ ಉಪ್ರಾಂತ್ ಚಲ್ಲೆಲ್ಯಾ ಸತ್ಕಾರ್ ಕಾರ್ಯಾಂತ್ ಮಾ| ಬಾ| ಫ್ಲೇವಿಯನ್ ಲೋಬೋ ಹಾಣಿ ನವ್ಯಾ ಯಾಜಕಾಂಚಿಂ ಆನಿ ತಾಂಚ್ಯಾ ಕುಟ್ಮಾಚಿ ಒಳಕ್ ಕರುನ್ ದಿಲಿ. ಗೊವ್ಳಿ ಬಾಪಾನ್ ನವ್ಯಾ ಯಾಜಕಾಂಕ್ ಅಭಿನಂದನ್ ಪಾಟವ್ನ್ ಬರೆಂ ಮಾಗ್ಲೆಂ ಆನಿ ತಾಂಚ್ಯಾ ಕುಟ್ಮಾಕ್ ಫುಲಾಂ ತುರೊ ದೀವ್ನ್ ಅಬಾರ್ ಮಾಂದುನ್ ಮಾನ್ ಕೆಲೊ.
ದೀಕ್ಷಾ ಘೆತ್ಲೆಲ್ಯಾ ಯಾಜಕಾಂ ತರ್ಪೆನ್ ಬಾ| ಜೀವನ್ ಡಿಸೋಜಾ ಹಾಣಿ ಗೊವ್ಳಿ ಬಾಪ್, ಪೋಷಕ್, ತರ್ಬೆತ್ದಾರ್ ಆನಿ ಭಾವಾಡ್ತ್ಯಾಂಚೊಂ ಉಪ್ಕಾರ್ ಭಾವುಡ್ಲೊ.
ತಸ್ವಿರ್ಯೊ : ಕೆನರಾ ಸಂಪರ್ಕ್ ಕೇಂದ್ರ್
