ಕರ್ನಾಟಕ – ಗೊಂಯ್ ಕಾರ್ಮೆಲಿತ್ ಪ್ರಾಂತ್ಯಾಚೊ ವ್ಹಡಿಲ್ ಜಾವ್ನ್ ಮಾ| ದೊ| ಜೊನ್ ಫ್ರಾನ್ಸಿಸ್ ಸಿಕ್ವೇರಾ ಹೆ ವಿಂಚುನ್ ಆಯ್ಲ್ಯಾತ್. ಹಿ ವಿಂಚ್ಣುಕ್ ಮಯ್ಸೂರ್ ಬೋಗಾದಿ ಧ್ಯಾನ ಸಾಧನ ಹಾಂಗಾಸರ್ ಎಪ್ರಿಲ್ 17, ಸುಕ್ರಾರಾ ದಿಸಾ ಚಲ್ಲೆಲ್ಯಾ ಸೊಳಾವ್ಯಾ ಪ್ರಾಂತೀಯ್ ಮಹಾ ಅಧಿವೇಶನಾಂತ್ ಜಾಲಿ. ಪಾಟ್ಲ್ಯಾ ತೀನ್ ವರ್ಸಾಂ ಪಾಸುನ್ ಪ್ರಾಂತೀಯ್ ವ್ಹಡಿಲ್ ಜಾವ್ನ್ ಸೆವಾ ದೀವ್ನ್ ಆಸ್ಲೆಲ್ಯಾ ಮಾ| ಸಿಲ್ವೆಸ್ಟರ್ ಡಿ ಸೊಜಾ ಹಾಂಚೆ ಥಾವ್ನ್ ಮಾ| ದೊ| ಜೊನ್ ಸಿಕ್ವೇರಾ ಹಾಣಿ ಹುದ್ದೊ ಸಾಂಬಾಳ್ಳೊ.
ಮಂಗ್ಳುರ್ ದಿಯೆಸೆಜಿಚ್ಯಾ ಅಗ್ರಾರ್ ಫಿರ್ಗಜೆಚೆ ಮಾ| ದೊ| ಜೊನ್ ಸಿಕ್ವೇರಾ ಆತ್ಮೀಕ್ ಮಾರ್ಗದರ್ಶಕ್ ಆನಿ ಶಿಕ್ಪಾತಜ್ಞ್ ಜಾವ್ನಾಸಾತ್. ತಾಣಿ ತತ್ವಶಾಸ್ತಿರಾಂತ್ – ಧಾರಾವಾಡ್ ಕರ್ನಾಟಕ ವಿಶ್ವವಿದ್ಯಾಲಯಾ ಥಾವ್ನ್ ಪಯ್ಲೆ ಪಾವ್ಟಿಂ ಆನಿ ಆಸ್ಟ್ರಿಯಾಚ್ಯಾ ವಿಯೆನ್ನಾ ವಿಶ್ವವಿದ್ಯಾಲಯಾ ಥಾವ್ನ್ ದುಸ್ರೆ ಪಾವ್ಟಿಂ ಸ್ನಾತಕೋತ್ತರ್ ಪದ್ವಿ ಜೊಡ್ಲ್ಯಾ. ಜರ್ಮನ್ ಭಾಷಾಶಾಸ್ತಿರಾಂತ್ ತಾಂಕಾ ಖೊಲಾಯೆಚೊ ಅಭ್ಯಾಸ್ ಆಸಾ. ರೊಮಾಚ್ಯಾ ಸಾಂ. ತೊಮಾಸ್ ಆಕ್ವಿನಸ್ ಫೊಂತಿಫಿಕಾಲ್ ವಿಶ್ವವಿದ್ಯಾಲಯಾ ಥಾವ್ನ್ ತಾಣಿ ತತ್ವಶಾಸ್ತಿರಾಂತ್ ದೊತೊರ್ ಸನದ್ ಆಪ್ಣಾಯ್ಲ್ಯಾ.
ಮಾ| ದೊ| ಜೊನ್ ಸಿಕ್ವೇರಾ ಜಾಯ್ತ್ಯಾ ವಿಶ್ವವಿದ್ಯಾಲಯಾಂನಿ ಆನಿ ಸ್ನಾತಕೋತ್ತರ್ ಶಿಕ್ಪಾಸಂಸ್ಥ್ಯಾಂನಿ ಸಂದರ್ಶಕ್ ಪ್ರಾಧ್ಯಾಪಕ್ ಜಾವ್ನ್ ಸೆವಾ ದೀವ್ನ್ ಆಸಾತ್. ಶಿಕ್ಪಾ ಶೆತಾ ಶಿವಾಯ್ ಮನ್ಶ್ಯಾ ಸಂಪನ್ಮೂಳ್ ಅಭಿವೃದ್ದಿ ಶೆತಾಕೀ ತಾಣಿ ವ್ಹಡ್ ದೆಣ್ಗಿ ದಿಲ್ಯಾ.
ಏಕ್ ಉತ್ತೀಮ್ ಪ್ರವಚನಕಾರ್ ಆನಿ ಬರವ್ಪಿ ಜಾವ್ನಾಸ್ಚ್ಯಾ ತಾಣಿ ಕೊಂಕ್ಣಿ, ಕನ್ನಡ, ಇಂಗ್ಲಿಶಾಂತ್ ಜಾಯ್ತಿಂ ಲೇಖನಾಂ ಬರಯ್ಲ್ಯಾಂತ್ ಮಾತ್ ನಯ್ ತಾಂಚೆ ಬೂಕ್ ಫಾಯ್ಸ್ ಜಾಲ್ಯಾಂತ್. ‘ಡಿಸಿಪ್ಲಿನ್ ಆಫ್ ಡೈಲಾಗ್’ (2001), ‘ಟ್ರಾನ್ಸ್ಫಾರ್ಮಿಂಗ್ ಫಾರ್ಮೇಶನ್’ (2002), ‘ಕಾಂಬ್ಯಾಟಿಂಗ್ ಟೆರರಿಸಂ’ (2004), ‘ತಾಚೆ ಮೋಗಾಳ್ ವೆಂಗೆಂತ್’ (2024), ‘ಇನ್ ಹಿಸ್ ಅಬೈಡಿಂಗ್ ಲವ್: ಸಿಂಪಲ್ ಸ್ಟೆಪ್ಸ್ ಟು ಕಾಂಟೆಂಪ್ಲೇಟಿವ್ ಪ್ರೇಯರ್’ (2024), ‘ಕ್ಲೈಂಬಿಂಗ್ ದಿ ಮೌಂಟೇನ್ ಆಫ್ ದಿ ಲಾರ್ಡ್: ಎ ಥರ್ಟಿ-ಡೇ ರಿಟ್ರೀಟ್ ಆನ್ ಕಾಂಟೆಂಪ್ಲೇಟಿವ್ ಕಾರ್ಮೆಲೈಟ್ ಸ್ಪಿರಿಚುಯಾಲಿಟಿ’ (2025), ‘ಬಿಯಾಂಡ್ ದಿ ಹೊರೈಸನ್ಸ್ ಆಫ್ ಲವ್: ಸೇಂಟ್ ತೆರೇಸಾ ಫಾರ್ ಅವರ್ ಟೈಮ್ಸ್’ (2026) – ಹಿ ತಾಣಿ ಬರವ್ನ್ ಫಾಯ್ಸ್ ಕೆಲ್ಲಿಂ ಪ್ರಮುಕ್ ಪುಸ್ತಕಾಂ.
ಪ್ರಕಾಶಕ್ – ಸಂಪಾದಕ್ ಜಾವ್ನ್ ಪ್ರತಿಕೋದ್ಯಮಕ್ ಶೆತಾಕೀ ತಾಣಿ ವರ್ತಿ ಸೆವಾ ದಿಲ್ಯಾ. ‘ಧ್ಯಾನ’ ಆನಿ ‘ಜೀವ ಜಲ’ ತಾಣಿ ಸ್ಥಾಪನ್ ಕೆಲ್ಲಿಂ ಪತ್ರಾಂ.
ಮಂಗ್ಳುರಾಂತ್ ‘ರಿಶಿವನ’ ಆನಿ ಗೊಂಯಾಂತ್ ‘ಡಿವೈನ್ ಸ್ಪ್ರಿಂಗ್ಸ್’ ಆಧ್ಯಾತ್ಮಿಕ್ ಕೇಂದ್ರ್ ಸ್ಥಾಪನಾ ಪಾಟ್ಲ್ಯಾನ್ ತಾಂಚೊ ದಿಶ್ಟಾವೊ ಆನಿ ಭರ್ಫೂರ್ ಮ್ಹಿನತ್ ಆಸಾ.
