ಮುಂಬಯ್ಚೊ ಆರ್ಚ್ಬಿಸ್ಪ್ ಕಾಡ್ದಿನಾಲ್ ಓಸ್ವಾಲ್ದ್ ಗ್ರೇಸಿಯಸ್ ಹಾಣಿ ಮಂಗ್ಳುರ್ ದಿಯೆಸೆಜಿಚ್ಯಾ ಜೆಪ್ಪು ಸಾಂತ್ ಆಂತೊನ್ ಆಸ್ರ್ಯಾಕ್ ಭೆಟ್ ದೀವ್ನ್ ಆಶ್ರಮ್ ವಾಸಿಂಕ್ ಭುಜಾವಣ್ ಪಾಟವ್ನ್ ಬೆಸಾಂವ್ ದಿಲೆಂ ಆನಿ ಪವಿತ್ ಸಭೆಚೊ ಆಧ್ಯಾತ್ಮಿಕ್ ಸಾಂಗಾತ್ ಭಾಸಾಯ್ಲೊ. ಆಸ್ರ್ಯಾಚೊ ದಿರೆಕ್ತೊರ್ ಮಾ| ಬಾ| ಜೆ. ಬಿ. ಕ್ರಾಸ್ತಾ ಹಾಣಿ ತಾಂಚೊ ಸಾಂಪ್ರದಾಯಿಕ್ ಶೊಲಾಸಾಂಗಾತಾ ಸ್ವಾಗತ್ ಕೆಲೊ ಆನಿ ದುಬ್ಳ್ಯಾ – ಧಾಕ್ಟ್ಯಾಂಚ್ಯಾ ಸೆವೆಂತ್ ಆಸ್ರ್ಯಾಚ್ಯಾ ಐತಿಹಾಸಿಕ್ ಸೆವೆಚಿ ಝಳಕ್ ಆನಿ ಆಸ್ರ್ಯಾಂತ್ಲ್ಯಾ ನಿವಾಸಿಂಕ್ ಲಾಭ್ಚ್ಯಾ ಸವ್ಲತೆಚಿ ಮಾಹೆತ್ ದಿಲಿ.
ಆಪ್ಲ್ಯಾ ಮಟ್ವ್ಯಾ ತರೀ ಅರ್ಥಾಪೂರ್ಣ್ ಭೆಟೆ ವೆಳಾರ್ ಕಾಡ್ದಿನಾಲ್ ಗ್ರೇಸಿಯಸ್ ಹಾಣಿ ಮಾನಸಿಕ್ ಪುನರ್ವಸ್ತೆ ಕೇಂದ್ರ್, ಗ್ರಂಥಾಲಯ್ ಆನಿ ವಸ್ತು- ಸಂಗ್ರಹಲಾಯಾಚೊ ಭೊಂವಾಡೊ ಘೆತ್ಲೊ ಆನಿ ಪಿಡೆಸ್ತಾಂ ಖಾತಿರ್ ಪ್ರತೇಕ್ ಥರಾನ್ ಮಾಗ್ಲೆಂ.
ಹ್ಯಾ ಸಂದರ್ಬಾರ್ ಆಸ್ರ್ಯಾಚೊ ಆಡಳ್ತ್ಯಾಧಿಕಾರಿ ಮಾ| ಬಾ| ಪ್ರವೀಣ್ ಮಾರ್ಟಿಸ್, ಮಾ| ಬಾ| ಗಿಲ್ಬರ್ಟ್ ಸೊಜ್, ಮಾ| ಬಾ| ವಿವಿಯನ್ ನಿಶಾಂತ್ ರೊಡ್ರಿಗಸ್ ಆನಿ ಮಾ| ಬಾ| ರುಡೊಲ್ಫ್ ಅಂದ್ರಾದೆ ಹಾಜರ್ ಆಸ್ಲೆ.
