ಕ್ರಿಸ್ಬೆನ್ ಮ್ಯೂಜಿಕಾನ್ ಆಯ್ಲೆವಾರ್ ಕೊಂಕ್ಣಿ ಭುರ್ಗ್ಯಾಂ ಖಾತಿರ್ ಕ್ರಿಸ್ಬೆನ್ ಲಿಟ್ಲ್ ಸ್ಟಾರ್ 2026 ಜಾಗತಿಕ್ ತಾಲೆಂತಾಂಚೊ ಸ್ಪರ್ಧೊ ಜಾಳಿಜಾಗ್ಯಾರ್ ಮಾಂಡುನ್ ಹಾಡ್ಲ್ಲೊ. 37 ನೊಂದಾವ್ಣೆ ಮಾರಿಫಾತ್ 46 ಭುರ್ಗ್ಯಾಂನಿ ಹಾಂತುಂ ಭಾಗ್ ಘೆತ್ಲೊ. ಬಾರಾ ವರ್ಸಾಂ ಸಕಯ್ಲ್ಯಾ ಪ್ರಾಯೆಚ್ಯಾ ಭುರ್ಗ್ಯಾಂಕ್ ಆಸಾ ಕೆಲ್ಲ್ಯಾ ಹ್ಯಾ ಸ್ಪರ್ಧ್ಯಾಂತ್ ಗಾಯಾನ್, ನಾಚ್, ಭಾಷಣ್ ಆನಿ ಸಂಗೀತ್ ವ್ಹಾಜಾಂತ್ರಾಂ ಸಂಗಿಂ ಗಾಯಾನ್ – ಹ್ಯಾ ವಿಭಾಗಾಂನಿ ಭುರ್ಗ್ಯಾಂನಿ ಆಪ್ಲಿಂ ತಾಲೆಂತಾಂ ಪ್ರದರ್ಶನ್ ಕೆಲಿಂ.
ಕ್ರಿಸ್ಬೆನ್ ಮ್ಯೂಜಿಕಾಚಿಂ ಅಧಿಕೃತ್ ಪದಾಂ ವಿಂಚುನ್ ತಾಲೆಂತ್ ಪ್ರದರ್ಶನ್ ಕರುಂಕ್ ಆಸ್ಲ್ಲೆಂ. ಪ್ರದರ್ಶನಾಚೊ ವೀಡಿಯೊ ಕ್ರಿಸ್ಬೆನ್ ಮ್ಯೂಜಿಕ್ ಯೂಟ್ಯೂಬ್ ಚಾನೆಲಾರ್ ಆಸುನ್ ಲೊಕಾಕ್ ಲಾಯ್ಕ್ಸ್ ದೀಂವ್ಕ್ ಆವ್ಕಾಸ್ ಆಸ್ಲೊ.
ಹ್ಯಾ ಸ್ಪರ್ಧ್ಯಾಚಿ ವರವ್ಣಿ ಮಂಗ್ಳುರ್ಚಿಂ ನಾಮ್ಣೆಚಿಂ ಕಲಾಕರಾಂ ಅಶ್ವಿನ್ ಡಿಕೋಸ್ಟಾ, ಕೆರನ್ ಕ್ರಾಸ್ಟಾ ಆನಿ ದೊ. ವೆಲಿಟಾ ಸಿಬೊನ್ ಲೋಬೊ ಹಾಣಿಂ ಕೆಲಿ. ವರಯ್ಣಾರಾಂಚೆ 80% ಅಂಕ್ ಆನಿ 20% ಯೂಟ್ಯೂಬ್ ಲಾಯ್ಕ್ಸ್ ಮೆಳವ್ನ್ ಜಿಕ್ಪ್ಯಾಕ್ ವಿಂಚುನ್ ಕಾಡ್ಲೆಂ.
ಬೆಂದುರ್ಚೊ ಇಯಾನ್ ನೋವಾ ಡಿಸೋಜಾ ಹ್ಯಾ ಸ್ಪರ್ಧ್ಯಾಚೊ ಜಿಕ್ಪಿ ಜಾವ್ನ್ ವಿಂಚುನ್ ಆಯ್ಲೊ, ಜಾಕಾ ಕ್ರಿಸ್ಬೆನ್ ಲಿಟ್ಲ್ ಸ್ಟಾರ್ 2026 ಬಿರುದ್ ಆನಿ ರುಪಯ್ 26,000 ನಗದ್ ಇನಾಮ್ ಫಾವೊ ಜಾಲೆಂ.
ಟೀಮ್ ಎಡಿಕೆ (ಎಡ್ರಿಕ್ ಜೋನ್ ಪಿಂಟೊ, ಡಿಲನ್ ಪಿರೆರಾ ಆನಿ ಕೀತ್ ಜೋರ್ಡನ್ ಡಿಸೋಜಾ), ವಲೋನಿಯಾ ಡಿಸೋಜಾ ಆನಿ ರಿದಮ್ ರೆಬೆಲ್ಸ್ ( ಅನಿಯಾ ಮೊರಾ ಮಸ್ಕರೆನ್ಹಸ್ ಆನಿ ಟಿವೊನಾ ಲೆನಿಟಾ ಸಿಕ್ವೇರಾ) ಹಾಂಕಾಂ ಭುಜ್ವಣೆಚಿಂ ಇನಾಮಾಂ ಜಾವ್ನ್ ನಗದ್ ರುಪಯ್ 5000 ಫಾವೊ ಜಾಲೆ.
ಭುರ್ಗ್ಯಾಂ ಥಂಯ್ ಕೊಂಕ್ಣಿ ಕಲೆಚಿ ಉರ್ಭಾ ಕಿರ್ಲಾವ್ನ್ ಆನಿ ವಾಡವ್ನ್ ತಾಣಿ ವಡ್ ಜಾತಾನಾ ಕೊಂಕ್ಣಿ ಕಲಾ ಆನಿ ಸಂಸ್ಕ್ರತಿ ಜಿವಾಳ್ ಉರಂವ್ಚ್ಯಾ ಉದ್ದೇಶಾನ್ ಆಸಾ ಕೆಲ್ಲ್ಯಾ ಹ್ಯಾ ಸ್ಪರ್ಧ್ಯಾಚೊ ಪಾಟ್ಲಾವ್ ಸಭಾರ್ ಕಲಾ ಪ್ರೇಮಿನಿ ಜಾಳಿ ಜಾಗ್ಯಾಂನಿ ಕೆಲೊ. ಹ್ಯಾ ಸ್ಪರ್ಧ್ಯಾಕ್ ಸಭಾರ್ ಜಣಾಂ ವಡಿಲಾಂನಿ ಆಪ್ಲ್ಯಾ ಭುರ್ಗ್ಯಾಂಕ್ ದಾಖಲ್ ಕರವ್ನ್ ಪಾಟಿಂಬೊ ದಿಲೊ, ತಶೆಂಚ್ ಕಲಾ ಪ್ರೇಮಿನಿ ಭುರ್ಗ್ಯಾಂಕ್ ಪ್ರೋತ್ಸಾವ್ ದಿಲೊ.
ಕ್ರಿಸ್ಬೆನ್ ಮ್ಯೂಜಿಕಾಚೊ ಮಾಲಕ್ ಕ್ರಿಸ್ಟೊಫರ್ ರೋಶನ್ ಲೋಬೊನ್ ಸ್ಪರ್ಧಿಕಾಂಚೊ, ಸ್ಪರ್ಧಿಕಾಂಚ್ಯಾ ವಡಿಲಾಂಚೊ, ವರಯ್ಣಾರಾಂಚೊ ಆನಿ ಸರ್ವ್ ಕೊಂಕ್ಣಿ ಕಲಾ ಪ್ರೇಮಿಂಚೊ ಆಭಾರ್ ಮಾಂದ್ಲಾ.
