ನಾಮ್ಣೆಚೊ ಕಥಾಕಾರ್ ವಲ್ಲಿ ವಗ್ಗ ಹಾಂಚ್ಯಾ 21 ವಿಂಚ್ಣಾರ್ ಕಾಣಿಯಾಂಚೊ ಸಂಗ್ರಹ್ ‘ವಿಂಚ್ಣಾರ್ ಕಾಣಿಯೊ’ ಆಯ್ತಾರಾ ಮಾಯ್ 10 ವೆರ್ ಸಾಂಜೆಚ್ಯಾ ಪಾಂಚ್ ವರಾರ್ ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾಚ್ಯಾ ಸಹೋದಯ ಸಾಲಾಂತ್ ವಿಶ್ವವಿದ್ಯಾಲಯಾಚೊ ಕುಲಪತಿ ಮಾ| ದೊ| ಪ್ರವೀಣ್ ಮಾರ್ಟಿಸ್.ಜೆ.ಸ. ಹೆ ಉಗ್ತಾಯ್ತಾಲೆ. ಸಾಹಿತ್ಯ ಅಕಾಡೆಮಿ, ನವಿ ದಿಲಿ, ಕೊಂಕಣಿ ಸಲ್ಹಾಗಾರ್ ಸಮಿತಿಚೊ ನಿಮಂತ್ರಕ್ ತಶೆಂ ಕಾರ್ಯಾಕಾರಿ ಮಂಡಳೆಚೊ ಸಾಂದೊ ಕವಿ ಮೆಲ್ವಿನ್ ರೊಡ್ರಿಗಸ್ ಮುಕೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್ತಲೆ. ಹೊ ಜಮೊ ‘ಮೈಕಲ್ ಡಿಸೋಜಾ – ವಿಷನ್ ಕೊಂಕಣಿ’ ಪುಸ್ತಕ್ ಅನುದಾನ್ ಯೆವ್ಜಣೆಖಾಲ್ ಲೂರ್ಡ್ಸ್ ಪ್ರಕಾಶನಾನ್ ಫಾಯ್ಸ್ ಕೆಲಾ ಆಸುನ್, 190 ಪಾನಾಂಚ್ಯಾ ಬುಕಾಚೆಂ ಮೋಲ್ ರು. 300/- ಆಸಾ. ಪುಸ್ತಕಾಕ್ ಮಾಲ್ಘಡೊ ಬರಯ್ಣಾರ್ ಡೊಲ್ಫಿ ಕಾಸಿಯಾನ್ ಪಯ್ಲೆಂ ಉತರ್ ಬರಯ್ಲಾಂ.
ವಲ್ಲಿ ವಗ್ಗ ಲಿಕ್ಣೆ ನಾಂವಾನ್ 1964 ಪಾಸುನ್ ಮುಳಾನ್ ವಗ್ಗ ಫಿರ್ಗಜೆಚೆ ವಲೇರಿಯನ್ ಡಿ’ಸೋಜಾ ಕೊಂಕ್ಣೆಂತ್ ಬರಯ್ತೇ ಆಯ್ಲ್ಯಾತ್.ಆಜ್ ಮೆರೆನ್ 150 ಕಥಾ, 250 ಕವಿತಾ ತಾಣಿ ರಚ್ಲ್ಯಾತ್ ಆಸುನ್, ‘ವಿಂಚ್ಣಾರ್ ಕಾಣಿಯೊ’ ತಾಂಚೆಂ ಇಕ್ರಾವೆಂ ಪುಸ್ತಕ್ ಜಾವ್ನಾಸಾ. ಕನ್ನಡ ಭಾಶೆಂತೀ ಬರಂವ್ಚ್ಯಾ ತಾಂಚ್ಯೊ ಕಾಣಿಯೊ ಸುಧಾ, ಮಯೂರ ಆನಿ ಹೆರ್ ಕನ್ನಡ ಪತ್ರಾಂನಿ ಫಾಯ್ಸ್ ಜಾಲ್ಯಾತ್.
ಕೊಂಕಣಿ ಆನಿ ಕನ್ನಡ ಸಾಹಿತ್ಯಾಕ್ ತಾಣಿ ದಿಲ್ಲಿ ಸೆವಾ ಲೆಕಾಕ್ ಧರುನ್ 2020 ವ್ಯಾ ವರ್ಸಾ ಕರ್ನಾಟಕ ಸರ್ಕಾರಾನ್ ಪ್ರತಿಷ್ಠಿತ್ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ದೀವ್ನ್ ತಾಂಕಾ ಮಾನ್ ಕೆಲಾ. ಸಾಂಗಾತಾ ತಾಂಕಾ ಸಂದೇಶ ಸಾಹಿತ್ಯ ಪ್ರಶಸ್ತಿ ಆನಿ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ಪಾವೊ ಜಾಲಾ. ಕಯ್ಗಾರೋದ್ಯಮಿ ಜಾವ್ನಾಸ್ಲ್ಲೆ ತೆ ಪ್ರಸ್ತುತ್ ಮೈಸೂರ್ ಆಪ್ಲ್ಯಾ ಕುಟ್ಮಾ ಸಾಂಗಾತಾ ನಿವೃತ್ತ್ ಜಿವಿತ್ ಸಾರುನ್ ಆಸಾತ್.
ಉಗ್ತಾವಣೆ ಕಾರ್ಯಾವೆಳಾರ್ ಪುಸ್ತಕ್ ವಿಶೇಸ್ ರಿಯಾಯ್ತೆರ್ ವಿಕ್ರ್ಯಾಕ್ ಆಸಾ ಮ್ಹಣ್ ಲೂರ್ಡ್ ಪ್ರಕಾಶನಾನ್ ಕಳಯ್ಲಾಂ.
1 comment
Congratulations, Valley Vagga! Another milestone in your writing career! Let’s have more books from you; you have made our literature rich!