“ಹಾಂವೆ ಕೊಂಕ್ಣೆಂತ್ ಬರಂವ್ಕ್ ಧರ್ತಾನಾಂಯ್ ವಲ್ಲಿ ಬಾಬ್ ಇತ್ಲ್ಯಾಚ್ ಉರ್ಬೆನ್ ಬರಯ್ತಾಲೆ ಆನಿ ಆತಾಂಯ್ ತಿತ್ಲ್ಯಾಚ್ ಉರ್ಭೆನ್ ಬರವ್ನ್ ಆಸಾತ್. ತಾಂಚ್ಯಾ ವ್ಹಡಿಲಾಂಕ್ ವಗ್ಗಾಂತ್ ಜವ್ಳೆ ಆಂಗಡ್ ಆಸ್ಲ್ಲಿ, ಏಕ್ ಉತ್ತೀಮ್ ಶಿಂವ್ಕಾರ್ ಮ್ಹಣ್ ತಾಣಿ ಗಾಂವಾರ್ ನಾಂವ್ ವೆಲ್ಲೆಂ. ಆತಾಂ ವಲ್ಲಿಬಾಬಾಚ್ಯಾ ಪುತಾನ್ ದುಬಯ್ ಶಹರಾಂತ್ ಜವ್ಳೆ ದುಕಾನ್ ಉಘಡ್ಲಾಂ ಆನಿ ತಾಚೆಸಂಗಿ ಜಾಯ್ತೆ ಶಿಂವ್ಕಾರ್ ಕಾಮ್ ಕಾಮ್ ಕರುನ್ ಆಸಾತ್. ಹಾಂವೆ ದುಬಂಯ್ತ್ ಖುದ್ದ್ ತಾಚೆಂ ಬಿಜ್ನೆಸ್ ಪಳಯ್ಲಾಂ. ಆಜೊ ಆನಿ ನಾತ್ವಾ ಮಧೆಂ – ಪೂತ್ ವಲ್ಲಿ ಬಾಬ್ ಮಾತ್ರ್ ಇಂಜಿನಿಯರಿಂಗ್ ವೃತ್ತಿ ಆನಿ ಉದ್ಯಮಾಂತ್ ಆಸ್ಲ್ಲೊ ವ್ಹಯ್ ತರೀ, ಎಕಾ ದಾಟ್ಟುಪರಿಂ ಕೊಂಕ್ಣಿ ಲೇಖಕಾಂ ಮಧೆಂ ಶಿಂವ್ಕಾರಾಚೆಂ ಕಾಮ್ ತಾಣೆ ಕೆಲಾಂ” ಮ್ಹಣಾಲೊ ಸಾಹಿತ್ಯ ಅಕಾಡೆಮಿ, ನವೀ ಡೆಲ್ಲಿ ಕಾರ್ಯಕಾರಿ ಸಮಿತಿ ಸಾಂದೊ ತಶೆಂ ಕೊಂಕ್ಣಿ ಸಲ್ಹಾಗಾರ್ ಸಮಿತಿಚೊ ನಿಮಂತ್ರಕ್ ಕವಿ ಮೆಲ್ವಿನ್ ರೊಡ್ರಿಗಸ್.
ತೋ, ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾಚ್ಯಾ ಸಹೋದಯ ಸಭಾಸಾಲಾಂತ್ ಮಾಲ್ಘಡೊ ಕಥಾಕಾರ್ ವಲ್ಲಿ, ವಗ್ಗ ಹಾಂಚೊ ಕಥಾ ಜಮೊ ವಿಂಚ್ಣಾರ್ ಕಾಣಿಯೊ ಲೊಕಾರ್ಪಣ್ ಕರುನ್ ಉಲಯ್ತಾಲೊ.
ಎಕಾ ನಿರ್ದಿಶ್ಟ್ ಘಡಿತಾಥಾವ್ನ್ ಕಶೆಂ ಕಾಣಿ ಫುಲ್ತಾ ಮ್ಹಳ್ಳೆ ವಿಶ್ಯಾಂತ್ ಆಪ್ಲೀಚ್ ಜುಜೆಚ್ಯಾ ಪೆರಾಂಚಿಂ ಕಾಣಿ ದೃಶ್ಟಾಂತ್ ಜಾವ್ನ್ ದೀವ್ನ್ ಕವಿ ಮೆಲ್ವಿನ್ ರೊಡ್ರಿಗಸ್ ಹಾಣಿ ಮಟ್ವಿ ಕಥಾ ಕೆದಾಳಾಯ್ ಮಟ್ವಿ ಆಸುಂಕ್ ಜಾಯ್, ನಿರೂಪಣ್ ಸಂಕ್ಷಿಪ್ತ್ ಆನಿ ನಿಖರತಾ ಆಸುಂಕ್ ಜಾಯ್ ಮ್ಹಣ್ ಸಾಂಗ್ಲೆಂ.
ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಪುರಸ್ಕೃತ್ ಸಾಹಿತಿ ಎಚ್ಚೆಮ್, ಪೆರ್ನಾಲ್ ಹಾಣಿ ವಿಂಚ್ಣಾರ್ ಕಾಣಿಯೊ ಪುಸ್ತಕಾಚಿ ಒಳಕ್ ಕರುನ್ ದಿಲಿ ಆನಿ 1964 ವ್ಯಾ ವರ್ಸಾ ಪಾಸುನ್ ಕೊಂಕ್ಣೆಂತ್ ಬರಂವ್ಕ್ ಸುರ್ವಾತ್ಲೆಲ್ಯಾ ವಲ್ಲಿ ವಗ್ಗಚ್ಯಾ ಕಾಣ್ಯಾಂಚೊಂ – ಸಮಾಜೆಂತ್ ಮೆರೆರ್ ಜಿಯೆತೆಲ್ಯಾಂ ತರ್ಫೆನ್ ರಾಂವ್ಚೊ ಪ್ರಮುಕ್ ಗೂಣ್ ಜಾವ್ನ್ ಆಸಾ. ಹೊ ಗೂಣ್ 1966 ವ್ಯಾ ವರ್ಸಾ ಬರಯಿಲ್ಲ್ಯಾ ‘ರಾನ್ವಣಿ’ ಕಾಣಿಯೆಂತ್ 1996 ವ್ಯಾ ವರ್ಸಾ ಬರಯಿಲ್ಲ್ಯಾ ‘ಹಾಂವ್, ಬೈರಾ ಆನಿ ಪಮೇಲಾ’ ಕಾಣಿಯೆಂತ್ ಆನಿ 2026 ವ್ಯಾ ಬರಯಿಲ್ಲ್ಯಾ ‘ರಘುರಾಮಾಚ್ಯಾ ಬಂಗ್ಲ್ಯಾ ಮುಕ್ಲೆಂ ಸಂತುಚೆಂ ಧಾಕ್ಟೆಂ ಝೊಪ್ಡೆಂ’ ಕಾಣಿಯೆಂತ್ – ತಾಣಿ ರಾಕುನ್ ಹಾಡ್ಲಾ ಮಾತ್ ನಯ್, ಕಾಳಾ ಸಾಂಗಾತಾ ತೆ ಬದ್ಲುನ್ ಆಯ್ಲ್ಯಾತ್ ಮ್ಹಳೆಂ.
ಲಿಬೇರಾ ಡಿ ಸೊಜಾ ಹಿಣೆ ಯೆವ್ಕಾರ್ ಮಾಗ್ಲೊ. ಲೊಯ್ ಡಿ ಸೊಜಾ ಹಾಣಿ ಸಯ್ರ್ಯಾಂಕ್ ಫುಲಾಂ ತುರೆ ದೀವ್ನ್ ಮಾನ್ ಕೆಲೊ.
ಕವಿ ಟೈಟಸ್ ನೊರೊನ್ಹಾ ತಾಕೊಡೆ ಹಾಣಿ ಕಾರ್ಯೆಂ ಚಲವ್ನ್ ವೆಲೆಂ.
