ಎಸ್.ಎಮ್.ಎಮ್.ಸಿ. ದುಬಯ್ ಹ್ಯಾ ನಾಂವಾನ್ ದೇಶಾಂತ್ ತಶೆಂ ವಿದೇಶಾಂತ್, ದುಬಯ್ಚ್ಯಾ ಸಾಂ. ಮೇರಿ ಕಥೊಲಿಕ್ ಇಗರ್ಜೆಚ್ಯಾ ಮಾಂತಾಖಾಲ್, ಸೆವಾ ಆನಿ ಮುಕೆಲ್ಪಣಾಕ್ ನಾಂವಾಡ್ಲೆಲ್ಯಾ ಸೇಂಯ್ಟ್ ಮೇರಿಸ್ ಮೆಂಗ್ಲೂರಿಯನ್ ಕಮ್ಯೂನಿಟಿ (SMMC) ಸಂಘಟನಾಚೊ ಸಂಯೋಜಕ್ ಜಾವ್ನ್, 2026 – 2028 ಹ್ಯಾ ಅವ್ಧೆಕ್, ಅಗ್ರಾರ್ಚೊ ಬೊನಿಫಾಸ್ ಕಾರ್ಲೊ ವಿಂಚುನ್ ಆಯ್ಲಾ. ಅಲ್ಲಿಪಾದೆಚೊ ಕೆವಿನ್ ಮಿಲನ್ ಸಿಕ್ವೇರಾ ಸಹ – ಸಂಯೋಜಕ್, ಉದ್ಯಾವರ್ಚಿ ವೀಣಾ ಜೆ. ಡಿ ಸಿಲ್ವ ಕಾರ್ಯದರ್ಶಿ ಆನಿ ಸಿದ್ದಕಟ್ಟೆಚೊ ಪ್ರವೀಣ್ ಸಿಕ್ವೇರಾ ಖಜಾನ್ದಾರ್ ಜಾವ್ನ್ ತಾಕಾ ಸಾಂಗಾತ್ ದಿತಲೆ.
ಸಾಂಗಾತಾ ಲಿತುರ್ಜಿಂತ್ ಅನೂಷ್ ಡಿ ಸಿಲ್ವ, ಬಜಾಲ್ ಆನಿ ಸಂದೀಪ್ ಮಥಾಯಸ್, ಉಡುಪಿ, ಎವ್ಕರಿಸ್ತ್ ವಾಂಟುಂಕ್ ಬೊಳಿಯೆಚಿ ಪ್ರೀಮಾ ಮಾರ್ಟಿಸ್, ಸ್ವಯಂ ಸೇವಕ್ ಸಂಘಟನಾಕ್ ನ್ಯೂಟನ್ ಬ್ರಿಟ್ಟೊ, ಹೊನ್ನಾವರ್ ಆನಿ ಅಶ್ವಿನಿ ಡಿ’ ಸೊಜಾ, ಕಾರ್ಕೊಳ್, ಮಾಧ್ಯಮ್ ಸಂಯೋಜಕ್ ಜಾವ್ನ್ ಜೇಸನ್ ಮಿರಾಂದಾ, ಸಂಸಿ, ಖೆಳ್ ಆನಿ ಸಾಂಸ್ಕೃತಿಕ್ ಕಾರ್ಯಾವಳಿಂನಿ ನಿಲೇಶ್ ಜೊಯ್ ಡಾಯಸ್, ಪುತ್ತೂರ್ ಆನಿ ಡೆನ್ಜಿಲ್ ರಾಲ್ಫ್ ಮೊರಾಸ್, ಕೊಂಕಣ್ ಯುವ ಸಂಘಟನಾಂತ್ ಅಶ್ವಿನಿ ಪಿಂಟೊ, ಮೊಗಾರ್ನಾಡ್ ಆನಿ ಜೆ.ಎಮ್.ಜೆ ಮಾಗ್ಣ್ಯಾ ಪಂಗಡ್ ಮಾಗ್ಣ್ಯಾಂತ್ ಸಹಯೋಗ್ ದಿತಲೆ. ಹಫ್ತ್ಯಾಚ್ಯಾ ಕೊಂಕ್ಣಿ ಮಿಸಾವೆಳಾರ್ ಫಿರ್ಗಜ್ ವಿಗಾರ್ ಮಾ| ಬಾ| ವಿಕ್ಟರ್ ಫೆರ್ನಾಂಡಿಸ್ ಕಾಪುಚಿನ್ ಹಾಣಿ ಅಧಿಕೃತ್ ಘೋಷಣಾ ಕೆಲಿ ಆನಿ ಹುದ್ದೆದಾರಾಂನಿ ಪ್ರತಿಜ್ಞಾ ಘೆತ್ಲಿ.
2013 ವ್ಯಾ ವರ್ಸಾ ಸ್ಥಾಪನ್ ಜಾಲ್ಲೊ ಸಾಂ. ಮೇರಿ ಮಂಗ್ಳುರಿ ಸಮುದಾಯ್ ಮಂಗ್ಳುರ್ ಆನಿ ಉಡುಪಿ ದಿಯೆಸೆಜಿಚ್ಯಾ ಕೊಂಕ್ಣಿ ಲೊಕಾಕ್ ದುಬಂಯ್ತ್ ಸಾಂಗಾತಾ ಹಾಡುಂಕ್ ಎಕೀನ್ಪಣಿ ವಾವುರ್ತಾ. ಲಿತುರ್ಜಿ, ಕೊಂಕ್ಣಿ ಸಾಂಸ್ಕೃತಿಕ್ ಕಾರ್ಯಿಂ, ಕುಟ್ಮಾಂ – ಸಹಮಿಲನಾಂ, ಯುವಜಣಾಂಕ್ ಪ್ರೋತ್ಸಾವ್ ಮಾತ್ ನಯ್ ಸಮುದಾಯ್ ಸೆವಾ ಆನಿ ಆರ್ಥಿಕ್ ಕುಮಕ್ ಹ್ಯಾ ವಠಾರಾಂನಿ ಸಮುದಾಯ್ ಕಾರ್ಯಾಳ್ಪಣಿ ಮೆತೆರ್ ಆಸಾ. ಸಮುದಾಯಾನ್ ಮಾಂಡುನ್ ಹಾಡ್ಚ್ಯಾ ಆಧ್ಯಾತ್ಮಿಕ್, ಸಮಾಜಿಕ್, ಸಾಂಸ್ಕೃತಿಕ್ ಕಾರ್ಯಾವಳಿ ನಿಮ್ತಿಂ ಎಮಿರೆತಾಂತ್ಲ್ಯಾ ಕೊಂಕ್ಣಿ ಲೊಕಾಮಧೆಂ ಬಾವ್ ಬಾಂದವ್ಪಣಾಚೊ ಬಾಂದ್ ಮಾತ್ ನಯ್ ಭಾವಾಡ್ತ್ ಆನಿ ಭಾಸ್ – ಸಂಸ್ಕೃತೆಚೊ ಮೋಗ್ ಘಟ್ ಜಾಲಾ.
ಪ್ರತಿಜ್ಞಾ ವಿಧಿ ಜಾತಕೂಚ್ ಉಲಯಿಲ್ಲ್ಯಾ ವಿಗಾರ್ ಮಾ| ಬಾ| ವಿಕ್ಟರ್ ಫೆರ್ನಾಂದ್, ಕಾಪುಚಿನ್ ಹಾಣಿ ಆದ್ಲ್ಯಾ ಸಮಿತಿಚೊ ಉಪ್ಕಾರ್ ಭಾವುಡ್ಲೊ ಆನಿ ಸೆವೆಚ್ಯಾ ಸ್ಪಿರಿತಾನ್ ಆನಿ ಎಕೀನ್ಪಣಾಚೊ ಸಮುದಾಯಾಚೊ ವಾವ್ರ್ ಮುಕಾರುನ್ ವರುಂಕ್ ನವ್ಯಾ ಸಮಿಕ್ ಉಲೊ ದೀವ್ನ್, ಬರೆಂ ಮಾಗ್ಲೆಂ.
ನವೊ ಅಧ್ಯಕ್ಷ್ ಬೊನಿಫಾಸ್ ಕಾರ್ಲೊನ್ ಸರ್ವಾಂಚೊಂ ಉರ್ಕಾರ್ ಭಾವುಡ್ಲೊ ಆನಿ ಸಮುದಾಯಾಚೊ ವಾವ್ರ್ ಮುಕಾರುನ್ ವರುಂಕ್ ಸಾಂದ್ಯಾಂಚೊಂ ಸಹಕಾರ್ ಮಾಗ್ಲೊ.
