ಜೀವಂತ್ ಜೆಜು ಸರ್ಗಿಂ ಚಡೊನ್ ವೆತಾನಾ ತಾಚಿಂ ರುಪಾಂ ಸಂಸಾರಿಂ ಸೊಡುನ್ ಗೆಲೊ. ತಸಲ್ಯಾ ಜಾಯ್ತ್ಯಾ ರುಪಾಂ ಪಯ್ಕಿ ಮೈಕಲ್ ಡಿ ಸೊಜಾ ಕುಟಮ್ ಏಕ್… ಮ್ಹಣಾಲೆ ಮಂಗ್ಳುರ್ ದಿಯೆಸೆಜಿಚೊ ವಿಶ್ರಾಂತ್ ಧರ್ಮಾಧ್ಯಕ್ಷ್ ಅ| ಮಾ| ದೊ| ಲುವಿಸ್ ಪಾವ್ಲ್ ಸೊಜ್. ತೆ ಜೆಪ್ಪು ಸಾಂ. ಜುಜೆ ಸೆಮಿನರಿಂತ್ ಸೆಮಿನರಿಸ್ತಾಂ ಖಾತೀರ್ ಮಾಂಡುನ್ ಹಾಡ್ಲೆಲ್ಯಾ ವಿಶೇಸ್ ಉಪನ್ಯಾಸ್ ಕಾರ್ಯಾವಳಿಚೊ ಸಮಾರೊಪ್ ಕರುನ್ ಉಲಯ್ತಾಲೆ.
ಮುಂದರುನ್ ತಾಣಿ ಮ್ಹಳೆಂ “ದೆವಾಚಿಂ ಕಾಮಾಂ ಆರ್ಥಿಕ್ ಅಡ್ಚಣಿಂ ಪಾಸುನ್ ಕೆನ್ನಾಂಚ್ ಥಾಂಬ್ಲ್ಲಿಂ ನಾಂತ್. ಮೈಕಲ್ ಡಿ ಸೊಜಾ ಕುಟ್ಮಾಮುಕಾಂತ್ರ್ ದೇವ್ಚ್ ಆಮ್ಚ್ಯಾ ಸೆಮಿನರಿಚ್ಯಾ ಆದಾರಾಕ್ ಆಯ್ಲಾ. ತಾಚೆರ್ ಆನಿ ತಾಚ್ಯಾ ಕುಟ್ಮಾಚೆರ್ ದೆವಾಚಿಂ ವಿಂಚ್ಣಾರ್ ಆಶಿರ್ವಾದಾಂ ಮಾಗ್ತಾಂವ್. ಆನಿ ತೀನ್ ವರ್ಸಾಂನಿ 150 ವರ್ಸಾಂಚೊಂ ಜುಬ್ಲೆವ್ ಸಂಭ್ರಮುಂಕ್ ವೆಚ್ಯಾ ಜೆಪ್ಪು ಸಾಂ. ಜುಜೆ ಸೆಮಿನರಿ ಥಾವ್ನ್ ಆಜ್ ಮೆರೆನ್ ಹಜಾರೊಂ ಯಾಜಕ್ ತಯಾರ್ ಜಾಲ್ಯಾತ್, ಫಕತ್ ಮಂಗ್ಳುರ್, ಉಡುಪಿ ಮಾತ್ ನಯ್, ಅಖ್ಖ್ಯಾ ಸಂಸಾರಾರ್ ತೆ ಸೊಮ್ಯಾಚೆಂ ಮಿಸಾಂವ್ ಮುಕಾರುನ್ ಆಸಾತ್. ಸೊಮ್ಯಾಚೆಂ ಮಿಸಾಂವ್ ಮ್ಹಳ್ಯಾರ್ ಪಾಪಾ ಫ್ರಾನ್ಸಿಸಾನ್ ಮ್ಹಳ್ಳೆಪರಿಂ ಸಮಾಜೆಂತ್ಲ್ಯಾ ನಿಮಾಣ್ಯಾ ಗರ್ಜೆವೊಂತಾ ಪರ್ಯಾಂತ್ ಪಾಂವ್ಚೆಂ. ಆಜ್ ಹಾಂಗಾಸರ್ ಮೈಕಲ್ ಡಿ ಸೊಜಾನ್ ದಿಲ್ಲೆಂ ಉಲವ್ಪ್ ಹ್ಯಾ ದಿಶೆನ್ ಆಮ್ಚ್ಯಾ ಸೆಮಿನರಿಸ್ತಾಂಕ್ ಮಾತ್ ನಯ್, ತಾಂಕಾ ಸೊಮ್ಯಾಚಾ ಶೆತಾಂತ್ ವಾವ್ರುಂಕ್ ತಯಾರ್ ಕರ್ಚ್ಯಾ ಮೆಸ್ತ್ರಿಂಕ್ ಸಯ್ತ್ ವ್ಹಡ್ ಉಪ್ಕಾರಾಕ್ ಪಡ್ತಲೆಂ” ಮ್ಹಣ್ ತಾಣಿ ಆಪ್ಲಿ ಅಭಿಪ್ರಾಯ್ ವೆಕ್ತ್ ಕೆಲಿ.
ಹ್ಯಾ ಸುವಾಳ್ಯಾರ್ ಸೆಮಿನರಿಚೊ ಆದ್ಲೊ ರೆಕ್ಟರ್, ಪ್ರಸ್ತುತ್ ನಿತ್ಯಾದರ್ ನಗರ್ ಫಿರ್ಗಜೆಚೊ ವಿಗಾರ್ ಮಾ| ದೊ| ರೊನಾಲ್ಡ್ ಸೆರಾವೊ ಹಾಣಿ ಬರಯಿಲ್ಲ್ಯಾ ತೀನ್ ಧಾರ್ಮಿಕ್ ನಾಟಕಾಂಚೆಂ ಪುಸ್ತಕ್ ‘ಭಾವಾಡ್ತಾಚೆಂ ಪಯ್ಣ್’ ಅ| ಮಾ| ದೊ| ಲುವಿಸ್ ಪಾವ್ಲು ಸೊಜ್ ಬಾಪಾಂನಿ, ಮೈಕಲ್ ಡಿ ಸೊಜಾ ಹಾಂಚೆ ಬರಾಬರ್ ಮೊಕ್ಳಿಕ್ ಕೆಲೆಂ.
ಮೈಕಲ್ ಡಿ ಸೊಜಾ ವಿಶನ್ ಕೊಂಕಣಿ ಪುಸ್ತಕ್ ಅನುದಾನಾ ಖಾಲ್ ಉಜ್ವಾಡಾಕ್ ಆಯಿಲ್ಲ್ಯಾ ಹ್ಯಾ ಪುಸ್ತಕಾಂತ್ – ಸೊಮ್ಯಾ ತುಂ ಖಂಯ್ ವೆತಾಯ್ ? – ಧರ್ಮ್ದೂತ್ ಪೆದ್ರುಚೆಂ ರೊಮಿ ಮಿಸಾಂವ್, ಹಾಂವ್ ಸತ್ ಸಾಂಗ್ತಾಂ – ಜೆಜುಚ್ಯಾ ಪುನರ್ಜಿವಂತ್ಪಣಾಚಿ ತನ್ಖಿ ಆನಿ ಕೊರ್ಡೆಲ್ಚೊ ಫ್ರಾದ್ ಸಾಯ್ಭ್ – ಫಾ| ಅಲೆಕ್ಸಾಂಡರ್ ದುಬ್ವಾ – ಅಶೆಂ ತೀನ್ ನಾಟಕ್ ಆಸೊನ್, 162 ಪಾನಾಂಚ್ಯಾ ಬುಕಾಚೆಂಮೋಲ್ ಫಕತ್ ರುಪಯ್ 150/- ಜಾವ್ನಾಸಾ. ಆಪ್ಲ್ಯಾ ಫಿರ್ಗಜಾಂನಿ ಫಿರ್ಗಜ್ ದೀಸ್, ಜುಬ್ಲೆವ್, ವಾಡ್ಯಾಚೊ ದೀಸ್ ವಾ ಹೆರ್ ವಿಶೇಸ್ ಸಂದರ್ಭಾಂನಿ ಪ್ರದರ್ಶನ್ ಕರುಂಕ್ ಹೆ ನಾಟಕ್ ಬೋವ್ ಜೊಕ್ತೆ ಜಾವ್ನಾಸೊನ್, ಹ್ಯಾ ಪುಸ್ತಕಾಚ್ಯಾ ಪ್ರತಿಯಾಂ ಖಾತೀರ್ ಮಾ| ದೊ| ರೊನಾಲ್ಡ್ ಸೆರಾವೊ ಹಾಂಕಾ, ವಾ ಪರ್ಗಟ್ಣಾರ್ ಸಾಂ. ಜುಜೆ ವಾಜ್ ಕೊಂಕ್ಣಿ ಅಕಾಡೆಮಿ, ಜೆಪ್ಪು ಸೆಮಿನರಿ ಹಾಂಗಾಸರ್ ಸಂಪರ್ಕ್ ಕರುಂಯೆತಾ.
ಹ್ಯಾ ಸುವಾಳ್ಯಾರ್ ಲೇಖಕ್ ತಶೆಂ ಸೆಮಿನರಿಚೊ ಅದ್ಲೊ ರೆಕ್ಟರ್ ಮಾ| ದೊ| ರೊನಾಲ್ಡ್ ಸೆರಾವೊ ಹಾಂಚೊ ಸೆಮಿನರಿಸ್ತಾಂನಿ ಉಪ್ಕಾರಿ ಮನಾನ್ ಸತ್ಕಾರ್ ಕೆಲೊ. ಸತ್ಕಾರ್ ಸ್ವೀಕಾರ್ ಕರುನ್ ದಿನ್ವಾಶಿ ಮನಾನ್ ಉಲಯಿಲ್ಲ್ಯಾ ಮಾ| ದೊ| ರೊನಾಲ್ಡ್ ಸೆರಾವೊ ಹಾಣಿ “ಆಪ್ಣಾಕ್ ವಿಗಾರ್ ಜಾಂವ್ಕ್ 39 ವರ್ಸಾಂ ಲಾಗ್ಲಿಂ. ಹೊ ಏಕ್ ಗಿನ್ನೆಸ್ ದಾಕ್ಲೊ ಮ್ಹಣ್ಯೆತ್. ಪೂಣ್ ತಿಂ 39 ವರ್ಸಾಂ ಹ್ಯಾ ಸೆಮಿನರಿಂತ್ ಹಾಂವೆ ಖರ್ಚಿಲಿಂ ಮ್ಹಳ್ಳ್ಯಾ ಆತ್ಮ್ಯಾತೃಪ್ತೆ ವರ್ತೆಂ ಭೊಗಾಪ್ ದುಸ್ರೆಂ ಮ್ಹಾಕಾ ನಾ. ಆಜೂನ್ ಹಾಂವ್ ಹ್ಯಾ ಸೆಮಿನರಿಚೊ ವಾಂಟೊ ಜಾವ್ನಾಸಾಂ” ಮ್ಹಳೆಂ. ತಾಳಿಯಾಂಚ್ಯಾ ಶಿಂವೊರಾನ್ ಸಭಾಗೃಹಾಂತ್ ಹಾಜರ್ ಆಸ್ಲೆಲ್ಯಾ ತಾಂಚ್ಯಾ ವಿದ್ಯಾರ್ಥಿಂನಿ ತಾಂಚ್ಯಾ ಉತ್ರಾಂಕ್ ವ್ಹಡ್ ಪ್ರತಿಸಾದ್ ದಿಲೊ.
ದೇವ್ ಆನಿ ಲೊಕಾಮಧೆಂ ಸಾಂಕೊವ್ ತುಮಿ ಜಾಯಾತ್ …. ಮ್ಹಳ್ಯಾ ಮುಕೆಲ್ ವಿಶಯಾಚೆರ್ ಆಪ್ಲೆಂ ಉಲವ್ಪ್ ಕೇಂದ್ರಿಕೃತ್ ಕರುನ್ ಮಹಾದಾನಿ ಮೈಕಲ್ ಡಿ ಸೊಜಾ ಹಾಣಿ ‘ಬದ್ಲಾವಣ್ ಆನಿ ಪಂಥಾಹ್ವನಾಂ ಮಧೆಂ ಪವಿತ್ ಸಭೆಂತ್ ಫುಡಾರಾಚೆ ಯಾಜಕ್’ ಹ್ಯಾ ವಿಶಯಾಚೆರ್ ಆಪ್ಲೆ ಅಧ್ಯಯನಾತ್ಮಕ್ ವಿಚಾರ್, ಪರಿಣಾಮ್ಕಾರಿ ರಿತಿನ್ ಮಾಂಡ್ಲೆ.
ಆಪ್ಲ್ಯಾ ಉಪನ್ಯಾಸಾಂತ್ ತಾಣಿ ಪಾಂಚ್ ಮುಕೆಲ್ ವಿಶಯಾಂಚೇರ್ ಭೊರ್ ದಿಲೊ. ದೆವಾಥಂಯ್ ಗೂಂಡಾಯೆಚೊ ಆನಿ ಭದ್ರ್ ಸಂಬಂದ್, ಲೊಕಾಕ್ ಸಮ್ಜೊಂಚಿಂ ತಾಂಕ್, ಜಾಣ್ವಾಯೆಂತ್ ಪರಿಪಿಕಾಯ್, ನಯ್ತಿಕ್ ತೊರಾಯ್ ಆನಿ ಸಾಂಸ್ಥಿಕ್ ಮುಕೆಲ್ಪಣ್ – ಹ್ಯಾ ಪಾಂಚ್ ವಿಶಯಾಂಚೇರ್ ಫುಡಾರಾಂಚ್ಯಾ ಯಾಜಕಾಂನಿ ನಿಪುಣತಾ ಜೊಡುಂಕ್ ಜಾಯ್ ಮ್ಹಣ್ ತಾಣಿ ಉಲೊ ದಿಲೊ.
ಹ್ಯಾ ಸುವಾಳ್ಯಾರ್ ಮೈಕಲ್ ಆನಿ ಫ್ಲಾವಿಯಾ ಡಿ ಸೊಜಾ ಹಾಂಚ್ಯಾ ಉದಾರ್ ಮನಾಕ್ ಸೆಮಿನರಿ ತರ್ಫೆನ್ ಅ|ಮಾ|ದೊ| ಲುವಿಸ್ ಪಾವ್ಲ್ ಸೊಜ್ ಹಾಣಿ ಮಾನ್ ಕೆಲೊ. ಸೆಮಿನರಿಚೊ ಆಡಳ್ತೆದಾರ್ ಮಾ| ಬಾ| ವಿನ್ಸೆಂಟ್ ಹಾಣಿ ಸತ್ಕಾರಾಕ್ ಸಾಂಗಾತ್ ದಿಲೊ.
ಹ್ಯಾ ಸುವಾಳ್ಯಾರ್ ಮೈಕಲ್ ಡಿ ಸೊಜಾ ಹಾಂಚಿ ಪತಿಣ್ ಶ್ರೀಮತಿ ಫ್ಲಾವಿಯಾ, ಚ್ಯಾರಿಟಿ ಸಲಹಾದಾರ್ ಮಾ| ಬಾ| ವಲೇರಿಯನ್ ಸೊಜ್, ಶ್ರೀ ಸ್ಟೀಫನ್ ಪಿಂಟೊ, ಶ್ರೀ ಓಸ್ವಲ್ಡ್ ರೊಡ್ರಿಗಸ್, ಪ್ರೊ| ಸಿ.ಎ.| ಲೈನಲ್ ಅರಾನ್ಹಾ ಆನಿ ಮೈಕಲ್ ಡಿ ಸೊಜಾ ವಿಶನ್ ಕೊಂಕಣಿ ಸಂಪಾದಕೀ ಮಂಡಳೆಚೆ ಸಾಂದೆ ಕವಿ ಮೆಲ್ವಿನ್ ರೊಡ್ರಿಗಸ್ ಆನಿ ಎಚ್ಚೆಮ್, ಪೆರ್ನಾಲ್ ಹಾಜರ್ ಆಸ್ಲೆ.
ಸೆಮಿನರಿಚೊ ರೆಕ್ಟರ್ ಮಾ| ದೊ| ರಾಜೇಶ್ ರೊಜಾರಿಯೊ ಹಾಣಿ ಪ್ರಾಸ್ತಾವಿಕ್ ಉಲವ್ಪ್ ದಿಲೆಂ. ಮಾ| ದೊ| ಐವನ್ ಮಿಯಾರ್ ಹಾಣಿ ಯೆವ್ಕಾರ್ ಮಾಗ್ಲೊ. ಭಾವ್ ಪ್ರಿನ್ಸ್ಟನ್ ಡಿ ಸೊಜಾ ಹಾಣಿ ಉಪ್ಕಾರ್ ಆಟವ್ನ್, ಕಾರ್ಯೆಂ ಚಲವ್ನ್ ವೆಲೆಂ.
