“ಕೃತಿಕಾರಾಕ್ ಕೃತಿಯೆಚ್ಯಾ ಅರ್ಥಾಚೇರ್ ಅಧಿಕಾರ್ ನಾ, ಕೃತಿಯೆಕ್ ಅರ್ಥ್ ದಿಂವ್ಚೊಚ್ ವಾಚ್ಪ್ಯಾನ್. ಆನಿ ಹೊ ಅರ್ಥ್ ಸದಾಂಚ್ ವೆಗ್ಳೊ ಆಸ್ತಾ. ಆನಿ ಹೊ ವೆಗ್ಳೊ ಅರ್ಥ್ ಕಾಂಯ್ ಕಾಳಾ ಉಪ್ರಾಂತ್ ಪರತ್ ಬದಲ್ತಾ” ಮ್ಹಣಾಲೊ ಫಾ| ಪ್ರಶಾಂತ್ ಮಾಡ್ತಾ, ಜೆ.ಸ. ತೋ ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾಚ್ಯಾ ಬೊಲ್ಕಾಂವ್ ಕಾರ್ಯಾವಳಿಂತ್ ಅರ್ಥ್ ವಿಶಯಾಚೇರ್ ಉಲಯ್ತಾಲೊ.
“ಎಕಾ ಕವೀಕ್ ಕವಿತಾ ರಚುನ್ ಫಾಯ್ಸ್ ಕೆಲ್ಯಾ ಉಪ್ರಾಂತ್, ಮ್ಹಜ್ಯಾ ಕವಿತೆಚೊ ಅರ್ಥ್ ಅಸೊ, ತೋ ಅಸೋಚ್ ಅರ್ಥ್ ಕರುನ್ ಘೆಜಾಯ್ ಮ್ಹಣ್ಚೊ ಅಧಿಕಾರ್ ನಾ. ಕವನಾಕ್ ಅರ್ಥ್ ದಿಂವ್ಚೊಚ್ ವಾಚ್ಪ್ಯಾನ್. ಕನ್ನಡಾಚೊ ಕವಿ ಪಂಪ ಥಾವ್ನ್ ಧರುನ್, ಕೊಂಕ್ಣೆಚ್ಯಾ ವಿಲ್ಪಿ ರೆಬಿಂಬಸ್ ಪರ್ಯಾಂತ್ ಚಡಾವತ್ ಕೃತಿಕಾರಾಂನಿ ಆಪ್ಲ್ಯಾ ಸಾಹಿತ್ಯಾಂತ್ ಸ್ತ್ರೀಯಾಂಚಿ ಚಾಲ್ ಠರಾಯಿಲ್ಲಿ ದಿಸುನ್ ಯೆತಾ. ತ್ಯಾ ಕಾಳಾಚ್ಯಾ ಪುರುಶ್ ಪ್ರಧಾನ್ ಸಮಾಜೆನ್ ಠರಾಯಿಲ್ಲ್ಯಾ ಹ್ಯಾ ಚಾಲಿಂತ್ ಸ್ತ್ರೀಯೆನ್ ಅಶೆಂಚ್ ನೆಸಜೆ, ಅಶೆಂಚ್ ಜಿಯೆಜೆ ಮ್ಹಣ್ಚಿಂ ಶರ್ತಾಂ ಆಸಾತ್. ಹಿ ಶರ್ತಾಂ ಪುರುಶ್ ಪ್ರಧಾನ್ ವೆವಸ್ತೆನ್ ಠಾರಾಯಿಲ್ಲಿಂ ಆನಿ ಥಾಪ್ಲ್ಲಿಂ ಜಾಲ್ಲ್ಯಾನ್ – ಹಾಚೊ ‘ಅರ್ಥ್’ ಸ್ತ್ರೀಯಾಂಚೇರ್ ಚಲ್ಚಿ ಹಿಂಸಾ ಆನಿ ಜುಲುಮ್” ಮ್ಹಣ್ ತಾಣಿ ಅ.ನ.ಕೃ, ಕೆ.ಎಸ್. ನರಸಿಂಹಸ್ವಾಮಿ ತಸಲ್ಯಾ ಕನ್ನಡ ಕವಿಂ ಥಾವ್ನ್ ವಿಲ್ಪಿ ರೆಬಿಂಬಸ್, ಮೆಲ್ವಿನ್ ರೊಡ್ರಿಗಸ್ ತಸಲ್ಯಾ ಕೊಂಕ್ಣಿ ಕವಿಂಚ್ಯಾ ಸಾಹಿತ್ಯಾಂತ್ಲೆ ದೆಕಿ ದೀವ್ನ್ ಆಪ್ಲೆ ವಿಚಾರ್ ಮಾಂಡ್ಲೆ.
“ಎಕಾ ಸಬ್ದಾಕ್ ಅರ್ಥ್ ಮೆಳಜೆ ಜಾಲ್ಯಾರ್ ತಾಕಾ ವಿರುದ್ ಅರ್ಥ್ ಆಸುಂಕ್ಚ್ ಜಾಯ್. ಹೆಂ ರಾಜಾಂವ್ ಸಾಹಿತ್ಯ್ ಕೃತಿಯೆಕೀ ಲಾಗು ಜಾತಾ” ಮ್ಹಣ್ ತಾಣಿ ಅಭಿಪ್ರಾಯ್ ಉಚಾರ್ಲಿ.
ಬೊಲ್ಕಾಂವ್ ಕಾರ್ಯಾವಳಿಚೊ ಸಂಚಾಲಕ್ ಎಚ್ಚೆಮ್, ಪೆರ್ನಾಲ್ ಹಾಣೆ ಪ್ರಸ್ತಾವನಾ ದಿತಚ್, ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯ್ ಕೊಂಕ್ಣಿ ವಿಭಾಗಾಚಿ ಮುಕೆಲಿ ಫ್ಲೋರಾ ಕಾಸ್ತೆಲಿನೊ ಹಿಣೆ ಬೊಲ್ಕಾಂವ್ ಡಾಯ್ರಿ ದೀವ್ನ್ ಫಾ| ಮಾಡ್ತಾ ಹಾಂಕಾ ಯೆವ್ಕಾರ್ ದಿಲೊ.
ಹ್ಯಾ ಸುವಾಳ್ಯಾರ್ ಕೊಂಕ್ಣಿ ಸಂಸ್ಥ್ಯಾಚೊ ನಿರ್ದೇಶಕ್ ಜಾವ್ನ್ ನೇಮಕ್ ಜಾಲ್ಲ್ಯಾ ಫಾ| ಪ್ರಶಾಂತ್ ಮಾಡ್ತಾ ಹಾಂಕಾ ಬೊಲ್ಕಾಂವ್ ಸಾಂಗಾತ್ಯಾಂನಿ ಶುಭಾಶಯ್ ಪಾಟಯ್ಲೆ.
ಕೊಂಕ್ಣಿ ಸಂಸ್ಥ್ಯಾಚೊ ಕಾರ್ಯಕ್ರಮ್ ಸಂಚಾಲಕ್ ಪಿಂಟೊ, ವಾಮಂಜೂರ್ ಆನಿ ಸಹಾಯಕಿ ವನಿತಾ ಹಾಣಿ ಕಾರ್ಯಾವಳ್ ಚಲವ್ನ್ ವರುಂಕ್ ಕುಮಕ್ ಕೆಲಿ.
