ಅಜಾಂಪಾಂಚೊ ಸಾಂತ್ ಅಂತೊನಿಚ್ಯಾ ವಾರ್ಶಿಕ್ ಪರ್ಬೆಚಿ ತಯಾರಾಯ್ ಜಾವ್ನ್ ತೀನ್ ದಿಸಾಂಚೆಂ ನೊವೆನ್ ಬುದ್ವಾರಾ, ಜೂನ್ 10 ವೆರ್ ಜೆಪ್ಪು ಸಾಂತ್ ಅಂತೊನ್ ಆಸ್ರ್ಯಾಂತ್ ಆನಿ ಮಿಲಾರ್ ದೇವ್ಮಂದಿರಾಂತ್ ಭಕ್ತಿಪಣಾನ್ ಸುರು ಜಾಲೆಂ. ಸನ್ವಾರಾ ಜೂನ್ 13 ವೆರ್ ವಾರ್ಶಿಕ್ ಪರ್ಬೆ ಸಾಂಗಾತಾ ಸಮಾರೋಪ್ ಸಂಭ್ರಮ್ ಚಲ್ತಲೊ.
ತ್ರಿದುಮ್ ನೊವೆನಾಕ್ ಸಾಂತ್ ಅಂತೊನ್ ಆಸ್ರ್ಯಾಚೊ ದಿರೆಕ್ತೊರ್ ಮಾ| ಬಾ| ಜೆ. ಬಿ. ಕ್ರಾಸ್ತಾ ಹಾಣಿ ಸಕಾಳಿಂ 6.00 ವರಾರ್ ಸಾಂ. ಅಂತೊನ್ ಆಸ್ರ್ಯಾಚ್ಯಾ ಚಾಪೆಲಾಂತ್ ಸಂಭ್ರಮಿಕ್ ಮಿಸಾಚ್ಯಾ ಬಲಿದಾನಾ ಸಾಂಗಾತಾ ಚಾಲನ್ ದಿಲೆಂ. ಮಂಗ್ಳುರ್ ದಿಯೆಸೆಜಿಚ್ಯಾ ಕಾರಿಜ್ಮಾತಿಕ್ ಸಂಚಾಲನಾನ್ ಸಕಾಳಿಂ 9.00 ಥಾವ್ನ್ ದೊನ್ಪಾರಾಂ 1.00 ಪರ್ಯಾಂತ್ ಮಾ| ಬಾ| ಕ್ಲಿಫರ್ಡ್ ಫೆರ್ನಾಂಡಿಸ್ ಹಾಂಚ್ಯಾ ಮುಕೆಲ್ಪಣಾರ್ ವಿಶೇಸ್ ಪ್ರಾರ್ಥನ್ ಚಲವ್ನ್ ವೆಲೆಂ. ಬ್ರ| ರೊನಿ ಆನಿ ಬ್ರ| ಡೊಲ್ಪಿ ಹಾಣಿ ಆರಾದನ್ ಆನಿ ಸ್ತುತಿಗಾಯನಾಂತ್ ಮಾಗ್ಣ್ಯಾಕ್ ಸಾಂಗಾತ್ ದಿಲೊ. ಮಂಗ್ಳುರ್ ದಿಯೆಸೆಜಿಚ್ಯಾ ಬೈಬಲ್ ಆಯೋಗಾಚೊ ನಿರ್ದೇಶಕ್ ಮಾ| ಬಾ| ವಿನ್ಸೆಂಟ್ ಸಿಕ್ವೇರಾ ಹಾಣಿ ‘ಬೈಬಲಾಂತ್ಲಿಂ ಕುಟ್ಮಾಂ’ ಹ್ಯಾ ವಿಶಯಾಚೆರ್ ಆಧ್ಯಾತ್ಮಿಕ್ ಪ್ರವಚನ್ ದಿಲೆಂ ಆನಿ ಪರ್ಬೆಚೊ ಉದ್ದೇಶ್ ಸಾಂಗ್ಲೊಂ.
ಮಾ| ಬಾ| ಕ್ಲಿಫರ್ಡ್ ಫೆರ್ನಾಂಡಿಸ್ ಹಾಣಿ ತ್ರಿದುಮಾಚೆಂ ಪಯ್ಲೆಂ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ಮಿಸಾ ಉಪ್ರಾಂತ್ ತೋಕೂರ್ ಫಿರ್ಗಜೆಚೊ ವಿಗಾರ್ ಮಾ| ಬಾ| ಅನಿಲ್ ಜೋಯಲ್ ಡಿಸೋಜ ಹಾಂಚ್ಯಾ ಮುಕೆಲ್ಪಣಾರ್ ಪವಿತ್ರ್ ಸಾಕ್ರಾಮೆಂತಾಚೆಂ ಆರಾದಾನ್ ಚಲ್ಲೆಂ. ಸಾಂಜೆಚ್ಯಾ 6:00 ವರಾರ್ ಮಿಲಾರ್ ದೇವ್ತೆಂಪ್ಲಾಂತ್ ಮಾ| ಬಾ| ಬೊನಿಫಾಸ್ ಪಿಂಟೊ ಹಾಂಚ್ಯಾ ಮುಕೆಲ್ಪಣಾರ್ ಮೀಸ್ ಆನಿ ಪ್ರವಚನ್ ಚಲ್ಲೆಂ.
ಸನ್ವಾರಾ 13 ವೆರ್ ಸಾಂಜೆಚ್ಯಾ 6.00 ವರಾರ್ ಮಂಗ್ಳುರ್ ದಿಯೆಸೆಜಿಚೊ ಗೊವ್ಳಿಬಾಪ್ ಅ|ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ ಹಾಂಚ್ಯಾ ಮುಕೆಲ್ಪಣಾರ್ ಸಂಭ್ರಮಿಕ್ ಫೆಸ್ತ್ ಮಿಸಾಚೆಂ ಬಲಿದಾನ್ ಚಲ್ತಲೆಂ.
ಸಾಂ. ಅಂತೊನ್ ಆಸ್ರ್ಯಾಚ್ಯಾ ಆಡಳ್ತ್ಯಾ ಮಂಡಳೆನ್ ಸಾಂತ್ ಅಂತೊನಿಚ್ಯಾ ಭಕ್ತಿಕಾಂಕ್ ನೊವೆನಾಕ್ ಆನಿ ಫೆಸ್ತಾಕ್ ಮೊಗಾಚೆಂ ಆಪವ್ಣೆಂ ದಿಲಾಂ.
