ಅಜಾಪಾಂಚೊಂ ಸಾಂತ್ ಅಂತೊನಿಚ್ಯಾ ವಾರ್ಶಿಕ್ ಫೆಸ್ತಾಚಿ ತಯಾರಯ್ ಜಾವ್ನ್ ಜೂನ್ 10 ಪಾಸುನ್ ಚಲೊನ್ ಆಸ್ಚ್ಯಾ ತೀನ್ ದಿಸಾಂಚ್ಯಾ ನೊವೆನಾಚ್ಯಾ ದುಸ್ರ್ಯಾ ದಿಸಾ ಲಗ್ನಾ ಜೊಡ್ಯಾಂಚೇರ್ ಆನಿ ಕುಟ್ಮಾ ಜಿವಿತಾಚೆರ್ ವಿಶೇಸ್ ನಿಯಾಳ್, ವಿಶೇಸ್ ಪ್ರಾರ್ಥನ್ ಆನಿ ಆಶೀರ್ವಚನಾಂ ಚಲ್ಲಿಂ.
ಸಕಾಳಿಂಚ್ಯಾ 6.00 ವರಾರ್ ಕರ್ನಾಟಕ ಪ್ರಾದೇಶಿಕ್ ಯುವ ಸಂಚಾಲನಾಚೊ ದಿರೆಕ್ತೊರ್ ಮಾ| ಬಾ| ಅಶ್ವಿನ್ ಕಾರ್ಡೊಜಾ ಹಾಣಿ, ಜೆಪ್ಪು ಸಾಂತ್ ಅಂತೊನಿಚ್ಯಾ ಆಸ್ರ್ಯಾಂತ್ ಸಂಭ್ರಮಿಕ್ ಮಿಸಾಚೆಂ ಬಲಿದಾನ್ ಭೆಟಂವ್ಚೆ ಸವೆಂ ನೊವೆನಾಕ್ ಚಾಲನ್ ದಿಲೆಂ. ಆಪ್ಲ್ಯಾ ಪ್ರಸಂಗಾಂತ್ ತಾಣಿ ಲಗ್ನಾಚೊ ಸಾಕ್ರಾಮೆಂತ್ ಕುಟ್ಮಾಚೆಂ ಕಾಳಿಜ್ ಆನಿ ಭುರ್ಗಿಂ ಜಾವ್ನಾಸಾತ್ ದೆವಾಚೆಂ ಮೊಲಾದೀಕ್ ದೆಣೆಂ ಮ್ಹಳ್ಳ್ಯಾ ವಿಶಯಾಚೆರ್ ಭೊರ್ ದಿಂವ್ಚೆ ಸಾಂಗಾತಾ ಲಗ್ನಾ ಭೆಸಾಚೆಂ ಪವಿತ್ಪಣ್ ಸಾಂಬಾಳುಂಕ್ ಕಾಜಾರಿ ಜೊಡ್ಯಾಂಕ್ ಉಲೊ ದಿಲೊ.
ಸಕಾಳಿಂಚ್ಯಾ 9.00 ಪಾಸುನ್ ದೊನ್ಪಾರಾಂ 1.00 ಪರ್ಯಾಂತ್ ಮಂಗ್ಳುರ್ ದಿಯೆಸೆಜಿಚ್ಯಾ ಕಾರಿಜ್ಮಾತಿಕ್ ಸಂಚಾಲನಾ ತರ್ಫೆನ್, ಮಾ| ಬಾ| ಕ್ಲಿಪರ್ಡ್ ಫೆರ್ನಾಂಡಿಸ್ ಹಾಂಚ್ಯಾ ಮುಕೆಲ್ಪಣಾರ್ ವಿಶೇಷ್ ಮಾಗ್ಣೆಂ ಚಲ್ಲೆಂ. ಆಪ್ಲ್ಯಾ ಪ್ರವಚನಾಂತ್ ಮಾ| ಬಾ| ಕ್ಲಿಫರ್ಡ್ ಹಾಣಿ ಕಾಜಾರಿ ಜೊಡಿಂ, ಕುಟ್ಮಾ ಬಾಂದ್ ಆನಿ ಲಗ್ನಾ ಜಿವಿತಾಂತ್ ಸಂಬಂದಾಂಚೆಂ ಮೋಲ್ ಹ್ಯಾ ವಿಶಯಾಚೆರ್ ಗೂಂಡಾಯೆಚೊ ಉಜ್ವಾಡ್ ಫಾಂಕ್ಲೊ. ಆಧುನಿಕ್ ಸಮಾಜೆಂತ್ ಕುಟ್ಮಾಂನಿ ಫುಡ್ ಕರ್ಚ್ಯಾ ಸವಾಲಾಂಚೇರ್ ವಿಶ್ಲೇಷಣ್ ಪ್ರಸ್ತುತ್ ಕೆಲ್ಲ್ಯಾ ಬಾ| ಕ್ಲಿಫರ್ಡ್ ಹಾಣಿ ಎಕಾಮೆಕಾಚೆರ್ ಗವ್ರವ್ ಆನಿ ವಿಶ್ವಾಸ್ ತಶೆಂಚ್ ಉಗ್ತ್ಯಾಮನಾಚ್ಯಾ ಸಂವಾದಾನ್ ಲಗ್ನಾಜಿವಿತಾಚೊ ಬಾಂದ್ ಘಟ್ ಕರುಂಕ್ ಉಲೊ ದಿಲೊ. ಕುಟಮ್ ಜಾವ್ನಾಸಾ ದೆವಾಚೆಂ ತೇಂಪ್ಲ್ ಮ್ಹಳ್ಯಾ ತಾಣಿ, ತ್ಯಾಗ್ ಆನಿ ಬೇಶರ್ತ್ ಮೊಗಾನ್ ಮಾತ್ ಕುಟ್ಮಾಂ ಬಾಂದುನ್ ಹಾಡುಂಕ್ ಜಾತಾ ಮ್ಹಣ್ ಕಾಜಾರಿ ಜೊಡ್ಯಾಂಕ್ ಸಲಹಾ ದಿಲಿ.
ಮಾ| ದೊ| ಸುನಿಲ್ ಕುಮಾರ್ ಡಿ ಸೊಜಾ ಹಾಂಚ್ಯಾ ಮುಕೆಲ್ಪಣಾರ್ ಸಂಭ್ರಮಿಕ್ ಮಿಸಾಚೆಂ ಬಲಿದಾನ್ ಆನಿ ಪ್ರವಚನಾ ಸಾಂಗಾತಾ ಸಾಂತ್ ಅಂತೊನ್ ಆಸ್ರ್ಯಾಂತ್ ಸಕಾಳಿಂಚೊಂ ಸಂಭ್ರಮ್ ಸಂಪನ್ನ್ ಜಾಲೊ.
ಸಾಂಜೆಚ್ಯಾ 6.00 ವರಾಂಚೇರ್ ಮಿಲಾರ್ ದೇವ್ಮಂದಿರಾಂತ್ ಮಾ| ಬಾ| ಬೊನಿಫಾಸ್ ಪಿಂಟೊ ಹಾಣಿ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ ಆನಿ ನೊವೆನಾಚ್ಯಾ ಮಾಗ್ಣ್ಯಾಂ ಸಾಂಗಾತಾ ಪ್ರವಚನ್ ದಿಲೆಂ.
