ಕೊಂಕ್ಣಿ ಸಮುದಾಯ್ ನೆದರ್ಲ್ಯಾಂಡ್ಸ್ (ಕೆಎಸ್ಎನ್) ಹಾಣಿಂ ಆಪ್ಲೊ ಪಯ್ಲೊ “ಕೆಎಸ್ಎನ್ ದೀಸ್” 2026 ಜೂನ್ 6ವೆರ್, ಹೂಫ್ಡೋರ್ಪಾಂತ್ಲ್ಯಾ ಸಾಂ ಜುವಾಂವ್ ಬಾಪ್ತಿಸ್ತಾಚ್ಯಾ ಇಗರ್ಜೆಚ್ಯಾ ಉಗ್ತ್ಯಾ ಮೈದಾನಾರ್ ವ್ಹಡಾ ಸಂಭ್ರಮಾನ್ ಮಾನಾಯ್ಲೊ. . ಮಂಗ್ಳುರ್ ಆನಿ ಕರಾವಳಿ ಕರ್ನಾಟಕ ಮುಳಾಚ್ಯಾ ಲಗ್ಬಗ್ 100 ಜಣಾಂನಿ ಹಾಂತುಂ ವಾಂಟೊ ಘೆತ್ಲೊ. ಮಾ| ಬಾ| ನವೀನ್ ರೊಡ್ರಿಗಸ್ ಹಾಣಿಂ ಕೊಂಕ್ಣೆಂತ್ ಮೀಸ್ ಭೆಟಯ್ಲೆಂ.
25 ವರ್ಸಾಂ ಥಾವ್ನ್ ಗೊಂಯ್ಚ್ಯಾ ಮುಳಾಚ್ಯಾ ಲೊಕಾಕ್ ಎಕ್ವಟಾಯ್ತೆಲ್ಯಾ ನೆದರ್ಲ್ಯಾಂಡ್ಸಾಂತ್ಲ್ಯಾ ಗೊಂಯ್ಕಾರಾಂಚ್ಯಾ (G-I-N.nl) ಸಂಸ್ಥ್ಯಾಚಿ ಸೆವಾ ಯಾದ್ ಕರುನ್, ಹ್ಯಾ ಸಂದರ್ಭಾರ್ ಶ್ರೀ ಜೆರಾರ್ಡ್ ಆನಿ ಶ್ರೀಮತಿ ಎವೆಲಿನ್ ಲೋಬೊ, ತಶೆಂಚ್ ಶ್ರೀ ಜೇಸನ್ ಆನಿ ಶ್ರೀಮತಿ ಅನೆಟ್ ಬರೆಟ್ಟೊ – ಜೊಡ್ಯಾಂಕ್ ಮಾನ್ ಕೆಲೊ.
ಸಾಂಸ್ಕೃತಿಕ್ ಕಾರ್ಯಕ್ರಮಾಂತ್ 1920 ಥಾವ್ನ್ 2026 ಪರ್ಯಾಂತ್ಲ್ಯಾ ಕರಾವಳಿಚ್ಯಾ ನ್ಹೆಸ್ಣಾ ಶೈಲಿ ದಾಖವ್ಚೊ ಫ್ಯಾಷನ್ ಶೋ ಆನಿ ಲೇಜಿ ಡ್ಯಾನ್ಸ್ ಲೊಕಾಚೆಂ ಗಮನ್ ವೊಡ್ಲೆಂ. ಖೆಳಾಂತ್ ದೊರಿ ವೊಡ್ಚೊ ಖೆಳ್, ಭುರ್ಗ್ಯಾಂಚೊ ಲಿಂಬೆ-ಕುಲೆರ್ ಧಾಂವ್, ಆನಿ ನೆದರ್ಲ್ಯಾಂಡ್ಸಾಂತ್ ಪಯ್ಲ್ಯೆ ಪಾವ್ಟಿಂ ಖೆಳ್ಲ್ಲೊ ಲಗೋರಿ ಖೆಳ್. ಸಯ್ರ್ಯಾಂಕ್ ಕರಾವಳಿ ಕರ್ನಾಟಕಾಚೆಂ ಸಾಂಪ್ರದಾಯಿಕ್ ಖಾಣ್ ದಿಲೆಂ.
ಮಂಗ್ಳುರ್ ದಿಯೆಸೆಜಿಚೊ ಬಿಸ್ಪ್ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ, ದಾಯ್ಜಿವಲ್ಡ್ ಸ್ಥಾಪಕ್ ವಾಲ್ಟರ್ ನಂದಳಿಕೆ, ಮಾ| ಬಾ| ರಿಚರ್ಡ್ ಲೋಬೊ ಆನಿ ನಾವಾಡ್ದಿಕ್ ಕಲಾಕಾರ್ ಡೊಲ್ಲಾ ಮಂಗ್ಳುರ್ ಹಾಣಿ ವಿಡಿಯೊ ಸಂದೇಶಾಂ ಮುಕಾಂತ್ರ್ ಕಾರ್ಯಾಕ್ ಬರೆಂ ಮಾಗೊನ್ ಪ್ರಚಾರ್ ದಿಲ್ಲ್ಯಾಕ್ ತಾಂಕಾ ವಿಶೇಸ್ ದಿನ್ವಾಸ್ ಪಾಟಯ್ಲೆ.
ಕೆಎಸ್ಎನ್ ಅಧ್ಯಕ್ಷ್ ಶೊನ್ ರೊಡ್ರಿಗಸ್ ಹಾಂಚ್ಯಾ ಮುಖೆಲ್ಪಣಾಖಾಲ್ ಕೆಎಸ್ಎನ್ ಸಮಿತಿ ಆನಿ ಸ್ವಯಂಸೇವಕಾಂನಿ ಕಾರ್ಯಕ್ರಮ್ ಯಶಸ್ವೆನ್ ಸಂಘಟಿತ್ ಕೆಲೆಂ.
