ಆಚರ್ಯಾಂಚೊಂ ಸಾಂತ್ ಅಂತೊನಿಚ್ಯಾ ಫೆಸ್ತಾಕ್ ತಯಾರಾಯ್ ಜಾವ್ನ್ ಜೆಪ್ಪು ಸಾಂತ್ ಅಂತೊನ್ ಆಸ್ರ್ಯಾಂತ್ ಆನಿ ಮಿಲಾರ್ ಫಿರ್ಗಜೆಚ್ಯಾ ಸಾಂತ್ ಅಂತೊನ್ ಪೂನ್ಶೆತಾಂತ್ ಸುರು ಆಸ್ಚೆಂ ತ್ರಿದುಮ್ ನೊವೆನ್, ಸುಕ್ರಾರಾ, ಜೂನ್ 12 ವೆರ್ ಸಂಪನ್ನ್ ಜಾಲೆಂ.
ತೀನ್ ದಿಸಾಂಚ್ಯಾ ನೊವೆನಾನ್ ಸಾಂತ್ ಅಂತೊನಿಚ್ಯಾ ಭಕ್ತಿಕಾಂಕ್ ಜೂನ್ 13 ವೆರ್ ಚಲ್ಚ್ಯಾ ವಾರ್ಶಿಕ್ ಫೆಸ್ತಾಕ್ ಆತ್ಮಿಕ್ ಜಾವ್ನ್ ತಯಾರ್ ಕೆಲಾಂ ಆಸುನ್, ಸನ್ವಾರಾ ಜೂನ್ 13 ವೆರ್, ಸಕಾಳಿಂಚ್ಯಾ 6.00 ವರಾಂಚೆರ್ ಜೆಪ್ಪು ಸಾಂತ್ ಅಂತೊನ್ ಆಸ್ರ್ಯಾಂತ್ ಮಾ| ಬಾ| ಪಾವ್ಲ್ ಮೆಲ್ವಿನ್ ಡಿ ಸೊಜಾ, ಕಾಪುಚಿನ್ ಹಾಂಚ್ಯಾ ಮುಕೆಲ್ಪಣಾರ್ ಆನಿ ಸಕಾಳಿಂಚ್ಯಾ 10.30 ವರಾಂಚೇರ್ ಕರ್ನಾಟಕ ಕಾರ್ಮೆಲಿತ್ ಪ್ರಾಂತ್ಯಾಚೊ ವ್ಹಡಿಲ್ ಮಾ| ದೊ| ಜೊನ್ ಸಿಕ್ವೇರಾ ಹಾಂಚ್ಯಾ ಮುಕೆಲ್ಪಣಾರ್ ಮಿಸಾಚಿಂ ಬಲಿದಾನಾಂ ಆಸ್ತೆಲಿಂ.
‘ಸಾಂತ್ ಅಂತೊನಿಚ್ಯಾ ಮಜತಿನ್ ಕ್ರೀಸ್ತಿ ಕೇಂದ್ರಿತ್ ಕುಟ್ಮಾಂ ಬಾಂದುನ್ ಹಾಡ್ಯಾಂ’ ಮ್ಹಳ್ಯಾ ಧ್ಯೇಯಾಖಾಲ್ ಚಲ್ಲೆಲ್ಯಾ ನೊವೆನಾಚ್ಯಾ ತಿಸ್ರ್ಯಾ ದಿಸಾ, ಜೂನ್ 12 ವೆರ್ ಸಕಾಳಿಂ 6.00 ವರಾರ್ ಆಸ್ರ್ಯಾಚ್ಯಾ ಚಾಪೆಲಾಂತ್, ಆಸ್ರ್ಯಾಚೊ ಆಡಳ್ತ್ಯಾ ಅಧಿಕಾರಿ ಮಾ| ಬಾ| ಪ್ರವೀಣ್ ಮಾರ್ಟಿಸ್ ಹಾಣಿ ಮಿಸಾಚ್ಯಾ ಪವಿತ್ ಬಲಿದಾನಾ ಸಾಂಗಾತಾ ಆಚರಣಾಕ್ ಸುರ್ವಾತ್ ದಿಲಿ.
ಆಪ್ಲ್ಯಾ ಪ್ರಸಂಗಾಂತ್ ತಾಣಿ ‘ಕುಟ್ಮಾಂತ್ ಮಾಲ್ಘಡ್ಯಾಂಚೊಂ ಪಾತ್ರ್ ಆನಿ ಮಹತ್ವ್’ ಹ್ಯಾ ವಿಶಯಾಚೆರ್ ನಿಯಾಳ್ ದಿಲೊ. “ಕುಟ್ಮಾಂತ್ ಮಾಲ್ಘಡಿಂ ವೊಜೆಂ ನಯ್, ಬಗಾರ್ ತಿಂ ಜಾವ್ನಾಸಾತ್ ದೆವಾಚೆಂ ವಿಶೇಸ್ ದೆಣೆಂ. ತಾಂಚೊ ಆಮಿ ಮೋಗ್ ಕರಿಜೆ ಆನಿ ತಾಂಕಾ ಗವ್ರವಾನ್ ಲೆಕಿಜೆ. ಮುಕ್ಲ್ಯಾ ಪಿಳ್ಗೆಕ್ ಪಾತ್ಯೆಣಿ, ಗಿನ್ಯಾನ್, ಜಾಣ್ವಾಯ್ ಆನಿ ಬುದ್ವಂತ್ಕಾಯ್ ಹಾತಾಂತರ್ ಕರ್ಚಿ ದೆವಾಚಿ ಕುರ್ಪಾ ಕುಟ್ಮಾಂತ್ ತಿಂ ಹಾಡುನ್ ಯೆತಾತ್” ಮ್ಹಣ್ ತಾಣಿ ಸಾಗ್ಲೆಂ.
ಆಸ್ರ್ಯಾಚಾ ವಠಾರಾಂತ್, ಸಕಾಳಿಂಚ್ಯಾ 9.00 ಥಾವ್ನ್ ದೊನ್ಪಾರಾಂ 1.00 ಪರ್ಯಾಂತ್ ವಿಶೇಸ್ ಪ್ರಾರ್ಥನಾಂ ಚಲ್ಲಿಂ. ಭಾ| ಡೊಲ್ಫಿ ಆನಿ ಭಾ| ರೋನಿ ಹಾಂಚ್ಯಾ ಫುಡಾರ್ಪಣಾರ್ ಆರಾಧನ್ ಆನಿ ಸ್ತುತಿಗಿತಾಂ ಚಲ್ಲಿಂ.
ಉಪ್ರಾಂತ್ ಮಾ| ಬಾ| ಬೊನಿಫಾಸ್ ಪಿಂಟೊ ಹಾಣಿ ‘ಜೆಜುಚೆಂ ಪವಿತ್ ಕಾಳಿಜ್’ ಹ್ಯಾ ವಿಶಯಾಚೆರ್ ಪವಿತ್ ಸಾಕ್ರಾಮೆಂತಾಚೆಂ ಆರಾಧನ್ ಆನಿ ಮಿಸಾಚೆಂ ಪವಿತ್ ಬಲಿದಾನ್ ಭೆಟಯ್ಲೆಂ.
ಆಪ್ಲ್ಯಾ ಪ್ರಸಂಗಾಂತ್ ತಾಣಿ ಸಮುದಾಯ್ ಸೆವೆಚ್ಯಾ ಮಹತ್ವಾ ವಿಶ್ಯಾಂತ್ ನಿಯಾಳ್ ದೀವ್ನ್, “ಕ್ರಿಸ್ತಾಚೆ ಖರೆ ಶಿಸ್ ಜಾಂವ್ಚೆಂ ಮ್ಹಳ್ಯಾರ್ ಪೆಲ್ಯಾಂಕ್ ಮೊಗಾನ್ ಆನಿ ಕಾಕುಳ್ತಿನ್ ಲೆಕ್ಚೆಂ ” ಮ್ಹಣ್ ಸಾಂಗ್ಲೆಂ.
ಸಾಂಜೆಚ್ಯಾ 6:00 ವರಾರ್ ಮಿಲಾರ್ ದೇವ್ತೆಂಪ್ಲಾಂತ್ ಮಾ| ಬಾ| ಬೊನಿಫಾಸ್ ಪಿಂಟೊ ಹಾಣಿ ನೊವೆನಾಚೆಂ ಮಾಗ್ಣೆಂ ಆನಿ ಮೀಸ್ ಭೆಟಯ್ಲೆಂ, ಭಕ್ತಿಕಾಂಕ್ ಪ್ರವಚನ್ ದಿಲೆಂ.
ಜೂನ್ 13 ವೆರ್, ಸನ್ವಾರಾ, ಮಿಲಾರ್ ದೇವ್ತೆಂಪ್ಲಾಂತ್ ಸಕಾಳಿಂಚ್ಯಾ 8.00 ವರಾಂಚೇರ್ ರುಜಾಯ್ ಕಾಥೆದ್ರಾಲಾಚೊ ರೆಕ್ಟರ್ ಮಾ| ಬಾ| ವಲೇರಿಯನ್ ಡಿ ಸೊಜಾ ಹಾಂಚ್ಯಾ ಫುಡಾರ್ಪಣಾರ್, ಸಾಂಜೆಚ್ಯಾ 4.30 ವರಾಂಚೇರ್ ಮಲಯಾಳಂ ಭಾಶೆಂತ್ ಆನಿ 6.00 ವರಾಂಚೇರ್ ಮಂಗ್ಳುರ್ ದಿಯೆಸೆಜಿಚೊ ಧರ್ಮಾಧ್ಯಕ್ಷ್ ಅ| ಮಾ| ದೊ| ಲುವಿಸ್ ಪಾವ್ಲ್ ಸೊಜ್ ಹಾಂಚ್ಯಾ ಪ್ರಧಾನ್ ಯಾಜಕ್ಪಣಾರ್ ಫೆಸ್ತ್ ಮಿಸಾಚೊ ಸಂಭ್ರಮ್ ಚಲ್ತಲೊ.
ಆಸ್ರ್ಯಾಚ್ಯಾ ಆಡಳ್ತ್ಯಾ ಮಂಡಳೆನ್ ಫಾಲ್ಯಾಂ, ಸನ್ವಾರಾ ಜೂನ್ 13 ವೆರ್ ಚಲ್ಚ್ಯಾ ಸರ್ವ್ ಧಾರ್ಮಿಕ್ ಸಂಭ್ರಮಾಂಕ್ ಸಾಂತ್ ಅಂತೊನಿಚ್ಯಾ ಭಕ್ತಿಕಾಂಕ್ ಮಾಯಾಮೊಗಾಚೆಂ ಆಪವ್ಣೆಂ ದಿಲಾಂ.
