ಆಚರ್ಯಾಂಚೊಂ ಸಾಂತ್ ಅಂತೊನಿಚಿ ಪರಬ್ ಜೆಪ್ಪು ಸಾಂತ್ ಅಂತೊನ್ ಆಸ್ರ್ಯಾಂತ್ ಆನಿ ಸಾಂತ್ ಅಂತೊನ್ ಪೂನ್ಶೆತ್ ಆಸ್ಚ್ಯಾ ಮಿಲಾರ್ ಮಾಯೆಚ್ಯಾ ದೇವ್ತೆಂಪ್ಲಾಂತ್ ವ್ಹಡಾ ಭಕ್ತಿ ಸಂಭ್ರಮಾಂತ್ ಮಾನಾಯ್ಲಿ. ಸಾಂಜೆಚ್ಯಾ 6.00 ವರಾಂಚೇರ್ ಮಿಲಾರ್ ಮಾಯೆಚ್ಯಾ ದೇವ್ತೆಂಪ್ಲಾಂತ್ ಮಂಗ್ಳುರ್ ದಿಯೆಸೆಜಿಚೊ ಗೊವ್ಳಿಬಾಪ್ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ ಹಾಣಿ ಪ್ರಧಾನ್ ಯಾಜಕ್ ಜಾವ್ನ್ ಹಾಜರ್ ಆಸೊನ್ ಫೆಸ್ತಾಚೆಂ ಸಂಭ್ರಮಿಕ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ.
ಆಪ್ಲ್ಯಾ ಪ್ರಸಂಗಾಂತ್ ದೊ| ಸಲ್ಡಾನ್ಹಾನ್ “ಕುಟಮ್ ಜಾವ್ನಾಸಾ ಪಾತ್ಯೆಣಿ ಆನಿ ಮೊಗಾಚೆಂ ಪಾಳ್ಣೆಂ. ದೆವಾಚೊ ಮೋಗ್ ಭೊಗುಂಕ್ ಘರ್ ಜಾವ್ನಾಸಾ ಪಯ್ಲೆಂ ತೇಂಪ್ಲ್. ಕುಟಮ್ ಕ್ರಿಸ್ತಿ ಕೇಂದ್ರಿತ್ ಆಸ್ಲ್ಯಾರ್, ಬೆಸಾಂವ್, ಭರ್ವಸೊ ಆನಿ ಭಲಾಯ್ಕಿ ಅಪಾಪಿಂ ವಾಳೊನ್ ಯೆತಾ” ಮ್ಹಳೆಂ.
ಮುಂದರುನ್ ಆಪ್ಲ್ಯಾ ಪ್ರವಚನಾಂತ್, ಸಾಂತ್ ಅಂತೊನಿಚ್ಯಾ ಜಿಣ್ಯೆಚೊ ಪ್ರಸ್ತಾಪ್ ಕೆಲ್ಲ್ಯಾ ತಾಣಿ ” ಸಾಂತ್ – ಭಕ್ತ್ ಫಕತ್ ಕುಡಿಚ್ಯಾ ಪಿಡೆಕ್ ಮಾತ್ ಸುಶೆಗ್ ದೀನಾಂತ್, ಬಗಾರ್ ಘಾಯೆಲ್ಲಿಂ ಕಾಳ್ಜಾಂ – ಮನಾಂಯ್ ಗೂಣ್ ಕರ್ತಾತ್. ಮಾಗ್ಣೆ ಆನಿ ಭಾವಾಡ್ತಾ ಮಾರಿಫಾತ್ ಆಮ್ಚೆ ತುಟ್ಲೆಲೆ ಸಂಬಂದ್ ಸಾರ್ಕೆ ಕರುಂಕ್ ಸಾಂತ್ – ಭಕ್ತ್ ಆಮ್ಕಾಂ ಉಲೊ ದಿತಾತ್. ಭಾಯ್ರ್ ಪಡ್ಲಲೆಂ ಸೊಧುನ್ ದಿಂವ್ಚೊ ಸಾಂತ್ ಮ್ಹಣ್ ನಾಂವಾಡ್ಲಲೊ ಸಾಂತ್ ಅಂತೊನ್ ಆಮ್ಚ್ಯಾ ಕುಟ್ಮಾಂನಿ ’ದೇವ್ ಭಾಯ್ರ್ ಪಡ್ಲಾಗೀ ?’ ಮ್ಹಣ್ ಆಜ್ ಆಮ್ಕಾಂ ವಿಚಾರುನ್ ಆಸಾಶೆಂ ಭೊಗ್ತಾ. ಕುಟ್ಮಾಂತ್ ದೇವಾಕ್ ಹೊಗ್ಡಾಯ್ಲ್ಯಾರ್ ಸಗ್ಳೆಂ ಹೊಗ್ಡಾಯಿಲ್ಲೆ ಪರಿಂ ” ಮ್ಹಣ್ ದೊ| ಸಲ್ಡಾನ್ಹಾ ಹಾಣಿ ಅಭಿಪ್ರಾಯ್ ಉಚಾರ್ಲಿ.
ಸಕಾಳಿಂಚ್ಯಾ 6.00 ವರಾಂಚೇರ್ ಜೆಪ್ಪು ಸಾಂತ್ ಅಂತೊನಿಚ್ಯಾ ಆಸ್ರ್ಯಾಂತ್ ಮಾ| ಬಾ| ಮೆಲ್ವಿನ್ ಪಾವ್ಲ್ ಡಿ ಸೊಜಾ, ಕಾಪುಚಿನ್ ಹಾಂಚ್ಯಾ ಮುಕೆಲ್ಪಣಾರ್ ಮಿಸಾಸವೆಂ ಸುರು ಜಾಲ್ಲೊ ಫೆಸ್ತಾಚೊ ದಬಾಜೊ , 10.30 ವ್ಹರಾಂಚೇರ್ ಕರ್ನಾಟಕ ಕಾರ್ಮೆಲಿತ್ ಪ್ರಾಂತ್ಯಾಚೊ ವ್ಹಡಿಲ್ ಮಾ| ಬಾ| ಜಾನ್ ಸಿಕ್ವೇರಾ ಹಾಂಚ್ಯಾ ಮಿಸಾಸವೆಂ ಸಂಪನ್ನ್ ಜಾಲೊ. 10.30 ವರಾಂಚ್ಯಾ ಮಿಸಾ ಉಪ್ರಾಂತ್ ಆಸ್ರ್ಯಾಚ್ಯಾ ವಠಾರಾಂತ್ ಪ್ರಾಯೆಸ್ತ್ ಆನಿ ಪಿಡೇಸ್ತಾಂ ಖಾತಿರ್ ವಿಶೇಸ್ ಮಾಗ್ಣೆಂ ಕೆಲೆಂ.
ಮಿಲಾರ್ ಮಾಯೆಚ್ಯಾ ದೇವ್ತೆಂಪ್ಲಾಂತ್ ಸಕಾಳಿಂಚ್ಯಾ 8.00 ವರಾಂಚೇರ್ ರುಜಾಯ್ ಕಾಥೆದ್ರಾಲಾಚೊ ರೆಕ್ಟರ್ ಮಾ| ಬಾ| ವಲೇರಿಯನ್ ಡಿ ಸೊಜಾ ಆನಿ 4.30 ವರಾಂಚೇರ್ ಮಲಯಾಳಂ ಭಾಶೆಂತ್ ಸಾಂತ್ ಅಂತೊನಿಚ್ಯಾ ಪರ್ಬೆಚಿಂ ಮಿಸಾಂ ಭೆಟಯ್ಲಿಂ.
ಮಿಸಾ ಉಪ್ರಾಂತ್ ಸಾಂತ್ ಅಂತೊನಿಚೆಂ ನೊವೆನ್ ಮಾಗ್ಣೆಂ ಆನಿ ರೆಲಿಕೆಚೆಂ ಆಶೀರ್ವಚನ್ ಆನಿ ಪ್ರದರ್ಶನ್ ಚಲ್ಲೆಂ.
ತೀನ್ ದಿಸಾಂಚ್ಯಾ ತ್ರಿದುಮ್ ನೊವೆನಾಕ್ ಸಹಕಾರ್ ದಿಲ್ಲ್ಯಾ ಆನಿ ಫೆಸ್ತ್ ಸಂಬ್ರಮುಂಕ್ ಕುಮಕ್ ಕೆಲ್ಲ್ಯಾ ಸರ್ವಾಂಕ್ ಸಾಂತ್ ಅಂತೊನ್ ಆಸ್ರ್ಯಾಚೊ ದಿರೆಕ್ತೊರ್ ಮಾ| ಬಾ| ಜೆ. ಬಿ. ಕ್ರಾಸ್ತಾ ಆನಿ ಆಡಳ್ತ್ಯಾ ಅಧಿಕಾರಿ ಮಾ| ಬಾ| ಪ್ರವೀಣ್ ಮಾರ್ಟಿಸ್ ಹಾಣಿ, ಆಡಳ್ತ್ಯಾ ಮಂಡಳೆಸವೆಂ ದಿನ್ವಾಸ್ ಪಾಟಯ್ಲೆ.
