ಕಿಂಗ್ ಖಾನ್ ನಾಂವಾನ್ ಸಂಸಾರಾರ್ ಫಾಮಾದ್ ಬಾಲಿವುಡ್ ನಟ್ ಆನಿ ರೋಹನ್ ಕಾರ್ಪೋರೇಶನ್ ಬ್ರಾಂಡ್ ಅಂಬಾಸಿಡರ್ ಶಾರುಖ್ ಖಾನ್ ಬ್ರೇಸ್ತಾರಾ, ಜೂನ್ 25 ವೆರ್ ಮಂಗ್ಳುರಾಕ್ ಯೇವ್ನ್, ಮಂಗ್ಳುರಾಂತ್ಲೊ ಲೊಕಾಮೊಗಾಳ್, ವಿಶ್ವಾಸಿ ಬಾಂದ್ಪಾಂ ನಿರ್ಮಾಣ್ ಸಂಸ್ಥೊ ರೋಹನ್ ಕಾರ್ಪೋರೇಶನ್ ಹಾಣಿ ಅಡ್ಯಾರ್ ಗಾರ್ಡನಾಂತ್ ಮಾಂಡುನ್ ಹಾಡ್ಲೆಲ್ಯಾ ‘ಶಾರುಕ್ ಖಾನಾ ಸಾಂಗಾತಾ ಏಕ್ ಸಾಂಜ್’ ವಿಶೇಸ್ ಕಾರ್ಯಾಂತ್ ಪ್ರಮುಕ್ ಸಯ್ರೊ ವಾಂಟೊ ಘೆತಲೊ.
ಸಾಂಜೆಚ್ಯಾ ಚಾರ್ ವೊರಾಂ ಪಾಸುನ್ ಕಾರ್ಯಾಕ್ ಪ್ರವೇಸ್ ಸುರು ಜಾಂವ್ಚೊ ಆಸುನ್, ವಿವಿಧ್ ಶೆತಾಂತ್ಲೆ ಗಣ್ಯ್ ವೆಕ್ತಿ, ಉದ್ಯಮಿ, ಲೊಕಾಪ್ರತಿನಿಧಿ ಆನಿ ನೊಂದಾವ್ಣಿ ಕೆಲ್ಲ್ಯಾ ಸಯ್ರ್ಯಾಂಕ್ ಮಾತ್ ಹ್ಯಾ ವಿಶೇಸ್ ಕಾರ್ಯಾಕ್ ಪ್ರವೇಶ್ ಲಾಭ್ತಲೊ.
“ಮಂಗ್ಳುರ್ಚ್ಯಾ ಮಾತಿಯೆರ್ ಶಾರುಖ್ ಖಾನಾಕ್ ಯೆವ್ಕಾರ್ ಮಾಗ್ಚೊ ಸುಯೋಗ್ ರೋಹನ್ ಕಾರ್ಪೋರೇಶನಾಕ್ ಲಾಭ್ಲಾ ಆಸುನ್, ಕಾರ್ಯಾಂತ್ ವಾಂಟೊ ಘೆತಲ್ಯಾ ಸರ್ವಾಂಕ್ ಹೊ ಏಕ್ ವಿಶೇಸ್ ಅನ್ಭೊಗ್ ಜಾಂವ್ಕ್ ಪಾವ್ತಲೊ” ಮ್ಹಣ್ ರೋಹನ್ ಕಾರ್ಪೋರೇಶನ್ ಆಡಳ್ತ್ಯಾ ನಿರ್ದೇಶಕ್ ದೊ| ರೋಹನ್ ಮೊಂತೇರೊ ಹಾಣಿ ಹ್ಯಾ ಸಂದರ್ಭಾರ್ ಅಭಿಪ್ರಾಯ್ ಉಚಾರ್ಲ್ಯಾ.
ಸಂಸ್ಥ್ಯಾಚೊ ನಿರ್ದೇಶಕ್ ಡಿಯೋನ್ ಮೊಂತೇರೊನ್; ಹೆಂ ಕಾರ್ಯೆಂ ಮಂಗ್ಳುರಾಂತ್ ಚಲ್ಚೆಂ ವ್ಹಡ್ ಮಟ್ಟಾಚೆಂ ಕೊರ್ಪೊರೇಟ್ ಕಾರ್ಯೆಂ ಜಾವ್ನಾಸೊನ್, ಕಾರ್ಯೆಂ ಯಶಸ್ವೀ ಜಾಂವ್ಕ್ ಸರ್ವಾಂಚೊ ಸಹಕಾರ್ ಮಾಗ್ಲೊ. ಕಾರ್ಯಾಂತ್ ವಾಂಟೆಲಿ ಜಾಂವ್ಕ್ ನೊಂದಾವ್ಣಿ ಗರ್ಜೆಜಿ ಮ್ಹಣ್ ತಾಣೆ ಹ್ಯಾ ಸಂದರ್ಭಾರ್ ಮ್ಹಳೆಂ.
