2002 ವ್ಯಾ ವರ್ಸಾ ಎಂಸಿಸಿ ಬ್ಯಾಂಕಾಚೆ ಫಕತ್ 16 ಶಾಖೆ ಆಸ್ಲೆ ಆನಿ ಕಾರ್ಯಾವ್ಯಾಪ್ತ್ ಫಕತ್ ಅವಿಭಜಿತ್ ದಕ್ಶಿಣ ಕನ್ನಡ ಜಿಲ್ಲೊ. ಆಜ್ ಬ್ಯಾಂಕಾಚಿ ಕಾರ್ಯಾವ್ಯಾಪ್ತ್ ಅಖ್ಖ್ಯಾ ಕರ್ನಾಟಕಾಕ್ ವಿಸ್ತಾರ್ಲ್ಯಾ ಮಾತ್ ನಯ್, ಬ್ಯಾಂಕಾಂತ್ ಶಾಖೆ ವಿಸ್ತರಾಣಾಚೊ ಪಾಡ್ವೊ ಸುರು ಜಾಲಾ. – ಮ್ಹಣಾಲೊ ಎಂಸಿಸಿ ಬ್ಯಾಂಕಾಚೊ ಅಧ್ಯಕ್ಷ್ ಸಹಕಾರ ರತ್ನ ಶ್ರೀ ಅನಿಲ್ ಲೋಬೊ. ತೋ, ಆಯ್ತಾರಾ, ಜೂನ್ 28 ವೆರ್ ದೇರಳಕಟ್ಟೆಂತ್ ಬ್ಯಾಂಕಾಚೊ 22 ವೊ ಶಾಖೊ ಉಗ್ತಾವಣ್ ಜಾಂವ್ಚ್ಯಾ ಸಂದರ್ಭಾರ್ ಮಂಗ್ಳುರ್ ಬ್ಯಾಂಕಾಚಾ ಪ್ರಧಾನ್ ದಫ್ತರಾಂತ್ ಆಪಯಿಲ್ಲ್ಯಾ ಪತ್ರ್ಕಾರ್ ಪರಿಶದೆಂತ್ ಉಲಯ್ತಾಲೊ.
“ಬ್ಯಾಂಕ್ ಮ್ಹಳ್ಯಾರ್ ತೆಂ ಸಮಾಜೆಚೆಂ. ಗ್ರಾಹಕಾಂಕ್ ಬರಿ ಸೆವಾ ದಿಲ್ಯಾರ್ ಗ್ರಾಹಕ್ ಬ್ಯಾಂಕ್ ವಾಡಯ್ತಾತ್. ಬ್ಯಾಂಕ್ ವಾಡ್ತಾನಾ ನವೆ ಶಾಖೆ ಉದೆತಾತ್, ಶಾಖೆ ನವೆ ಜಾತಾನಾ ಆಮ್ಚ್ಯಾ ತರ್ನಾಟ್ಯಾಂಕ್ ಕಾಮಾಚೆ ಅವ್ಕಾಸ್ ಲಾಭ್ತಾತ್. ಅಶೆಂ ಪ್ರದೇಶಾಚ್ಯಾ ಅಭಿವೃದ್ದೆಂತ್ ಬ್ಯಾಂಕಾಂಚೊಯ್ ಪಾತ್ರ್ ಆಸಾ. ಎಂಸಿಸಿ ಬ್ಯಾಂಕಾಂತ್ ಗ್ರಾಹಕಾಂಕ್, ಪ್ರತೇಕ್ ಜಾವ್ನ್ ಮಾಲ್ಘಡ್ಯಾ ನಾಗರಿಕಾಂಕ್ ಮೆಳ್ಚಿ ಸೆವಾ ಪ್ರದೇಶಾಚ್ಯಾ ಖಂಯ್ಚ್ಯಾಯ್ ಬ್ಯಾಂಕಾಂನಿ ಮೆಳಾನಾ ಮ್ಹಣ್ ಹಾಂವ್ ಧಯ್ರಾನ್ ಸಾಂಗ್ತಾಂ. ನವ್ಯಾ ಗಾಂವಾಂತ್ ಶಾಖೊ ಉಘಡ್ತಾನಾ ಗಾಂವಾ ಖಾತಿರ್ ಕಿತೆಂ ತರೀ ತಾಂಕಿ ಭಿತರ್ಲೆಂ ಕರ್ತಾಂವ್, ಚ್ಯಾರಿಟಿ ಫಂಡಾಥಾವ್ನ್ ಸಾಮಾಜಿಕ್ ಬರೆಪಣಾಕ್ ಕುಮಕ್ ದೀಂವ್ಕ್ ವಿಸ್ರಾನಾಂವ್. ಆಮ್ಚ್ಯಾ ಬ್ಯಾಂಕಾಂತ್ ವಿಶೇಸ್ ಕಾರ್ಯಿಂ ಜಾತಾನಾ ಸಮಾಜೆಂತ್ ಮೆರೆರ್ ಜಿಯೆತೆಲ್ಯಾಂಕೀ ಕುಮಕ್ ಕರ್ತಾಂವ್, ಪ್ರತಿಭಾವಂತಾಂಕ್ ಮಾನ್ ಕರ್ತಾಂವ್. ಸಮಾಜೆ ಥಾವ್ನ್ ಜೊಡ್ಲಲೆಂ ಸಮಾಜಿಕ್ ಬರೆಪಣಾ ಖಾತಿರ್ ದಿಂವ್ಚ್ಯಾಂತ್ ಸುರಾತ್ ನಾ” ಮ್ಹಣ್ ಶ್ರೀ ಲೋಬೊನ್ ಮ್ಹಳೆಂ.
ಆಮ್ಚ್ಯಾ ಆಡಳ್ತ್ಯಾ ಮಂಡಳೆನ್ ಬ್ಯಾಂಕಾಚೆಂ ಸುಂಕಾಣ್ ಹಾತಿಂ ಘೆತಾನಾ, 500 ಕೊರೊಡ್ ಆಸ್ಲಲೊ ವೆವ್ಹಾರ್ ಫಕತ್ ಸಾತ್ ವರ್ಸಾಂನಿ 1,550 ಕೊರೊಡಾಂಕ್ ಪಾವಯ್ಲಾ. 2 ಥಾವ್ನ್ 3 ಕೊರೊಡ್ ಆಸ್ಲಲೊ ಮುನಾಫೊ ಆತಾಂ 10 ಕೊರೊಡಾಂಕ್ ಪಾವ್ಲಾ. ಎಂಸಿಸಿ ಬ್ಯಾಂಕ್ ರಿಜರ್ವ್ ಬ್ಯಾಂಕ್ ಆನಿ ಕರ್ನಾಟಕ ಸರ್ಕಾರಾಚ್ಯಾ ಜೋಡ್ ನಿಯಂತ್ರಣಾರ್ ಕಾಮ್ ಕರೀತ್ ಆಸೊನ್, ಗ್ರಾಹಕಾಂಕ್ ತಾಂಚ್ಯಾ ಡಿಪೊಸಿಟಾಚೆರ್ ರಿಜರ್ವ್ ಬ್ಯಾಂಕಾಚಾ ನಿಯಮಾ ಪರ್ಮಾಣೆ ಡಿಐಸಿಜಿಸಿ ವಿಮಾ ಸವ್ಲತ್ ಆಸಾ. ಎಂಸಿಸಿ ಬ್ಯಾಂಕಾಚೆ ಚಡಾವತ್ ಶಾಖೆ ತಳ್ ಅಂತಸ್ತಾಕ್, ಬರಿ ಪಾರ್ಕಿಂಗ್ ಸವ್ಲತ್ ಆಸ್ಚ್ಯಾ ಸುವಾತೆಂಕ್ ಬದ್ಲಿಲ್ಯಾತ್. ಎಕಾ ನವ್ಯಾ ಶಾಖ್ಯಾಕ್ ಮುನಾಫೊ ಜೊಡುಂಕ್ ದೋನ್ – ತೀನ್ ವರ್ಸಾಂ ಲಾಗ್ತಾತ್ ತರ್ ಆಮ್ಚ್ಯಾ ನವ್ಯಾ ಶಾಖ್ಯಾಂನಿ ಫಕತ್ 7 ಮಯ್ನ್ಯಾಂನಿ 10 ಕೊರೊಡ್ ವೆವ್ಹಾರ್ ಕೆಲಾ ಮಾತ್ ನಯ್, ಮುನಾಫೊ ದಾಕಲ್ ಕೆಲಾ. ಹಾಚೆ ಪಾಟ್ಲ್ಯಾನ್ ಆಮ್ಚ್ಯಾ ಶಿಬಂದೆಚೊ ಸಮರ್ಪಿತ್ ವಾವ್ರ್ ಆಸಾ.0 ಅಗೋಸ್ತ್ ಮಯ್ನ್ಯಾಂತ್ ಕಟಪಾಡಿಂತ್ 23 ವೊ ಶಾಖೊ ಉಗ್ತಾವಣ್ ಜಾತಲೊ. ಹ್ಯಾ ಆರ್ಥಿಕ್ ವರ್ಸಾ ಪಯ್ಲೆಂ ಶಾಖ್ಯಾಂಚೊಂ ಸಂಕೊ ಪಂಚ್ವೀಸಾಕ್ ಪಾವಯ್ತೆಲ್ಯಾಂವ್” ಮ್ಹಣ್ ಶ್ರೀ ಲೋಬೊನ್ ಮ್ಹಳೆಂ.
ಜೂನ್ 28 ವೆರ್, ಸಕಾಳಿಂಚ್ಯಾ 11.00 ವರಾಂಚೇರ್, ದೇರಳಕಟ್ಟೆ ಶಾಖ್ಯಾಚೆಂ ಆರ್ಶಿರ್ವಚನ್ ಪಾನೀರ್ ಫಿರ್ಗಜೆಚೊ ವಿಗಾರ್ ಮಾ| ವಿಕ್ಟರ್ ಡಿಮೆಲ್ಲೊ ಕರ್ತಲೆ. ಕರ್ನಾಟಕ ಸರ್ಕಾರಾಚೊ ಭಲಾಯ್ಕೆ ಮಂತ್ರಿ ಶ್ರೀ ಯು.ಟಿ. ಖಾದರ್ ಶಾಖೊ ಉಗ್ತಾಯ್ತಲೆ. ಮುಕೆಲ್ ಸಯ್ರಿ ಜಾವ್ನ್ ಅರ್ಸುಲಾಯ್ನ್ ಮೆಳಾಚಿ ಮಾ ವ್ಹಡಿಲ್ನ್ ಭ|ಮಿಲ್ಲಿ ಫೆರ್ನಾಂಡಿಸ್, ಮಾನಾಚೆ ಸಯ್ರೆ ಜಾವ್ನ್ ಫಾದರ್ ಮುಲ್ಲರ್ ಹೋಮಿಯೊಪತಿ ಕೊಲೆಜಿಚೊ ಆಡಳ್ತ್ಯಾಧಿಕಾರಿ ಮಾ| ಬಾ| ನಿಲೇಶ್ ಕ್ರಾಸ್ತಾ, ಶ್ರೀಮತಿ ದಿವ್ಯ ಸತೀಶ್ ಶೆಟ್ಟಿ, ಕೋಟೆಕಾರ್ ಪಟ್ಟಣ ಪಂಚಾಯತ್ ಆಧ್ಯಕ್ಷಿಣ್ ಆನಿ ಬೆಳ್ಮ ಗ್ರಾಮ ಪಂಚಾಯ್ತಾಚೊ ಮಾಜಿ ಅಧ್ಯಕ್ಷ್ ಸಿ.ಎಂ. ಸತ್ತಾರ್ ಹಾಜರ್ ಆಸ್ತಲೆ. ಹ್ಯಾಚ್ ಸುವಾಳ್ಯಾರ್ ದೇರಳಕಟ್ಟೆಂತ್ ಬ್ಯಾಂಕಾಚೆಂ 16 ವೆಂ ಎಟಿಎಂ ಉಗ್ತಾವಣ್ ಜಾತೆಲೆಂ.
ಪತ್ರಾ ಪರಿಶದೆಂತ್ ಬ್ಯಾಂಕಾಚೊ ಉಪಾಧ್ಯಕ್ಶ್ ಶ್ರೀ ಜೆರಾಲ್ಡ್ ಜೂಡ್ ಡಿಸಿಲ್ವಾ, ನಿರ್ದೇಶಕ್ ಡಾ. ಜೆರಾಲ್ಡ್ ಪಿಂಟೊ, ಅನಿಲ್ ಪತ್ರಾವೊ, ಜೆ.ಪಿ. ರೊಡ್ರಿಗಸ್, ಡೇವಿಡ್ ಡಿಸೋಜಾ, ಎಲ್ರಾಯ್ ಕಿರಣ್ ಕ್ರಾಸ್ಟೊ, ರೋಶನ್ ಡಿಸೋಜಾ, ಮೆಲ್ವಿನ್ ವಾಸ್, ಸುಶಾಂತ್ ಸಲ್ಡಾನ್ಹಾ, ಐರಿನ್ ರೆಬೆಲ್ಲೊ, ಡಾ. ಫ್ರೀಡಾ ಡಿಸೋಜಾ, ಆಲ್ವಿನ್ ಮೊಂತೇರೊ, ಫೆಲಿಕ್ಸ್ ಡಿಕ್ರೂಜ್ ಆನಿ ಮಹಾ ಪ್ರಬಂದಕ್ ಸುನಿಲ್ ಮಿನೇಜಸ್ ಹಾಜರ್ ಆಸ್ಲೆ.
