ಅನಿವಾಸಿ ಉದ್ಯಮಿ ತಶೆಂ ದಾನಿ, ಅಬುದಾಬಿಚೆಂ ಪ್ರಮುಕ್ ಕೊಂಕಣಿ ಸಾಂಸ್ಕೃತಿಕ್ ಸಂಘಟನ್, ಕೆಸಿಒ ಹಾಚೊ ಸ್ಥಾಪಕ್ ಆನಿ ಪ್ರಸ್ತುತ್ ಅಧ್ಯಕ್ಷ್ ಶ್ರೀ ಲಿಯೋ ರೊಡ್ರಿಗಸ್ ಆನಿ ಶ್ರೀಮತಿ ಲವೀನಾ ರೊಡ್ರಿಗಸ್ ಹಾಣಿ ಸಾಂ. ಜುಜೆ ವಾಜ್ ಹೋಮ್ ಹಾಂಗಾಸರ್ ವಸ್ತಿ ಕರುನ್ ಆಸ್ಚ್ಯಾ ಮಂಗ್ಳುರ್ ದಿಯೆಸೆಜಿಚ್ಯಾ ವಿಶ್ರಾಂತ್ ಯಾಜಕಾಂಚ್ಯಾ ಸೆವೆಕ್ ಮ್ಹಣ್ ಮಾರುತಿ ಸುಜುಕಿ ಎಟ್ರಿಗಾ ವಾಹನ್ ದಾನ್ ದಿಲಾಂ.
ವಾಹನಾಚಿಂ ದಸ್ತಾವೆಜಾಂ ಆನಿ ಚಾವಿ, ಧರ್ಮಾಧ್ಯಕ್ಶ್ಯಾಚಾ ನಿವಾಸಾಂತ್ ಮಂಗ್ಳುರ್ ದಿಯೆಸೆಜಿಚೊ ಗೊವ್ಳಿ ಬಾಪ್ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ ಹಾಂಕಾ ಎಕಾ ಸರಳ್ ಕಾರ್ಯಾಂತ್ ಹಾತಾಂತರ್ ಕೆಲಿಂ. ಧರ್ಮಾಧ್ಯಕ್ಷ್ ದೊ| ಸಲ್ಡಾನ್ಹಾ ಹಾಣಿ ರೊಡ್ರಿಗಸ್ ಕುಟ್ಮಾಚ್ಯಾ ದಯಾಳಾಯೆಚ್ಯಾ ಹ್ಯಾ ಕರ್ನೆಚೊ ಉಪ್ಕಾರ್ ಬಾವುಡ್ಲೊ, ತಾಂಚೇರ್ ಆನಿ ತಾಂಚ್ಯಾ ಕುಟ್ಮಾಚೇರ್ ದೆವಾಚಿಂ ವಿಂಚ್ಣಾರ್ ಆಶೀರ್ವಾದಾಂ ಮಾಗುನ್, ವಾಹನ್ ಬೆಂಜಾರ್ ಕೆಲೆಂ. ಆನಿ ಶ್ರೀ ಲಿಯೋ ಆನಿ ಶ್ರೀಮತಿ ಲವೀನಾ ಹಾಂಚೊ ಶೊಲ್ ಪಾಂಗ್ರುನ್ ಸತ್ಕಾರ್ ಕೆಲೊ.
ನವೆಂ ಎಟ್ರಿಗಾ ಕಾರ್ ಸಾಂ. ಜುಜೆ ವಾಜ್ ಯಾಜಕಾಂಚ್ಯಾ ಘರಾಂತ್ ಜಿಯೆಂವ್ಚ್ಯಾ ಮಾಲ್ಘಡ್ಯಾ ಯಾಜಕಾಂಚ್ಯಾ ಪಯ್ಣಾ ಆನಿ ಭಲಾಯ್ಕೆ ತಪಾಸ್ಣೆಚ್ಯಾ ತಶೆಂ ಹೆರ್ ಗರ್ಜಾಂ ಖಾತಿರ್ ವಾಪಾರ್ತೆಲೆ.
ಹ್ಯಾ ಸಂದರ್ಭಾರ್ ದಿಯೆಸೆಜಿಚೊ ವಿಗಾರ್ ಜೆರಾಲ್ ಮೊ| ಮ್ಯಾಕ್ಸಿಮ್ ನೊರೊನ್ಹಾ, ಛಾನ್ಸಲರ್ ಮಾ| ಬಾ| ವಿಕ್ಟರ್ ಜೋರ್ಜ್ ಡಿ ಸೊಜಾ, ದಿಯೆಸೆಜಿಚೊ ಎಸ್ಟೇಟ್ ಅಧಿಕಾರಿ ಮಾ| ಬಾ| ಮ್ಯಾಕ್ಸಿಮ್ ರೊಜಾರಿಯೊ, ಆರ್ಥಿಕ್ ಆಡಳ್ತೆದಾರ್ ಮಾ| ಬಾ| ಎಡ್ವಿನ್ ವಿನ್ಸೆಂಟ್ ಕೊರೆಯಾ, ಸಾಂ. ಜುಜೆ ವಾಜ್ ಹೋಮ್ ಹಾಚೊ ಖಬಾಡ್ದಾರಿ ಮಾ| ಬಾ| ಆಲ್ವಿನ್ ರಿಚರ್ಡ್ ಡಿ ಸೊಜಾ ಆನಿ ಹೆರ್ ಹಾಜರ್ ಆಸ್ಲೆ.
