ದೇರಳಕಟ್ಟೆ ಫಾ|ಮುಲ್ಲರ್ಸ್ ಕೊಂಪ್ಲೆಕ್ಸಾಂತ್ ಎಂಸಿಸಿ ಬ್ಯಾಂಕಾಚೊ 22 ವೊ ಶಾಖೊ ಬ್ಯಾಂಕಾಚೊ ಅಧ್ಯಕ್ಷ್ ಸಹಕಾರ ರತ್ನ ಅನಿಲ್ ಲೋಬೊ ಹಾಣಿ, ಆಯ್ತಾರಾ ಜೂನ್ 28 ವೆರ್ ಉಗ್ತಾಯ್ಲೊ. ದೇರಳಕಟ್ಟೆ ಫಾ| ಮುಲ್ಲರ್ ಹೋಮಿಯೋಪಥಿ ಮೆಡಿಕಲ್ ಕೊಲೆಜಿಚೊ ಆಡಳ್ತ್ಯಾ ಅಧಿಕಾರಿ ಮಾ| ಬಾ| ನಿಲೇಶ್ ಕ್ರಾಸ್ತಾ ಹಾಣಿ ಎಟಿಎಂ ಉಗ್ತಾಯ್ಲೆಂ.
ಅರ್ಸುಲಾಯ್ನ್ ಫ್ರಾನ್ಸಿಸ್ಕನ್ ಮೆಳಾಚಿ ಸುಪೀರಿಯರ್ ಜನರಲ್ ಭ| ಮಿಲ್ಲಿ ಫೆರ್ನಾಂಡಿಸ್ ಹಿಣೆ ಸೇಫ್ ರೂಂ, ಫಾ| ಮುಲ್ಲರ್ ಹೋಮಿಯೋಪಥಿಕ್ ಫಾರ್ಮಾಸ್ಯುಟಿಕಲ್ ವಿಭಾಗಾಚೊ ಆಡಳ್ತ್ಯಾಧಿಕಾರಿ ಮಾ| ಬಾ| ನೆಲ್ಸನ್ ದೀರಜ್ ಪಾಯ್ಸ್ ಹಾಣಿ ಬ್ಯಾಂಕಾಚಾ ಇ – ಸ್ಟಾಂ ಸೆವೆಕ್ ಚಾಲನ್ ದಿಲೆಂ.
ಪಾನೀರ್ ಫಿರ್ಗಜೆಚೊ ವಿಗಾರ್ ಮಾ| ಬಾ| ವಿಕ್ಟರ್ ಡಿಮೆಲ್ಲೊ ನ್ ಶಾಖೊ ಬೆಂಜಾರ್ ಕೆಲೊ. ಉಪ್ರಾಂತ್ ಚಲ್ಲೆಲ್ಯಾ ವೆದಿ ಕಾರ್ಯಾಕ್ ಮಾನಾಚಿ ಸಯ್ರಿ ಜಾವ್ನ್ ಕೋಟೆಕಾರ್ ಗ್ರಾಮ ಪಂಚಾಯತಾಚಿ ಅಧ್ಯಕ್ಷಿಣ್ ದಿವ್ಯಾ ಸತೀಶ್ ಶೆಟ್ಟಿ ಹಾಜರ್ ಆಸ್ಲಿ. ಉಪಾಧ್ಯಕ್ಷ್ ಜೆರಾಲ್ಡ್ ಜೂಡ್ ಡಿ’ಸಿಲ್ವಾ, ನಿರ್ದೇಶಕ್ ರೋಶನ್ ಡಿಸೊಜಾ ಆನಿ ಮಹಾಪ್ರಬಂಧಕ್ ಸುನಿಲ್ ಮಿನೇಜಸ್ ಹಾಣಿ ವೇದಿರ್ ಸಾಂಗಾತ್ ದಿಲೊ.
ಆಪ್ಲ್ಯಾ ಅಧ್ಯಕ್ಷೀಯ್ ಉಲವ್ಪಾಂತ್ ಬ್ಯಾಂಕಾಚೊ ಅಧ್ಯಕ್ಷ್ ಸಹಕಾರ ರತ್ನ ಅನಿಲ್ ಲೋಬೊನ್ ಎಂಸಿಸಿ ಬ್ಯಾಂಕಾಂತ್ ಗ್ರಾಹಕಾಂಕ್ ಮೆಳ್ಚ್ಯಾ ಗ್ರಾಹಕ್ ಸೆವೆಚಿ ತೊಕ್ಣಾಯ್ ಕೆಲಿ ಆನಿ ಹೆರ್ ನವ್ಯಾ ಶಾಖ್ಯಾಂಕ್ ಮೆಳ್ಲ್ಲೆ ತಸಲೊಚ್ ಸಹಕಾರ್ ದೇರಳಕಟ್ಟೆ ಶಾಖ್ಯಾಕೀ ಮೆಳ್ತಲೊ ಮ್ಹಣ್ ವಿಶ್ವಾಸ್ ವೆಕ್ತ್ ಕೆಲೊ. ರಿಜರ್ವ್ ಬ್ಯಾಂಕಾಚ್ಯಾ ನಿಯಂತ್ರಣಾರ್ ಕಾಮ್ ಕರ್ಚ್ಯಾ ಎಂಸಿಸಿ ಬ್ಯಾಂಕಾಂತ್ ಗ್ರಾಹಕಾಂಚ್ಯಾ ಡಿಪೊಸಿಟಾಕ್ ಡಿಐಸಿಜಿಸಿ ವಿಮೊ ಖಾತ್ರಿ ಆಸ್ಲೆಲ್ಯಾನ್ ಎಂಸಿಸಿ ಬ್ಯಾಂಕಾಂತ್ ವೆವ್ಹಾರ್ ಕರುಂಕ್ ಗ್ರಾಹಕಾಂನಿ ಬಿಯೆಂವ್ಚಿ ಗರ್ಜ್ ನಾ ಮ್ಹಣ್ ತಾಣೆ ಮ್ಹಳೆಂ. ಪ್ರಸ್ತುತ್ ಆಡಳ್ತ್ಯಾ ಮಂಡಳೆನ್ ಪಾಂಚ್ ನವೆ ಶಾಖೆ ಉಘಡ್ಲ್ಯಾತ್ ಆಸುನ್ ಹರ್ ಶಾಖ್ಯಾಂತ್, ಗ್ರಾಹಕಾಂಚೊ ವಿಶ್ವಾಸ್ ಆನಿ ಶಿಬಂದೆಚ್ಯಾ ಮಿನತೆನ್, ವರ್ಸಾ ಭಿತರ್ ₹10 ಕೊರೊಡ್ ವ್ಯವಹಾರ್ ಕರುನ್ ದಾಕ್ಲೊ ಕೆಲಾ ಮ್ಹಳೆಂ. ದೇರಳಕಟ್ಟೆ ವಠಾರಾಂತ್ ಶಿಕ್ಪಾಸಂಸ್ಥೆ, ಭಲಾಯ್ಕೆ ಸಂಸ್ಥೆ, ಐಟಿ ಕಂಪ್ಣೊ ಆನಿ ಹೆರ್ ಉದ್ಯಮಾಂ ಆಸೊನ್ ಪ್ರದೇಶ್ ಬರೊಚ್ ಅಭಿವೃದ್ದಿ ಜಾಲ್ಲ್ಯಾನ್ ಹ್ಯಾ ಶಾಖ್ಯಾಂತೀ ವರ್ಸಾ ಭಿತರ್₹10 ಕೊರೊಡ್ ವ್ಯವಹಾರಾಚೊ ಶೆವೊಟ್ ಪಾಂವ್ಚ್ಯಾಕ್ ಕಶ್ಟ್ ಜಾಂವ್ಚೆ ನಾಂತ್ ಮ್ಹಣ್ ಲೋಬೊನ್ ಹ್ಯಾ ವೆಳಿಂ ಅಭಿಪ್ರಾಯ್ ಉಚಾರ್ಲಿ.
ಸಮುದಾಯ್ ಸೆವೆಚೊ ವಾಂಟೊ ಜಾವ್ನ್ ಎಂಸಿಸಿ ಬ್ಯಾಂಕ್ ದೇರಳಕಟ್ಟೆ ಶಾಖ್ಯಾ ವ್ಯಾಪ್ತೆಚ್ಯಾ ಶಿಕ್ಪಾ ಆನಿ ಹೆರ್ ಶೆತಾಂನಿ ಸಾಧನ್ ಕೆಲ್ಲ್ಯಾ ಫ್ರ್ಯಾಂಕಿ ಫ್ರಾನ್ಸಿಸ್ ಕುಟಿನ್ಹಾ, ಅಲ್ವಿನ್ ಜೆರೋಮ್ ಡಿ’ಸೋಜಾ, ಫಯಾಝ್ ಮಡೂರು, ಸಿಎ ಮ್ಯಾಕ್ಸಿಮ್ ಫೆರ್ನಾಂಡಿಸ್, ಉಗ್ಗಪ್ಪ ಪೂಜಾರಿ ಆನಿ ಶಫಿ ಬಬ್ಬುಕಟ್ಟೆ ಹಾಂಚೊ ಮಾನ್ ಕೆಲೊ. ಬ್ಯಾಂಕಾ ಥಾವ್ನ್ ವಿಶೇಸ್ ಭುರ್ಗ್ಯಾಂಚಾ ಇಸ್ಕೊಲಾಕ್, ಚಾರಿಟೇಬಲ್ ಟ್ರಸ್ಟಾಕ್, ಆಶ್ರಮಾಕ್ ಆನಿ ವಿದ್ಯಾರ್ಥಿಚ್ಯಾ ಶಿಕ್ಪಾಕ್ ಮ್ಹಣ್ ₹2,75,000 ಆರ್ಥಿಕ್ ಕುಮಕ್ ದಿಲಿ.
ನವ್ಯಾ ಶಾಖ್ಯಾಚೆಂ ಇಂಟೀರಿಯರ್ ಕಾಮ್ ಕೆಲ್ಲೊ ಎಂಜಿನಿಯರ್ ಕಾರ್ತಿಕ್ ಕಿರಣ್ ಹಾಕಾ ಆನಿ ಮುಕೆಲ್ ಆನಿ ಮಾನಾಚ್ಯಾ ಸಯ್ರ್ಯಾಂಕ್ ಉಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೊ.
ಹ್ಯಾ ಸುವಾಳ್ಯಾರ್ ಉಪಾಧ್ಯಕ್ಷ್ ಜೆರಾಲ್ಡ್ ಜೂಡ್ ಡಿ’ಸಿಲ್ವಾ, ನಿರ್ದೇಶಕ್ ಆಂಡ್ರ್ಯೂ ಡಿ’ಸೋಜಾ, ಡೇವಿಡ್ ಡಿ’ಸೋಜಾ, ಮೆಲ್ವಿನ್ ವಾಸ್, ಜೆ.ಪಿ. ರೋಡ್ರಿಗಸ್, ಅನಿಲ್ ಪತ್ರಾವೊ, ಎಲ್ರಾಯ್ ಕಿರಣ್ ಕ್ರಾಸ್ತಾ, ಐರಿನ್ ರೆಬೆಲ್ಲೋ, ವಿನ್ಸೆಂಟ್ ಲಸ್ರಾದೊ, ಸುಶಾಂತ್ ಸಲ್ಡಾನ್ಹಾ, ಫೆಲಿಕ್ಸ್ ಡಿಕ್ರೂಜ್, ಅಲ್ವಿನ್ ಪಿ. ಮೊಂತೇರೊ ಆನಿ ಮಹಾಪ್ರಬಂಧಕ್ ಸುನಿಲ್ ಮಿನೇಜಸ್ ಹಾಜರ್ ಆಸ್ಲೆ.
ನಿರ್ದೇಶಕ್ ರೋಶನ್ ಡಿ’ಸೋಜಾ ಹಾಣೆ ಯೆವ್ಕಾರ್ ಮಾಗ್ಲೊ. ಶೈನಿ ವೀಭಾ ಡಿ’ಸೋಜಾ ಹಿಣೆ ಕಾರ್ಯೆಂ ಚಲಯ್ಲೆಂ. ದೇರಳಕಟ್ಟೆ ಶಾಖ್ಯಾಚಿ ವ್ಯವಸ್ಥಾಪಕಿ ಶ್ರೀಮತಿ ಜೂಲಿಯೆಟ್ ಡಿ’ಸೋಜಾ ಹಿಣೆ ದಿನ್ವಾಸ್ ಪಾಟಯ್ಲೆ.
