ಪ್ರಸ್ತುತ್ ಕುವೇಯ್ಟಾಂತ್ ವಸ್ತಿ ಕರುನ್ ಆಸ್ಚೆ, ಜೇಸನ್ ಮಿಸ್ಕಿತ್, ನಿಡ್ದೋಡಿ ಆನಿ ಮರ್ವಿನ್ ಕ್ವಾಡ್ರಸ್, ಬಾರ್ಕೂರ್ ಆಪ್ಲ್ಯಾ ಜೆ.ಎಂ. ರಾಗಾಸ್ ಮ್ಯೂಜಿಕ್ ಕ್ರಿಯೇಶನ್ಸ್ ಬ್ಯಾನರಾಖಾಲ್ ಜುಲೈ ಮಯ್ನ್ಯಾಚ್ಯಾ ಅಕೇರಿಕ್ ‘ಕೊಂತಾಮಣಿ’ ಮರಿಯಾಳ್ ಭಕ್ತಿಕ್ ಕಾಂತಾರ್ ಲೊಕಾರ್ಪಣ್ ಕರುಂಕ್ ಆಯ್ತೆ ಜಾಲ್ಯಾತ್.
ಕಾಂಯ್ ವರ್ಸಾಂ ಆದಿಂ ತಾಣಿ ಉಂಚ್ಲ್ಯಾ ಕಾಲೆತಿಚಿಂ ಕೊಂಕ್ಣಿ ಪದಾಂ – ಕಾಂತಾರಾಂ ಪ್ರಸಾರ್ ಕರ್ಚ್ಯಾ ಉದ್ದೇಶಾನ್ ಯೂ ಟ್ಯೂಬಾರ್ ಜೆ.ಎಂ. ರಾಗಾಸ್ ಮ್ಯೂಜಿಕ್ ಕ್ರಿಯೇಶನ್ಸ್ ಮ್ಹಳ್ಳ್ಯಾ ನಾಂವಾರ್ ಚಾನೆಲ್ ಸುರು ಕೆಲ್ಲೆಂ. ಹ್ಯಾ ಚಾನೆಲಾರ್ ಪ್ರಸಾರ್ ಜಾಲ್ಲೆಂ ಕವಿ ವಿಲ್ಸನ್ ಕಟೀಲ್ ಲಿಕ್ಣೆ ಥಾವ್ನ್ ಉದೆಲ್ಲೆಂ ತಾಂಚೆಂ ಫುಡ್ಲದ್ ಪದ್ ‘ಎಕ್ಲೊಂಚ್ ಬಸುನ್’ ಬರೆಂಚ್ ಫಾಮಾದ್ ಜಾಲ್ಲೆಂ. ಹ್ಯಾ ಪದಾಚೆಂ ವಿಡಿಯೊಚೆಂ ಚಿತ್ರೀಕರಣ್ ಬಲ್ಗೇರಿಯಾ ದೇಶಾಂತ್ ಆನಿ ಕುವೈಟಾಂತ್ ಕರುನ್ ತಾಣಿ ದಾಕ್ಲೊ ರಚ್ಲ್ಲೊ.
ಥೊಡ್ಯಾಚ್ ಮಯ್ನ್ಯಾಂ ಆದಿಂ ಬಾ| ಜೊ.ಸಿ. ಸಿದ್ದಕಟ್ಟೆ ಹಾಂಚ್ಯಾ ಲಿಕ್ಣೆ ಥಾವ್ನ್ ಉದೆಲ್ಲೆಂ, ಜೇಸನ್ ಲೋಬೊ ಆನಿ ಸೋನಲ್ ಮೊಂತೇರೊ ಹಾಣಿ ಗಾಯ್ಲೆಲೆಂ ಭಕ್ತಿಕ್ ಗೀತ್ ‘ತುಂ ಮಹಿಮೆಚೊ ದೇವ್’ ಪ್ರಸಾರ್ ಕೆಲ್ಲೆಂ.
ಪ್ರಸ್ತುತ್ ‘ಕೊಂತಾಮಣಿ’ ಏಕ್ ಮರಿಯಾಳ್ ಕಾಂತಾರ್ ಜಾವ್ನಾಸುನ್, ಮರಿ ಮಾಂಯ್ಚ್ಯಾ ಭಕ್ತಿನ್ ತೆಂ ನಿರ್ಮಾಣ್ ಕೆಲಾಂ. ಆದಿಂ ಕುವೇಯ್ಟ್ ಆಸೊನ್ ಪ್ರಸ್ತುತ್ ಯು. ಕೆಂತ್ ವಸ್ತಿ ಕರುನ್ ಆಸ್ಚ್ಯಾ ರಾಯನ್ ಲೋಬೊ ಹಾಣೆ ಹ್ಯಾ ಕಾಂತಾರಾಚಿಂ ಉತ್ರಾಂ ಬರಯ್ಲ್ಯಾಂತ್. ಜೇಸನ್ ಮಿಸ್ಕಿತಾನ್ ತಾಳೊ ಬಸಯ್ಲಾ ಆನಿ ಸಂಗೀತ್ಗಾರ್ ರಾಜಗೋಪಾಲ್ ಹಾಣೆ ಸಂಗೀತ್ ನಿರ್ದೇಶನ್ ದಿಲಾಂ. ಮರ್ವಿನ್ ಕ್ವಾಡ್ರಸಾನ್ ಹೆಂ ಕಾಂತಾರ್ ಗಾಯ್ಲಾಂ ಆಸೊನ್, ಮಂಗ್ಳುರ್ಚ್ಯಾ ಡೆನ್ಜಿಲ್ ಪಿರೇರಾ ಹಾಂಚ್ಯಾ ಬ್ಲೂ ಏಂಜೆಲ್ ಕೊಯೆರ್ ಪಂಗ್ಡಾನ್ ಗಾಯನಾಂತ್ ಸಾಂಗಾತ್ ದಿಲಾ.
ರಾಜಗೋಪಾಲ್ ಆನಿ ರಾಯನ್
ಬ್ಲೂ ಏಂಜೆಲ್ಸ್
ಧೀರನ್ ಆನಿ ಆಲ್ಯನ್ ಕಾರ್ಡೊಜಾ ಹಾಣಿ ಮರ್ವಿನ್ ಕ್ವಾಡ್ರಸಾಚ್ಯಾ ಸಾಂಗಾತ್ಪಣಾರ್ ವಿಡಿಯೊ ತಯಾರ್ ಕೆಲಾ. ಸಂತೋಷ್ ಹಾಣೆ ಪಿರ್ಲುಕ್ ಆನಿ ಗೌತಮ್ ಹಾಣಿ ತಬ್ಲಾ ಖೆಳೊನ್ ಸಂಗೀತ್ ಗಿರೇಸ್ತ್ ಕೆಲಾಂ ತರ್, ಸುಮುಖ್ ಹಾಣೆ ಕಾಂತಾರ್ ಸಂಗೀತಾಂತ್ ಸಜಯ್ಲಾಂ.
ಕಾಂತಾರಾಚ್ಯಾ ನಿರ್ಮಾಣ್ ಕಾರ್ಯಾಂತ್ ಸಂತೋಷ್ ಬರ್ಬೋಜಾ, ಓಸ್ವಲ್ಡ್ ಆನಿ ಲವೀನಾ ಪುರ್ಟಾದೊ ಆನಿ ಕ್ಲ್ಯಾನ್ವಿನ್ ಫೆರ್ನಾಂಡಿಸ್ ಹಾಣಿ ವಿನ್ಯಾಸಾಂತ್ ಸಾಂಗಾತ್ ದಿಲಾ ತರ್, ಕೊಂಕ್ಣಿ ಮೋಗಿ ತಶೆಂ ವಿಶನ್ ಕೊಂಕಣಿ ಪ್ರವರ್ತಕ್ ಮೈಕಲ್ ಡಿ ಸೊಜಾ ಹಾಣಿ ಆರ್ಥಿಕ್ ಕುಮಕ್ ದಿಲ್ಯಾ.
ಪರ್ಗಾಂವಾಂತ್ ಜಿಯೆಂವ್ಚ್ಯಾ ಮಂಗ್ಳುರಿ ಕಥೊಲಿಕ್ ಲೊಕಾಚ್ಯಾ ಭಕ್ತೆಚೊ ಆವಾಜ್ ‘ಕೊಂತಾಮಣಿ’ ಕಾಂತಾರಾಂತ್ ಆಟಾಪ್ಲಾ ಆನಿ ಕೊಂತಾಚ್ಯಾ ಭಕ್ತಿಪಣಾಚೊ ಸಂದೇಶ್ ಆಯ್ಕೊವ್ಪ್ಯಾಂಕ್ ದಿತಾ ಮ್ಹಣ್ ಜೇಸನ್ ಆನಿ ಮರ್ವಿನಾನ್ ಹ್ಯಾ ಕಾಂತಾರಾಂ ವಿಶ್ಯಾಂತ್ ಅಭಿಪ್ರಾಯ್ ಉಚಾರ್ಲ್ಯಾ ಆನಿ ಜುಲೈ ಮಯ್ನ್ಯಾಚಾ ಅಕೇರಿಕ್ ಲೊಕಾರ್ಪಣ್ ಜಾಂವ್ಚ್ಯಾ ಹ್ಯಾ ಮರಿಯಾಳ್ ಕಾಂತಾರಾಕೀ ಜೆಎಂ ರಾಗಾಸ್ ಮ್ಯೂಜಿಕ್ ಕ್ರಿಯೇಶನ್ಸ್ ಪದಾಂ ಆನಿ ಗೀತಾಂಕ್ ಮೆಳ್ಲ್ಲೊಚ್ ಪ್ರತಿಸಾದ್ ಮೆಳ್ತಲೊ ಮ್ಹಣ್ ವಿಶ್ವಾಸ್ ವೆಕ್ತ್ ಕೆಲಾ.
