ಆಮಿ ಸ್ತ್ರೀಯಾಂನಿ ಸಗ್ಳ್ಯೊ ಅಡ್ಕಳ್ಯೊ ಮೊಡುನ್ ನವಿ ವಾಟ್ ತಯಾರ್ ಕರುಂಕ್ ಜಾಯ್, ಅಸಲಿ ಏಕ್ ವಾಟ್ – ಹೆರ್ ಸ್ತ್ರೀಯಾಂನಿ ಸುರಕ್ಶಿತ್, ಶಾಂತೆನ್ ಚಲೊಂಕ್ ವೆಚೆ ತಸಲಿ” ಮ್ಹಣಾಲಿ ಮಂಗ್ಳುರ್ ಸಾಂ. ಲುವಿಸ್ ( ಪರಿಗಣಿತ್ ವಿಶ್ವವಿದ್ಯಾಲಯ್) ಸೋಶಿಯಲ್ ವರ್ಕ್ ವಿಭಾಗಾಚಿ ಮುಕೆಲಿ ಆನಿ ಸಾಂಗಾತಿ ಪ್ರಾಧ್ಯಾಪಕ್ ದೊ| ವಿದ್ಯಾ ವಿನುತಾ ಡಿ ಸೊಜಾ.
ದೊ| ವಿದ್ಯಾ ಆಯ್ತಾರಾ, ಜುಲಾಯ್ 5 ವೆರ್, ಮಾಜಿಸ್ ಸಭಾಸಾಲಾಂತ್, ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾಚ್ಯಾ ಕೊಂಕ್ಣಿ ಸಂಸ್ಥ್ಯಾಚಿ ಮಯ್ನ್ಯಾಳಿ ಕಾರ್ಯಾವಳ್ ಬೊಲ್ಕಾಂವ್ 16 ವ್ಯಾ ಅಂಕ್ಯಾಂತ್ ವೆಗ್ಳಿ ಮ್ಹಳ್ಳ್ಯಾ ವಿಶಯಾಚೇರ್ ಉಲಯ್ತಾಲಿ.
ಆಪ್ಲೆ ವಿಚಾರ್ ಚಾ. ಫ್ರಾ. ದೆ ಕೊಸ್ತಾಚ್ಯಾ ‘ಆಮ್ಗೆರ್ ಏಕ್ ಬಾಬು ಜಾಲಾ’ ಪದಾ ಥಾವ್ನ್ ಸುರು ಕೆಲ್ಲ್ಯಾ ತಿಣೆ ’ಘರಾಂತ್ ಆಮ್ಕಾಂ ವಾಸ್ರಾಂ ತೆಗಾಂ, ತಾಂಚೆರ್ ಕೊಣೀ ಶಿಣಾನಾ, ಆಮಿಂಯ್ ಚೆಡ್ವಾಂ ತೀಂಯ್ ಚೆಡ್ವಾಂ, ಪೆಲ್ಯಾನ್ ಸರಾ ಮ್ಹಣಾನಾ’ ವೊಳಿಂಚೇರ್ ವಿಶೇಸ್ ಭೊರ್ ದಿಲೊ ಆನಿ ಆಜ್ಯೀ ಕೊಂಕ್ಣಿ ಪದಾಂನಿ ಸ್ತ್ರೀಯಾಂಕ್ ಜಳ್ಚಿ ಆನಿ ಉಜ್ವಾಡ್ ದಿಂವ್ಚಿ ವಾತ್ ಮ್ಹಣ್ ಪಿಂತ್ರಾಯ್ತಾತ್. ಕಿತ್ಯಾಕ್ ಸ್ತ್ರೀಯೆನ್ಚ್ ಆಪ್ಣೆಂ ಜಳೊನ್ ಉಜ್ವಾಡ್ ದೀಜೆ ? ಮ್ಹಣ್ ಸವಾಲ್ ಉಟಯ್ಲೆಂ. ಬಸ್ಸಾಂನಿ ಪಯ್ಣ್ ಕರ್ತಾನಾ ವಾ ಸರ್ವಜಣಿಕ್ ಜಾಗ್ಯಾಂನಿ ಚುಕಿಚ್ಯಾ ಸ್ಪರ್ಶಾಕ್ ಫಕತ್ ಘುಂವೊನ್ ರಾವೊನ್ ಪ್ರತಿಕ್ರಿಯಾ ದಿಂವ್ಚ್ಯಾ ಬದ್ಲಾಕ್ ವ್ಹಡ್ ತಾಳ್ಯಾನ್ ಆವಾಜ್ ಕಾಡುಂಕ್ ಸ್ತ್ರಿಯಾಂನಿ ಶಿಕಜೆ ಮ್ಹಣ್ ತಿಣೆ ಉಲೊ ದಿಲೊ.
ಸಂಯ್ಭಾನ್ ಸ್ತ್ರೀಯೊ ವೆಗ್ಳ್ಯೊ, ಸ್ತ್ರೀಯೊ ಸಗ್ಳೆಂ ಉಡಾಸ್ ದವರ್ತಾತ್, ಸ್ತ್ರೀಯಾಂನಿ ಉಂಚ್ಲೆಂ ಶಿಕಪ್ ಜೊಡ್ಚೆಂ ಗರ್ಜೆಚೆಂ, ಆವಯ್ ಜಾಲ್ಯಾ ಉಪ್ರಾಂತೀ ಸ್ತ್ರಿಯೆಕ್ ಖಾಸ್ಗಿ ವೇಳ್ ಜಾಯ್, ಮತಿಚ್ಯಾ ಭಲಾಯ್ಕೆ ವಿಶ್ಯಾಂತ್ ಉಲಂವ್ಕ್ – ಸಲಹಾ ಘೆಂವ್ಕ್ ಪಾಟಿಂ ಕರ್ಚೆಂ ನಯ್ – ಅಶೆಂ ಜಾಯ್ತ್ಯಾ ವಿಶಯಾಂಚೇರ್ ತಿಣೆ ದಾಕ್ಲೆ, ಅನ್ಭೊಗ್ ಆನಿ ಸಂಸೊದ್ ಸಮೊರ್ ದವರುನ್ ತಾಕ್ತೆನ್ ಆಪ್ಲೆ ವಿಚಾರ್ ಮಾಂಡ್ಲೆ. ವಿಚಾರ್ ಮಂಡನಾ ಉಪ್ರಾಂತ್ ಭಾಸಾಭಾಸ್ ಚಲ್ಲಿ.
ಕಾರ್ಯಾವಳಿಚ್ಯಾ ಸುರ್ವಾತಿರ್ ಬೊಲ್ಕಾಂವ್ ಕಾರ್ಯಾವಳಿಚೊ ಸಂಯೋಜಕ್ ಎಚ್ಚೆಮ್, ಪೆರ್ನಾಲ್ ಹಾಣೆ ದೊ| ವಿದ್ಯಾ ವಿನುತಾ ಡಿ ಸೊಜಾ ಹಿಚಿ ಮಟ್ವ್ಯಾನ್ ಒಳಕ್ ಕರುನ್ ದಿಲಿ ಆನಿ ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯ್, ಕೊಂಕ್ಣಿ ಸಂಸ್ಥ್ಯಾಚೊ ದಿರೆಕ್ತೊರ್ ಮಾ| ಬಾ| ಪ್ರಶಾಂತ್ ಮಾಡ್ತಾ ಜೆ. ಸ. ಹಾಣಿ ಬೊಲ್ಕಾಂವ್ ಡಾಯ್ರಿ ದೀವ್ನ್ ಯೆವ್ಕಾರ್ ಮಾಗ್ಲೊ.
ಕೊಂಕ್ಣಿ ಸಂಸ್ಥ್ಯಾಚೊ ಸಲಹಾದಾರ್ ದೊ| ಆಲ್ವಿನ್ ಡೆಸಾ, ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯ್, ಕೊಂಕ್ಣಿ ವಿಭಾಗಾಚಿ ಮುಕೆಲಿ ಪ್ಲೋರಾ ಕಾಸ್ತೆಲಿನೊ ಕಾರ್ಯಾವಳಿಕ್ ಹಾಜರ್ ಆಸ್ಲಿಂ. ಕೊಂಕ್ಣಿ ಸಂಸ್ಥ್ಯಾಚೊ ಕಾರ್ಯಕ್ರಮ್ ಸಂಯೋಜಕ್ ಪಿಂಟೊ ವಾಮಂಜೂರ್ ಆನಿ ವನಿತಾ ಹಾಣಿ ಕಾರ್ಯಾವಳಿಕ್ ಸಹಕಾರ್ ದಿಲೊ.
