ದೆರೆಬಯ್ಲ್ ಫಿರ್ಗಜೆಚ್ಯಾ ಕ್ರಿಸ್ಟನ್ ಜೋಶುವಾ ಮಿನೇಜಸ್ ಹಾಣೆ ಮಂಗ್ಳುರ್ ದಿಯೆಸೆಜಿಚ್ಯಾ ಕಥೊಲಿಕ್ ಯುವ ಸಂಚಾಲನಾಚ್ಯಾ ಚರಿತ್ರೆಂತ್ ಅತ್ಯಧಿಕ್ ಮತಾಂ ಸಾಂಗಾತಾ ಜಿಕೊನ್ ದಾಕ್ಲೊ ರಚ್ಲಾ. 2025 -26 ಆವ್ಧೆಕ್ ರುಜಾಯ್ ಕಾಥೆದ್ರಾಲಾಚ್ಯಾ ಸಭಾಂಗ್ಣಾಂತ್ ಚಲ್ಲೆಲ್ಲ್ಯಾ ಸಂಚಾಲನಾಚ್ಯಾ 80 ವ್ಯಾ ಜೆರಾಲ್ ಎಲಿಸಾಂವಾಂತ್ ಹಿ ವಿಂಚವ್ಣ್ ಜಾಲಿ.
ದೆರೆಬಯ್ಲ್ ಫಿರ್ಗಜೆಚ್ಯಾ ಎಡ್ವರ್ಡ್ ಆನಿ ಬೆನೆಡಿಕ್ಟಾ ಮಿನೇಜಸ್ ಜೊಡ್ಯಾಚೊ ಪೂತ್, ಕ್ರಿಸ್ಟನಾನ್ ಪ್ರಾಥಮಿಕ್ ಶಿಕಪ್ ಕುಂಟಿಕಾನ ಸಾಂ. ಆನ್ನ್ ಇಸ್ಕೊಲಾಂತ್ ಕೆಲೆಂ. ಸಾತ್ವ್ಯಾ ಆನಿ ಧಾವ್ಯಾ ವರ್ಗಾಂತ್ ಶಿಕ್ತಾನಾಂಚ್ ತೋ ವಿದ್ಯಾರ್ಥಿ ಮುಕೆಲಿ ಆಸ್ಲೊ. ಸಾಂ. ಲುವಿಸ್ ಶಿಕ್ಪಾಸಂಸ್ಥ್ಯಾಂನಿ ಪದ್ವೆಪೂರ್ವ್ ಆನಿ ಪದ್ವೆ ಶಿಕಪ್ ಜೊಡ್ಲಲೊ ತೋ 2023 -24 ವ್ಯಾ ವರ್ಸಾಕ್ ಸಾಂ. ಲುವಿಸ್ ಕೊಲೆಜಿಚ್ಯಾ ವಿದ್ಯಾರ್ಥಿ ಸಂಘಟನಾಚೊ ಅಧ್ಯಕ್ಷ್ ಜಾವ್ನ್ ವಿಂಚೊನ್ ಆಯಿಲ್ಲೊ.
ಸಮುದಾಯ್ ಸೆವೆಂತ್ ಕಾರ್ಯಾಳ್ ಜಾವ್ನಾಸ್ಚ್ಯಾ ಕ್ರಿಸ್ಟನಾನ್ ವೈಸಿಎಸ್ ಸಂಘಟನಾಚೊ ಉಪಾಧ್ಯಕ್ಷ್ ಆನಿ ಅಧ್ಯಕ್ಷ್, ಐಸಿವೈಎಮ್ ದೆರೆಬಯ್ಲ್ ಫಿರ್ಗಜ್ ಘಟಕಾಚೊ ಅಧ್ಯಕ್ಷ್ ಆನಿ ಮಂಗ್ಳುರ್ ದಿಯೆಸೆಜಿಚ್ಯಾ ಸಿಟಿ ವಾರಾಡೊ ಐಸಿವೈಎಮ್ ಸಂಘಟನಾಚೊ ಅಧ್ಯಕ್ಶ್ ತಶೆಂ ಕೇಂದ್ರೀಯ್ ಕಾರ್ಯಾಕಾರಿ ಸಮಿತಿಚೊ ಸಾಂದೊ ಜಾವ್ನ್ಯೀ ಸೆವಾ ದಿಲ್ಯಾ.
ಎನ್ಎಸ್ಯುಐ ಸಂಘಟನಾಂತೀ ಕಾರ್ಯಾಳ್ ಆಸ್ಚೊ ಕ್ರಿಸ್ಟನ್ ತವಳ್ – ತವಳ್ ಸಮಾಜಿಕ್ ಮುದ್ದ್ಯಾಂಚೇರ್ ಪ್ರತಿಭಟನಾಂ / ಸಭಾ ಮಾಂಡುನ್ ಹಾಡ್ತಾ ಆನಿ ವಿದ್ಯಾರ್ಥಿ ತಶೆಂ ಯುವಜಣಾಂಚ್ಯಾ ಹಕ್ಕಾಂ ಖಾತಿರ್ ನಿರಂತರ್ ಆವಾಜ್ ಉಟಯ್ತಾ.
ತಾಚೊ ಭಾವ್ ವಾಸ್ತುಶಿಲ್ಪಿ ಗ್ಯಾವಿನ್ ಮಿನೇಜಸ್ ಏಕ್ ಉತ್ತೀಮ್ ಗಾವ್ಪಿ ತಶೆಂ ಭಯ್ಣ್ ಇವಾಂಜೆಲ್ ಬ್ಲೆಸ್ಸಿ ಸಯ್ತ್ ಕಲಾಕಾರ್ ಜಾವ್ನ್ ಸಮುದಾಯಾಂತ್ ಕಾರ್ಯಾಳ್ ಆಸಾತ್.
