ಕೊಂಕಣಿ ತಶೆಂ ಕನ್ನಡ ಕವಿ ವಿಲ್ಸನ್ ಕಟೀಲ್ ಹಾಕಾ ಕನ್ನಡ ಸಾಹಿತ್ಯ ಪರಿಷತಾನ್ ದಿಂವ್ಚಿ 2022 ವ್ಯಾ ವರ್ಸಾಚಿ ಪ್ರತಿಶ್ಟಿತ್ ಶ್ರೀವಿಜಯ ಸಾಹಿತ್ಯ ದತ್ತಿ ಪ್ರಶಸ್ತಿ ಫಾವೊ ಜಾಲ್ಯಾ. ಕನ್ನಡ ಸಾಹಿತ್ಯ ಪರಿಷತ್ ಹರ್ಯೆಕಾ ವರ್ಸಾ ದೊಗಾಂ ಜಣಾಂಕ್ ಹಿ ಪ್ರಶಸ್ತಿ ದಿತಾ. 2021 ವ್ಯಾ ವರ್ಸಾ ಥಾವ್ನ್ 2025 ವರ್ಸಾ ಪರ್ಯಾಂತ್ ಹರ್ ವರ್ಸಾ ದೊಗಾಂ ಸಾಹಿತಿಂ ಲೆಕಾರ್ ಧಾ ಜಣಾಂ ಹ್ಯಾ ಪ್ರಶಸ್ತೆಕ್ ವಿಂಚುನ್ ಆಯ್ಲ್ಯಾಂತ್. ಹರ್ ಪುರಸ್ಕೃತಾಕ್ ರು. 60,000 ಸವೆಂ ಯಾದಿಸ್ತಿಕಾ ಆನಿ ಪ್ರಶಸ್ತಿ ಫಲಕ್ ದೀವ್ನ್ ಮಾನ್ ಕರ್ತಾತ್.
ವಿಲ್ಸನಾಚೊ ಕನ್ನಡ ಕವಿತೆಂಚೊ ಪುಂಜೊ ‘ನಿಷೇಧಕ್ಕೊಳಪಟ್ಟ ನೋಟು’ ಸಾಹಿತ್ಯ್ ಪ್ರೇಮಿಂಚಿಂ ಮನಾಂ ಜಿಕುಂಕ್ ಸಕ್ಲ್ಲೊ ಆನಿ ಚರ್ಚೆಕ್ ವೊಳೊಗ್ ಜಾಲ್ಲೊ ಪುಂಜೊ. ಹಾಕಾ ಎದೊಳ್ ಚ್ ’ಯುವ ಕವಿಗಳ ಪ್ರಥಮ’ ವಿಭಾಗಾಂತ್ ಕನ್ನಡ ಸಾಹಿತ್ಯ ಅಕಾಡೆಮಿಚೊ ಪುರಸ್ಕಾರ್, ಕೆ. ಬಿ. ಸಿದ್ದಯ್ಯ ಪುರಸ್ಕಾರ್, ದಾಂತಿ ಪುರಸ್ಕಾರ್ ಪ್ರಾಪ್ತ್ ಜಾಲಾ. ಹ್ಯಾ ಭಾಯ್ರ್ ವಿಲ್ಸನಾಕ್ ಬೆಟಗೇರಿ ಕೃಷ್ಣ ಶರ್ಮ ಸ್ಮಾರಕ ಟ್ರಸ್ಟಾನ್ ದಿಂವ್ಚೊ ಪುರಸ್ಕಾರ್ಯೀ ಪ್ರಾಪ್ತ್ ಜಾಲಾ. ವಿಲ್ಸನಾಚ್ಯೊ ಕವಿತಾ ಕರ್ನಾಟಕ ವಿಶ್ವವಿದ್ಯಾಲಯ ಧಾರವಾಡ, ನ್ಯಾಷನಲ್ ಕಾಲೇಜು ಬೆಂಗಳೂರು ತಸಲ್ಯಾ ಶಿಕ್ಪಾಸಂಸ್ಥ್ಯಾಂನಿ ವಿದ್ಯಾರ್ಥಿಂಕ್ ಪಾಠ್ ಜಾವ್ನ್ ಶಿಕೊಂಕ್ ವಿಂಚುನ್ ಆಯ್ಲ್ಯಾತ್.
ಶ್ರೀವಿಜಯ – ಕನ್ನಡ ಸಾಹಿತ್ಯ್ ಚರಿತ್ರೆಂತ್ ಪಯ್ಲೊ ಆನಿ ಬೊವ್ ಫಾಮಾದ್ ಆಧಾರ್ ಗ್ರಂಥ್ ಜಾವ್ನ್ ಆಸ್ಚೊ ’ಕವಿರಾಜ ಮಾರ್ಗ’ ಹಾಚೊ ಬರಯ್ಣಾರ್. ಚಡುಣೆಂ ಕ್ರಿ. ಉ. 850 ವೊ ತಾಚೊ ಕಾಳ್. ಕನ್ನಡಾಚೊ ಫಾಮಾದ್ ಕವಿ ಪಂಪಚ್ಯಾಕೀ ಆದಿಂ, ತವಳ್ಚ್ಯಾ ರಾಷ್ಟ್ರಕೂಟ ರಾಯಾಂಚ್ಯಾ ಆಸ್ಥಾನಾಂತ್ ತೊ ಜಿಯೆಲ್ಲೊ. ಅಸಲ್ಯಾ ಪ್ರಾಚೀನ್ ಕವಿಚ್ಯಾ ನಾಂವಾರ್ 45 ವರ್ಸಾಂ ಸಕಲ್ಲ್ಯಾ ಪ್ರಾಯೆಚ್ಯಾಂಕ್ ಹಿ ದತ್ತಿ ಪ್ರಶಸ್ತಿ ಕನ್ನಡ ಸಾಹಿತ್ಯ ಪರಿಷತ್ ದಿತಾ.
ದೀಕ್ ಆನಿ ಪೀಕ್, ಪಾವ್ಳೆ, ಪಾಕ್ಳ್ಯೊ (ಸಂಪಾದಿತ್ ಕೃತಿ), ಎನ್ಕೌಂಟರ್, ಚಿತುರ್ಲೆಚೆ ಅಚ್ಚೇ ದಿನ್ – ಹೆ ವಿಲ್ಸನಾಚೆ ಕೊಂಕ್ಣಿ ಕವಿತಾ ಜಮೆ. ಹಾಂತು ಎನ್ಕೌಂಟರ್ ಕವಿತಾ ಜಮ್ಯಾಕ್ ವಿಶ್ವ ಕೊಂಕ್ಣಿ ಕೇಂದ್ರಾನ್ ದಿಂವ್ಚಿ ಶ್ರೀಮತಿ ವಿಮಲಾ ವಿ. ಪೈ. ಕವಿತಾ ಕೃತಿ ಪುರಸ್ಕಾರ್ ಫಾವೊ ಜಾಲಾ. ನಿಷೇಧಕ್ಕೊಳಪಟ್ಟ ಒಂದು ನೋಟು – ತಾಚ್ಯಾ ಕನ್ನಡ ಕವಿತೆಂಚೊ ಪುಂಜೊ.
