ಸಾಹಿತ್ಯ್ ಶೆತಾಂತ್ ರೋಶು, ಬಜ್ಪೆ ನಾಂವಾನ್ ಒಳ್ಕಿಚೊ ಶ್ರೀ ರೋಶನ್ ಮೆಲ್ಕಿ ಸಿಕ್ವೇರಾ ಹಾಚೊ 10 ವೊ ಕೊಂಕ್ಣಿ ಪುಸ್ತಕ್, ತಾಚಿ ದುಸ್ರಿ ಕಾದಂಬರಿ ‘ಹೊ ಮ್ಹಜೊ ಅಪ್ರಾಧ್’ ಜುಲೈ 06 ವೆರ್ ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ ದಫ್ತರಾಂತ್, ಅಕಾಡೆಮಿಚೊ ಅಧ್ಯಕ್ಷ್ ಸ್ಟ್ಯಾನಿ ಅಲ್ವಾರಿಸ್ ಹಾಣಿಂ ಉಗ್ತಾವಣ್ ಕೆಲೊ. ಹ್ಯಾ ವೆಳಾರ್ ಅಕಾಡೆಮಿಚೊ ರಿಜಿಸ್ಟ್ರಾರ್ ರಾಜೇಶ್ ಜಿ, ಸ್ಥಾಯಿ ಸಮಿತಿಚೆ ಸಾಂದೆ ನವೀನ್ ಲೋಬೊ, ದಯಾನಂದ ಮಡ್ಕೇಕರ್, ಸಮರ್ಥ್ ಭಟ್ ಆನಿ ರೊನಾಲ್ಡ್ ಕ್ರಾಸ್ತಾ ಹಾಜರ್ ಆಸ್ಲ್ಲೆ.
2025 ವ್ಯಾ ವರ್ಸಾ ಎಂ.ಸಿ.ಸಿ. ಬ್ಯಾಂಕ್ ಹಾಂಚ್ಯಾ ಪ್ರಾಯೋಜಕ್ಪಣಾಖಾಲ್ ಆಸಾ ಕೆಲ್ಲ್ಯಾ ಕಾದಂಬರಿ ಸ್ಪರ್ಧ್ಯಾಂತ್ ರೋಶುಚ್ಯಾ ‘ಹೊ ಮ್ಹಜೊ ಅಪ್ರಾಧ್’ ಕಾದಂಬರಿಕ್ ಪಯ್ಲೆಂ ಬಹುಮಾನ್ ಲಾಬ್ಲ್ಲೆಂ ಆಸಾ.ಕೊಂಕ್ಣಿ ಸಾಹಿತ್ಯಾಂತ್ ಆಪ್ಲ್ಯಾ ಸೊಳಾ ವರ್ಸಾಂ ಪ್ರಾಯೆರ್ಥಾವ್ನ್ಂಚ್ ಲಿಖುಂಕ್ ಸುರ್ವಾತ್ ಕೆಲ್ಲ್ಯಾ ರೋಶುನ್ 2015 ವ್ಯಾ ವರ್ಸಾ ಅಪ್ಲೊ ಪಯ್ಲೊ ಕೊಂಕಣಿ ಪುಸ್ತಕ್ ವಿನೋದಾಂಚೊ ಪುಂಜೊ ‘ಹಾಸ್ಯ್ ಎಟ್ಯಾಕ್’ ಮೊಕ್ಳಿಕ್ ಕೆಲೊ. ತ್ಯಾ ನಂತರ್ ಹರ್ಯೇಕ್ ವರ್ಸಾ ಮ್ಹಳ್ಳೆಬರಿಂ ತಾಣೆಂ ಪುಸ್ತಕ್ ಪರ್ಗಟ್ ಕೆಲ್ಯಾತ್. ತೀಂತ್ ಜಾಲೆಂ ರಗತ್ (2018), ಗಿರ್ಬುಜಿ (2021) – ತಾಚ್ಯಾ ಕವಿತೆಚಿಂ ಫುಸ್ತಕಾಂ ತರ್, ಹಾಸ್ಯ್ ಎಟ್ಯಾಕ್ (2015),ಓಪನ್ ಹಾಸ್ಯ್ ಸರ್ಜರಿ (2017), ಫೆಲಿಸ್ ನವಿಡಾಡ್ (2020), ಪೋಲಿ-ಟಿಕಲ್ (2023) ಆನಿ ಕೊಂಕ್ಣಿ ಸರ್ಕಸ್ (2025) – ವಿನೋದಿಕ್ ಪುಸ್ತಕಾಂ. ಪೇಯಿಂಗ್ ಗೆಸ್ಟ್ ಆನಿ ಹೆರ್ ಕಥಾ (2022) – ಮಟ್ವ್ಯಾ ಕಾಣಿಯಾಂಚೆಂ ಪುಸ್ತಕ್ ತರ್, ಸಾಂಡುನ್ ಘಾಲ್ಲಿ ಶೆಳಿ (2024), ಹೊ ಮ್ಹಜೊ ಅಪ್ರಾಧ್ (2026) – ಕಾದಂಬರಿ.
ರೋಶುನ್ ಕವಿತಾ, ಭುರ್ಗ್ಯಾಂಚ್ಯೊ ಕವಿತಾ, ವಿನೋದ್, ರಾಜಕೀಯ್ ವಿಡಂಬನಾಂ, ಮಟ್ವ್ಯೊ ಕಾಣಿಯೊ ತಶೆಂಚ್ ಕಾದಂಬರಿ ಮ್ಹಣೊನ್ ಎದೊಳ್ ವರೇಗ್ ಧಾ ಪುಸ್ತಕಾಂ ಪರ್ಗಟ್ ಕೆಲ್ಯಾಂತ್. ತ್ಯಾ ಭಾಯ್ರ್ ತಾಣೆಂ ಲೇಖನಾಂ, ಲಲಿತ್ ಪ್ರಬಂಧ್, ಚಿಕ್ಣಿ ಕಥಾ, ಗಝಲ್ ಬರಯ್ಲ್ಯಾತ್. ತಾಣೆ ಕೊಂಕ್ಣಿ ಪದಾಂಯ್ ಬರಯ್ಲ್ಯಾಂತ್, ವಿಡಿಯೋಯ್ ಕೆಲ್ಯಾತ್.
ಕನ್ನಡ ಭಾಶೆಚೆ ತೀನ್ ನಾಟಕ್ ತಾಣೆ ಕೊಂಕ್ಣೆಕ್ ತರ್ಜುಮೊ ಕೆಲ್ಯಾತ್ ಆನಿ ಅಸ್ತಿತ್ವ ಪಂಗ್ಡಾನ್ ಹ್ಯಾ ನಾಟಕಾಚಿಂ ಪ್ರದರ್ಶನಾಂ ಕೆಲ್ಯಾಂತ್. ಹೋಂ ಸ್ವೀಟ್ ಹೋಂ (2017), ಆದಾಂವ್ ಎವೆನ್ ಉಗಡ್ಲೆ ದೊಳೆ, ರಚ್ನಾರಾ ಅತಾಂ ತುಂಚ್ ಪಳೆ (2020), ವಿಶೆವ್ ಅಪಾರ್ಟ್ಮೆಂಟ್ (2022) ತಾಣೆ ತರ್ಜುಮೊ ಕೆಲ್ಲೆ ನಾಟಕ್.
ಆಯ್ಲೆವಾರ್ ಮೊಕ್ಳಿಕ್ ಜಾಲ್ಲೊ ರೋಶುಚೊ ಧಾವೊ ಪುಸ್ತಕ್ ಜಾವ್ನಾಸೊನ್ ಕೊಂಕ್ಣಿ ಸಾಹಿತ್ಯ್ ಶೆತಾಂತ್ ರೋಶುಚಿ ತಾಂಕ್ ದಾಕಯ್ತಾ. ಹರ್ಯೇಕ್ ಪುಸ್ತಕ್ ಪರ್ಗಟ್ ಕರ್ತಾನಾ ರೋಶುನ್ ಸಾಂಬಾಳ್ಚಿ ಜಾಗ್ರುತ್ಕಾಯ್, ವಿನ್ಯಾಸ್, ಸಾಹಿತ್ಯಾಚೆಂ ಮಟ್ಟ್ ತಶೆಂಚ್ ವಿಕ್ರೊ ರೋಶುಕ್ ಜಾಯ್ತೆ ಪುರಸ್ಕಾರ್ ಹಾಡ್ನ್ ದೀಂವ್ಕ್ ಪಾವ್ಲ್ಯಾತ್. ಸಮನ್ವಯ ಸಂಸ್ಥ್ಯಾಥಾವ್ನ್ ಯುವಕಿರಣ್ ಪುರಸ್ಕಾರ್ 2013, ಕಿಟಾಳ್ ಯುವ ಪುರಸ್ಕಾರ್ – 2017, ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪುರಸ್ಕಾರ್ 2018 (ತೀಂತ್ ಜಾಲೆಂ ರಗತ್), ಗೋವಾ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪುರಸ್ಕಾರ್ – 2019, ಡಾ. ಟಿ.ಎಂ.ಎ.ಪೈ. ಪ್ರಶಂಸಾರ್ಹ್ ಪುರಸ್ಕಾರ್ – 2020, ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪುರಸ್ಕಾರ್ 2022 (ಪೇಯಿಂಗ್ ಗೆಸ್ಟ್), ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪುರಸ್ಕಾರ್ 2025 (ಕೊಂಕ್ಣಿ ಸರ್ಕಸ್) – ತಾಕಾ ಲಾಭ್ಲ್ಲೆ ಪುರಸ್ಕಾರ್.
‘ಹೊ ಮ್ಹಜೊ ಅಪ್ರಾಧ್’ ಬೂಕ್ ರೋಶುಚಿ ದುಸ್ರಿ ಕಾದಂಬರಿ ಆಸೊನ್ ಕಾದಂಬರಿ ಸ್ಪರ್ಧ್ಯಾಂತ್ ಹಾಕಾ ಪಯ್ಲೆಂ ಬಹುಮಾನ್ ಲಾಭ್ಲಾಂ. ಹೊ ಬೂಕ್ 154 ಪಾನಾಂಚೊ ಆಸೊನ್ ಮುಖ್ಪಾನ್ ವಿನ್ಯಾಸ್ ವಿಲ್ಸನ್ ಕಯ್ಯಾರ್ ಹಾಣೆಂ ಸಜಯ್ಲಾಂ. ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿನ್ ಹೊ ಪುಸ್ತಕ್ ಪರ್ಗಟ್ ಕೆಲಾ ಆನಿ ಚೇತನಾ ಪ್ರಿಂಟರ್ಸ್, ಮಂಗ್ಳುರ್ ಹಾಣಿಂ ಭೋವ್ ಸುಂದರ್ ರಿತಿನ್ ಛಾಪುನ್ ದಿಲಾ. ಹ್ಯಾ ಬುಕಾಚೆಂ ಮೋಲ್ ಫಕತ್ 200/-. ಪ್ರತಿ ಜಾಯ್ ಆಸ್ಲ್ಲ್ಯಾನಿಂ ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ ಹಾಚೆಂ ಲಾಲ್ಬಾಗ್ ದಫ್ತರ್ ವಾ ರೋಶು, ಬಜ್ಪೆಕ್ ಸಂಪರ್ಕ್ ಕರ್ಚೊ ವಾ 9880119515 ನಂಬ್ರಾಕ್ ಸಂಪರ್ಕ್ ಕರ್ಚೆಂ. ಗೂಗಲ್ ಪೇ ವಾ ಫೋನ್ ಪೇ ಕೆಲ್ಯಾರ್ ಪುಸ್ತಕ್ ಟಪ್ಪಲಾ ಮುಕಾಂತ್ರ್ ಘರಾ ಪಾವಂವ್ಚಿ ವೆವಸ್ತಾ ಆಸಾ.
ಆಧುನಿಕ್ ಕಾಳಾರ್ ಸ್ತ್ರೀಯೆ ವಯ್ರ್ ಜಾಯ್ತೆ ಜುಲುಮ್ ಚಲ್ತಾತ್. ಥೊಡೆಪಾವ್ಟಿಂ ಜಿವಿತಾಂತ್ ಆಮ್ಕಾಂ ಹರ್ಯೇಕ್ಲೆ ತಿರಸ್ಕಾರ್ ಕರ್ತಾತ್. ತ್ಯಾ ವೆಳಾರ್ ತಿ ವಾ ತೊ ಕಶೆಂ ಜಿಯೆಂವ್ಕ್ ಸಕ್ತಾ, ಕಸಲೆ ಸಮಸ್ಸೆ ಫುಡ್ ಕರ್ತಾ, ಕಿತ್ಯಾ ಖಾತಿರ್ ಜಿಯೆತಾ ಮ್ಹಳ್ಳ್ಯಾಚೆರ್ ಹಿ ಕಾಣಿ ವಿಣ್ಲ್ಯಾ. ಗಲ್ಫಾ ಥಾವ್ನ್ ನಿವೃತ್ತ್ ಜಾವ್ನ್ ಗಾಂವಾಂತ್ ಜಿಯೆಂವ್ಕ್ ಆಯಿಲ್ಲ್ಯಾ ದಾದ್ಲ್ಯಾಚಾ ಜಿಣಿಯೆಚೇರ್ ಬರಯಿಲ್ಲಿ ರೋಶುಚಿ ಪಯ್ಲಿ ಕಾದಂಬರಿ ‘ಸಾಂಡುನ್ ಘಾಲ್ಲಿ ಶೆಳಿ’ ಹಾಕಾಯ್ ವಾಚ್ಪ್ಯಾನಿಂ ಉತ್ತೀಮ್ ಪ್ರತಿಕ್ರಿಯಾ ದಿಲ್ಲಿ ಆಸಾ. ಕಾದಂಬರಿ ಬರವ್ಪಿ ನಾಂಚ್ ಮ್ಹಣ್ಚ್ಯಾ ಕಾಳಾರ್ ರೋಶುನ್ ತೀನ್ ವರ್ಸಾನಿಂ ದೋನ್ ಕಾದಂಬರಿ ಬರವ್ನ್ ಕಾದಂಬರಿ ಶೆತ್ ಜಿವಾಳ್ ದವರ್ಲಾಂ ಮ್ಹಣ್ಚ್ಯಾಂತ್ ದುಬಾವ್ ನಾ.
ವೃತ್ತೆನ್ ಆರ್ಥಿಕ್ ಸಲಹದಾರ್ ಜಾವ್ನ್ ವಾವುರ್ನ್ ಆಸ್ಚೊ ರೋಶು , ಆಪ್ಲಿ ಪತಿಣ್ ಸಿಂತಿಯಾ ತಶೆಂಚ್ ಭುರ್ಗಿಂ ರೇಜಲ್ ಆನಿ ರೇನಲ್ ಸವೆಂ ಬಜ್ಪೆಂತ್ ವಸ್ತಿ ಕರ್ತಾ.
