ಎಕ್ವಟ್ ಆನಿ ಸೆವಾ ಹ್ಯಾ ಧ್ಯೇಯಾಖಾಲ್ ಎಮಿರೆತಾಂತ್ ಸಮಾಜ್ಮುಖಿ ವಾವ್ರಾಂತ್ ಎಕೀನ್ಪಣಾನ್ ಮೆತೆರ್ ಆಸ್ಚ್ಯಾ ಯುನಾಯ್ಟೆಡ್ ಲೊರೆಟ್ಟೊ ಫ್ರೆಂಡ್ಸ್ ಸಂಘಟನಾನ್ ದುಬಯ್ ಭಲಾಯ್ಕೆ ಪ್ರಾಧಿಕಾರಾಚ್ಯಾ ಆಶ್ರಯಾಖಾಲ್, ಕೆ ಎಲ್ಎಮ್ ಗ್ರೂಪ್ ಹಾಂಚ್ಯಾ ಸಹಯೋಗಾನ್, ಬಾಲಕೃಷ್ಣ ಸಾಲಿಯಾನ್ ಹಾಚ್ಯಾ ಮಾರ್ಗದರ್ಶನಾರ್ ಚವ್ತೆಂ ರಗ್ತಾದಾನ್ ಶಿಬಿರ್ ಆಯ್ತಾರಾ ಜೂನ್ 12 ವೆರ್ ಮಾಂಡುನ್ ಹಾಡ್ಲ್ಲೆಂ. ಹ್ಯಾ ಶಿಬಿರಾಂತ್ ಎಕುಣ್ 126 ಜಣಾಂನಿ ವಾಂಟೊ ಘೆತ್ಲೊ ತರ್, 112 ಜಣಾಂನಿ ರಗತ್ ದಾನ್ ದೀವ್ನ್ ಮನ್ಶಾಜೀವ್ ವಾಂಚಂವ್ಚ್ಯಾ ಮಹತ್ವಾಚ್ಯಾ ಮಿಸಾಂವಾಂತ್ ಹಾತ್ ಮೆಳಯ್ಲೊ.
ಪ್ರೀತಿ ಸೀಮಾ ಡಿ ಸೊಜಾ ಹಿಣೆ ಕಾರ್ಯಾಚೆಂ ಸುಂಕಾಣ್ ಘೆತ್ಲ್ಲೆಂ.
ಕಾರ್ಯಾಂತ್ ಬಾಲಕೃಷ್ಣ ಸಾಲಿಯಾನ್ ಹಾಂಕಾ ತಾಂಚ್ಯಾ ಸಮರ್ಪಿತ್ ವಾವ್ರಾಕ್ ಆನಿ ಮಾರ್ಗದರ್ಶನಾಕ್ ಆನಿ ಕೆ ಎಲ್ ಎಮ್ ಗ್ರೂಪಾ ತರ್ಪೆನ್ ಕುಶಾಲ್ ಡಿ ಸೊಜಾ ಆನಿ ಲೀನಾ ಡಿ ಸೊಜಾ ಹಾಂಕಾ ರಗ್ತಾದಾನ್ ಶಿಬಿರಾಕ್ ಸಹಯೋಗ್ ದಿಲ್ಲ್ಯಾಕ್ ಸನ್ಮಾನ್ ಕೆಲೊ. ಸತತ್ 44 ವೆ ಪಾವ್ಟಿಂ ರಗತ್ ದಾನ್ ದೀನ್ ದಾಕ್ಲೊ ರಚ್ಲಲೊ ಸಂಘಟನಾಚೊ ಸಾಂದೊ ಫ್ಲೊಯ್ಡ್ ಕಿರಣ್ ಮೊರಾಸ್ ಹಾಕಾ ವಿಶೇಸ್ ಮಾನ್ ಕೆಲೊ.
ಯುನಾಯ್ಟೆಡ್ ಲೊರೆಟ್ಟೊ ಫ್ರೆಂಡ್ಸ್ ಹಾಚೊ ಅಧ್ಯಕ್ಷ್ ಡೊನಾಲ್ಡ್ ನೊರೊನ್ಹಾನ್ ಕಾರ್ಯಕಾರಿ ಸಮಿತಿ ಸವೆಂ ಸಹಯೋಗ್ ಆನಿ ಸಹಕಾರ್ ದಿಲ್ಲ್ಯಾ ದುಬಯ್ ಭಲಾಯ್ಕೆ ಪ್ರಾಧಿಕಾರಾಚೊ ಆನಿ ಕೆ ಎಲ್ ಎಮ್ ಗ್ರೂಪಾಚೊ, ಸ್ವಯಂಸೇವಕಾಂಚೊಂ, ಪೋಶಕಾಂಚೊಂ ಆನಿ ಪ್ರಮುಕ್ ಜಾವ್ನ್ ರಗ್ತ್ ದಾನ್ ದಿಲ್ಲ್ಯಾ ದಾನಿಂಚೊಂ ಉಪ್ಕಾರಿ ಮನಾನ್ ಅಬಾರ್ ಮಾಂದ್ಲೊ. ಉಪ್ಕಾರಿ ಮನಾಚಿ ನಿಶಾನಿ ಜಾವ್ನ್ ಹ್ಯಾ ವೆಳಾರ್ ರಗತ್ ದಾನ್ ದಿಲ್ಲ್ಯಾ ಸರ್ವಾಂಕ್ ಪ್ರಮಾಣ್ ಪತ್ರಾಂ ದಿಲಿಂ.
