ಗ್ರಾಹಕಾಂಕ್ ಬರಿ ಸೆವಾ ದಿಂವ್ಚ್ಯಾ ಇರಾದ್ಯಾನ್, ಎಂ.ಸಿ.ಸಿ. ಬ್ಯಾಂಕಾಚೊ ಮೊರ್ಗನ್ಸ್ಗೇಟ್ ಶಾಖೊ ಸನ್ವಾರಾ ಜುಲೈ 25 ವೆರ್ ಮಾರ್ನಮಿಕಟ್ಟಾ ಎಚ್.ಎಚ್. ಡೈಮಂಡ್ ಸಿಟಿಚ್ಯಾ ವಿಶಾಲ್ ಸುವಾತೆಕ್ ಥಳಾಂತರ್ ಜಾಲೊ. ಹ್ಯಾಚ್ ಸುವಾಳ್ಯಾರ್ ಶಾಖ್ಯಾಚೊ 31 ವರ್ಸುಗೆ ಸಂಭ್ರಮ್ ಚಲ್ಲೊ.
ಬ್ಯಾಂಕಾಚೊ ಅಧ್ಯಕ್ಷ್ ಸಹಕಾರ ರತ್ನ್ ಅನಿಲ್ ಲೋಬೊ ಹಾಣಿ ಕಾರ್ಯಾಚೆಂ ಅಧ್ಯಕ್ಷ್ ಸ್ಥಾನ್ ಘೆತ್ಲ್ಲೆಂ. ಕಾಸ್ಸಿಯಾ ಸಾಂ. ರೀತಾ ಫಿರ್ಗಜೆಚೊ ಯಾಜಕ್ ಮಾ| ಬಾ| ರಿತೇಶ್ ರೊಡ್ರಿಗಸ್ ಹಾಣಿ ಶಾಖ್ಯಾಚೆಂ ಆಶೀರ್ವಚನ್ ಕೆಲೆಂ. ಲೊಕರ್ ರೂಮ್ ಮಂಗ್ಳುರ್ ಮ್ಹಾಪಾಲಿಕೆಚೊ ಸಾಂದೊ ತಶೆಂ ಬ್ಯಾಂಕಾಚೊ ಅದ್ಲೊ ನಿರ್ದೇಶಕ್ ಜೇಮ್ಸ್ ವಿಕ್ಟರ್ ಡಿಮೆಲ್ಲೊ ಹಾಣಿ ಉಗ್ತಾಯ್ಲೆಂ.
ಆಪ್ಲ್ಯಾ ಅಧ್ಯಕ್ಶೀಯ್ ಉಲವ್ಪಾಂತ್ ಬ್ಯಾಂಕಾಚೊ ಅಧ್ಯಕ್ಷ್ ಅನಿಲ್ ಲೋಬೊ ಹಾಣಿ ಬ್ಯಾಂಕಾಚೆ ನಿರ್ದೇಶಕ್, ಆಡಳ್ತ್ಯಾ ಮಂಡಳಿ, ಸಿಬಂದಿ, ಗ್ರಾಹಕ್ ಆನಿ ಹಿತಯ್ಶಿಂಚೊ ಮನಾಪಾಸುನ್ ಉಪ್ಕಾರ್ ಭಾವುಡ್ಲೊ. ಎಂಸಿಸಿ ಬ್ಯಾಂಕ್ ರಾಜ್ಯಾಚೊ ಸಹಕಾರಿ ಇಲಾಖೊ ಆನಿ ರಿಜರ್ವ್ ಬ್ಯಾಂಕ್ ಹಾಂಚ್ಯಾ ಜೋಡ್ ನಿಯಂತ್ರಣಾಚೆರ್ ಚಲ್ತಾ ಜಾಲ್ಲ್ಯಾನ್ ಗ್ರಾಹಕಾಂಚ್ಯಾ ಡೆಪೊಸಿಟಾಕ್ ರಾಷ್ಟ್ರೀಯ್ ಮಟ್ಟಾಚ್ಯಾ ಬ್ಯಾಂಕಾಂನಿ ಮೆಳ್ಚಿ ಡಿಐಸಿಜಿಸಿ ವಿಮಾ ಭದ್ತತಿ ಮೆಳ್ತಾ ಮ್ಹಣ್ ತಾಣೆ ಮ್ಹಳೆಂ.
ಕರ್ನಾಟಕಾಂತ್ಲ್ಯಾ 262 ಸಹಕಾರಿ ಬ್ಯಾಂಕಾಂ ಪಯ್ಕಿ ಎಂಸಿಸಿ ಬ್ಯಾಂಕಾಕ್ ಮಾತ್ ವಿಶೇಸ್ ಎನ್ಆರ್ಐ ಸವ್ಲತ್ ಆಸಾ ಮ್ಹಳ್ಳಿ ಗಜಾಲ್ ಕಥೊಲಿಕ್ ಸಮುದಾಯಾಕ್ ಗವ್ರವಾಚಿ ಮ್ಹಳ್ಳ್ಯಾ ತಾಣೆ ಎಂಸಿಸಿ ಬ್ಯಾಂಕಾಂತ್ ಎನ್ಆರ್ಐ ಡಿಪೊಸಿಟ್ ಎದೊಳ್ಚ್ ₹100 ಕೊರೊಡ್ ಉತರ್ಲ್ಯಾತ್ ಮ್ಹಣ್ ಮ್ಹಳೆಂ. ಗ್ರಾಹಕಾಂಚಿಂ ಸೆವಾ ಆನಿ ತೃಪ್ತಿಚ್ ಆಮ್ಚಿ ದಾದೊಸ್ಕಾಯ್ ಮ್ಹಣ್ ಅನಿಲ್ ಲೋಬೊ ಮ್ಹಣಾಲೊ.
ಆಗಸ್ಟ್ 2 ವೆರ್ ಕಟಪಾಡಿಂತ್ ಬ್ಯಾಂಕಾಚೊ 23 ವೊ ಶಾಖೊ ಸುರು ಜಾತಾ ಆನಿ ಪ್ರಸ್ತುತ್ ಆರ್ಥಿಕ್ ವರ್ಸಾಭಿತರ್ 25 ಶಾಖೆ ಕರ್ಚೊ ಶೆವೊಟ್ ಆಮ್ಕಾಂ ಆಸಾ ಮ್ಹಣ್ ತೋ ಮ್ಹಣಾಲೊ.
ಮಾ| ಬಾ| ರಿತೇಶ್ ರೋಡ್ರಿಗಸ್ ಆನಿ ಮುಕೆಲ್ ಸಯ್ರೊ ಆಯಿಲ್ಲ್ಯಾ ಜೇಮ್ಸ್ ವಿಕ್ಟರ್ ಡಿ’ಮೆಲ್ಲೊ ಹಾಣಿ ಆಪ್ಲ್ಯಾ ಸಂದೇಶಾಂನಿ ಬ್ಯಾಂಕಾಕ್ ಬರೆಂ ಮಾಗ್ಲೆಂ. ಕೊಮೆಡಿ ಕಿಂಗ್ ನಾಮಾಂಕಿತ್ ಕಲಾಕಾರ್ ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ ಆನಿ ಹೆಲ್ತ್ ಮಾರ್ಟ್ ಹಾಚೊ ಮಾಲಕ್ ಕೃಷ್ಣ ಬಿಂದುಮನೆ ಹ್ಯಾ ಸುವಾಳ್ಯಾರ್ ಮಾನಾಚೆ ಸಯ್ರೆ ಜಾವ್ನ್ ವೆದಿರ್ ಹಾಜರ್ ಆಸ್ಲೆ.
ಶಿಕ್ಪಾಂತ್ ಸಾಧನ್ ಕೆಲ್ಲ್ಯಾ ಕರೆನ್ ಡಿ’ಕ್ರೂಜ್ ಆನಿ ಕಿನಾರಾ ಡಿ’ಕ್ರೂಜ್ ಹಾಂಕಾ ಕಾರ್ಯಕ್ರಮಾಂತ್ ಸನ್ಮಾನ್ ಕೆಲೊ. ಮೋರ್ಗನ್ಸ್ಗೇಟ್ ಶಾಖ್ಯಾಚಿ ಆದ್ಲಿ ವ್ಯವಸ್ಥಾಪಕಿ ಜಸಿಂತಾ ಸೆರಾವೊ ಹಿಕಾ ಜಲ್ಮಾದಿಸಾಚೆ ಉಲ್ಲಾಸ್ ಪಾಟಯ್ಲೆ. ಜೇಮ್ಸ್ ವಿಕ್ಟರ್ ಡಿ’ಮೆಲ್ಲೊ ಆನಿ ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ ಹಾಂಚೋಯ್ ತಾಣಿ ಕರ್ಚ್ಯಾ ಸಮಾಜ್ಸೆವೆ ಖಾತಿರ್ ಮಾನ್ ಕೆಲೊ.
ಬ್ಯಾಂಕಾಚೆ ನಿರ್ದೇಶಕ್ ಡೇವಿಡ್ ಡಿಸೋಜ, ಮೆಲ್ವಿನ್ ವಾಸ್, ಅನಿಲ್ ಪತ್ರಾವೊ, ರೋಶನ್ ಡಿಸೋಜ, ಐರಿನ್ ರೆಬೆಲ್ಲೊ, ಫೆಲಿಕ್ಸ್ ಡಿ’ಕ್ರೂಸ್, ವೃತ್ತಿಪರ್ ನಿರ್ದೇಶಕ್ ಸಿ.ಜಿ. ಪಿಂಟೊ, ಮಹಾಪ್ರಬಂಧಕ್ ಸುನಿಲ್ ಮಿನೇಜೆಸ್, ಅಧಿಕಾರಿ, ಸಿಬ್ಬಂದಿ ಆನಿ ಗ್ರಾಹಕ್ – ಹಿತಯ್ಶಿ ಕಾರ್ಯಾಕ್ ಹಾಜರ್ ಆಸ್ಲೆ.
ಬ್ಯಾಂಕಾಚೊ ನಿರ್ದೇಶಕ್ ಹೆರಾಲ್ಡ್ ಮೊಂತೇರೊ ಹಾಣಿ ಯೆವ್ಕಾರ್ ಮಾಗ್ಲೊ. ಮೋರ್ಗನ್ಸ್ಗೇಟ್ ಶಾಖ್ಯಾಚೊ ವೆವಸ್ಥಾಪಕ್ ಡೆರಿಲ್ ಲಸ್ರಾದೊ ಹಾಣಿ ದಿನ್ವಾಸ್ ಪಾಟಯ್ಲೆ. ಪ್ರೀತಂ ನೊರೊನ್ಹಾ ಹಾಣೆ ಕಾರ್ಯೆಂ ಚಲವ್ನ್ ವೆಲೆಂ.
