“ಸಾಹಿತ್ಯಾಕ್ ಸಮಾಜೆಚೊ ಆರ್ಸೊ ಮ್ಹಣ್ತಾತ್. ಸಮಾಜೆಂತ್ ಜೆಂ ಘಡ್ತಾ ತಾಚೆಂ ಪ್ರತಿಫಲನ್ ಸಾಹಿತ್ಯಾಂತ್ ದಿಸಜೆ ಮ್ಹಣ್ತಾತ್. ಪುಣ್ ಹಾಂವ್ ಏಕ್ ಮೇಟ್ ಮುಕಾರ್ ವಚುನ್ ಸಾಹಿತ್ಯ್ ಸಮಾಜೆಚೊ ಜೀವ್ ಮ್ಹಣ್ತಾಂ” ಮ್ಹಣಾಲೊ ದೊ| ವಿನ್ಸೆಂಟ್ ಆಳ್ವ, ಉಡುಪಿ ಮಿಲಾಗ್ರೆಸ್ ಕೊಲೆಜಿಚೊ ಪ್ರಾಚಾರ್ಯ್. ದೊ| ಆಳ್ವ ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾಚ್ಯಾ ಕೊಂಕ್ಣಿ ಸಂಸ್ಥ್ಯಾಚಿ ಮಯ್ನ್ಯಾಳಿ ಕಾರ್ಯಾವಳ್ ಬೊಲ್ಕಾಂವ್ ಹಾಂತು ದಣ್ಸಲ್ಲೊ ತಾಳೊ ಹ್ಯಾ ವಿಶಯಾಚೇರ್ ಆಪ್ಲೆ ವಿಚಾರ್ ಮಾಂಡುನ್ ಉಲಯ್ತಾಲೊ.
“ಜಾಗತಿಕ್ ಸಾಹಿತ್ಯಾಚಾ ಅಭ್ಯಾಸಾನ್ ಕೊಂಕ್ಣಿ ಸಾಹಿತ್ಯಾಚಿ ಗಡ್ ವಿಸ್ತಾರಾಯ್ಲಿ. ಜಾಗತಿಕ್ ಸಾಹಿತ್ಯಾಂತ್ ವಾಡೊನ್ ಆಯಿಲ್ಲ್ಯಾ ಸಮೀಕ್ಶೆಚ್ಯಾ ಇಸ್ಕೊಲಾಂಚೊ ಅಭ್ಯಾಸ್ ಕೊಂಕ್ಣಿ ಸಾಹಿತ್ಯ್ ಸಮ್ಜೊಂಕ್ ಉಪ್ಕಾರ್ತಾ. ಸಾಹಿತ್ಯ್ ಸಮೀಕ್ಶೆಚ್ಯಾ ಲಿಬರಲ್ ಹ್ಯೂಮನಿಸಂ ಕಾಳಾರ್ ಬರಯ್ಣಾರಾನ್ ಬರಯಿಲ್ಲೊಚ್ ಕೃತಿಯೆಚೊ ಅರ್ಥ್ ಮ್ಹಣ್ ಆಸ್ಲೊ. ಪೂಣ್ ಜಾಕ್ವೆಸ್ ಡೆರಿಡಾಚ್ಯಾ ವಿಘಟನ್ ಸಿದ್ದಾಂತಾನ್ ಹೆಂ ಚಿಂತಪ್ ಬದ್ಲಿಲೆಂ. ಮುಕಾರ್ ವಾಚ್ಪ್ಯಾಚೊ ಪ್ರತಿಸಾದ್ ಸಿದ್ದಾಂತ್ ಚಾಲ್ತೆಕ್ ಆಯ್ಲೆಂ. ಸಾಹಿತ್ಯ್ ಕೃತಿ ರಚುನ್ ಜಾಲ್ಯಾ ಉಪ್ರಾಂತ್ ಕೃತಿಕಾರ್ ಮೊರ್ತಾ, ಕೃತಿಯೆಕ್ ಖರೊ ಅರ್ಥ್ ವಾಚ್ಪಿ ದಿತಾ ಮ್ಹಣ್ಚ್ಯಾ ಸಿದ್ದಾಂತಾಕ್ ಮ್ಹಜೋಯ್ ಸಹಮತ್ ಆಸಾ” ಮ್ಹಣ್ ಡೊ| ಆಳ್ವಾ ಮ್ಹಣಾಲೊ.
ಆಪ್ಣೆ ಕನ್ನಡ ಥಾವ್ನ್ ಕೊಂಕ್ಣೆಕ್ ಭಾಶಾಂತರ್ ಕೆಲ್ಲ್ಯಾ ದೊ| ಯು. ಆರ್. ಅನಂತಮೂರ್ತಿಚ್ಯಾ ಸಂಸ್ಕಾರ ಕಾದಂಬರಿಚ್ಯಾ ಸಾವ್ಳೆಂತ್, ತಾಂತ್ಲಿಂ ಪ್ರಮುಕ್ ತೀನ್ ಪಾತ್ರಾಂ ವಿಂಚುನ್, ಪ್ರಾಣೇಶಾಚಾರ್ಯ, ನಾರಣಪ್ಪ ಆನಿ ಚಂದ್ರಿ – ಹ್ಯಾ ತೀನ್ ಪಾತ್ರಾಂನಿ ಕಶೆಂ ವೆವೆಗ್ಳ್ಯಾ ರುಪಾಚೆ ದಣ್ಸಲ್ಲೆ ತಾಳೆ ಆಮ್ಕಾಂ ಆಯ್ಕೊಂಕ್ ಮೆಳ್ತಾತ್ ಮ್ಹಳ್ಳೆವಿಶ್ಯಾಂತ್ ದೃಶ್ಟಾಂತಾಂ ದೀವ್ನ್ ವಿಚಾರ್ ಮಾಂಡ್ಲೆ. ದಣ್ಸಲ್ಲ್ಯಾ ತಾಳ್ಯಾ ವಿಶ್ಯಾಂತ್ ಉಲಂವ್ಚೆ ಪ್ರಾಸ್ ಆಮಿ ದಣ್ಸಲ್ಲೆ ತಾಳೆ ಜಾಯ್ಜೆ ಮ್ಹಣ್ ಆನ್ಭೊಗಾಂತ್ಲಿಂ ನೀಜ್ ಘಡಿತಾಂ ಮುಕಾರ್ ದವರ್ನ್ ತಾಣೆ ಮುದ್ದೊ ಮಾಂಡ್ಲೊ. ಹ್ಯಾ ಸಂದರ್ಭಾರ್ ತಾಣಿ ಶೆಕ್ಸ್ಪಿಯರಾಚ್ಯಾ ಮರ್ಚಂಟ್ ಒಫ್ ವೆನಿಸ್ ನಾಟಕಾಚೊ ಆನಿ ತಾಂತ್ಲ್ಯಾ ದಣ್ಸಾಲ್ಲ್ಯಾ ಪಾತ್ರಾಂಚೋಯ್ ಉಲ್ಲೇಕ್ ಕೆಲೊ.
ಬೊಲ್ಕಾಂವ್ ಕಾರ್ಯಾವಳಿಚೊ ಸಂಚಾಲಕ್ ಎಚ್ಚೆಮ್, ಪೆರ್ನಾಲ್ ಹಾಣೆ ದೊ| ಆಳ್ವಾಚಿ ಮಟ್ವ್ಯಾನ್ ಒಳಕ್ ಕರುನ್ ದಿಲಿ ಆನಿ ಕೊಂಕ್ಣಿ ಸಂಸ್ಥ್ಯಾಚೊ ದಿರೆಕ್ತೊರ್ ಮಾ| ಬಾ| ಪ್ರಶಾಂತ್ ಮಾಡ್ತಾ ಹಾಣಿ ಬೊಲ್ಕಾಂವ್ ಡಾಯ್ರಿ ದೀವ್ನ್ ದೊ| ಆಳ್ವಾಕ್ ಬೊಲ್ಕಾಂವಾಕ್ ಯೆವ್ಕಾರ್ ಮಾಗ್ಲೊ.
ವಿಚಾರ್ ಮಂಡನಾ ಉಪ್ರಾಂತ್ ಚಲ್ಲೆಲ್ಲ್ಯಾ ಸಂವಾದಾಂತ್ ದೊ| ಪ್ರೇಮ್ ಮೊರಾಸ್, ದೊ| ವಿಲ್ಯಮ್ ದ ಸಿಲ್ವ ಆನಿ ಮಾ| ಬಾ| ಪ್ರಶಾಂತ್ ಮಾಡ್ತಾ ಹಾಣಿ ಪೂರಕ್ ವಿಚಾರ್ ವೆಕ್ತ್ ಕೆಲೆ.
ಕು| ವನಿತಾ ಹಿಣೆ ಕಾರ್ಯಾವಳ್ ಚಲವ್ನ್ ವರುಂಕ್ ಸಹಕಾರ್ ದಿಲೊ.
