ಉಡುಪಿ ದಿಯೆಸೆಜಿಚ್ಯಾ ಕಟಪಾಡಿಂತ್ ಎಂಸಿಸಿ ಬ್ಯಾಂಕಾಚೊ 23 ವೊ ಶಾಖೊ, ಆಯ್ತಾರಾ, ಆಗೋಸ್ತ್ 2 ವೆರ್ ಗ್ಲೋಬಲ್ ರೆಸಿಡೆನ್ಸಿ ಹ್ಯಾ ಬಾಂದ್ಪಾಚ್ಯಾ ತಳ್ ಮಾಳಿಯೆರ್ ಉಗ್ತಾವಣ್ ಜಾಲೊ.
ಶಾಖೊ ಉಗ್ತಾವಣ್ ಕರುನ್ ಬ್ಯಾಂಕಾಚೊ ಅಧ್ಯಕ್ಷ್ ಸಹಕಾರ ರತ್ನ ಅನಿಲ್ ಲೋಬೊ ಹಾಣೆ ಗ್ರಾಹಕ್ ಸೆವೆಕ್ ಎಂಸಿಸಿ ಬ್ಯಾಂಕಾಚಿ ಆದ್ಯತಾ, ಪಾಟ್ಲ್ಯಾ ಆಟ್ ವರ್ಸಾಂನಿ ತಾಚ್ಯಾ ಮುಕೆಲ್ಪಣಾಚ್ಯಾ ಆಡಳ್ತ್ಯಾ ಮಂಡಳೆನ್ ದಾಖಲ್ ಕೆಲ್ಲಿ ಬ್ಯಾಂಕಾಚಿ ತಿದೊಡಿ ಪ್ರಗತಿ ಅಂಕ್ಡ್ಯಾ – ಸಾಂಕ್ಡ್ಯಾ ಸವೆಂ ಮಾಂಡುನ್, ಹೆರ್ ನವ್ಯಾ ಶಾಖ್ಯಾಪರಿಂ ಕಟಪಾಡಿ ಶಾಖೊಯ್ ಉಗ್ತಾವಣ್ ಜಾಲ್ಲ್ಯಾ ಫಕತ್ ಸ ಮಯ್ನ್ಯಾಂ ಭಿತರ್ 10 ಕೊರೊಡ್ ವ್ಯವಹಾರ್ ಕರ್ತಲೊ ಮ್ಹಣ್ ಭರ್ವಸೊ ಉಚಾರ್ಲೊ.
ಮುಕೆಲ್ ಸಯ್ರೊ, ಕರಾವಳಿ ಅಭಿವೃದ್ಧಿ ಪ್ರಾಧಿಕಾರ ಹಾಚೊ ಅಧ್ಯಕ್ಶ್ ಎಂ. ಎ. ಗಫೂರ್ ಹಾಣೆ ಸೇಫ್ ರೂಂ ಉಗ್ತಾಯ್ಲೆಂ. ಕಟಪಾಡಿ ಸಾಂ ವಿಶೆಂತ್ ಡಿ ಪಾವ್ಲ್ ಫಿರ್ಗಜೆಚೊ ವಿಗಾರ್ ಮಾ| ಬಾ| ರಾಜೇಶ್ ಪ್ರಸನ್ನ ಹಾಣಿ ದಿವೊ ಪೆಟವ್ನ್ ನವ್ಯಾ ಶಾಖ್ಯಾಚೆಂ ಆಶೀರ್ವಚನ್ ಕೆಲೆಂ.
ಕಾಪು ಶಾಸಕ್ ಗುರ್ಮೆ ಸುರೇಶ್ ಶೆಟ್ಟಿ, ಸಿಎಸ್ಐ ಕ್ರೈಸ್ಟ್ ಚರ್ಚ್, ಕಟಪಾಡಿ ಹಾಚೊ ಪ್ರೆಸ್ಬಿಟರ್ ಮಾ| ಅಕ್ಷಯ್ ಡಿ. ಅಮ್ಮಣ್ಣ, ಕೆಸಿಸಿಡಿಸಿ ಹಾಚೊ ನಿರ್ದೇಶಕ್ ಪ್ರಶಾಂತ್ ಜತ್ತನ್ನ, ಉಡುಪಿ ಜಿಲ್ಲಾ ಪಂಚಾಯತ್ ಆದ್ಲೊ ಸಾಂದೊ ಗೀತಾಂಜಲಿ ಎಂ. ಸುವರ್ಣ, ಎಸ್ವಿಎಸ್ ವಿದ್ಯಾವರ್ಧಕ ಸಂಘ (ರಿ.), ಕಟಪಾಡಿ ಹಾಚೊ ಕಾರ್ಯದರ್ಶಿ ಕೆ. ಸತ್ಯೇಂದ್ರ ಪೈ, ಚಾರ್ಟರ್ಡ್ ಅಕೌಂಟೆಂಟ್ ಪ್ರೀತೇಶ್ ಬರ್ಟನ್ ಡೆಸಾ ಆನಿ ಉಡುಪಿ ಜಿಲ್ಲ್ಯಾಚ್ಯಾ ಮುಸ್ಲಿಂ ಫೆಡರೇಶನಾಚೊ ಪ್ರಧಾನ್ ಕಾರ್ಯದರ್ಶಿ ಇಸ್ಮಾಯಿಲ್ ಕಟಪಾಡಿ ಮಾನಾಚೆ ಸಯ್ರೆ ಜಾವ್ನ್ ಆನಿ ಬ್ಯಾಂಕಾಚೊ ಉಪಾಧ್ಯಕ್ಶ್ ಜೆರಾಲ್ಡ್ ಜೂಡ್ ಡಿ’ಸಿಲ್ವಾ ಆನಿ ಮಹಾಪ್ರಬಂಧಕ್ ಸುನಿಲ್ ಮಿನೇಜಸ್ ವೆದಿರ್ ಹಾಜರ್ ಆಸ್ಲೆ.
oplus_137363458
ಪ್ರಸ್ತುತ್ ಆಡಳ್ತ್ಯಾ ಮಂಡಳೆನ್ ಸ ನವೆ ಶಾಖೆ ಉಘಡ್ಲ್ಯಾತ್ ಆಸುನ್, ಹ್ಯಾ ಆರ್ಥಿಕ್ ವರ್ಸಾ ಭಿತರ್ ಶಾಖ್ಯಾಂಚೊಂ ಸಂಕೊ ಪಂಚ್ವೀಸಾಕ್ ಪಾವಂವ್ಚೊ ಇರಾದೊ ಆಸಾ. ಆನಿ ಹ್ಯಾ ಸಗ್ಳ್ಯಾ ಸಾಧನಾಕ್ ಬ್ಯಾಂಕಾಚಿ ನಿರ್ದೇಶಕ್ ಮಂಡಳಿ, ಶಿಬಂದಿ, ಸಾಂದೆ ಆನಿ ಗ್ರಾಹಕಾಂಚೊ ಸಹಕಾರ್ಚ್ ಕಾರಣ್ ಜಾವ್ನಾಸಾ ಮ್ಹಣ್ ಸರ್ವಾಂಚೊಂ ಅನಿಲ್ ಲೋಬೊ ಹಾಣೆ ಉಪ್ಕಾರ್ ಆಟಯ್ಲೊ. ಕಟಪಾಡಿ ವಠಾರಾಚ್ಯಾ ಲೊಕಾನ್ ಎಂಸಿಸಿ ಬ್ಯಾಂಕಾಕ್ ಪಯ್ಲಿ ಆದ್ಯತಾ ದೀವ್ನ್ ಬ್ಯಾಂಕ್ ವಾಡಯ್ಜೆ ಮ್ಹಣ್ ತಾಣೆ ಉಲೊ ದಿಲೊ.
ಸಮಾಜಿಕ್ ಬಾಂದವ್ಪಣ್ ಘಟ್ ಕರ್ಚ್ಯಾ ಇರಾದ್ಯಾನ್ ಶಿಕ್ಪಾ ಶೆತಾಂತ್ ವಿಶೇಸ್ ಸಾಧನ್ ಕೆಲ್ಲ್ಯಾಂಕ್, ರ್ಯಾಂಕ್ ವಿಜೇತಾಂಕ್, ಸಮಾಜ್ ಸೆವಾ ಸಾಧಕಾಂಕ್ ಕಾರ್ಯಾಂತ್ ಸನ್ಮಾನ್ ಕೆಲೊ ಆನಿ ರವಿ ಕೆ. ಹಾಂಕಾ ಆರ್ಥಿಕ್ ಕುಮಕ್ ದಿಲಿ.
ಬ್ಯಾಂಕಾಚೆ ನಿರ್ದೇಶಕ್ ಜೋಸೆಫ್ ಅನಿಲ್ ಪತ್ರಾವೊ, ಡೇವಿಡ್ ಡಿ’ಸೋಜಾ, ಜೆ. ಪಿ. ರೋಡ್ರಿಗಸ್, ಹೆರಾಲ್ಡ್ ಮೊಂತೆರೊ, ಎಲ್ರೊಯ್ ಕಿರಣ್ ಕ್ರಾಸ್ತೊ, ಐರಿನ್ ರೆಬೆಲ್ಲೊ, ವಿನ್ಸೆಂಟ್ ಲಸ್ರಾದೊ, ಆಂಡ್ರೂ ಡಿಸೋಜ, ರೋಶನ್ ಡಿಸೋಜ, ಫೆಲಿಕ್ಸ್ ಡಿ’ಕ್ರೂಜ್ ಆನಿ ಸುಶಾಂತ್ ಸಲ್ಡಾನ್ಹಾ ಸುವಾಳ್ಯಾಕ್ ಹಾಜರ್ ಆಸ್ಲೆ. .
ಬ್ಯಾಂಕಾಚೊ ನಿರ್ದೇಶಕ್ ದೊ| ಜೆರಾಲ್ಡ್ ಪಿಂಟೊನ್ ಯೆವ್ಕಾರ್ ಮಾಗ್ಲೊ. ಅಲ್ವಿನ್ ದಾಂತಿನ್ ಕಾರ್ಯೆಂ ಚಲಯ್ಲೆಂ.
