'ಮೈಕಲ್ ಡಿಸೋಜ ಕುಟಮ್ ಸಮುದಾಯಾಕ್ ದೆವಾನ್ ದಿಲ್ಲೆಂ ದೆಣೆಂ' - ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ

ಮೈಕಲ್ ಡಿ ಸೊಜಾ ಆನಿ ತಾಚೆಂ ಕುಟಮ್ ಆಮ್ಚ್ಯಾ ಸಮುದಾಯಾಕ್ ದೆವಾನ್ ದಿಲ್ಲೆಂ ದೆಣೆಂ’ ಮ್ಹಣಾಲೊ ಮಂಗ್ಳುರ್ ದಿಯೆಸೆಜಿಚೊ ಧರ್ಮಾಧ್ಯಕ್ಷ್ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ. ದೊ| ಸಲ್ಡಾನ್ಹಾ ಆಯ್ತಾರಾ, ಅಗೋಸ್ತ್ 16 ವೆರ್ ಮಂಗ್ಳುರ್ಚ್ಯಾ ಇಜಯ್ ಫಿರ್ಗಜೆ ಸಾಲಾಂತ್ ಎಂಡಿಎಸ್ ಚ್ಯಾರಿಟೀಸ್ ಹಾಣಿ ತಾಂಚ್ಯಾ ಎಡುಕೇರ್ ಉಪಕ್ರಮಾಖಾಲ್ ಮಾಂಡುನ್ ಹಾಡ್ಲೆಲ್ಯಾ ಉಮೆದ್ 2026 (ಮಂಗ್ಳುರ್ ಆವೃತ್ತಿ) ಕಾರ್ಯಾವಳಿಚ್ಯಾ ಅಧ್ಯಕ್ಶ್ ಸ್ಥಾನಾಥಾವ್ನ್, ಜಮ್ಲೆಲ್ಯಾ ಹಜಾರೊಂ ವಿದ್ಯಾರ್ಥಿ, ಪೋಶಕ್, ಯಾಜಕ್, ಧರ್ಮ್‌ಭಯ್ಣಿ, ಹಿತಯ್ಶಿಂಕ್ ಉದ್ದೇಸುನ್ ಉಲಯ್ತಾಲೊ. ಫಾ| ಮುಲ್ಲರ‍್ಸ್ ಚ್ಯಾರಿಟೇಬಲ್ ಸಂಸ್ಥ್ಯಾಚೊ ದಿರೆಕ್ತೊರ್ ಮಾ| ಬಾ| ಫಾವುಸ್ತಿನ್ ಎಲ್. ಲೋಬೊ ಹೆ ಮುಕೆಲ್ ಸಯ್ರೆ ಜಾವ್ನ್ ಕಾರ್ಯಾವಳಿಕ್ ಹಾಜರ್ ಆಸೊನ್ ತಾಣಿ ವಿದ್ಯಾರ್ಥಿಂಕ್ ಮಾರ್ಗದರ್ಶನ್ ದಿಲೆಂ.

Care, Support, Empower ಹ್ಯಾ ಉದಾತ್ತ್ ಧೇಯಾಖಾಲ್ ಪಾಟ್ಲ್ಯಾ ಸಬಾರ್ ವರ‍್ಸಾಂ ಪಾಸುನ್ ಸಮಾಜ್‌ಮುಖಿ ವಾವ್ರ್ ಕರುನ್ ಆಸ್ಚ್ಯಾ ಮೈಕಲ್ ಡಿ ಸೊಜಾ ಆನಿ ಕುಟ್ಮಾಚಿ ತೊಕ್ಣಾಯ್ ಕರುನ್ ದೊ| ಸಲ್ಡಾನ್ಹಾ ಹಾಣಿ ಮ್ಹಳೆಂ “ಎಂಡಿಎಸ್ ಚ್ಯಾರಿಟೀಸ್ ಸಂಸ್ಥೊ ಫಕತ್ ಶಿಕ್ಪಾಕ್ ಮಾತ್ ನಯ್, ಮಂಗ್ಳುರ್ ತಶೆಂಚ್ ಹೆರ್ ದಿಯೆಸೆಜಿಂನಿ ಸಮಾಜೆಚ್ಯಾ ಮೆರೆರ್ ಜಿಯೆಂವ್ಚ್ಯಾ ಲೊಕಾಕ್ ಘರಾಂ ಬಾಂದುಂಕ್, ದುರುಸ್ತ್ ಕರುಂಕ್, ವಯ್ಜಾಕೀಯ್ ಚಿಕಿತ್ಸೆಕ್ ಆನಿ ತಿಸ್ರೆಂ ಭುರ‍್ಗೆಂ ಆಸ್ಚ್ಯಾ ಕುಟ್ಮಾಕ್ ಕುಮಕ್ ಕರುನ್ ಆಸಾ. ಎಡುಕೇರ್ ಉಪಕ್ರಮಾ ಮುಕಾಂತ್ರ್ ಆಮ್ಚ್ಯಾ ಯುವಜಣಾಂಚೊಂ ಫುಡಾರ್ ಭದ್ರ್ ಕರ್ಚೆಂ ಕಾಮ್ ವ್ಹಡಾ ಜವಬ್ದಾರೆನ್ ಕರ್ತೇ ಆಸಾ”

“ಸರ್‌ಲ್ಲೊ ಕಾಳ್ ಆಪಡ್ಚೆ ತರ್ ಫಾತೊರ್ ಆಪ್ಡಿಜಾಯ್, ವರ‍್ತಮಾನ್ ಕಾಳ್ ಆಪ್ಡುಂಕ್ ಜಾಯ್ ತರ್ ಫುಲ್ ಆಪ್ಡಿಜಾಯ್, ಫುಡಾರಾಚ್ಯಾ ಕಾಳಾಕ್ ಆಪುಡ್ಜೆ ತರ್ ಎಕಾ ವೆಕ್ತಿಚೆಂ ಜಿವಿತ್ ಆಪಡ್ಜಾಯ್’ ಮ್ಹಳ್ಳಿ ಉಕ್ತಿ ಉಲ್ಲೇಕ್ ಕೆಲ್ಲ್ಯಾ ದೊ| ಸಲ್ಡಾನ್ಹಾ ಹಾಣಿ “ಮೈಕಲ್ ಡಿ ಸೊಜಾ ಆನಿ ತಾಚ್ಯಾ ಕುಟ್ಮಾನ್ ಆಪ್ಲ್ಯಾ ಎಂಡಿಎಸ್ ಚ್ಯಾರಿಟೀಸ್ ಉಪಕ್ರಮಾಂ ಮಾರಿಫಾತ್ ಆಮ್ಚ್ಯಾ ಸಮುದಾಯಾಚೊ ಆದ್ಲೊ, ಪ್ರಸ್ತುತ್ ಆನಿ ಫುಡಾರಾಚೊ ಕಾಳ್ ಆಪಡ್ಚೆಂ ಪ್ರಾಮಾಣಿಕ್ ಕಾಮ್ ಕೆಲಾಂ. ತಾಣಿ ಆಜ್ ಆಪಡ್ಲೆಲ್ಯಾ ಭುರ‍್ಗ್ಯಾಂನಿ, ಮೈಕಲ್ ಡಿ ಸೊಜಾ ಕುಟ್ಮಾನ್ ದಿಲ್ಲ್ಯಾ ಕುಮ್ಕೆಹಾತಾಚೊ ಉಡಾಸ್ ದವರ‍್ಚೆಸವೆಂ ತಾಂಚ್ಯಾಯ್ ಜಿವಿತಾಂತ್ ಸಂದ್ರಾಪ್ ಮೆಳ್ತಾನಾ ಹೆರಾಂಚಿಂ ಜಿವಿತಾಂ ಆಪಡ್ಚೆಂ ಮಿಸಾಂವ್ ಮುಕಾರುನ್ ವೆಲ್ಯಾರ್ ಮೈಕಲ್ ಡಿ ಸೊಜಾ ಹಾಂಕಾ ಮಾನ್ ದಿಲ್ಲೆಪರಿಂ” ಮ್ಹಣ್ ಆಪ್ಲಿ ಅಭಿಪ್ರಾಯ್ ಉಚಾರ‍್ಲಿ.

ಇಜಯ್ ಫಿರ್ಗಜೆಚೊ ವಿಗಾರ್ ಮಾ। ಬಾ। ಸ್ಟೇನಿ ಪಿರೇರಾ ಹಾಣಿ ಮಾಗ್ಣ್ಯಾದ್ವಾರಿಂ ಉಮೆದ್ 2026 ಕಾರ್ಯಾಕ್ ಚಾಲನ್ ದಿಲೆಂ.

ಉಮೆದ್ – ಎಡುಕೇರ್ ಉಪಕ್ರಮಾಖಾಲ್ ಎಂಡಿಎಸ್ ಚ್ಯಾರಿಟೀಸ್ ಸಾಂಗಾತಾ ಸಂಬಂದ್ ಜೊಡ್ಲೆಲ್ಯಾ ವಿದ್ಯಾರ್ಥಿಂಚೊಂ ವಾರ‍್ಶಿಕ್ ಮೆಳಾವೊ ಜಾವ್ನಾಸೊನ್, ಮಂಗ್ಳುರ್ ಆವೃತ್ತೆಚ್ಯಾ ಹ್ಯಾ ಪಯ್ಲ್ಯಾ ಮೆಳಾವ್ಯಾಂತ್ ವಿದ್ಯಾರ್ಥಿಂಕ್ ವೃತ್ತಿ ಮಾರ‍್ಗದರ್ಶನ್, ಕೌಶಲ್ಯಾಂ ತರ‍್ಭೆತಿ ಆನಿ ಜಿಣ್ಯೆ ಶಿಕಪ್ ದಿಂವ್ಚೊ ವಾವ್ರ್ ಚಲ್ಲೊ. ಹ್ಯಾ ವರ‍್ಸಾ ಮಾಲ್ಗಡೊ ಮೆಸ್ತ್ರಿ ತಶೆಂ ‘ಗುರೂಜಿ’ ನಾಂವಾನ್ ಕೊಂಕ್ಣಿ ತಶೆಂ ಹೆರ್ ಭಾಸಾಂನಿ ಬರಂವ್ಚೊ ಫಾಮಾದ್ ಲೇಖಕ್ ರಿಚರ್ಡ್ ಆಲ್ವಾರೆಸ್, ಕುಲ್ಶೇಕರ್ ಹಾಣಿ ಎಡುಕೇರ್ ವಿದ್ಯಾರ್ಥಿಂಕ್ ತರ‍್ಬೆತಿ ದಿಲಿ. ತಾಣಿ ವೆಳಾಂತ್ ನಿವೇಶ್, ನವೆಂಸಾಂವಾಚಿಂ ಸೊಧ್ನಾಂ ಆನಿ ಜಿವಿತಾಚಿ ಸ್ಪೂರ‍್ತಿ ಹ್ಯಾ ವಿಶಯಾಚೇರ್ ಆಪ್ಲೆ ವಿಚಾರ್ ಕೇಂದ್ರೀಕೃತ್ ಕರುನ್ ಸಂವಾದಿ ರುಪಾರ್ ವಿದ್ಯಾರ್ಥಿ ತಶೆಂ ಪೋಶಕಾಂಕ್ ಆಪುರ್ಬಾಯೆಚಿ ತರ್ಭೆತಿ ದಿಲಿ.

ಕಾರ್ಯಾವಳಿಕ್ ಮುಕೆಲ್ ಸಯ್ರೊ ಜಾವ್ನ್ ಆಯಿಲ್ಲ್ಯಾ, ಫಾದರ್ ಮುಲ್ಲರ‍್ಸ್ ಚ್ಯಾರಿಟೇಬಲ್ ಸಂಸ್ತ್ಯಾಚೊ ದಿರೆಕ್ತೊರ್ ಮಾ| ಬಾ| ಫಾವುಸ್ತಿನ್ ಲೋಬೊ ಹಾಣಿ ವಿದ್ಯಾರ್ಥಿಂಕ್ ಶೃದ್ದೆನ್ ಶಿಕೊಂಕ್ ಉಲೊ ದಿಂವ್ಚೆ ಸಾಂಗಾತಾ, ಶಿಕ್ಪಾ ಸಾಂಗಾತಾ ಕೌಶಲ್ಯಾಂ ಜೊಡುನ್, ವಾಂಟ್ಯಾಕ್ ಯೆಂವ್ಚೆ ಅವ್ಕಾಸ್ ಜೊಕ್ತ್ಯಾ ವೆಳಾರ್ ವಾಪಾರ‍್ಲ್ಯಾರ್ ವೃತ್ತೆಂತ್ ಊಂಚಾಯೆಕ್ ಪಾವ್ಯೆತ್ ಮ್ಹಳ್ಳಿ ಗಜಾಲ್ ದಾಕ್ಲೆ ದೀವ್ನ್ ಸಾಂಗ್ಲೆಂ. ಸಾಂಗಾತಾಚ್ ಮೈಕಲ್ ಡಿ ಸೊಜಾ ಹಾಂಚ್ಯಾ ವಾವ್ರಾಚಿ ತೊಕ್ಣಾಯ್ ಕೆಲ್ಲ್ಯಾ ತಾಣಿ ಎಂಡಿಎಸ್ ಉಪಕ್ರಮಾ ಮುಕಾಂತ್ರ್ ಮೈಕಲ್ ಡಿ ಸೊಜಾ ಕುಟಮ್ ಫಕತ್ ‘ಮಾಸ್ಳಿ ದಿಂವ್ಚೆಂ ಕಾಮ್ ಕರಿನಾ, ಬಗಾರ್ ಮಾಸ್ಳಿ ಧರುಂಕ್ ಶಿಕಯ್ತಾ’ ಮ್ಹಣ್ ಮಾರ‍್ಮಿಕ್ ಥರಾನ್ ಮ್ಹಳೆಂ. ಆಜ್ ಎಂಡಿಎಸ್ ಚ್ಯಾರಿಟಿಸ್ ಥಾವ್ನ್ ಕುಮ್ಕೆ ಹಾತ್ ಘೆತ್ಲೆಲ್ಯಾ ವಿದ್ಯಾರ್ಥಿಂನಿ ಫುಡಾರಾಂತ್ ಹೆರ್ ವಿದ್ಯಾರ್ಥಿಂಕ್ ಕುಮ್ಕೆ ಹಾತ್ ದೀಂವ್ಕ್ ಮಾ। ಬಾ। ಲೋಬೊ ಹಾಣಿ ಹ್ಯಾ ಸುವಾಳ್ಯಾರ್ ಉಲೊ ದಿಲೊ.

ಮಾನಾಚೆ ಸಯ್ರೆ ಜಾವ್ನ್ ಇಜಯ್ ಫಿರ್ಗಜೆಚೊ ವಿಗಾರ್ ಮಾ| ಬಾ| ಸ್ಟೇನಿ ಪಿರೇರಾ, ಫಿರ‍್ಗಜ್ ಗೊವ್ಳಿಕ್ ಮಂಡಳೆಚೊ ಉಪಾಧ್ಯಕ್ಷ್ ನಿರ್ಮಲ್ ಡಿಸೋಜ, ಜೆಪ್ಪು ಸಾಂ. ಜುಜೆ ಸೆಮಿನರಿಚೊ ರೆಕ್ಟರ್ ಮಾ| ದೊ| ರಾಜೇಶ್ ರೊಸಾರಿಯೊ, ಸಾಂ. ಜುಜೆ ಇಂಜಿನಿಯರಿಂಗ್ ಕೊಲೆಜಿಚೊ ನಿರ್ದೇಶಕ್ ಮಾ| ಬಾ| ವಿಲ್ಫ್ರೆಡ್ ಪ್ರಕಾಶ್ ಡಿಸೋಜ ವೆದಿರ್ ಹಾಜರ್ ಆಸ್ಲೆ.

ಎಂಡಿಎಸ್ ಚ್ಯಾರಿಟೀಸ್ ವಾವ್ರಾ ವಿಶ್ಯಾಂತ್ ಸುಕ್ಣ್ಯಾನದರ್ ಪೇಶ್ ಕೆಲ್ಲ್ಯಾ ಉಪಕ್ರಮಾಚೊ ಸಲಹಾದಾರ್ ಪ್ರೊ| ಸಿ.ಎ. ಲೈನಲ್ ಅರಾನ್ಹಾ ಹಾಣಿ ಪಾಟ್ಲ್ಯಾ 13 ವರ್ಸಾಂನಿ ಮೈಕಲ್ ಡಿ ಸೊಜಾ ಕುಟ್ಮಾನ್ ಕೆಲ್ಲ್ಯಾ ಸಮಾಜಿಕ್ ವಾವ್ರಾಚಿ ಮಟ್ವ್ಯಾನ್ ಝಳಕ್ ದಿಲಿ. 2013 ಥಾವ್ನ್ 2025 ಪರ್ಯಾಂತ್ ‘ಎಡುಕೇರ್’ ಉಪಕ್ರಮಾಚೊ – ಮಂಗ್ಳುರ್ ದಿಯೆಸೆಜಿಚ್ಯಾ 3,098 ವಿದ್ಯಾರ್ಥಿಂನಿ, ಉಡುಪಿ ದಿಯೆಸೆಜಿಚ್ಯಾ 740 ವಿದ್ಯಾರ್ಥಿಂನಿ ಮೆಳೊನ್ ಎಕುಣ್ 3,838 ವಿದ್ಯಾರ್ಥಿಂನಿ ಕುಮ್ಕೆಹಾತ್ ಘೆತ್ಲಾ ಆಸುನ್, ಪ್ರಸ್ತುತ್ 2026 ವ್ಯಾ ವರ‍್ಸಾ ಮಂಗ್ಳುರ್ ದಿಯೆಸೆಜಿಂತ್ 505 ವಿದ್ಯಾರ್ಥಿಂಕ್ ಎಕುಣ್ 4.84 ಕೊರೊಡ್ ಎಂಡಿಎಸ್ ಚ್ಯಾರಿಟೀಸ್ ಥಾವ್ನ್ ಎಡುಕೇರ್ ಉಪಕ್ರಮಾ ಖಾಲ್ ಮಂಜೂರ್ ಜಾಲಾ ಆಸುನ್ ಹಾಂತು 343 ಶಿಕಪ್ ಮುಕಾರ‍್ಸುಂಚ್ಯಾ ವಿದ್ಯಾರ್ಥಿಂಕ್ 3.33 ಕೊರೊಡ್ ಮಂಜೂರ್ ಜಾಲಾ ತರ್, 162 ನವ್ಯಾ ವಿದ್ಯಾರ್ಥಿಂಕ್ ಸುಮಾರ್ 1.50 ಕೊರೊಡ್ ಮಜತ್ ಮಂಜೂರ್ ಜಾಲ್ಯಾ ಮ್ಹಣ್ ಪ್ರೊ| ಅರಾನ್ಹಾ ಹಾಣಿ ಮ್ಹಳೆಂ.

ಎಡುಕೇರ್ ಉಪಕ್ರಮಾಚ್ಯಾ ಫುಡಾರಾ ವಿಶ್ಯಾಂತ್ ಉಲವ್ನ್ ಪ್ರೊ| ಅರಾನ್ಹಾ ಹಾಣಿ “ಎಕ್ಲ್ಯಾಚಾ ಜಿವಿತಾನ್ ಅನ್ಯೆಕ್ಲ್ಯಾಚಾ ಜಿವಿತಾಕ್ ಸ್ಪರ್ಶ್ ದೀಜೆ ” ಮ್ಹಳ್ಯಾ ಧ್ಯೇಯಾ ಸಾಂಗಾತಾ ‘ಎಂಡಿಎಸ್ ಚಾರಿಟೀಸ್ ಅಲುಮ್ನಿ ನೆಟ್‌ವರ್ಕ್’ ಸ್ಥಾಪನ್ ಕರ‍್ಚಿ ಆಲೊಚೆನ್ ವಿದ್ಯಾರ್ಥಿಂ ಮುಕಾರ್ ದವರ‍್ಲಿ. ಶಿಕಪ್ ಸಂಪೊನ್, ವೃತ್ತೆಕ್ ಲಾಗ್ಲ್ಯಾ ಉಪ್ರಾಂತೀ ಎಕಾಮೆಕಾಸವೆಂ ಸಂಪರ‍್ಕ್, ಮಾರ್ಗದರ್ಶನ್, ವೃತ್ತಿ ಸಲಹಾ ಆನಿ ಎಕಾಮೆಕಾ ಕುಮಕ್ ಕರುಂಕ್ ಏಕ್ ಕಾರ್ಯಾಳ್ ವೇದಿ ಹ್ಯಾ ಮಾರಿಫಾತ್ ತಯಾರ್ ಜಾಂವ್ಕ್ ಜಾಯ್ ಆನಿ ತಾಚೊ ಉಪೆಗ್ ಜಾಂವ್ಕ್ ಜಾಯ್. ಆಜ್ ಎಡುಕೇರ್ ಉಪಕ್ರಮಾ ಥಾವ್ನ್ ಕುಮಕ್ ಘೆತ್ಲಲ್ಯಾಂನಿ ಫುಡಾರಾಂತ್ ಹ್ಯಾ ಉಪಕ್ರಮಾ ಸಾಂಗಾತಾ ಜೊಡ್ಚ್ಯಾ ವಿದ್ಯಾರ್ಥಿಂಕ್ ಶಿಕ್ಪಾ ವಿಶ್ಯಾಂತ್, ವೃತ್ತೆ ವಿಶ್ಯಾಂತ್ ಮಾಹೆತ್ ದಿಲ್ಯಾರ್ ಏಕ್ ಬಳಿಶ್ಟ್ ಸಮುದಾಯ್ ಬಾಂದುನ್ ಹಾಡುಂಕ್ ಆಮ್ಕಾಂ ಸಲೀಸ್ ಜಾತೆಲೆಂ” ಮ್ಹಣ್ ಪ್ರೊ। ಅರಾನ್ಹಾ ಹಾಣಿ ಆಪ್ಲೆ ವಿಚಾರ್ ಮಾಂಡ್ಲೆ.

ಕಾರ್ಯಾವಳಿಂತ್ ಎಡುಕೇರ್ ಉಪಕ್ರಮಾಚೊ ವಾಂಟೊ ಜಾಲ್ಲ್ಯಾ ವಯ್ಜಾಕೀಯ್, ಇಂಜಿನಿಯರಿಂಗ್, ಉದ್ಯಮ್ ಆಡಳ್ತೆಂ, ನರ‍್ಸಿಂಗ್ ಅಶೆಂ ಉಂಚ್ಲೆ ಶಿಕಪ್ ಜೊಡ್ಲೆಲ್ಯಾ ಆನಿ ಜೊಡುನ್ ಆಸ್ಚ್ಯಾ ಕಾಂಯ್ ವಿದ್ಯಾರ್ಥಿಂನಿ ಆಪ್ಲೆ ಅನ್ಭೊಗ್ ಆನಿ ಭೊಗ್ಣಾಂ ವಾಂಟುನ್ ಘೆತ್ಲಿಂ ಆನಿ ಮೈಕಲ್ ಡಿ ಸೊಜಾ ಕುಟ್ಮಾಚೊ ಉಪ್ಕಾರ್ ಭಾವುಡ್ಲೊ.

ಎಂಡಿಎಸ್ ಚ್ಯಾರೀಟಿಸ್ ಸಂಸ್ಥ್ಯಾಚೊ ಸಲಹಾದಾರ್ ಸ್ಟೀಫನ್ ಪಿಂಟೊ ಹಾಣಿ ಸಯ್ರ್ಯಾಂಕ್ ಮಾನಾಚೊ ಯೆವ್ಕಾರ್ ಮಾಗ್ಲೊ. ಎಡುಕೇರ್ ಉಪಕ್ರಮಾಚಿ ಸಂಚಾಲಕಿ ರೀನಾ ಡಿ ಕೊಸ್ಟಾ ಹಿಣೆ ದಿನ್ವಾಸ್ ಪಾಟಯ್ಲೆ. ಲೇಖಕ್ – ಪತ್ರಕರ‍್ತ್ ಎಚ್ಚೆಮ್ ಪೆರ್ನಾಲ್ ಹಾಣಿ ಕಾರ್ಯಾಚೆಂ ಸೂತ್ರ್ ಸಂಚಾಲನ್ ಕೆಲೆಂ.

ಎಂಡಿಎಸ್ ಚ್ಯಾರಿಟೀಸ್ ಹಾಚೆ ಸಲಹಾದಾರ್ ಮೇಸ್ತ್ರಿ ಓಸ್ವಲ್ಡ್ ರೊಡ್ರಿಗಸ್, ಶುಭ ರೊಡ್ರಿಗಸ್ ಹಾಣಿ ಉಮೆದ್ 2026 ಕಾರ್ಯಾವಳಿಕ್ ಜೊಕ್ತೆಂ ಮಾರ‍್ಗದರ್ಶನ್ ಆನಿ ನಿರ್ದೇಶ್ ದಿಲೆ. ಎಂಡಿಎಸ್ ಮುಕೆಲ್ ದಫ್ತರಾಚ್ಯಾ ವೀಣಾ, ತೇಜಸ್ವಿನಿ ತಶೆಂಚ್ ಹೆನ್ರಿ ಡಿ ಸೊಜಾ ಬೆಂದುರ್, ಪ್ರವೀಣ್ ಕ್ರಾಸ್ತಾ, ಅರ್ಜುನ್ ಹಾಣಿ ಉಮೆದ್ 2026 ಕಾರ್ಯಾಕ್ ಸಹಕಾರ್ ದಿಲೊ.