“ಆಮ್ಚೊ ದೇಶ್ ಸ್ವತಂತ್ರ್ ಜಾಂವ್ಚ್ಯಾಕ್ ಆಮ್ಚ್ಯಾ ಮಾಲ್ಘಡ್ಯಾಂನಿ ಜಾಯ್ತೊ ತ್ಯಾಗ್ ಆನಿ ಸಾಕ್ರಿಫಿಸ್ ಕೆಲಾ. ಆಪ್ಲ್ಯಾ ಜಿವಾಚೆಂ ಬಲಿದಾನ್ ಸಯ್ತ್ ತಾಣಿ ದಿಲಾಂ. ಆಜ್ ಆಮಿ ಸ್ವತಂತ್ರ್ ಆಮ್ಚೆಂ ‘ಹಕ್’ ಮ್ಹಣ್ ಚಿಂತಾಂವ್. ತೆಂ ಚುಕಿಚೆಂ ನ್ಹಂಯ್. ಪೂಣ್ ಸ್ವತಂತ್ರ್ ಏಕ್ ಜವಾಬ್ದಾರಿ ಮ್ಹಳ್ಳೆಂ ಆಮಿ ವಿಸ್ರೊಂಕ್ ಫಾವೊ ನಾ” ಮ್ಹಣಾಲೊ ಅನಿವಾಸಿ ಉದ್ಯಮಿ, ದಾನಿ ಆನಿ ಬಹುಭಾಶಾ ಗಾವ್ಪಿ ತಶೆಂ ನಟ್ ಮೆರಿಟ್ ಫ್ರೈಟ್ ಸಿಸ್ಟಮ್ ಹಾಚೊ ಮಾಲಕ್ ಶ್ರೀ ಜೋಸೆಫ್ ಮಥಾಯಸ್. ತೋ ಅಶೋಕನಗರ ಸರ್ಕಾರಿ ಪ್ರಾಥಮಿಕ್ ಇಸ್ಕೊಲಾಚ್ಯಾ ಸಾಲಾಂತ್, ಜಿಲ್ಲ್ಯಾ ರಾಜ್ಯೋತ್ಸವ್ ಪ್ರಶಸ್ತಿ ವಿಜೇತ್ ಅಶೋಕನಗರ ಯುವಕ ಸಂಘ(ನೊ) ಹಾಣಿ ಸುಟ್ಕೆ ಪರ್ಬೆಚ್ಯಾ ಸುವಾಳ್ಯಾರ್, ಮಾಂಡುನ್ ಹಾಡ್ಲೆಲ್ಯಾ ಮಾಲ್ಗಡ್ಯಾ ನಾಗರಿಕಾಂಕ್ ಫುಡ್ವೆಂ – ಕಾಪಡ್, ಅಶಕ್ತಾಂಕ್ ವಯ್ಜಾಕೀಯ್ ಚಿಕಿತ್ಸೆಕ್ ಆರ್ಥಿಕ್ ಕುಮಕ್, ಸ್ವ ಉದ್ಯಮ್ ಕರ್ತೆಲ್ಯಾಂಕ್ ಸೈಕಲ್ ಆನಿ ಶಿವ್ಣೆ ಯಂತ್ರ್ ಆನಿ ಶಾಳೆಚ್ಯಾ ಭುರ್ಗ್ಯಾಂಕ್ ಯುನಿಫೊರ್ಮ್ ವಿತರಣ್ ಕರ್ಚ್ಯಾ ಕಾರ್ಯಾಚೊ ಅಧ್ಯಕ್ಷ್ ಜಾವ್ನ್ ಉಲಯ್ತಾಲೊ.
ಮುಂದರುನ್ ತಾಣಿ “ಸುಟ್ಕೆಚಿ ಪರಿಭಾಶಾ ಬದ್ಲಲ್ಲ್ಯಾ ಆಯ್ಚ್ಯಾ ಕಾಳಾರ್ ಸಮಾಜೆಚ್ಯಾ ಮೆರೆರ್ ಜಿಯೆಂವ್ಚೊ ಜಾಯ್ತೊ ಲೋಕ್ ಅಜೂನ್ ಮುಳಾವ್ಯಾ ಗರ್ಜಾಂ ಥಾವ್ನ್ ವಂಚಿತ್ ಜಾಲ್ಲೊ ದಿಸ್ತಾ. ಥೊಡೆಪಾವ್ಟಿಂ ಸರ್ಕಾರಾಚಿಂ ಕಲ್ಯಾಣ್ ಕಾರ್ಯಕ್ರಮಾಂಯ್ ತಾಂಚೆ ಪರ್ಯಾಂತ್ ಪಾವಾನಾಂತ್. ಆಮ್ಚೆ ಪಯ್ಕಿ ಕೊಣಾಕ್ ಸಾದ್ ಆಸಾ ತಾಣಿ ಆಮ್ಚ್ಯಾ ಸಂಪರ್ಕಾಕ್ ಮೆಳ್ಚ್ಯಾ ತಾಂಚ್ಯಾ ಆದಾರಾಕ್ ಪಾವೊನ್, ತಾಣೀಯ್ ಸುಟ್ಕೆಚೊ ಖರೊ ಸಂತೊಸ್ ಭೊಗ್ಚೆ ವಿಶ್ಯಾಂತ್ ಕಾಂಯ್ ಚಿಂತಪ್ ಆಟಂವ್ಕ್ ಜಾಯ್” ಮ್ಹಣ್ ಮಾರ್ಮಿಕ್ ಜಾವ್ನ್ ಮ್ಹಳೆಂ.
ಪಾಟ್ಲ್ಯಾ ಎಕ್ವೀಸ್ ವರ್ಸಾಂ ಪಾಸುನ್ ಅಶೋಕನಗರ ಯುವಕ ಸಂಘಾಚ್ಯಾ ಮುಕೆಲ್ಪಣಾರ್ ಶ್ರೀ ಜೋಸೆಫ್ ಮಥಾಯಸ್ ಆಪ್ಲಿ ದಾತಾರಾಂ ದೆ। ಲೋರೆನ್ಸ್ ಆನಿ ಮೇರಿ ಮಥಾಯಸ್ ಹಾಂಚ್ಯಾ ಉಡಾಸಾಕ್ ಹೆಂ ಕಾರ್ಯಕ್ರಮ್ ಖಳನಾಸ್ತಾನಾ ಮಾಂಡುನ್ ಹಾಡ್ತಾ. ಚಡುಣೆ ಹರ್ಯೇಕಾ ವರ್ಸಾ ಹ್ಯಾಚ್ ಕಾರಣಾಕ್ ಲಾಗೊನ್ ತೋ ದುಬಯ್ ಥಾವ್ನ್ ಗಾಂವಾಕ್ ಯೆತಾ ಆನಿ ಇಸ್ಕೊಲಾಚ್ಯಾ ಭುರ್ಗ್ಯಾಂ ಸಾಂಗಾತಾ ಆನಿ ಗರ್ಜೆವೊಂತಾಂ ಸಾಂಗಾತಾ ಸುಟ್ಕೆ ಪರ್ಬೆಚೊ ಅರ್ಧೊ ದೀಸ್ ಖರ್ಚಿತಾ.
ಇಸ್ಕೊಲಾಚಿ ಮುಕೆಲ್ ಮೆಸ್ತ್ರಿರ್ಣ್ ಶ್ರೀಮತಿ ಜೋಯ್ಸ್ ಹೆನ್ರೀಟಾ ಹಿಣೆ ಆಪ್ಲ್ಯಾ ಭಾಶಣಾಂತ್ ಭಾರತಾಚೊ ಆದ್ಲೊ ರಾಷ್ಟ್ರಾಧ್ಯಕ್ಶ್ ಎಪಿಜೆ ಅಬ್ದುಲ್ ಕಲಾಂ ಹಾಣೆ ಆಪ್ಲ್ಯಾ ಜಿವಿತಾಂತ್ ಪೊಲಿಯೊ ಥಾವ್ನ್ ವಳ್ವಳ್ಚ್ಯಾ ಭುರ್ಗ್ಯಾಂಚ್ಯಾ ಕ್ಯಾಲಿಫರಾಚಿ ವಜನ್ ಉಣಿ ಕೆಲ್ಲ್ಯಾ ಸಂಸೊಧಾಚಿ ಘಡಿಚ್ ಆಪ್ಲ್ಯಾ ಜಿವಿತಾಚಿ ಪ್ರಮುಕ್ ಘಡಿ ಮ್ಹಣ್ ಉಚಾರ್ಲೆಲ್ಯಾ ಅಭಿಪ್ರಾಯೆಚೊ ಉಲ್ಲೇಕ್ ಕರುನ್ ಶ್ರೀ ಜೋಸೆಫ್ ಮಥಾಯಸ್ ಹಾಣಿ ತಾಚ್ಯಾ ವ್ಹಡಿಲಾಂಚ್ಯಾ ಉಡಾಸಾಕ್ ಮಾಲ್ಘಡ್ಯಾ ನಾಗರಿಕಾಂ ಥಾವ್ನ್ ಧರುನ್ ಪಯ್ಲ್ಯಾ ವರ್ಗಾಂತ್ ಶಿಕ್ಚ್ಯಾ ಮಾಣ್ಕುಲ್ಯಾಂ ಪರ್ಯಾಂತ್ ಸಮಾಜೆಂತ್ ಮೆರೆರ್ ಜಿಯೆಂವ್ಚ್ಯಾ ಹರ್ ಪ್ರಾಯೆಚ್ಯಾ ಲೊಕಾಚೆಂ ಜಿವಿತ್ ಆಪಡ್ಲಾಂ ಮ್ಹಣ್ ಸಾಂಗ್ಲೆಂ. ತಾಂಚ್ಯಾ ಉದ್ಯಮಾಚೆರ್, ಕುಟ್ಮಾಚೆರ್ ದೇವ್ ಅನಿಕೀ ಚಡ್ ಬೆಸಾಂವಾಂ ವೊತುಂದೀ ಮ್ಹಣ್ ಮಾಗ್ಲೆಂ.
ಉರ್ವ ಕೊರಗಜ್ಜ ಕ್ಷೇತ್ರಾಚೊ ಅಧ್ಯಕ್ಷ್ ಶ್ರೀ ರಾಜೇಶ್ ಉರ್ವ ಆನಿ ಹೊಟೇಲ್ ಉದ್ಯಮಿ ಶ್ರೀ ಕೆ. ಸುಧಾಕರ ಆಳ್ವ ಹ್ಯಾ ಸುವಾಳ್ಯಾರ್ ಮಾನಾಚೆ ಸಯ್ರೆ ಜಾವ್ನ್ ಹಾಜರ್ ಆಸ್ಲೆ. ಸಂಗಾಚೊ ಗವ್ರವ್ ಅಧ್ಯಕ್ಷ್, ಶ್ರೀ ಶಂಕರ್ ಎನ್. ಪೂಂಜ ಆನಿ ಅಧ್ಯಕ್ಷ್ ಶ್ರಿ ಜಯರಾಮ ಹ್ಯಾ ಸುವಾಳ್ಯಾರ್ ವೆದಿರ್ ಹಾಜರ್ ಆಸ್ಲೆ. ಶ್ರೀ ಜೋಸೆಫ್ ಮಥಾಯಸ್ ಹಾಂಕಾ ರಾಜ್ಯೋತ್ಸವ ಆನಿ ಹೆರ್ ಪ್ರಶಸ್ತ್ಯೊ ಮೆಳ್ಳೆಲ್ಲ್ಯಾ ಅಭಿಮಾನಾನ್ ಸಂಘಾ ತರ್ಪೆನ್ ಮಾನ್ ಪತ್ರ್, ಮಾನ್ ಚಿಹ್ನ್, ಶೊಲ್, ಫಳಾಂ – ಫುಲಾಂ ದೀವ್ನ್ ಸನ್ಮಾನ್ ಕೆಲೊ.
ಶ್ರೀ ಅರುಣ್ ದಾಂತಿ ಹಾಣಿ ಅಭಿನಂದನ್ ಭಾಷಣಾಂತ್ ಶ್ರೀ ಜೋಸೆಫ್ ಮಥಾಯಸ್ ಹಾಂಚ್ಯಾ ಬಹುಮುಖಿ ವೆಕ್ತಿತ್ವಾಚಿಂ ಕುಸಾಂ ಉಸವ್ನ್, ತಾಚೆ ಥಂಯ್ ಭಿತರ್ ಸಮಾಜೆಚ್ಯಾ ದುಕಿಂಕ್ ಆನಿ ಗರ್ಜಾಂಕ್ ಸ್ಪಂದನ್ ಕರ್ಚೊ ಏಕ್ ಸಂವೇದನಾಶೀಳ್ ಕಲಾಕಾರ್ ಆಸಾ ದೆಕುನ್ ತೋ ಸಮಾಜೆಂತ್ ಮೆರೆರ್ ಜಿಯೆಂವ್ಚ್ಯಾ ಲೊಕಾವಿಶಿಂ ಸದಾಂಚ್ ಚಿಂತಾ ಮ್ಹಣ್ ಅಭಿಪ್ರಾಯ್ ಉಚಾರ್ಲಿ.
ಇಸ್ಕೊಲಾಚ್ಯಾ ಭುರ್ಗ್ಯಾಂನಿ ಪ್ರಾರ್ಥನ್ ಗೀತ್ ಗಾಯ್ಲೆಂ. ಚೇತನ್ ಕುಮಾರ್ ಹಾಣಿ ಕಾರ್ಯೆಂ ಚಲಯ್ಲೆಂ. ಕೊಂಕ್ಣಿ ಕವಿ ಆರ್ಥರ್ ಪಿರೇರಾ ಆನಿ ಎಚ್ಚೆಮ್ ಪೆರ್ನಾಲ್ ಹ್ಯಾ ವೆಳಾರ್ ಹಾಜರ್ ಆಸ್ಲೆ.
