ಎಂಸಿಸಿ ಬ್ಯಾಂಕಾಕ್ 2025–26 ವ್ಯಾ ವರ್ಸಾಕ್ ಸಹಕಾರೀ ಬ್ಯಾಂಕಿಂಗ್ ಶೆತಾಂತ್, ಎಕುಣ್ ವೆವ್ಹಾರಾಂತ್ ಕೆಲ್ಲ್ಯಾ ಉಂಚ್ಲ್ಯಾ ಸಾಧನಾಂ ಖಾತಿರ್ ದಿಂವ್ಚಿ ದಕ್ಷಿಣ ಕನ್ನಡ ಜಿಲ್ಲ್ಯಾಚೆಂ ಕೇಂದ್ರ್ ಸಹಕಾರೀ ಬ್ಯಾಂಕ್ (ಎಸ್ಸಿಡಿಸಿಸಿ) ಹಾಣಿ ದಿಂವ್ಚಿ ಪ್ರತಿಷ್ಠಿತ್ ‘ಸರ್ವತೋಮುಖ ಅಭಿವೃದ್ಧಿಗಾಗಿ ಸಾಧನಾ ಪ್ರಶಸ್ತಿ’ ಪ್ರಾಪ್ತ್ ಜಾಲ್ಯಾ.
ಪ್ರಶಸ್ತಿ ಪ್ರದಾನ್ ಸಂಭ್ರಮ್ ಸನ್ವಾರಾ, 22 ಆಗಸ್ಟ್ 2026 ವೆರ್ ಎಸ್ಸಿಡಿಸಿಸಿ ಬ್ಯಾಂಕ್ ಹಾಂಚ್ಯಾ ವಾರ್ಷಿಕ್ ಮ್ಹಾಸಭೆವೆಳಾರ್ ಸಹಕಾರೀ ಶೆತಾಂತ್ಲ್ಯಾ ಗಣ್ಯ್ ವೆಕ್ತಿಂ ಹುಜಿರ್ ಚಲ್ಲೊ.
ಎಸ್ಸಿಡಿಸಿಸಿ ಬ್ಯಾಂಕಾಚೊ ಅಧ್ಯಕ್ಷ್ ದೊ| ಎಂ. ಎನ್. ರಾಜೇಂದ್ರ ಕುಮಾರ್ ಹಾಣಿ ಪ್ರಶಸ್ತಿ ಪ್ರದಾನ್ ಕೆಲಿ. ಎಂಸಿಸಿ ಬ್ಯಾಂಕ್ ತರ್ಪೆನ್ ಬ್ಯಾಂಕಾಚೊ ಉಪಾಧ್ಯಕ್ಶ್ , ಪ್ರಧಾನ್ ವೆವಸ್ಥಾಪಕ್, ನಿರ್ದೇಶಕ್ ಆನಿ ಉಪ ಪ್ರಧಾನ್ ವೆವಸ್ಥಾಪಕಾಂನಿ ಸಾಂಗಾತಾ ಪ್ರಶಸ್ತಿ ಘೆತ್ಲಿ.
“ಹಿ ಪ್ರಶಸ್ತಿ ಎಂಸಿಸಿ ಬ್ಯಾಂಕಾಚ್ಯಾ ಕಾರ್ಯಾಕ್ಶಮತೆಕ್, ನಿರಂತರ್ ವಾಡಾವಳಿಕ್ ಲಾಬ್ಲ್ಲೊ ಮಾನ್ ಜಾವ್ನಾಸಾ. ಹ್ಯಾ ಸಾಧನಾ ಪಾಟ್ಲ್ಯಾನ್ ಪ್ರಸ್ತುತ್ ಅಧ್ಯಕ್ಷ್ ಅನಿಲ್ ಲೋಬೊಚೆಂ ಸಮರ್ಪಿತ್ ಮುಕೆಲ್ಪಣ್, ಆಡಳ್ತ್ಯಾ ಮಂಡಳೆಚ್ಯಾ ಸಾಂದ್ಯಾಂಚೆಂ ಮಾರ್ಗದರ್ಶನ್, ಶಿಬಂದೆಚಿ ವಾಂವ್ಟ್ ಆನಿ ಗ್ರಾಹಕಾಂಚಿಂ ಪಾತ್ಯೆಣಿ ಆಸಾ” ಮ್ಹಣ್ ಹ್ಯಾ ಸಂದರ್ಬಿ ಎಂಸಿಸಿ ಬ್ಯಾಂಕಾಚ್ಯಾ ಪ್ರತಿನಿಧಿಂನಿ ಅಭಿಪ್ರಾಯ್ ಉಚಾರ್ಲ್ಯಾ.
ಅವಿಭಜಿತ್ ದಕ್ಷಿಣ ಕನ್ನಡ ಜಿಲ್ಲ್ಯಾಂತ್ ಪಾಟ್ಲ್ಯಾ ಆಟ್ ವರ್ಸಾಂ ಪಾಸುನ್ ಪ್ರಗತೆಚ್ಯಾ ಮೆಟಾಂನಿ ಭರಾನ್ ಚಲೊನ್ ಆಸ್ಚ್ಯಾ ಎಂಸಿಸಿ ಬ್ಯಾಂಕಾನ್ ಗುಮಾನ್ ವೊಡ್ಚೆ ತಸಲಿ ವಾಡಾವಳ್ ದಾಕಯ್ಲ್ಯಾ. ಪ್ರಸ್ತುತ್ ಎಂಸಿಸಿ ಬ್ಯಾಂಕಾಕ್ ಕರ್ನಾಟಕ ರಾಜ್ಯಾಚಿ ಕಾರ್ಯಾವ್ಯಾಪ್ತಿ ಆಸೊನ್, ಪ್ರಸ್ತುತ್ ಬ್ಯಾಂಕಾಚೆ 23 ಶಾಖೆ ಆಸಾತ್. 2025–26 ವ್ಯಾ ಆರ್ತಿಕ್ ವರ್ಸಾ ಬ್ಯಾಂಕಾನ್ ₹1,525 ಕೊರೊಡ್ ವೆವ್ಹಾರ್ ಕೆಲ್ಲೊ ಆಸುನ್, ಆದ್ಲ್ಯಾ ಆರ್ತಿಕ್ ವರ್ಸಾಚ್ಯಾ ತುಲನಾಂತ್ 22.89 ಠಕ್ಕೆ ವಾಡಾವಳ್ ದಾಕಯ್ಲ್ಯಾ. ಆರ್ತಿಕ್ ವರ್ಸಾಚ್ಯಾ ಅಕೇರಿಕ್ ಬ್ಯಾಂಕಾಂತ್ ₹872.88 ಕೊರೊಡ್ ಠೇವ್ ಆನಿ ₹652.06 ಕೊರೊಡ್ ದಿಲ್ಲೆಂ ರೀಣ್ ಆಸಾ.
ಪ್ರಸ್ತುತ್ ಬ್ಯಾಂಕಾಚೊ ಎಕುಣ್ ವಯ್ವಾಟ್ ₹1600 ಕೊರೊಡಾಂಕ್ ಮಿಕ್ವೊನ್, ಬ್ಯಾಂಕಾಚಿ ವಾಡಾವಳ್ – ಬ್ಯಾಂಕಾಚೇರ್ ಗ್ರಾಹಕಾಂಚೊಂ ವಿಶ್ವಾಸ್ ಆನಿ ಅಭಿಮಾನ್ ದಾಕಯ್ತಾ.
