ಮಂಗ್ಳುರ್ ದಿಯೆಸೆಜಿಚ್ಯಾ ಕಥೊಲಿಕ್ ಶಿಕ್ಪಾ ಮಂಡಳೆನ್, ಆಪ್ಲ್ಯಾ ಆಡಳ್ತ್ಯಾಖಾಲ್ ಯೆಂವ್ಚ್ಯಾ ಪದ್ವೆ ಪೂರ್ವ್ ಕೊಲೆಜಿಚ್ಯಾ ಶಿಕ್ಪಾಂತ್ ಮುಕಾರ್ ಆಸುನ್ ಆರ್ಥಿಕ್ ಗರ್ಜೆನ್ ಆಸ್ಚ್ಯಾ 101 ಪ್ರತಿಭಾವಂತ್ ಭುರ್ಗ್ಯಾಂಕ್ ಮಂಗ್ಳಾರಾ, ಅಗೋಸ್ತ್ 25 ವೆರ್ ಬಜ್ಜೋಡಿ ಶಾಂತಿಕಿರಣ್ ಗೊವ್ಳಿಕ್ ಕೇಂದ್ರಾಂತ್ ತಿಸ್ರ್ಯಾ ವರ್ಸಾಚೆಂ ಮೊ| ಲೆಸ್ಲಿ ಶೆಣೈ ವಿದ್ಯಾರ್ಥಿ ವೇತನ್ ವಾಂಟಪ್ ಕಾರ್ಯೆಂ ಚಲ್ಲೆಂ.
ಕಾರ್ಯಾವಳಿಚ್ಯಾ ಪಯ್ಲೆಂ ಮಂಗ್ಳುರ್ಚ್ಯಾ ‘ಇನ್ಸ್ಟಿಟ್ಯೂಟ್ ಫಾರ್ ಇಂಡಿವಿಜುಯಲ್ ಡೆವಲಪ್ಮೆಂಟ್’ ಸಂಸ್ಥ್ಯಾಚೊ ನಿರ್ದೇಶಕ್ ಪ್ರೊ. ದೊ. ರೊನಾಲ್ಡ್ ಪಿಂಟೊ ಹಾಣಿ ವಿದ್ಯಾರ್ಥಿಂಕ್ ವೃತ್ತಿ ಮಾರ್ಗದರ್ಶನ್ ದಿಲೆಂ. ಸಮುದಾಯಾಚ್ಯಾ ವಿದ್ಯಾರ್ಥಿಂನಿ ಐ.ಎ.ಎಸ್., ಕೆ.ಎ.ಎಸ್. ತಸಲೆ ನಾಗರಿಕ್ ಸೆವಾ, ರಾಕಣ್ ಸೆವಾ , ಬ್ಯಾಂಕಿಂಗ್ ಆನಿ ಹೆರ್ ಸ್ಪರ್ಧಾತ್ಮಕ್ ಪರೀಕ್ಷಾ ಫುಡ್ ಕರುಂಕ್ ತಯಾರ್ ಜಾಂವ್ಚೆ ವಿಶ್ಯಾಂತ್ ತಾಣಿ ಉಲೊ ಆನಿ ಮಾಹೆತ್ ದಿಲಿ.
ಬಜ್ಪೆ ಕೃಪಾಸಾಧನ ವಿದ್ಯಾರ್ಥಿಂಚ್ಯಾ ಪ್ರಾರ್ಥನಾ ಸವೆಂ ಕಾರ್ಯೆಂ ಸುರ್ವಾತ್ಲೆಂ. ಕಥೊಲಿಕ್ ಶಿಕ್ಪಾ ಮಂಡಳೆಚೊ ಕಾರ್ಯದರ್ಶಿ ಮಾ. ದೊ. ಪ್ರವೀಣ್ ಲಿಯೋ ಲಸ್ರಾದೊ ಹಾಣಿ ಯೆವ್ಕಾರ್ ಮಾಗ್ಲೊ ಆನಿ ಶಿಕ್ಪಾನಿಧಿಚೊ ಮಹತ್ವ್ ಆನಿ ಪ್ರಸ್ತುತ್ ನಿಧಿಕ್ ತಾಣಿ ದಿಲ್ಲ್ಯಾ ವ್ಹಡಾ ದೆಣ್ಗೆಚೊ ಉಡಾಸ್ ಕಾಡ್ಲೊ. ಕಾರ್ಯಾಂತ್ ದೆ| ಮೊ| ಲೆಸ್ಲಿ ಎಫ್. ಶೆಣೈ ಹಾಂಚ್ಯಾ ತಸ್ವಿರೆಕ್ ಫುಲಾಂ ಅರ್ಪುನ್ ನಮಾನ್ ಪಾಟಯ್ಲೊ ಆನಿ ತಾಂಚ್ಯಾ ಆತ್ಮ್ಯಾಕ್ ಶಾಂತಿ ಮಾಗ್ಲಿ.
ಪ್ರಸ್ತುತ್ ಮುಲ್ಕಿ ಫಿರ್ಗಜೆಚೊ ವಿಗಾರ್ ಆನಿ ಸಿ.ಬಿ.ಇ ಸಂಸ್ಥ್ಯಾಚೊ ಆದ್ಲೊ ಕಾರ್ಯದರ್ಶಿ ಮಾ. ಬಾ. ಅಂಟನಿ ಶೇರಾ ಹ್ಯಾ ಸಂದರ್ಭಾರ್ ಉಲವ್ನ್, “ವಿದ್ಯಾರ್ಥಿಂನಿ ಆಪ್ಲ್ಯಾ ಜಿವಿತಾಂತ್ ಶಿಕ್ಪಾಕ್ ಪಯ್ಲಿ ಆದ್ಯತಾ ದೀಂವ್ಕ್ ಜಾಯ್. ಬರೆ ಅಂಕ್ ಜೋಡ್ನ್ ಶಿಕ್ಪಾಂತ್ ಸಾಧನ್ ಕರ್ಚೆ ಸಾಂಗಾತಾ ಬರ್ಯಾ ಮೊಲಾಂನಿ ಭರ್ಲಲೆಂ ಜಿವಿತ್ ರೂಪಿತ್ ಕರುಂಕ್ ಜಾಯ್. ಆಜ್ ತುಮ್ಕಾಂ ಲಾಭ್ಲ್ಲೊ ಪ್ರೋತ್ಸಾವ್ ತುಮಿ ಫುಡಾರಾಂತ್ ಹೆರಾಂಕ್ ದಿಂವ್ಚೆಂ ಬರೆಂ ಮನ್ ದಾಕಂವ್ಕ್ ಜಾಯ್” ಮ್ಹಳೆಂ.
ಕಾರ್ಯಕ್ರಮಾಕ್ ಮುಕೆಲ್ ಸಯ್ರೊ ಜಾವ್ನ್ ಅಮೆರಿಕಾ ಥಾವ್ನ್ ದೆ| ಮೊ| ಲೆಸ್ಲಿ ಶೆಣೈ ಹಾಂಚ್ಯಾ ಭಾವಾಚೊ ಪೂತ್ ಗೋಲ್ಡ್ವಿನ್ ವಾಸ್ ಹಾಜರ್ ಅಸೊನ್, ಸಂಸ್ಥ್ಯಾ ತರ್ಪೆನ್ ತಾಂಕಾ ಮಾನ್ ಕೆಲೊ. ಆಪ್ಲ್ಯಾ ಬಾಪ್ಲ್ಯಾಚೊ ಉಡಾಸ್ ಕಾಡುನ್ ತಾಂಚ್ಯಾ ಆತ್ಮ್ಯಾಕ್ ಶಾಂತಿ ಲಾಭ್ಚೆ ಪಾಸುನ್ ವಿದ್ಯಾರ್ಥಿಂಕ್ ಮಾಗೊಂಕ್ ವಿನಂತಿ ಕೆಲ್ಲ್ಯಾ ತಾಣಿ “ವಿದ್ಯಾರ್ಥಿಂನಿ ಕೆದಿಂಚ್ ಧಯ್ರ್ ಸಾಂಡಿನಾಯೆ, ಜಿಣ್ಯೆಂತ್ ಕೆದಾಳಾಯ್ ಶೆವೊಟ್ ಉಂಚ್ಲೊ ದವರುಂಕ್ ಜಾಯ್ ಆನಿ ಉಪ್ಕಾರ್ ಆನಿ ಕುಮಕ್ ಕೆಲ್ಲ್ಯಾಂಕ್ ಕೆದಿಂಚ್ ವಿಸ್ರಾನಾಯೆ” ಮ್ಹಳೆಂ.
ಶಾಂತಿ ಕಿರಣ್ ಸಂಸ್ಥ್ಯಾಚೊ ನಿರ್ದೇಶಕ್ ಮಾ. ಬಾ. ಸಂತೋಷ್ ರೊಡ್ರಿಗಸ್ ಹಾಣಿ ” ಪ್ರಸ್ತುತ್ ಆರ್ಥಿಕ್ ಕುಮಕ್ ವಿದ್ಯಾರ್ಥಿಂಚ್ಯಾ ಫುಡಾರಾಕ್ ಏಕ್ ಲ್ಹಾನ್ ಕುಮಕ್ ಜಾವ್ನಾಸಾ. ಹಾಚೊ ಬರೊ ಉಪೆಗ್ ಕರುನ್ ಜವಾಬ್ದಾರೆಚೆ ನಾಗರಿಕ್ ಜಾವ್ನ್ ಜಿಯೆಂವ್ಚಿಚ್ ವ್ಹಡ್ ಉಪಲಬ್ದಿ” ಮ್ಹಣ್ ವಿದ್ಯಾರ್ಥಿಂಕ್ ಆಶೀರ್ವಚನ್ ದಿಲೆಂ.
ಚೇಲೂರು ಸಾಂ. ತೊಮಾಸ್ ಇಸ್ಕೊಲಾಚೊ ಮುಕೆಲ್ ಮೆಸ್ತ್ರಿ ಲ್ಯಾನ್ಸಿ ರೊಡ್ರಿಗಸ್ ಹಾಣಿ ಕಾರ್ಯೆಂ ಚಲಯ್ಲೆಂ. ಸಿ.ಬಿ.ಇ ದಫ್ತರಾಚಿ ವಾವ್ರಾಡಿ ಪ್ರೀತಿ ಗೋಮ್ಸ್ ಹಿಣೆ ದಿನ್ವಾಸ್ ಪಾಟಯ್ಲೆ.
■ ವರ್ದಿ / ತಸ್ವಿರ್ಯೊ : ಕೆನರಾ ಸಂಪರ್ಕ್ ಕೇಂದ್ರ್, ಮಂಗ್ಳುರ್ ದಿಯೆಸೆಜ್
