“ಹ್ಯಾ ಸಂಸಾರಾಂತ್ ಕಿತ್ಲೆಶ್ಯೊ ಭಾಸೊ ಆಸ್ಲ್ಲ್ಯೊ ಜಾಂವ್ಕ್ ಪುರೊ. ಪೂಣ್ ಆಜ್ ಕಿತ್ಲೆ ಚಾಲ್ತೆರ್ ಆಸಾತ್ ? ಆಜ್ ಕಾಲ್ ಸಗ್ಳ್ಯಾನಿತ್ಲ್ಯಾನ್ ‘ಕೊಂಕ್ಣಿ ಉಲಯ್ – ಕೊಂಕ್ಣಿ ಫುಲಯ್ – ಕೊಂಕ್ಣಿ ಉರಯ್’ ಮ್ಹಳ್ಳೆ ನಾರೆ ವೆದಿಂ ಥಾವ್ನ್ ಆಯ್ಕೊಂಕ್ ಮೆಳ್ತಾತ್. ಪೂಣ್ ಉಡಾಸ್ ದವರಾ ಖಂಯ್ಚೀಯ್ ಭಾಸ್ ಫಕತ್ ಉಲವ್ನ್, ಫುಲಂವ್ಕೀ ಜಾಯ್ನಾ, ಉರಂವ್ಕೀ ಜಾಯ್ನಾ” ಮ್ಹಣಾಲೊ ಕೇಂದ್ರ್ ಸಾಹಿತ್ಯ್ ಅಕಾಡೆಮಿ ಪ್ರಶಸ್ತಿ ವಿಜೇತ್ ಕೊಂಕ್ಣಿ ಸಾಹಿತಿ / ಪತ್ರ್ಕರ್ತ್ ಎಚ್ಚೆಮ್, ಪೆರ್ನಾಲ್.
ತೋ ಹಂಪನಕಟ್ಟಾ ಮಿಲಾರ್ ಕೊಲೆಜಿನ್ ಮಾಂಡುನ್ ಹಾಡ್ಲೆಲ್ಯಾ ಕೊಂಕ್ಣಿ ಮಾನ್ಯತಾ ದೀಸ್ ಆಚರಣ್ ಕಾರ್ಯಾಂತ್ ಮುಕೆಲ್ ಸಯ್ರೊ ತಶೆಂ ಪ್ರಮುಕ್ ಉಲವ್ಪಿ ಜಾವ್ನ್ ಉಲಯ್ತಾಲೊ.
“ಆಮ್ಚ್ಯಾ ಸುತ್ತುರಾಂತ್ ಇತ್ಲೆ ಕೊಂಕ್ಣಿ ಸಂಗ್ ಸಂಸ್ಥೆ ಆಸಾತ್. ಹರ್ ಹಫ್ತ್ಯಾಂತ್ ಮ್ಹಳ್ಳೆಪರಿಂ ಕೊಂಕ್ಣೆಚ್ಯಾ ನಾಂವಾನ್ ಕೊಂಕ್ಣಿ ಕಾರ್ಯಿಂ ಸಾದರ್ ಜಾತಾತ್. ಪೂಣ್ ಕಿತ್ಲೆ ಸಂಗ್ ಸಂಸ್ಥೆ ಕೊಂಕ್ಣಿ ಕಾರ್ಯಾಚಿ ವರ್ದಿ ಕೊಂಕ್ಣೆಂತ್ ಆಮ್ಕಾಂ ಧಾಡುನ್ ದಿತಾತ್? ತಾಂಕಾ ಕೊಂಕ್ಣಿ ನಾಕಾ, ಕೊಂಕ್ಣೆಚ್ಯಾ ನಾಂವಾನ್ ತಾಂಕಾ ಜಾಯ್ ಫಕತ್ ಪ್ರಚಾರ್, ದಾನ್ ಆನಿ ಅನುದಾನ್. ಪಾಟ್ಲ್ಯಾ 15 ವರ್ಸಾಂ ಪಾಸುನ್ ಏಕ್ ಕೊಂಕ್ಣಿ ಜಾಳಿಜಾಗ್ಯಾಚೊ ಸಂಪಾದಕ್ ಜಾವ್ನ್ ತುಮ್ಕಾಂ ಸಾಂಗ್ತಾಂ – ಖಬರ್ ಕೊಂಕ್ಣೆಂತ್ ಆಸಾಗೀ ? ಮ್ಹಣ್ ವಿಚಾರ್ಲ್ಯಾರ್ ಹಾಂಚಿ ಜಾಪ್ – ತುಂ ಕೊಂಕ್ಣೆಂತ್ ಕರ್ನ್ ಘಾಲ್ ! ತಾಂಚ್ಯಾ ಕಾರ್ಯಾಂಚ್ಯೊ ವರ್ದ್ಯೊ ಫಾಯ್ಸ್ ಜಾಂವ್ಚ್ಯೊ – ಕನ್ನಡ ವಾ ಇಂಗ್ಲೆಶಾಂತ್ ! ಹಾಂಚೊ ಪತ್ರ್ – ವೆವ್ಹಾರ್, ಅಪೀಲಾಂ ಸಗ್ಳಿಂ ಆಸ್ಚಿಂ ಇಂಗ್ಲಿಶಾಂತ್. ವೆಬ್ಸೈಟ್ ಇಂಗ್ಲಿಶಾಂತ್. ಹಿ ಬೋವ್ ಬೆಜಾರಾಯೆಚಿ ಗಜಾಲ್”
” ಆಜ್ ಕೆನರಾಂತ್, ಕೊಂಕ್ಣಿ ಭಾಸ್ ಉರ್ಲ್ಯಾ ಜಾಲ್ಯಾರ್ ಚಡ್ಕರುನ್ ಥಳೀಯ್ ಪವಿತ್ ಸಭೆವರ್ವಿಂ ಮಾತ್. ಶೆರ್ಮಾಂವ್ ದಿಂವ್ಚ್ಯಾ ಪ್ರಾದ್ರ್ಯಾಬಾಂ ಥಾವ್ನ್ ನಂಯ್, ಬಗಾರ್ ಪಯ್ಲೆ ಪಾವ್ಟಿಂ ಬೈಬಲ್ ಕೊಂಕ್ಣೆಕ್ ತರ್ಜಣ್ ಕೆಲ್ಲ್ಯಾ ಮೊ| ರೇಮಂಡ್ ಮಸ್ಕರೇನ್ಹಸ್ ವಾ ಕೊಂಕ್ಣೆಂತ್ ಸಬ್ದಾ ಕೋಸ್ ರಚ್ಲೆಲ್ಯಾ ಸಿಲಾ ಮಿನೇಜ್ ತಸಲ್ಯಾ ಯಾಜಕಾಂ ಥಾವ್ನ್. ಹಾಚೊ ಅರ್ಥ್ ಆದ್ಲ್ಯಾ ಕಾಳಾರ್ ಆಪುರ್ಬಾಯೆಚೊ ಶೆರ್ಮಾಂವ್ ದಿತಲೆ ಪುರ್ವಿತ್ ನಾತ್ಲ್ಲೆ ಮ್ಹಣ್ ಅರ್ತ್ ನ್ಹಂಯ್. ಕಿತ್ಲೆಶೆ ಆಸ್ಲ್ಲೆ ಜಾಂವ್ಕ್ ಪುರೊ. ಆಮ್ಚ್ಯಾ ಮಾಲ್ಘಡ್ಯಾಂನಿ ಭೆಶ್ಟೆಂಚ್ ಸಾಂಗೊಂಕ್ ನಾ – ‘ಉಲಯಿಲ್ಲೆಂ ವಾರ್ಯಾರ್ ವೆತಾ, ಬರಯಿಲ್ಲೆಂ ಆನಿ ಛಾಪ್ಲ್ಲೆಂ ಮಾತ್ ಉರ್ತಾ.’ ಜ್ಯಾ ದಿಸಾ ಥಳೀಯ್ ಪವಿತ್ ಸಭೆಂತ್ ಕೊಂಕ್ಣೆಚೊ ವಾಪಾರ್ ರಾವಯ್ಲೊ, 80% ಕೊಂಕ್ಣಿ ಆಸ್ಚಿ ನಾ. ದೆಕುನ್ ಹಾಂವ್ ಮ್ಹಣ್ತಾಂ – ಜೆ ಪರ್ಯಾಂತ್ ಆಮಿ ಕೊಂಕ್ಣಿ ವಾಚುಂಕ್ ಅನಿ ಬರಂವ್ಕ್ ಶಿಕನಾಂವ್ , ಕೊಂಕ್ಣಿ ಫುಲಂವ್ಕ್, ಉರಂವ್ಕ್ ಸಕಾನಾಂವ್. ದೆಕುನ್ ಆಮ್ಚ್ಯಾ ವಿದ್ಯಾರ್ಥಿಂನಿ ಕೊಂಕ್ಣೆಂತ್ ವಾಚುಂಕ್ ಆನಿ ಬರಂವ್ಕ್ ಶಿಕುಂಕ್ ಜಾಯ್”
ಕಾರ್ಯಾಚೊ ಅಧ್ಯಕ್ಶ್ ಮಿಲಾರ್ ಫಿರ್ಗಜೆಚೊ ವಿಗಾರ್ ತಶೆಂಚ್ ಮಿಲಾರ್ ಶಿಕ್ಪಾ ಸಂಸ್ಥ್ಯಾಚೊಂ ಮುಕೆಲಿ ಮಾ| ಬಾ| ಐವನ್ ಮೈಕಲ್ ರೊಡ್ರಿಗಸ್ ಹಾಣಿ “ಕೊಲೆಜಿಚ್ಯಾ ಕೊಂಕ್ಣಿ ಸಂಘಾನ್ ‘ವಾಲ್ ಮ್ಯಾಗಜಿನ್’ ತಸಲೆಂ ಚಿಂತಪ್ ಆಟವ್ನ್ ಏಕ್ ಪ್ರೇತನ್ ಕೆಲ್ಯಾರ್ ಕೊಂಕ್ಣಿ ವಾಚನ್ ಆನಿ ಬರಪ್ ಜಿವಾಳ್ ದವರುಂಕ್ ಜಾತೆಲೆಂ. ಸಾಂಗಾತಾಚ್ ತವಳ್ ತವಳ್ ಕೊಂಕ್ಣಿ ತರ್ಬೆತ್ಯೊ ಮಾಂಡುನ್ ಹಾಡ್ಚೆಸವೆಂ ವಿಚಾರ್ ವಿನಿಮಯ್ ಕೆಲ್ಯಾರ್ ಭಾಶೆಚ್ಯಾ ವಾಡಾವಳಿಕ್ ಪೂರಕ್ ಜಾತೆಲೆಂ” ಮ್ಜಣ್ ಸಲಹಾ ದಿಲಿ ಆನಿ ಕೊಂಕ್ಣಿ ಮಾನ್ಯತಾಯೆ ದಿಸಾಚೆ ಶುಭಾಶಯ್ ಪಾಟಯ್ಲೆ.
ಪ್ರಾರ್ಥನ್ ಗೀತಾದ್ವಾರಿಂ ಕಾರ್ಯಾಕ್ ಚಾಲನ್ ದೀವ್ನ್, ಕೊಂಕ್ಣಿ ಭಾವ್ಟೊ ಉಬವ್ನ್ ಸುರ್ವಾತ್ಲೆಲ್ಯಾ ಕಾರ್ಯಾಂತ್ ‘ಕೊಂಕ್ಣಿ ಕಾವ್ಯೆಂ ರುಪಾಂ ಆನಿ ರೂಪಕಾಂ’ ವಿಮರ್ಶೆಚ್ಯಾ ಬುಕಾಕ್ 2025 ವ್ಯಾ ವರ್ಸಾಚಿ ಪ್ರತಿಷ್ಠಿತ್ ಕೇಂದ್ರ್ ಸಾಹಿತ್ಯ್ ಅಕಾಡೆಮಿ ಪ್ರಶಸ್ತಿ ಜೋಡ್ನ್, ಕೊಂಕ್ಣಿ ಸಾಹಿತ್ಯಾಂತ್ ಕೇಂದ್ರ್ ಸಾಹಿತ್ಯ್ ಅಕಾಡೆಮಿ ಪ್ರಶಸ್ತಿ ಜೊಡ್ಲಲೊ ಪಯ್ಲೊ ವಿಮರ್ಶೆಚೊ ಬೂಕ್ ದಾಕ್ಲೊ ರಚ್ಲೆಲ್ಯಾ, ಎಚ್. ಎಮ್. ಪೆರ್ನಾಲ್ ಹಾಕಾ ಮಿಲಾರ್ ಕೊಲೆಜಿ ತರ್ಪೆನ್ ಮಾನ್ ಪತ್ರ್, ಸ್ಮರಣಿಕಾ, ಶಾಲೊ, ಝೆಲೊ ಆನಿ ಫುಲಾಂ ದಾಲಿ ದೀವ್ನ್ ಮಾನ್ ಕೆಲೊ. ಕೊಂಕ್ಣಿ ಸಂಘಾಚಿ ಸಂಘಟಕಿ ಶ್ರೀಮತಿ ಪ್ರಮೀಳಾ ಮಸ್ಕರೇನ್ಹಸ್ ಹಿಣೆ ಎಚ್ಚೆಮ್ ಪೆರ್ನಾಲ್ ಹಾಚಿ ಒಳಕ್ ಕರುನ್ ದಿಲಿ ಆನಿ ಮಾನ್ ಪತ್ರ್ ವಾಚ್ಲೆಂ.
ಹ್ಯಾ ಸಂದರ್ಬಾರ್ ಕೊಲೆಜಿಚೊ ಪ್ರಾಚಾರ್ಯ್ ಮಾ| ದೊ| ಆಲ್ವಿನ್ ಸೆರಾವೊ, ಉಪ ಪ್ರಾಚಾರ್ಯ್ ಶ್ರೀಮತಿ ಗ್ಲೆನಿಶಿಯಾ ಫೆರ್ನಾಂಡಿಸ್ ಆನಿ ಕೊಂಕಣಿ ಸಂಘಾಚಿ ಕಾರ್ಯದರ್ಶಿ ಜ್ಯಾನಿಶ್ ವೆದಿರ್ ಹಾಜರ್ ಆಸ್ಲಿಂ .
ಕೊಂಕಣಿ ಸಂಘಾಚಿ ಕಾರ್ಯದರ್ಶಿ ಜ್ಯಾನಿಶ್ ಹಿಣೆ ಯೆವ್ಕಾರ್ ಮಾಗ್ಲೊ. ಪ್ರಾಧ್ಯಾಪಕ್ ಡೆನ್ಜಿಲ್ ಪಿಂಟೊ ಹಾಣೆ ಕಾರ್ಯಾಚೆಂ ಸೂತ್ರ್ ಸಂಚಾಲನ್ ಕರುನ್ , ದಿನ್ವಾಸ್ ಪಾಟಯ್ಲೆ.
ಮನೊರಂಜನಾಚೊ ವಾಂಟೊ ಜಾವ್ನ್ ಕೊಂಕಣಿ ಸಂಘಾಚ್ಯಾ ವಿದ್ಯಾರ್ಥಿಂನಿ ಕೊಂಕ್ಣಿ ಭಾಶೆಚ್ಯಾ ವರ್ತಮಾನ್ ಆನಿ ಫುಡಾರಾ ವಿಶಿಂ ನಾಟ್ಕುಳೊ, ಕೊಂಕ್ಣಿ ಪದಾಂ ಆನಿ ನಾಚ್ ಸಾದರ್ ಕೆಲೊ.
