“ಕವಿಮನಾಚ್ಯಾಂಕ್ ವಿಶೇಸ್ ಥರಾನ್ ಚಿಂತ್ಚಿ ಸಕತ್ ಆಸ್ತಾ. ಗುರುತ್ವ್ ಸಕ್ತೆಚಿ ಅಸ್ಮಿತಾಯ್ ಸೊಧುನ್ ಕಾಡ್ಲಲ್ಯಾ ನ್ಯೂಟನ್ ಆನಿ ಎಪ್ಪಲಾಚಿ ಕಾಣಿ ಪಳಯಾ. ಆಮ್ಚ್ಯೆ ತಕ್ಲೆರ್ ಎಪ್ಪಲ್ ಪಡ್ಲ್ಲೆಂ ತರ್ ಆಮಿ ತೆಂ ಎಪ್ಪಲ್ ಬರೇಂ ಆಸಾಗೀ, ಖಾಂವ್ಕ್ ಜಾತಾಗೀ ವಾ ಕುಸ್ಲಾಂಗೀ ಇತ್ಲೆಂ ಮಾತ್ರ್ ಚಿಂತ್ಯಾಂವ್. ಪುಣ್ ನ್ಯೂಟನ್ ತಸಲೊ ವಿಜ್ನಾನಿ ಹಾಚ್ಯಾಕೀ ಭಾಯ್ರ್ ವಚೊನ್ ’ಹೆಂ ಎಪ್ಪಲ್ ರುಕಾಥಾವ್ನ್ ಸಕಯ್ಲ್ ಪಡೊಂಕ್ ಕಾರಣ್ ಕಿತೆಂ?’ ಮ್ಹಣ್ ಚಿಂತಿಲಾಗ್ಲೊ ಆನಿ ಹ್ಯಾ ಚಿಂತ್ಪಾಚೆಂ ಫಳ್ ಜಾವ್ನ್ ಗುರುತ್ವ್ ಸಕ್ತೆಚಿ ಅಸ್ಮಿತಾಯ್ ಉಜ್ವಾಡಾಕ್ ಆಯ್ಲಿ. ಕವಿಯ್ ತಶೆಂಚ್ ಆಮಿ ಚಿಂತಿನಾತ್ಲೆಂ ತೆ ಚಿಂತ್ತಾತ್” ಅಶೆಂ ಮ್ಹಣಲಾಗ್ಲೊ ಕಟೀಲ್ ಫಿರ್ಗಜೆಚೊ ವಿಗಾರ್ ಮಾ. ಬಾ ಆಲ್ಫ್ರೆಡ್ ಜೆ ಪಿಂಟೊ. ಕಟೀಲ್ ಫಿರ್ಗಜೆಚ್ಯಾ ಸಭಾಸಾಲಾಂತ್ ಚಲ್ಲಲ್ಯಾ ’ಗ್ರಾಮ್ ಲೋಕ್’ ಕಾರ್ಯಾಚೆಂ ಉದ್ಘಾಟಕ್ ಜಾವ್ನ್ ತೆ ಉಲಯ್ತಾಲೆ.
026, ಆಗಸ್ಟಾಚ್ಯೆ 30 ತಾರಿಕೆರ್ ಭಾರತೀಯ್ ಕಥೊಲಿಕ್ ಯುವ ಸಂಚಾಲನ್ ಕಟೀಲ್ ಘಟಕ್ ಆನಿ ಸಾಹಿತ್ಯ್ ಅಕಾಡೆಮಿ ನವೀ ದಿಲ್ಲಿ ಹಾಂಚ್ಯಾ ಜೋಡ್ ಆಸ್ರ್ಯಾಖಾಲ್ ಕಟೀಲ್ ಇಗರ್ಜೆಚ್ಯಾ ಸಾಲಾಂತ್ ಹೆಂ ಕಾರ್ಯೆಂ ಮಾಂಡುನ್ ಹಾಡ್ಲ್ಲೆಂ. ಕಾರ್ಯಾಚ್ಯೆ ಸುರ್ವೇರ್ ಸಾಹಿತ್ಯ್ ಅಕಾಡೆಮಿ ನವೀ ದಿಲ್ಲಿ ಹಾಚೊ ಕೊಂಕ್ಣೀ ಸಲ್ಲಾಗಾರ್ ಮಂಡಳೆಚೊ ನಿಮಂತ್ರಕ್, ಕೇಂದ್ರ್ ಸಾಹಿತ್ಯ್ ಅಕಾಡೆಮಿ ಪುರಸ್ಕಾರ್ ವಿಜೇತ್ ಕವಿ ಮೆಲ್ವಿನ್ ರೊಡ್ರಿಗಸ್ ಹಾಣಿಂ ಸಾಹಿತ್ಯ್ ಅಕಾಡೆಮಿ ಮ್ಹಳ್ಯಾರ್ ಕಿತೆಂ, ತಿ ಕಶಿ ಕಾಮ್ ಕರ್ತಾ ಮ್ಹಳ್ಳೆವಿಶಿಂ ಮಾಹೆತ್ ದಿಲಿ. ಕಟೀಲ್ಚೊ ವಿಗಾರ್ ಆಲ್ಫ್ರೆಡ್ ಜೆ. ಪಿಂಟೊ ಹಾಣಿಂ ದಿವೊ ಪೆಟೊವ್ನ್ ಕಾರ್ಯಾಚೆಂ ಉಗ್ತಾವಣ್ ಕೆಲೆಂ. ಕೇಂದ್ರ ಸಾಹಿತ್ಯ್ ಅಕಾಡೆಮಿ ಪುರಸ್ಕಾರ್ ಕವಿ ಆನಿ ಸಾಹಿತ್ಯ್ ಅಕಾಡೆಮಿ ನವೀ ದಿಲ್ಲಿ ಹಾಚೊ ಕರ್ನಾಟಕಾಚೊ ಪ್ರತಿನಿಧಿ ಎಚ್ಚೆಮ್ ಪೆರ್ನಾಲ್ ಹಾಣಿಂ ಕಾರ್ಯೆಂ ಚೊಲೊವ್ನ್ ವ್ಹೆಲೆಂ. ಹಾಂಚೆಸಾಂಗಾತಾ ಕವಿ ವಿಲ್ಸನ್ ಕಟೀಲ್ ಆನಿ ಐ.ಸಿ.ವೈ.ಎಮ್ ಕಟೀಲ್ ಘಟಕಾಚೊ ಅಧ್ಯಕ್ಷ್ ಎಸ್ಟಲ್ ಸಿಕ್ವೇರಾ ವೆದಿರ್ ಹಾಜರ್ ಆಸ್ಲ್ಲೆ.
ಕಾರ್ಯಾಚೊ ಮುಕೇಲ್ ವಾಂಟೊ ಜಾವ್ನ್ ಸಾಹಿತ್ಯ್ ಸಾದರೀಕರಣಾಚೊ ವಾಂಟೊ ಬೊವ್ ಆಪುರ್ಬಾಯೆನ್ ಚಲ್ಲೊ. ಕವಿ ವಿಲ್ಸನ್ ಕಟೀಲ್ ಹಾಚ್ಯಾ ಮುಕೇಲ್ಪಣಾಖಾಲ್ ಚಲ್ಲಲ್ಯಾ ಹ್ಯಾ ವಾಂಟ್ಯಾಂತ್ ಕವಿ ವಿಡಂಬನ್ಕಾರ್ ರೋಶು ಬಜ್ಪೆ ಹಾಣೆಂ ವಿನೋದ್ ವಾಚುನ್ ಲೊಕಾಕ್ ಹಾಸಯ್ಲೆಂ ತರ್ ಕವಿ ಜೊಸ್ಸಿ ಪಿಂಟೊ ಕಿನ್ನಿಗೋಳಿ ಹಾಣಿಂ ಜನಪದ್ ಕಾಣಿ ವಾಚುನ್ ಸರ್ವಾಂಕ್ ವ್ಹಡ್ಲಿಮಾಂಯ್ಚ್ಯಾ ಉಸ್ಕ್ಯಾರ್ ಧಲಯ್ಲೆಂ. ಜೋಯ್ಸ್ ಪಿಂಟೊ ಕಿನ್ನಿಗೊಳಿ, ಜೀವ್ ಕ್ರಾಸ್ತಾ ನಿಡ್ಡೋಡಿ, ವಿನ್ನಿಫ್ರೆಡ್ ಪಿಂಟೊ, ಅಲೆಕ್ಸ್ ತಾವ್ರೊ, ಫಾ ಆಲ್ಫ್ರೆಡ್ ಪಿಂಟೊ ಆನಿ ವಿಲ್ಸನ್ ಕಟೀಲ್ ಹಾಣಿಂ ಆಪಾಪ್ಲ್ಯೊ ಕವಿತಾ ಸಾದರ್ ಕೆಲ್ಯೊ.
ಆಖೇರಿಕ್ ಐ.ಸಿ.ವೈ.ಎಮ್ ಕಟೀಲ್ ಘಟಕಾಚೊ ಅಧ್ಯಕ್ಶ್ ಆಸ್ಟಲ್ ಸಿಕ್ವೇರಾ ಹಾಣೆಂ ಸರ್ವಾಂಚೊ ಉಪ್ಕಾರ್ ಬಾವುಡ್ಲೊ.
ತಸ್ವೀರ್ಯೊ : ಅಲ್ಫೋನ್ಸ್ ಮೆಂಡೋನ್ಸಾ ಪಾಂಗ್ಳಾ.
