ಕೇರಳಾಚೊ ಮಾಲ್ಘಡೊ ಕೊಂಕ್ಣಿ ಸಾಹಿತಿ ಆನಿ ವಾವ್ರಾಡಿ ಪದ್ಮಶ್ರೀ ಎನ್. ಪುರುಶೋತ್ತಮ್ ಮಲ್ಯ ಸುಕ್ರಾರಾ, ಸಪ್ತೆಂಬರ್ 11 ವೆರ್ ಸಂವ್ಸಾರಾಕ್ ಅಂತರ್ಲೆ. ತೆ 97 ಪಿರಾಯೆಚೆ ಆಶಿಲ್ಲೆ. ತಾಂಚ್ಯಾ ಮರ್ಣಾಥಂಯ್ ಅಖಿಲ್ ಭಾರತೀಯ್ ಕೊಂಕ್ಣಿ ಪರಿಶದ್ ಆನಿ ಗೊಂಯ್ಚ್ಯಾ ಕೊಂಕ್ಣಿ ಭಾಶಾ ಮಂಡಳಾನ್ ದೂಕ್ ಉಚಾರ್ಲಾಂ.
ಕೇರಳಂತ್ಲ್ಯಾ ಕೊಚಿ ವಾಠಾರಾಂತ್ಲೆ ಎನ್. ಪುರುಶೋತ್ತಮ್ ಮಲ್ಯ ಹಾಂಣಿ ಕಥಾ, ಕವಿತಾ, ಕಾದಂಬರಿ, ಪ್ರಬಂದ್, ನಾಟಕ್ ಅಶೆಂ ವಿವಿಂಗಡ್ ಸಾಹಿತ್ಯ್ ಪ್ರಕಾರಾಂತ್ಲಿಂ ಸುಮಾರ್ 21 ಪುಸ್ತಕಾಂ ಬರಯ್ಲ್ಯಾಂತ್ ತಶೆಂಚ್ ಮಲಯಾಳಮ್ ಭಾಶೆಂತ್ಲ್ಯಾನ್ ಕೊಂಕ್ಣಿ ಭಾಶೆಂತ್ ಪುಸ್ತಕಾಂಚೊ ಅಣ್ಕಾರ್ ಕೆಲಾ. 1986 ವರ್ಸಾ ಜಾಲ್ಲೆ ಅಖಿಲ್ ಭಾರತೀಯ್ ಕೊಂಕ್ಣಿ ಸಾಹಿತ್ಯ್ ಪರಿಶದೆಚೆ ತೆ ಯೆವ್ಕಾರ್ ಅಧ್ಯಕ್ಷ್ ಆಶಿಲ್ಲೆ.
ಪುರುಶೋತ್ತಮ್ ಮಲ್ಯ ಹಾಂಕಾಂ ಸಾಹಿತ್ಯ್ ಅಕಾದೆಮಿಚೊ 2008 ವರ್ಸಾಚೊ ಅಣ್ಕಾರ್ ಪುರಸ್ಕಾರ್ ಫಾವೊ ಜಾಲಾ. 2011 ವರ್ಸಾ ತಾಂಕಾಂ ವಿಶ್ವ್ ಕೊಂಕ್ಣಿ ಕೇಂದ್ರಾಚೊ ವಿಮಲಾ ವಿ ಪಯ್ ವಿಶ್ವ್ ಕೊಂಕ್ಣಿ ಜಿಣೆ ಗೌರವ್ ಪುರಸ್ಕಾರ್ ಫಾವೊ ಜಾಲಾ. ತಶೆಂಚ್ ಭಾರತ್ ಸರ್ಕಾರಾಚೊ ಪದ್ಮಶೀ ಪುರಸ್ಕಾರ್ ತಾಂಕಾಂ 2015 ವರ್ಸಾ ಫಾವೊ ಜಾಲಾ.
1966 ವರ್ಸಾ ಸ್ಥಾಪನ್ ಕೆಲ್ಲೆ ಕೊಂಕ್ಣಿ ಭಾಶಾ ಪ್ರಚಾರ್ ಸಭೆಚೆ ತೆ ಸಂಸ್ಥಾಪಕ್ ಆಶಿಲ್ಲೆ. ಹೆ ಸಂಸ್ಥೆ ವರ್ವಿಂ, ತಾಂಣಿ ಕೇರಳಾಂತ್ ಕೊಂಕ್ಣಿ ಚಳವಳ್ ಚಲಯ್ಲಿ. ಕೊಂಕ್ಣಿ ಭಾಶೆಚೊ ಆಸ್ಪಾವ್ ಸಂವಿಧಾನಾಚೆ ಆಟ್ವೆ ಅನುಸುಚೀಂತ್ ಜಾವ್ಚೊ ಮ್ಹಣೂನ್ ತಾಂಣಿ ಮೊಲಾದೀಕ್ ವಾವ್ರ್ ಕೆಲಾ. ಕೊಂಕ್ಣಿ ಭಾಶಾ ಭವನಾಚಿ ಸ್ಥಾಪನಾ ಜಾಲಿ ತೆನ್ನಾ ತಾಚೆ ಪಯ್ಲೆ ಅಧ್ಯಕ್ಷ್ ಜಾಂವ್ಚೊ ಮಾನ್ ತಾಂಕಾಂ ಫಾವೊ ಜಾಲೊ.
ಕೊಂಕ್ಣಿ ಸಮಾಜಾಕ್ ಎಕ್ಟಾಂಯ್ ಹಾಡೂನ್ ಕೊಂಕ್ಣಿ ಭಾಶೆಚ್ಯಾ ಪ್ರಸಾರಾ ಖಾತೀರ್ ತೆ ನಿಶ್ಟೆನ್ ಆನಿ ಪ್ರಾಮಾಣೀಕಪಣಾನ್ ವಾವುರ್ಲೆ ಅಶೆಂ ಅಖಿಲ್ ಭಾತರೀಯ್ ಕೊಂಕ್ಣಿ ಪರಿಶದ್ ಆನಿ ಕೊಂಕ್ಣಿ ಭಾಶಾ ಮಂಡಳಾನ್ ಸಂಯುಕ್ತಪಣಾನ್ ಉಜ್ವಾಡಾಯಿಲ್ಲೆ ಪ್ರಸಿದ್ಧಿ ಪತ್ರಕಾಂತ್ ಮ್ಹಳಾಂ.
