ಸಂಸಾರ್ಭರ್ ಆಸ್ಚ್ಯಾ ಕೊಂಕ್ಣಿ ಲೊಕಾಕ್ ಎಕಾ ವೆದಿಖಾಲ್ ಸಾಂಗಾತಾ ಹಾಡ್ಚ್ಯಾ ಉದ್ದೇಶಾನ್ ದೊ| ವಿವೇಕ್ ಮೆಂಡೋನ್ಸಾ ಹಾಂಚ್ಯಾ ಮೆಂಡೋನ್ಸಾ ಫಾಂವ್ಡೇಶನ್ ಬೊಂದೆರಾಖಾಲ್ ಕೊಂಕನಿಜ್ (KONKANIZ) ಉಪಕ್ರಮಾಕ್ ಮಂಗ್ಳುರಾಂತ್ ಚಾಲನ್ ದಿಲೆಂ.
“ಗಡಿ ಮಾತ್ ನಯ್, ಬೊಲಿಯೊ, ಲಿಪಿಯೊ ಅಶೆಂ ಜಾಯ್ತ್ಯಾ ಗಜಾಲಿಂಕ್ ಲಾಗುನ್ ಕೊಂಕ್ಣಿ ಲೊಕಾಮಧೆಂ ನಿರ್ಮಾಣ್ ಜಾಲ್ಲೊ ಅಂತರ್ ಉಣೊ ಕರ್ಚ್ಯಾ ದಿಶೆನ್ ಸಾಮಾನ್ಯ್ ಸಾಂಸ್ಕೃತಿಕ್ ಬಾಂದ್ ಘಟ್ ಕರ್ಚೊ ಜಾವ್ನಾಸಾ ಕೊಂಕನಿಜ್ ಹಾಚೊ ಮುಕೆಲ್ ಶೆವೊಟ್. ಭಾಸ್, ಖಾಣ್ ಜೆವಣ್, ನಾಟಕ್, ಸಿನೆಮಾ, ಸಂಗೀತ್, ಖೆಳ್ ಆಮ್ಕಾಂ ಲಾಗಿಂ ಹಾಡುಂಕ್ ಉಪ್ಕಾರ್ಚ್ಯೊ ಗಜಾಲಿ ಜಾವ್ನಾಸಾತ್. ಕಾರಣ್ ಆಮ್ಚಿಂ ಮುಳಾಂ ಏಕ್. ಹ್ಯಾ ಗಜಾಲಿಂಕ್ ತೆಂಕೊ ದೀವ್ನ್, ಏಕ್ ಸಾಂಸ್ಕೃತಿಕ್ ಸಾಂಕೊವ್ ಬಾಂದುನ್ ಆಮ್ಚೆಂ ಕೊಂಕ್ಣಿಪಣ್ ಜಿವೆಂ ದವರ್ಚ್ಯಾ ದಿಶೆನ್ ಕೊಂಕನಿಜ್ ಪ್ರಾಮಾಣಿಕ್ಪಣಿ ವಾವುರ್ತಲೆಂ” ಮ್ಹಣ್ ಮೆಂಡೋನ್ಸಾ ಫಾಂವ್ದೇಶನಾಚೊ ದೊ| ವಿವೇಕ್ ಮೆಂಡೋನ್ಸಾ ಮ್ಹಣಾಲೊ. ಮಂಗ್ಳುರ್ಚ್ಯಾ ಪತ್ರಿಕಾ ಭವನಾಂತ್ ಆಪಯಿಲ್ಲ್ಯಾ ಪತ್ರಾ ಪರಿಶದೆಂತ್ ತಾಣಿ ಹಿ ಮಾಹೆತ್ ದಿಲಿ.
ಕೊಂಕನಿಜ್ ಹ್ಯಾ ಉಪಕ್ರಮಾಖಾಲ್ ಪಯ್ಲೆಂ ಕಾರ್ಯಕ್ರಮ್ ಜಾವ್ನ್ ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾಂತ್ ಅಂತರಾಷ್ಟ್ರೀಯ್ ಮಟ್ಟಾರ್ ವ್ಹಡ್ ನಾಂವ್ ಕೆಲ್ಲೆಂ. 24 ಅಂತರಾಷ್ಟ್ರಿಯ್ ಪ್ರಶಸ್ತ್ಯೊ ಆಪ್ಣಾಯಿಲ್ಲೆಂ ಪಿಂತುರ್ ನಾಚೋಂ-ಯಾ ಕುಂಪಸಾರ್ ಪ್ರದರ್ಶನ್ ಜಾತಾಲೆಂ. ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾಚ್ಯಾ ಎಲ್.ಸಿ.ಆರ್.ಐ. ಸಭಾಂಗ್ಣಾಂತ್ ಸುಕ್ರಾರಾ, ಸಪ್ತೆಂಬರ್ 18 ವೆರ್, ಸಾಂಜೆಚ್ಯಾ 3.45 ವರಾಂಚೇರ್ ಹೆಂ ಪಿಂತುರ್ ಪ್ರದರ್ಶನ್ ಜಾತಲೆಂ. ಸರ್ವ್ ಕೊಂಕ್ಣಿ ಲೊಕಾನ್ ಹೆಂ ಪಿಂತುರ್ ಪಳೆಂವ್ಚೆ ಖಾತಿರ್ ಹ್ಯಾ ಪಿಂತುರಾಕ್ ಪ್ರವೇಶ್ ದರ್ ಫಕರ್ ರು. 100/- ದವರ್ಲಾ ಆಸುನ್, ಹಾಂಗಾಸರ್ ದಿಲ್ಲ್ಯಾ ಪೋಸ್ಟರಾಚೇರ್ ಆಸ್ಚೊ ಕ್ಯೂ ಆರ್ ಕೋಡ್ ವಾಪರುನ್ ಬಸ್ಕಾ ಅಮಾನತ್ ಕರುಂಕ್ ಜಾತಾತ್ ಮ್ಹಣ್ ದೊ। ಮೆಂಡೋನ್ಸಾ ಮ್ಹಣಾಲೊ.
ಬಾರ್ಡ್ರಾಯ್ ಬ್ಯಾರೆಟ್ಟೊ ಹಾಣೆ ಹೆಂ ಸಿನೆಮಾ ಗೋವಾ ಫೋಕ್ಲೋರ್ ಪ್ರೊಡಕ್ಷನ್ಸ್ ಬ್ಯಾನರಾಖಾಲ್ ನಿರ್ಮಾಣ್ ಕೆಲಾಂ ಆಸುನ್, ‘ನಾಚೋಂ-ಯಾ ಕುಂಪಸಾರ್’ ಕೊಂಕಣಿ ಸಿನೆಮಾಚ್ಯಾ ಇತಿಹಾಸಾಂತ್ಚ್ ಆರ್ವಿಲ್ಯಾ ದಿಸಾಂನಿ ಬೋವ್ ಗಾಜ್ಲೆಲೆಂ ಸಿನೆಮಾ ಜಾವ್ನಾಸಾ. ಹ್ಯಾ ಸಿನೆಮಾಕ್ 24 ಅಂತಾರಾಷ್ಟ್ರೀಯ್ ಗವ್ರವ್, 3 ರಾಷ್ಟ್ರೀಯ್ ಪ್ರಶಸ್ತ್ಯೊ ಆನಿ 10 ಗೋವಾ ರಾಜ್ಯಾಚ್ಯೊ ಪ್ರಶಸ್ತಿ ಫಾವೊ ಜಾಲ್ಯಾತ್. ಲಂಡನ್ ಇಂಡಿಯನ್ ಫಿಲ್ಮ್ ಫೆಸ್ಟಿವಲ್ ಸಾಂಗಾತಾ ಸಂಸಾರಾಚ್ಯಾ ಜಾಯ್ತ್ಯಾ ಪ್ರತಿಷ್ಠಿತ್ ಚಲನಚಿತ್ರೋತ್ಸವಾಂನಿ ಹ್ಯಾ ಸಿನೆಮಾನ್ ಪ್ರೇಕ್ಶಕ್ ತಶೆಂ ಸಮೀಕ್ಶಾಕಾಚೆಂ ಗುಮಾನ್ ವೊಡ್ಲಾಂ. 1960 ಆನಿ 1970ರ ಧಾಕ್ದ್ಯಾಚ್ಯಾ ಗೊಂಯ್ಚ್ಯಾ ರೋಮಾಂಚಕ್ ಸಂಗೀತ್ ಸಂಸಾರಾಚ್ಯಾ ಪಾಟಿಥಳಾರ್ ಹ್ಯಾ ಸಿನೆಮಾಚಿ ಕಾಣಿ ಬಾಂದುನ್ ಹಾಡ್ಲ್ಯಾ.
ಮುಕ್ಲ್ಯಾ ದಿಸಾಂನಿ ಗೊಂಯ್ – ಕರ್ನಾಟಕ ಮಧೆಂ ಸಾಹಿತೀಕ್ ತಶೆಂ ಸಾಂಸ್ಕೃತಿಕ್ ವಿನಿಮಯ್ ‘ಕೊಂಕನಿಜ್’ ತರ್ಪೆನ್ ಚಾಲು ಉರ್ತಲೊ ಮ್ಹಣ್ ದೊ| ಮೆಂಡೋನ್ಸಾನ್ ಮ್ಹಳೆಂ. ಪತ್ರಾ ಪರಿಶದೆಂತ್ ರೆಕ್ಸ್ ಫೆರ್ನಾಂಡಿಸ್, ಆಂಟೋನಿಯೋ ಫೆರ್ನಾಂಡಿಸ್, ಟೈಟಸ್ ನೊರೊನ್ಹಾ ಆನಿ ಸಾಹಿತ್ಯ ಅಕಾಡೆಮಿ ವಿಜೇತ್ ಸಾಹಿತಿ / ಪತ್ರ್ಕರ್ತ್ ಎಚ್ಚೆಮ್ ಪೆರ್ನಾಲ್ ಹಾಜರ್ ಆಸ್ಲೆ.
