ಸಪ್ತೆಂಬರಾಚ್ಯಾ 12 ವೆರ್ ಕೊಂಕಣಿ ಕುಟಮ್ ಜರ್ಮನಿ ಹಾಣಿ ಜಾಲ್ಬಾವು ಗೀಸೈಮ್, ಫ್ರಾಂಕ್ಫರ್ಟ್ ಹಾಂಗಾಸರ್ ಮೊಂತಿ ಸಾಯ್ಭಿಣಿಚೆಂ ಫೆಸ್ತ್ ಆನಿ ನವೆಂ ಜೆಂವ್ಚೊ ಸಂಭ್ರಮ್ ವ್ಹಡಾ ದಬಾಜಾನ್ ಮಾನಾಯ್ಲೊ. ಕಾರ್ಯಾಂತ್ 300 ಸಾಂದ್ಯಾಂನಿ ವಾಂಟೊ ಘೆತ್ಲೊ. ಸಂಭ್ರಮಾಚಾರಣಾಕ್ ಜರ್ಮನಿಂತ್ ಭಾರತ್ ಸರ್ಕಾರಾಚೊ ಕೊನ್ಸುಲೆಟ್ ಜನರಲ್ ಸೌರಭ್ ಸಿಂಗ್ ಆನಿ ತಾಚಿ ಪತಿಣ್ ದೊ| ಸಾನಿಯಾ ಸಿಂಗ್ ವಿಶೇಸ್ ಸಯ್ರಿಂ ಜಾವ್ನ್ ಹಾಜರ್ ಆಸ್ಲಿಂ.
ಮಾ| ಬಾ| ರೋಬರ್ಟ್ ರೇಗೊ ಹಾಣಿ ಪ್ರಧಾನ್ ಯಾಜಕ್ ಜಾವ್ನ್ ಸಂಭ್ರಮಿಕ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ಬಾ| ಜೇಸನ್ ಆನಿ ಬಾ| ಮನೋಹರ್ ಹಾಣಿ ಸಹಭೆಟವ್ಣಿ ಕೆಲಿ. ಮಿಸಾಚ್ಯಾ ಪಯ್ಲೆಂ ಭುರ್ಗ್ಯಾಂನಿ ಆನಿ ವ್ಹಡಿಲಾಂನಿ ಮರಿಯೆಕ್ ಫುಲಾಂ ಅರ್ಪುನ್ ಮಾನ್ ಕೆಲೊ. ವೆಲೊನ್ ಮಚಾದೊ ಆನಿ ಸಾಂಗೊಡ್ಯಾಂನಿ ಮಧುರ್ ಗಾಯನಾನ್ ಮಿಸಾಚ್ಯಾ ಬಲಿದಾನಾಚಿ ಸೊಭಾಯ್ ದೊಡ್ತಿ ಕೆಲಿ. ಬೆಥನಿ ಭಯ್ಣಿಂನಿ ಮಿಸಾಚ್ಯಾ ಬಲಿದಾನಾಚಿ ಮಾಂಡಾವಳ್ ಕೆಲಿ.
ಸಂಗಟನಾಚಿ ಖಜಾನ್ದಾರ್ ಪ್ರಿಯಾ ಲೋಬೊ ಹಿಣೆ ಯೆವ್ಕಾರ್ ಮಾಗ್ಲೊ. ಅಧ್ಯಕ್ಷ್ ಕೀತ್ ಸೊನ್ ನೊರೊನ್ಹಾ, ಉಪಾಧ್ಯಕ್ಷ್ ಅಲೆನ್ ಕುಟಿನ್ಹಾ, ಕಾರ್ಯದರ್ಶಿ ಪ್ರವೀಣ್ ಸೆರಾವೊ, ಸಹಕಾರ್ಯದರ್ಶಿ ನಂದನ್ ಡಿ ಸೊಜಾ, ಸಾಂಸ್ಕೃತಿಕ್ ಕಾರ್ಯದರ್ಶಿ ಸ್ಟೆಫಿ ಪಿರೇರಾ ಹಾಣಿ ಸಾಂಗಾತ್ ದಿಲೊ. ಸಾಂಸ್ಕೃತಿಕ್ ಕಾರ್ಯದರ್ಶಿ ಸ್ಟೆಫಿ ಪಿರೇರಾ ಹಿಚ್ಯಾ ಮುಕೆಲ್ಪಣಾರ್ ಭುರ್ಗ್ಯಾಂನಿಂ ತಶೆಂ ವ್ಹಡಾಂನಿ ಕೊಂಕ್ಣಿ ಪದಾಂ, ನಾಚ್, ನಾಟ್ಕುಳೆ ಆನಿ ಜಮ್ಯಾ ಗಾಯನಾಂ ಸಾದರ್ ಕೆಲಿಂ. ನಂದನ್ ಡಿ ಸೊಜಾ ಆನಿ ಲವಿಟಾ ಡಿ ಸೊಜಾ ಹಾಂಚ್ಯಾ ವಿಶೇಸ್ ಪ್ರದರ್ಶನಾನ್ ಸಂಭ್ರಮ್ ರಂಗ್ಲೊ. ಘರಾಚ್ ಕೆಲ್ಲ್ಯಾ ರಾಂದ್ವಯೆಚೆಂ ಏಲಂ ಚಲ್ಲೆಂ. ಮಾ| ಬಾ| ರೋಬರ್ಟ್ ರೇಗೊ ಹಾಣಿ ಸಂಗಾಚೊ ಸ್ವತಂತ್ರ್ ಜಾಳಿಜಾಗೊ https://konkanikutam.de/ ಉಗ್ತಾಯ್ಲೊ.
2002 ವ್ಯಾ ವರ್ಸಾ ಥೊಡ್ಯಾಚ್ ಜಣಾಂನಿ ಮೆಳೊನ್ ಸುರ್ವಾತ್ಲಲೊ ಲ್ಹಾನ್ ಪಂಗಡ್ ಕೊಂಕಣಿ ಕುಟಮ್, ಆಜ್ ಜರ್ಮನಿಂತ್ ಏಕ್ ಸಂಗ್ ಜಾವ್ನ್ ರೂಪಿತ್ ಜಾಲಾ. ಮಾ| ಬಾ| ರೋಬರ್ಟ್ ರೇಗೊ ಸುರ್ವಾತೆ ಪಾಸುನ್ ಕೊಂಕಣಿ ಕುಟಮ್ ಸಂಗಾ ಸಾಂಗಾತಾ ಜೊಡುನ್ ಆಸಾತ್ ಆನಿ ಮಾರ್ಗದರ್ಶನ್ ದೀವ್ನ್ ಆಸಾ. ಟೆಲಿಫೊನಾ ಥಾವ್ನ್ ಸುರು ಜಾಲ್ಲೊ ಸಂಗ್ ಆಜ್ ಸಮಾಜಿಕ್ ಮಾಧ್ಯಮಾಂಚಾ ಕಾಳಾಂತ್ಲ್ಯಾನ್ ಉತ್ರೊನ್, ಸ್ವತಂತ್ರ್ ಜಾಳಿ ಜಾಗ್ಯಾಕ್ ಪಾವ್ಲಾ. ಮಾಂಯ್ಗಾಂವ್ಚಿ ಕೊಂಕ್ಣಿ ಭಾಸ್, ಸಂಗೀತ್ ಆನಿ ಸಾಂಸ್ಕೃತಿಕ್ ಗ್ರೇಸ್ತ್ಕಾಯ್ ಜಗಂವ್ಚೆ ದಿಶೆನ್ ಕೊಂಕಣಿ ಕುಟಮ್ ಜರ್ಮನಿ ಪರ್ಗಾಂವಾಂತ್ ಆಪ್ಲ್ಯಾ ತಾಂಕಿ ಭಿತರ್ಲೆಂ ಕಾಮ್ ಕರುನ್ ಆಸಾ.
ಅಧ್ಯಕ್ಶ್ ಕೀತ್ ಶೊನ್ ನೊರೊನ್ಹಾ ಹಾಣೆ ಉಪ್ಕಾರ್ ಆಟಂವ್ಚೆ ಸವೆಂ ಕಾರ್ಯೆಂ ಸಂಪನ್ನ್ ಜಾಲೆಂ.
1 comment
Kudos to Germany team for making out Monthi fest shine in Europe.