ಸಪ್ಟೆಂಬರ್ 12 ವೆರ್ ಸಾಂ ಜುಜೆ ಇಗರ್ಜೆಂತ್ ‘ಕೋಂಕ್ಣಿ ಸಮುದಾಯ್ ನೆದರ್ಲೆಂಡ್ಸ್’ (KSN) ಹಾಚ್ಯಾ ಮುಖೇಲ್ಪಣಾರ್, ಲೈಡನಾಂತ್ಲ್ಯಾ ಸಾಂ ಜುಜೆ ಇಗರ್ಜೆಂತ್, ಮೊಂತಿ ಸಾಯ್ಬಿಣಿಚೆಂ ಫೆಸ್ತ್ ಗಾಂವ್ಚ್ಯಾ ರಿತಿ ರಿವಾಜಿಂಸವೆಂ ಭಕ್ತಿಪಣಾನ್ ಆನಿ ವ್ಹಡಾ ಸಂಭ್ರಮಾನ್ ಆಚರಣ್ ಕೆಲೆಂ. ನೆದರ್ಲೆಂಡಾಚ್ಯಾ ವೆಗ್ಳ್ಯಾ ವೆಗ್ಳ್ಯಾ ಶಹರಾಂ ಥಾವ್ನ್ ಆಯಿಲ್ಲಿಂ ಕುಟ್ಮಾಂ ಎಕಾ ಅವಿಭಕ್ತ್ ಕುಟ್ಮಾಬರಿಂ ಸಾಂಗಾತಾ ಆಯ್ಲಿಂ . ಆತ್ಮಿಕ್ ದಿರೆಕ್ತೋರ್ ಮಾ। ಬಾ। ರಿಚರ್ಡ್ ಲೋಬೋ, ಎಸ್ವಿಡಿ, ಹಾಣಿಂ ಸರ್ವಾಂಕ್ ಯೆವ್ಕಾರ್ ಮಾಗೊನ್ ಆಶೀರ್ವಚನ್ ದಿಲೆಂ ಆನಿ ಫೆಸ್ತಾಚಿ ಸುರ್ವಾತ್ ಕೆಲಿ.
ಇಗರ್ಜೆ ಭಾಯ್ಲ್ಯಾ ಮೋಕ್ಳ್ಯಾ ಸುವಾತೆರ್ ಭುರ್ಗ್ಯಾಂನಿ ಬಾಳೋಕ್ ಮರಿಯೆಚ್ಯಾ ಇಮಾಜಿಕ್ ಫುಲಾಂ ಅರ್ಪಣ್ ಕೆಲಿಂ. ಲ್ಹಾನ್ ಹಾತಾಂನಿ ವ್ಹಾವಯಿಲ್ಲಿಂ ಫುಲಾಂ ಆನಿ ಭುರ್ಗ್ಯಾಂಚ್ಯೊ ತಾಳಿಯೋ — ಹೆಂ ದೃಶ್ಯ್ ಹಾಜರ್ ಆಸಲ್ಲ್ಯಾ ಹರ್ಯೆಕ್ಲ್ಯಾಕ್ ಗಾಂವ್ಚಿ ಯಾದ್ ಹಾಡುನ್ ಆಯ್ಲೆಂ.
ಉಪ್ರಾಂತ್ ಕೋಂಕ್ಣಿ ಭಾಶೆಂತ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ಲವಿಟಾ ಲೋಬೊ ಹಿಚ್ಯಾ ಮುಖೇಲ್ಪಣಾರ್ ಆನಿ ರೊಬರ್ಟ್ ಡಿ’ಅಲ್ಮೇದಾ ಹಾಚ್ಯಾ ಸಂಗೀತ್ ಸಂಯೋಜನಾಖಾಲ್ ಗಾಯನ್ ಪಂಗ್ಡಾನ್ ಮಧುರ್ ಗೀತಾಂ ಗಾವ್ನ್ ಮಿಸಾಕ್ ಜೀವ್ ದಿಲೊ. ತಶೆಂಚ್ ಭುರ್ಗ್ಯಾಂನಿ ಸಾಯ್ಬಿಣಿಚ್ಯಾ ಮಾನಾಕ್ ವಿಶೇಸ್ ಕೊಂಕ್ಣಿ ಗೀತ್ ಪಂಗ್ಡಾನ್ ಗಾವ್ನ್ ಅರ್ಪಿಲೆಂ. ಶೆರ್ಮಾಂವಾಂತ್ ಸಾಂತ್ ಆನ್ ಆನಿ ಮರಿ ಮಾಯೆಚೋ ಮಾನ್ ಕರ್ನ್, ಸಾಂಗಾತಾಚ್ “ಧರ್ತರೆ ಮಾಯ್”( Mother Earth) — ಹಿಚೋಯ್ ಮಾನ್ ಕೆಲೋ. ಹೆಂ ಶೆರ್ಮಾಂವ್ ಕೊಂಕ್ಣೆಂತ್ ದಿಲ್ಲೊ ತರೀ, ಕೊಂಕ್ಣಿ ಕಳಿತ್ ನಾತಲ್ಲ್ಯಾಂಕ್ ಇಂಗ್ಲಿಷ್ ಪ್ರತಿ ದಿಲ್ಲಿ.
ಮಿಸಾ ಉಪ್ರಾಂತ್ ಇಗರ್ಜೆ ಸರ್ಶಿಲ್ಯಾ ಸಾಲಾಂತ್ ಸಾಂಗಾತಾ ಜೆವಣ್ ಆಸ್ಲ್ಲೆಂ. ಮಂಗ್ಳುರಿ ರಿವಾಜಿ ಪ್ರಮಾಣೆಂ ಮೋಗಾನ್ ಆನಿ ಜತ್ನೆನ್ ತಯಾರ್ ಕೆಲ್ಲೆಂ ಪಾರಂಪರಿಕ್ ಖಾಣ್ ಸರ್ವಾಂನಿ ವಾಂಟುನ್ ಘೆತ್ಲೆಂ. ಉಪ್ರಾಂತ್ ಮನೋರಂಜನಾಚೆಂ ಕಾರ್ಯೆಂ ಚಲ್ಲೆಂ. ಓಸ್ಕರ್ ರೊಡ್ರಿಗಸ್ ಹಾಣೆಂ ನಿರೂಪಕ್ ಜಾವ್ನ್ ಕಾರ್ಯೆಂ ಚಲವ್ನ್ ವ್ಹೆಲೆಂ. ಹಾವ್ಜಿ, ಪಂಗ್ಡಾ ಖೆಳ್ ಆನಿ ನಾಚ್ — ಹಿಂ ಸರ್ವಾಂಕ್ ಮೊಗಾಚಿಂ ಜಾಲಿಂ. ನೆದರ್ಲೆಂಡ್ಸ್ ಆಮ್ಚಿ ಕರ್ಮಭೂಮಿ. ಪುಣ್ ಮೋಂತಿ ಫೆಸ್ತಾ ದಿಸಾ ಆಮ್ಚಿ ಜಲ್ಮಾಭೂಮಿ ಆಮ್ಚ್ಯಾ ಕಾಳ್ಜಾಂತ್ ಜಿವಾಳ್ ಜಾತಾ. ಭಾಸ್, ಭರ್ವಸಾಂವ್ ಆನಿ ಏಕ್ವಟ್ — ಹಿಂ ತೀನ್ ಹ್ಯಾ ದಿಸಾ ಸಾಂಗಾತಾ ಆಸಲ್ಲಿಂ.
