ಕೊಂಕಣಿ ಭಾಸ್ ಆನಿ ಸಂಸ್ಕೃತಿ ಪ್ರತಿಷ್ಠಾನ ವಿಶ್ವಕೊಂಕಣಿ ಕೇಂದ್ರಾಂತ ಅಕ್ತೋಬರ್ 03 ವೆರ್ ಕನಕದಾಸಾಲೆ ಸಾಹಿತ್ಯ ಕೊಂಕಣಿಂತ: ವಿಚಾರಸಂಕಿರಣ ಆನಿ ಗೀತ ಗಾಯನ ಕಾರ್ಯಾವಳ ಉಗ್ತಾವಣ ಸುವಾಳೊ ಚಲ್ಲೆಂ. ಮುಖೇಲ ಸೊಯರೊ ಜಾವನು ಭಾಗಿ ಜಾಲ್ಲೆಲೆ ಕನ್ನಡಾಚೆ ನಾಮನೆಚೆ ಅನುವಾದಕ ಆನಿ ಕುವೆಂಪು ಭಾಷಾ ಭಾರತಿ ಪ್ರಾಧಿಕಾರಾಚೆ ಅಧ್ಯಕ್ಷ ಜಾವನು ಆಶಿಲೊ ಡಾ. ಪ್ರಧಾನ ಗುರುದತ್ತ್ ಹಾನ್ನಿ ದಿವೊ ಲಾವನು ಕಾರ್ಯಾವಳೀಚೆ ಉಗ್ತಾವಣ ಕೆಲೆಂ.
ವಿಶ್ವ ಕೊಂಕಣಿ ಕೇಂದ್ರಾಚೆ ಅಧ್ಯಕ್ಷ ಮಾನೆಸ್ತ್ ನಂದಗೋಪಾಲ ಶೆಣೈ ಹಾನ್ನಿ ಆಯಿಲೆ ಸೊಯರೆಂಕ ಸ್ವಾಗತ ಕರತಚಿ ಕೊಂಕಣಿಂತ ಪ್ರಗಟ ಜಾಲೆಲೆ ಕನಕದಾಸಾಲೊ ಸಾಹಿತ್ಯ ಕೊಂಕಣಿ ಭಾಷಿಕ ಲೋಕಾಂಕ ಪಾವೊವಚೆ ಚಾಂಗ ಉದ್ದೇಶ ದವೊರುನು ಕೊಂಕಣಿ ಭಾಸ ಆನಿ ಸಂಸ್ಕೃತಿ ಪ್ರತಿಷ್ಠಾನ, ವಿಶ್ವ ಕೊಂಕಣಿ ಕೇಂದ್ರಾ ತರಪೇನ ದೋನಿ ದಿವಸಾಚೆ ಕಾರ್ಯಾವಳ್ ಆಯೋಜನ ಕೆಲಾಂ ಅಶಿಂ ಸಾಂಗಲೆಂ. ಬೆಂಗಳೂರು ಸಂತ ಕವಿ ಕನಕದಾಸ ಆನಿ ತತ್ವಪದಕಾರ ಅಧ್ಯಯನ ಕೇಂದ್ರಚೆ ಅಧ್ಯಕ್ಷ ಮಾನೆಸ್ತ್ ಕಾ.ತ. ಚಿಕ್ಕಣ್ಣ ಹಾನಿ ಧಾಡುನ ದಿಲೆಲೆ ಶುಭ ಸಂದೇಶ ಆಯಿಲೆಂ ಸೊಯೆರೆಂಕ ವಾಜುನ ಸಾಂಗಲೆಂ.
ಮಂಗಳೂರು ವಿಶ್ವವಿದ್ಯಾಲಯಚೆ ಪ್ರಾಂಶುಪಾಲ ಡಾ. ಜಯವಂತ ನಾಯಕ್ ಹಾನ್ನಿ ಕನಕದಾಸ ಕಾವ್ಯಂಚೆ ತೀನಿ ಸಂಪುಟ ಪುಸ್ತಕ ಲೋಕಾರ್ಪಣ ಕೆಲೆಂ. ಸಂತ ಅಲೋಷಿಯಸ್ ಕಾಲೇಜ್ ಕೊಂಕಣಿ ಸಂಸ್ಥೆಚಾ ಫಾದರ್ ಪ್ರಶಾಂತ ಮಾಡ್ತ ಹಾನ್ನಿ ಉಪಸ್ಥಿತ ಆಸುನು ಕಾರ್ಯವಳೀಕ ಶುಭ ಸಾಂಗಲೆಂ. ಹ್ಯಾ ಸಂಧರ್ಭಾರ ಮಂಗಳೂರ್ ಸಾಧನಾ ಬಳಗ ಆನಿ ನಾಟ್ಯ ಧಾರಾ ಬಾಯಲಾಂಗೆಲೆ ಪಂಗಡಾ ಥಾವನ ‘ಕನಕದಾಸಾಲೆ ಕೀರ್ತನ ನೃತ್ಯ್ ಭಜನ’ ಆನಿ ಉಪೇಂದ್ರ ಮಲ್ಯ ಪಂಗಡಾ ಥಾವನ ‘ಶ್ರೀನಿವಾಸ ಕಲ್ಯಾಣ’ ಗೀತ ನಾಟಕ ಪ್ರದರ್ಶನ ಜನಮೊಗಾಳ್ ಜಾಲೆಂ.
ಕನಕದಾಸಾಲೆ ಕೀರ್ತನ ವಿಚಾರ ಸಂಕಿರಣಾಂತು ಕನಕದಾಸ ಸಾಹಿತ್ಯ ಕೊಂಕಣಿಕ ಅನುವಾದ ಕೆಲೆಲೆ ಮಾನೆಸ್ತಾಂ ಥಾವನ ಕನಕದಾಸ ಸಾಹಿತ್ಯ ಬದ್ದಲ ಸಂಶೋಧನಾತ್ಮಕ ಪ್ರಬಂಧ ಮಂಡನಾ ವಿಚಾರಸಂಕಿರಣ ಚಲ್ಲೆ. ದೊ. ಗೀತಾ ಶೆಣೈ, ದೊ. ಬಿ ದೇವದಾಸ ಪೈ, ದೊ. ಸಂಧ್ಯಾ ನಾಯಕ್, ದೊ. ಶೈಲಜಾ ಮಂಗಳೂರುಕಾರ, ಮಾನೆಸ್ತಿಣ್ ಶಕುಂತಳಾ ಆರ್ ಕಿಣಿ, ಮಾನೆಸ್ತಿಣ್ ಜಯಶ್ರೀ ಶೆಣೈ, ಮಾನೆಸ್ತ ಮಧುಕರ ಮಲ್ಯ, ದೊ. ಅರವಿಂದ ಶ್ಯಾನಭಾಗ್ ಆನಿ ಮಾನೆಸ್ತಿಣ್ ಸ್ಮಿತಾ ಶೆಣೈ ಸಾಹಿತ್ಯ ತಜ್ಞ ಭಾಗಿ ಜಾವನು ತಾಂಗೆಲೆ ವಿಚಾರ ಮಂಡನ ಚಲ್ಲೆಂ.
ಕನಕದಾಸಾಲೆ ಕೀರ್ತನಾಚೆ ಗೀತ-ಗಾಯನ ಕಾರ್ಯಾವಳೀಂತ ಕನಕದಾಸಾಲೆ ಕೊಂಕಣಿ ಅನುವಾದಿತ ಪದ ನಾಮನೆಚೆ ಸಂಗೀತ ತಜ್ಞ ಜಾಲೆಲೆ ಪುತ್ತೂರು ನರಸಿಂಹ ನಾಯಕ್, ವಿದ್ವಾನ್ ಯೋಗೀಶ ಕಿಣಿ, ಮಾನೆಸ್ತಿಣ್ ಚೈತ್ರಾ ಪೈ, ಮಾನೆಸ್ತ್ ರವೀಂದ್ರ ಪ್ರಭು, ಮಾನೆಸ್ತ್ ಮುರಳೀಧರ ಕಾಮತ್, ಮಾನೆಸ್ತಿಣ್ ವರ್ಷಾ ಪ್ರಭು ಆನಿ ಮಾನೆಸ್ತ್ ಪುತ್ತೂರು ಪಾಂಡುರಂಗ ನಾಯಕ ಹಾನ್ನಿ ತಾಂಗೆಲೆ ಮೊವಾಳ್ ರಾಗ ಸ್ವರಾಂನಿ ಪದ ಸಾಂಗತಚಿ ಲೋಕಾಂಗೆಲೆ ಮನ ಜಿಕ್ವಲೆಂ. ಸರ್ವ ಸಂಗೀತಗಾರಾಂಕ ಆನಿ ಅನುವಾದಕಾಂಕ ಹ್ಯಾ ಸಂದರ್ಭಾರ ಶಾಳ್ ಪಾಂಗುರುನು ಯಾದಸ್ತಿಕಾ ದೀವನು ಮಾನ ಕೆಲೆಂ.
ಹ್ಯಾ ಸಂದರ್ಭಾರ ವಿಶ್ವ ಕೊಂಕಣಿ ಕೇಂದ್ರ ಅಧ್ಯಕ್ಷ ಮಾನೆಸ್ತ್ ಸಿ ಎ ನಂದಗೋಪಾಲ್ ಶೆಣೈ ಹಾನ್ನಿ ಅಖಿಲ ಭಾರತ ಕೊಂಕಣಿ ಪರಿಷದ್ ಚೆ 34 ವೇ ಸಮ್ಮೇಳನಾಚೆ ಅಧ್ಯಕ್ಷ ಪದಾ ಖಾತೀರ್‍ ವಿಂಚುನ ಆಯಿಲ್ಲೆಂ ಸಂದೇಶ ಸಭೆಂತ ಕೇಂದ್ರಚೆ ಟ್ರಸ್ಟಿ ಮೆಲ್ವಿನ್ ರೊಡ್ರಿಗಸ್ ಹಾನ್ನಿ ಸಾಂಗಲೆ. ಕೇಂದ್ರಾಚೆ ವಿಶ್ವಸ್ಥ ಮಂಡಳ ಸಾಂಗಾತಾ ಸೇರವನು ತಾಂಕಾ ಅಭಿನಂದನ ಕರನು ಮಾನ ದಿಲೆಂ. ಉಪಾಧ್ಯಕ್ಷ ವಿಲಿಯಂ ಡಿಸೋಜಾ, ರಮೇಶ್ ಡಿ ನಾಯಕ್, ಟ್ರಸ್ಟಿ ಗಿಲ್ಬರ್ಟ್ ಡಿಸೋಜಾ, ಖಜಾಂಚಿ ಬಿ ಆರ್ ಭಟ್, ಡಾ. ಬಿ ದೇವದಾಸ ಪೈ, ಮುಖೇಲ ಸಂಪಾದಕಿ ದೊ.ಗೀತಾ ಶೆಣೈ ಆನಿ ಹೆಂ ಸಗಳೇ ಕಾರ್ಯಾವಳೀಚೆ ಪ್ರಾಯೋಜಕ ಜಾಲೆಲೆ ‘ವರ್ಧನಿ’ ಚಾ ಮಾನೆಸ್ತಿಣ್ ಉಷಾ ನಂದಗೋಪಾಲ ಶೆಣೈ ಹಾನ್ನಿ ಉಪಸ್ಥಿತ ಆಶಿಲಿಂಚಿ.
ಮಾನೆಸ್ತ್ ಬಾಲಚಂದ್ರ ಪ್ರಭು ಹಾನ್ನಿ ಕನಕದಾಸಾಲೆ ಕೀರ್ತನಾ ಕೊಂಕಣಿಂತ ಕೆಲೆಲೆ ರಾಗ ಸಂಯೋಜನ ಕರನು ಪ್ರಾರ್ಥನಾ ಗೀತ ಗಾಯಲೆಂ. ಮಾನೆಸ್ತಿಣ್ ಸುಚಿತ್ರಾ ಶೆಣೈ, ಸ್ಮಿತಾ ಶೆಣೈ ಆನಿ ದೊ. ವಿಜಯಲಕ್ಷ್ಮೀ ನಾಯಕ ಹಾನ್ನಿ ಕಾರ್ಯವಳೀಚೆ ಸತ್ರ ಸಂಚಲನ ಕೆಲೆಂ. ಸಮಾರಂಭಾಂತ ಹೆರ ಮಾನೆಸ್ತ ಲೋಕ ಉಪಸ್ಥಿತ ಆಸುನು ದೋನಿ ದಿವಸಾಚೆ ಕಾರ್ಯಾವಳೀ ಪೊಳೊವನು ಆನಂದ ಪಾವಲಿಂತಿ.
