ದೆಶಾಚ್ಯಾ ಸರ್ವೋಚ್ಚ್ ನಿತಿಚ್ಯಾ ಸಿಯಾಸಣಾರ್ ಬಸಲಲೊ ಮನಿಸ್ , ನೀತ್ ವಿಚಾರುಂಕ್ ಗೆಲ್ಲ್ಯಾ ತರ್ನಾಟ್ಯಾಕ್ ‘ಜರ್ಲೊ’ ಮ್ಹಣ್ತಾ ಆನಿ ಏಕ್ ಮನಿಸ್ ಜಾವ್ನ್ ತುಜೆಂ ರಗತ್ ಸಳ್ಸಾಳಾನಾ ತರ್, ತುಂ ಕಸಲೊ ಮನಿಸ್ ?
ಹೆಂ ಬರಯ್ತಾನಾ ಕವಿ ವಿಲ್ಸನ್ ಕಟೀಲಾನ್ ಚಲಂವ್ಚ್ಯಾ ‘ಪೊಯೆಟಿಕ್ಸ್’ ಪಂಗ್ಡಾಂತ್ ಏಕ್ ಸವಾಲ್ ವಿಚಾರ್ಲಾಂ “ಕವಿಂಚ್ಯಾ ಹ್ಯಾ ಗ್ರೂಪಾಂತ್, ಪಯ್ಲೆಂಚೆಂ ಪರಿಂ ಅತಾಂ ಕಾಂಯ್ ಕವಿತಾ/ ಜುಗಲ್ಬಂಧಿ ದಿಸಾನಾಂತ್. ದಿಸಾಕ್ ಎಕ್ಲ್ಯಾ ಲೆಕಾರ್ ಬರಯ್ಲ್ಯಾರೀ ಪಾವ್ತಾ. ವಾಡ್ಯಾ ಜಮಾತ್ ಮಯ್ನ್ಯಾಂತ್ ಎಕಾ ಘರಾ ಅಸ್ಲ್ಲೆಬರಿಂ.😃” ಸವಾಲಾ ಅಕೇರಿಕ್ ಹಾಸ್ಚಿ ಇಮೋಜಿ ಕಿತ್ಯಾಕ್ ಚಿಡ್ಕಾಯ್ಲ್ಯಾ ಕಳಾನಾ; ಮೆಲೋನಿನ್ ಇಗರ್ಜೊ ದಾಕಯ್ತಾನಾ ಮೋದಿನ್ ‘ಹ್ಹಿಹ್ಹಿಹ್ಹಿ’ ಮ್ಹಣ್ ಹಾಸ್ಚೆಪರಿಂ.
ಆಜ್ ದೆಶಾಚಿ ಪರಿಸ್ಥಿತಿ ಆನಿ ಕವಿಂಚೆಂ ಮೌನ್ – ಹಿ ಹಾಸೊನ್ ಕಾಡ್ಚಿ ಗಜಾಲ್ ಖಂಡಿತ್ ನಯ್.
ವರ್ಸಾಂ ವರ್ಸಾಂ ಶಿಕೊನ್ ಭುರ್ಗಿಂ ನೀಟ್ ಪರೀಕ್ಷಾ ಬರಯ್ತಾತ್ ಆನಿ ಘಡ್ಯೆ ಭಿತರ್ ತಾಣಿ ಬರಯಿಲ್ಲಿ ಪರೀಕ್ಷಾಚ್ ‘ಅಸಿಂಧು ಜಾತಾ ಆನಿ ದೆದೆಸ್ಪೊರ್ ಭುರ್ಗಿಂ ಆತ್ಮಹತ್ಯಾ ಕರುನ್ ಘೆತಾತ್ ಆನಿ ಆಮ್ಕಾಂ ಕಿತೆಂಚ್ ಭೊಗಾನಾ ?ಜೀವ್ ಹೊಗ್ಡಾಯಿಲ್ಲ್ಯಾ ಭುರ್ಗ್ಯಾಂ ಪಯ್ಕಿ ‘ಆಮ್ಚಿಂ’ ನಾಂತ್ ದೆಕುನ್, ಸಮಾದಾನ್ ?
ದೆಶಾಚ್ಯಾ ಬಾರ್ ಕೌನ್ಸಿಲಾಚೊ ಅಧ್ಯಕ್ಷ್ ಮ್ಹಣ್ತಾ ‘ತೀಸ್ ತೆ ಪಾಂತ್ತೀಸ್ ಠಕ್ಕೆ ನಕ್ಲಿ ವಕೀಲ್ ಆಸಾತ್.’ ಸನದ್ ನಾತ್ಲೆಲ್ಯಾ ವಕೀಲಾಂಕ್ ಬಾರ್ ಕೌನ್ಸಿಲಾಚೆಂ ಸಾಂದೆಪಣ್ ದಿಲಾಂ ಜಾಲ್ಯಾರ್, ಚುಕಿದಾರ್ ಕೋಣ್? ಹೆಂ ಸಗ್ಳೆಂ ಜಾತಾನಾ, ಬಾರ್ ಕೌನ್ಸಿಲಾಚೊ ಅಧ್ಯಕ್ಷ್ ಕಿತೆಂ ನಿದೊನ್ ಪಡ್ಲ್ಲೊ ?
ಪರ್ಜೆರಾಜಾಂತ್ ತೀನ್ ಪ್ರಮುಕ್ ಖಾಂಭೆ ಆಸೊನ್, ನ್ಯಾಯ್ಪಾಲಿಕಾ ಸರ್ವಾಂ ಪ್ರಾಸ್ ವಯ್ಲ್ಯಾ ಸ್ಥರಾರ್ ಆಸಾ. ರಾಜ್ನೇತಾನ್ ಚೂಕ್ ಕೆಲ್ಯಾರ್, ಕಾನೂನ್ ಚುಕಿಚೆಂ ಜಾಲ್ಯಾರ್ ಸಂವಿಧಾನ್ ಪೀಠಾಕ್ ತೆಂ ಸಾರ್ಕೆಂ ಕರ್ಚೊ ಅಧಿಕಾರ್ ಆಸಾ. ಅಸಲ್ಯಾ ನ್ಯಾಯ್ಪಾಲಿಕೆಂತ್ ನಿತಿದಾರ್ ಜಾಯ್ಜೆ ಜಾಲ್ಯಾರ್ ಕೊಲಿಜಿಯಂ ವೆವಸ್ತೆ ಭಿತರ್ ಬಾಪುಯ್, ಬಾಪ್ಪು, ಮಾವ್ಶಿ ಜಾಯ್. ನಾ ಜಾಲ್ಯಾರ್ ನಾ. ಕಿತ್ಲೊ ಬುದ್ವಂತ್ ಕಾನುನ್ ತಜ್ಞ್ ಜಾಲ್ಯಾರೀ ಬಾಪ್ಪು – ಮಾವ್ಶಿ ನಾಸ್ತಾನಾ ತಾಕಾ ಸರ್ವೋಚ್ಚ್ ನ್ಯಾಯ್ಪಾಲಿಕೆಂತ್ ನಿತಿದಾರ್ ಜಾಂವ್ಚ್ಯಾಕ್ ಕಶ್ಟ್.
ಶ್ರೀಲಂಕಾಂತ್, ನೇಪಾಳಾಂತ್, ಬಾಂಗ್ಲಾಂತ್ ‘ಜೆನ್ ಜಿ’ ಉಟ್ಲೆ, ಸತ್ತಾ ‘ಪಲಟ್’ ಜಾಲಿ. ಬದ್ಲಾವಣ್ ಆಯ್ಲಿ. ಭಾರತಾಂತ್ ‘ಜೆನ್ ಜಿ’ ಧರ್ಮ್ – ಜಾತಿಚೆಂ ಆಫೀಮ್ ಮಾರ್ನ್ ನಿದೊನ್ ಪಡ್ಲ್ಲೆ. ಹಾಂಕಾ ಸವೋಚ್ಚ್ ನಿತಿಚ್ಯಾ ಸಿಯಾಸಣಾರ್ ಬಸ್ಲೆಲ್ಯಾನ್ ಥಾಪಡ್ ಮಾರಿಜೆ ಪಡ್ಲೆಂ. ಹೆಂ ಥಾಪಡ್ ಫಕತ್, ಸರ್ವೋಚ್ಚ್ ನ್ಯಾಯ್ಪಾಲಿಕೆಂತ್ ‘ಮಾಲ್ಘಡೊ ವಕೀಲ್ ಕಶೆಂ ಜಾಂವ್ಚೆಂ?’ ಮ್ಹಣ್ ವಿಚಾರ್ನ್ ಸರ್ವಜಣಿಕ್ ಹಿತಾಸಕ್ತೆಚಿ ಅರ್ಜಿ ದಾಕಲ್ ಕೆಲ್ಲ್ಯಾ ವಕೀಲಾಕ್ ಮಾತ್ ಮಾರ್ಲಲೆಂ ನಯ್, ತರುಣ್ ಪತ್ರ್ಕರ್ತ್, ಮಾಹೆತಿ ಹಕ್ ಕಾರ್ಯಕರ್ತ್ ಆನಿ ಉಂಚ್ಲೆಂ ಶಿಕಪ್ ಜೊಡುನ್ ಫಾವೊತೆಂ ಕಾಮ್ ಮೆಳಾನಾಸ್ತಾನಾ ಲ್ಹಾನ್ – ವ್ಹಡ್ ನವ್ಕರಿ ಕರ್ಚ್ಯಾ ಹರ್ ತರ್ನಾಟ್ಯಾಚಾ ಕಾನ್ಸುಲಾಕ್ ಮಾರ್ಲ್ಲೆಂ ಥಾಪಡ್. ಹಾಚಿ ದೂಕ್ ತರ್ನಾಟ್ಯಾ ಭುರ್ಗ್ಯಾಂಚಿಂ ಆವಯ್ – ಬಾಪುಯ್ ಜಾಲ್ಲ್ಯಾಂಕ್ ಜಾಯ್ಜೆ. ಜರಿ ಆತಾಂಯ್ ತುಮಿ ನಿದೆಂತ್ಲೆಂ ಉಟಾನಾಂತ್ ತರ್, ಏಕ್ ದೀಸ್ ಗೊಬೊರ್ ಜಾವ್ನ್ ವೆತೆಲ್ಯಾತ್ ನಕ್ಕೀಚ್.
ಜರ್ಲೆ ಘಾಣ್ ಕರ್ತಾತ್, ಧೊಸ್ತಾತ್ … ಮ್ಹಳ್ಳೆ ವಿಶ್ಯಾಂತ್ ತಾಳೊ ಪಿಂಜೂನ್ ಉಲಯ್ತಲೆ, ಕಿತ್ಯಾಕ್ ಜರ್ಲೆ ಜಲ್ಮೊಂಚ್ಯಾ ಗಟಾರಾಂ ವಿಶ್ಯಾಂತ್ ಉಲಯ್ನಾಂತ್ ?
ಜರ್ಲ್ಯಾಂಚೇರ್ ತುಮ್ಚ್ಯಾ ಕವಿತೆಂಕ್ ಯೆವ್ಕಾರ್, ಹಾಂಗಾಸರ್ ಜರ್ಲ್ಯಾ ಕವಿತೆಂಚಿಂ ಶಿಂಕಳ್ ಸುರು ಜಾತಾ…. ಕಿಟಾಳಾರ್ ಜರ್ಲ್ಯಾ ಕವಿತೆಂಚ್ಯಾ ಶಿಂಕ್ಳೆಕ್ ಚಾಲನ್ ದಿಲ್ಲ್ಯಾ, ಆಮ್ಚ್ಯಾ ಕಾಳಾಚೊ ಸಂವೇದನಾಶೀಳ್ ಬರವ್ಪಿ ಕಿಶೂ, ಬಾರ್ಕುರ್ ಹಾಕಾ ದಿನ್ವಾಸ್. ಹ್ಯಾ ವಿಶಯಾಚೇರ್ ಬರಯಿಲ್ಲ್ಯೊ ತುಮ್ಚೊ ಕವಿತಾ editor@kittall.com ಹಾಂಗಾಸರ್ ಧಾಡುನ್ ದಿಯಾತ್. ಫಾವೊತೆ ವಿಂಚುನ್ ಫಾಯ್ಸ್ ಕರ್ತೆಲ್ಯಾಂವ್.
■ ಎಚ್ಚೆಮ್
ಕೋಚಿಂಗ್ ಸೆಂಟರಾಂಚ್ಯಾ ವೊಣ್ದಿ ಫುಟೊಳ್ಯಾನಿಂ,
ಅಮ್ಚೆಂ ಧಾಂವಪ್-
ಮಿಶ್ಯಾಂನಿಂ ಚಾಕ್ತಾಂವ್ ರೂಚ್
ಆಮ್ಶೆಲ್ಲ್ಯಾ ಮ್ಹೊಂವಾಬರಿ ವೊಮ್ತಾಲ್ಲ್ಯಾ
ಫುಡಾರಾಂಚಿ,
ಸರ್ಕಾರಿ ಸೂಟ್ಕೆಸಿಂಥಾವ್ನ್
ಪಾಜರ್ಚಿ.
ಜರ್ಲೆ, ಲೊಂಕ್ಡಾಕಾಳ್ಜಾಂಚೆಂ.
ಜಡ್ಜಾಚ್ಯಾ ಮೊಚ್ಯಾಂಪಂದಾ ಧರ್ನಿಸಮಾಚೆ.
ಏಕ್ಪಾವ್ಟಿಂ ಮಸ್ತಿಲ್ಯಾರ್, ಹಜ್ರಾನಿಂ ವಾಡ್ಚೆ.
ಭಾಡ್ಯಾಚಿಂ ಕರ್ಲಾಂ ಬ್ಲೇಜರಾಂಬರಿ,
ತಾಂಚೆರ್ ಪೊಕೊಳ್ ‘ಸ್ಕಿಲ್ ಇಂಡಿಯಾ’ ಚೊ ವೋಪ್-
ತುಟ್ತ್ಯಾ ಸಪ್ಣಾಂಚೆರ್
ಪರ್ಜಳ್ತೊ ವಿಕಾಳ್ ಲೇಪ್.
ಆಮ್ಚಿಂ ಫೆಸ್ತಾಂ ‘ಇಂಟರ್ವ್ಯೂ’ ತುಕ್ಡ್ಯಾಂರ್,
ತಾಂತ್ಯಾ ದವರ್ತಾಂವ್ ‘ನೀಟ್’ ದೆಸ್ವಾಟಾಂರ್
ಲಾಖಾನಿಂ ಉಟ್ತಾಂವ್ ಮವ್ನ್ ಥವ್ಯಾರ್
ಮಿಳ್ಮಿಳ್ಚ್ಯಾ ಪರ್ದ್ಯಾಪಂದಾ.
ವಿಚಿತ್ರ್ ಬಚಾವಿ:
ಖಂಯ್ಸರೀ ಚಲಾನಾಂವ್,
ಪೂಣ್ ಖಂಡಿತ್ ಪಾವ್ತಲ್ಯಾಂವ್-
ಲ್ಹಾಲ್ಹಾನ್ಶ್ಯಾ ಪಾಂಯಾಂನಿಂ
ಚಲುನ್ ಆಜೂನಿ
ದಿವೆ ಪಾಲ್ವುಂಕ್ ಜಾತಾನಾ.
■ ಕಿಶೂ, ಬಾರ್ಕುರ್.
1 comment
Well written Kishoo…
ಅಭಿನಂದನ್ ತುಕಾ,